Yoa 6

Yesũ Aivũnĩthya Ĩkomano ĩnene ya Andũ

(Mat 14.13-21; Mk 6.30-44; Lk 9.10-17)

1Ĩtina wa ũu, Yesũ nĩwainganĩisye ngalĩko ĩla ĩngĩ ya Ĩia ya Kalilii, yĩla noyo yĩtawa Timbeliasi. 2Ĩkomano ĩnene ya andũ nĩyamumie ĩtina, nũndũ andũ asu nĩmoonete syama ila weekaa akavosya andũ ala maĩ awau. 3Yesũ nĩwaendie kĩĩmanĩ ĩũlũ ekala nthĩ vo e na amanyĩw'a make. 4Mboka ya Vasaka ya Ayuti yaĩ vakuvĩ. 5Yĩla Yesũ wookĩlilye metho oona ĩkomano ĩnene ya andũ yũkĩte vala ũĩ, nĩwakũlilye Vilivũ atĩĩ, “Tũtonya kũthooa mĩkate va andũ aa onthe makaya?” 6Amũkũlilye ũu aimũtata, nũndũ we mwene nĩweesĩ ũndũ ũkwĩsa kwĩka.

7Vilivũ nĩwamũsũngĩie amwĩa atĩĩ, “Ndinalĩ#6.7 Ndinalĩ: Ndinalĩ ĩmwe nĩ yo mũthũkũmi wa kĩvalũa waĩvawa ĩtina wa kũthũkũma mũthenya mũima maana elĩ iitonya kũthooa mĩkate yĩanĩe kĩla mũndũ akakwata kalungu.”

8Mũmanyĩw'a ũngĩ wa Yesũ wĩtawa Endelea, mwana-a-inyia wa Simioni Vetelo nĩwaisye atĩĩ, 9“Vaa ve kamwana ke na mĩkate ĩtano ya nganũ ĩla yĩtawa mbaale na makũyũ elĩ, ĩndĩ kĩu nĩ kyaũ kwa andũ maingĩvĩte ũũ?”

10Yesũ nĩweeie amanyĩw'a make atĩĩ, “Ĩkalyai andũ nthĩ.” Vandũ vau vaĩ nyeki mbingĩ mũno, na kwoou andũ onthe nĩmekalile nthĩ; ũtalo wa aũme waĩ ta ngili itano. 11Nĩvo ĩndĩ Yesũ woosie ĩla mĩkate, atũngĩa Ngai mũvea, na asya nĩyĩaĩwe andũ onthe ala mailyĩ nthĩ. Nĩweekanie na makũyũ o ũu, na andũ onthe maya ũndũ mũndũ ũkwenda. 12Mamina kũvũna, Yesũ nĩweeie amanyĩw'a make atĩĩ, “Ũmbany'ai ilungu syonthe ila syatiala wĩthĩe vai kĩmwe kĩnaanangĩka mana.” 13Kwoou nĩmasyũmbanisye mausũsya ikavũ ĩkũmi na ilĩ sya ilungu sya ĩla mĩkate ĩtano ya mbaale, ila syatialilw'e nĩ andũ ala maĩe.

14Yĩla andũ moonie kyama kĩu Yesũ weeka nĩmaisye atĩĩ, “Kwa w'o ũũ nĩwe mwathani ũla wũkĩte kũũ ĩũlũ wa nthĩ.” 15Yesũ nĩwamanyie kana andũ meenda kũka mamwose na vinya mamũtw'e mũsumbĩ, na kwoou auma vau ĩngĩ athi iĩmanĩ e weka.

Yesũ Akinyĩlĩte Ĩianĩ ĩũlũ

(Mat 14.22-33; Mk 6.45-52)

16Kwavika ĩa mawĩoo, amanyĩw'a ma Yesũ nĩmatheeie mathi ĩianĩ, 17na malika ĩsiwanĩ mainganĩsye mathi Kavelinaũmu. Kwaĩ kũnatuka na Yesũ ndaĩ anamba kũvika vala maĩ. 18Kĩseve kĩnene nĩkyauutanaa na kwoou kĩw'ũ kyambĩĩa kũkĩlany'a. 19Amanyĩw'a mathi ta kĩlomita itano kana thanthatũ, nĩmamwonie Yesũ akilĩlye kũvika ĩsiwanĩ akinyĩlĩte ĩianĩ ĩũlũ. Nĩmakwatiwe nĩ w'ĩa mwingĩ, 20ĩndĩ Yesũ amea atĩĩ, “Ninyie, ekai kũkĩa!” 21Nĩmatanie mũno kũmũthokya Yesũ ĩsiwanĩ, na vau kwa vau ĩsiwa yavika ũtee wa ĩia ndũanĩ ĩla maendete.

Andũ Maimũmantha Yesũ

22Ũnĩ ũsu, ĩkomano ya andũ ala matiĩtwe mũinganĩsyo wa ĩia nĩmamanyie kana vau vaĩ o ĩsiwa yĩmwe na Yesũ ndaalika ĩsiwanĩ vamwe na amanyĩw'a make, ĩndĩ amanyĩw'a maendete me oka. 23Masiwa angĩ kuma Timbeliasi nĩmavikie vakuvĩ na vala andũ manaĩĩe ĩla mĩkate, ĩtina wa Mwĩai Yesũ kũtũngĩa Ngai mũvea. 24Nĩvo ĩndĩ andũ asu, mamina kũmanya kana Yesũ na amanyĩw'a make mai kũu, malikile masiwanĩ asu mathi Kavelinaũmu makamũmanthe Yesũ.

Mũkate ũla Ũetae Thayũ

25Yĩla andũ asu mamwonie Yesũ na kũu ngalĩko ĩla ĩngĩ ya ĩia nĩmamũkũlilye atĩĩ, “Mũmanyĩsya, wũkie kũũ ĩndĩĩ?”

26Yesũ amasũngĩa amea atĩĩ, “Nĩmũtavya w'o, mũiũmantha nĩkwĩthĩwa nĩmũnoonie syama, ĩndĩ nũndũ mũnaĩe mĩkate mwavũna. 27Mũikethĩny'e mũimantha lĩu ũla wanangĩkaa; thĩnĩkai mũimantha lĩu ũla ũetae thayũ ũtathela. Lĩu ũsu nĩw'o Mwana wa Mũndũ wĩmũnenga, nũndũ Ngai Asa nũmũnengete ũkũmũ wa kwĩka ũu.”

28Nĩvo ĩndĩ andũ asu mamũkũlilye atĩĩ, “Twaĩlĩte kwĩka ata nĩ kana twĩthĩwe tũyĩka maũndũ ala Ngai wendaa twĩke?”

29Yesũ amasũngĩa amea atĩĩ, “Ũndũ ũla Ngai wendaa mwĩke nĩ kũmũĩkĩĩa ũla ũtũmĩtwe nĩwe.”

30Namo mamwĩa atĩĩ, “Na yu wĩĩka kyama kĩva nĩ kana tũkyone tũkũĩkĩĩe? Wĩĩka ũndũ mwaũ? 31#Kuma 16.4,15; Sav 78.24 Aaũmae maitũ nĩmaĩe lĩu wĩtawa mana me weũnĩ, o tondũ kũandĩkĩtwe Maandĩkonĩ Matheu, ‘Nĩwamanengie mũkate kuma ĩtunĩ maye.’ ”

32Yesũ amea atĩĩ, “Nĩmũtavya w'o, Mwose ti we wamũnengie mũkate kuma ĩtunĩ; Ĩthe wakwa nĩwe ũmũnengae mũkate ũla wa w'o kuma ĩtunĩ. 33Nũndũ mũkate wa Ngai nĩ ũla watheeie kuma ĩtunĩ na ũnengae nthĩ thayũ.”

34Namo mamwĩa atĩĩ, “Mwĩai tũnengae mũkate ũsu mavinda onthe.”

35Yesũ amea atĩĩ, “Nyie ninyie mũkate ũsu ũetae thayũ. Mũndũ ũla wũkaa kwakwa ndakew'a nzaa, na ũla ũndĩkĩĩaa ndakew'a waũni o na vanini. 36Ĩndĩ o tondũ nĩmũtavisye, o na kau nĩmwambona, mũikũndĩkĩĩa. 37Onthe ala Asa ũnengae nĩmokaa kwakwa, na mũndũ o na wĩva ũla wũkaa kwakwa, nyie ndikamũlũngya, 38nũndũ ndyaauma ĩtunĩ nũke kwĩka kwenda kwakwa; nookie kwĩka kwenda kwa ũla ũndũmĩte. 39Nakw'o kwenda kwa ũsu ũndũmĩte nĩkw'o kũũ: Ndikasye mũndũ o na ũmwe wa ala ũnengete, ĩndĩ nĩmathayũũkya onthe mũthenyanĩ wa mũminũkĩlyo. 40Ĩthe wakwa endaa mũndũ o na wĩva ũla ũmũmanyaa Mwana na ũmũĩkĩĩaa, ethĩwe na thayũ ũtathela. Nĩvo ĩndĩ nakwa ngamũthayũũkya mũthenyanĩ wa mũminũkĩlyo.”

41Ayuti nĩmambĩĩie kũnyungunyĩsya nũndũ wa kwĩthĩwa Yesũ aisye, “Nyie ninyie mũkate ũla watheeie kuma ĩtunĩ.” 42Nĩmakũlanilye atĩĩ, “Ũũ tyo Yesũ mwana wa Yosevu? Ĩthe na nyinyia no tũmesĩ. Kwoou atonya ata kwasya kana atheeie kuma ĩtunĩ?”

43Yesũ amasũngĩa amea atĩĩ, “Ekai kũnyungunyĩsya katĩ wenyu. 44Vai mũndũ ũtonya kũka kwakwa Asa ũla ũndũmĩte atamũetete, nakwa ngamũthayũũkya mũthenyanĩ wa mũminũkĩlyo. 45#Ĩsa 54.13 Ĩvukunĩ ya athani nĩkũandĩkĩtwe, ‘Makamanyĩw'a onthe nĩ Ngai.’ Kwoou mũndũ o na wĩva ũla wĩthukĩĩasya Asa, na kwĩmanyĩsya kuma kwake nĩwũkaa kwakwa. 46Kũu ti kwasya kana ve mũndũ waamwona Asa eka o ũla umĩte kwa Ngai; ũsu nowe wamwonie Asa. 47Nĩmũtavya w'o, mũndũ ũla ũndĩkĩĩaa e na thayũ ũtathela. 48Nyie ninyie mũkate ũla ũetae thayũ. 49Aaũmae menyu nĩmaĩe lĩu wĩtawa mana me weũnĩ, ĩndĩ nĩmakwie. 50Ĩndĩ vaa ve mũkate ũla ũtheeaa kuma ĩtunĩ, ũla mũndũ ũtonya kũya na akalea kũkw'a. 51Ninyie mũkate ũla ũetae thayũ, ũla watheeie kuma ĩtunĩ. Mũndũ o na wĩva aya mũkate ũsu akeethĩwa thayũ tene na tene, naw'o mũkate ũla nyie nĩnengane kwondũ wa thayũ wa nthĩ nĩ mwĩĩ wakwa.”

52Ayuti nĩmambĩĩie kũteta me oka mayasya atĩĩ, “Kũtonyeka ata mũndũ ũũ atũnenge mwĩĩ wake tũye?”

53Kwoou Yesũ amea atĩĩ, “Nĩmũtavya w'o, mwalea kũya mwĩĩ wa Mwana wa Mũndũ na kũnyw'a nthakame yake, mũikethĩwa na thayũ nthĩnĩ wenyu. 54Mũndũ ũla ũĩsaa mwĩĩ wakwa na kũnyw'a nthakame yakwa, e na thayũ ũtathela, nakwa ngamũthayũũkya mũthenyanĩ wa mũminũkĩlyo. 55Nũndũ mwĩĩ wakwa nĩ lĩu wa w'o, na nthakame yakwa nĩ kyaũnyw'a kwa w'o. 56Mũndũ ũla ũĩsaa mwĩĩ wakwa na kũnyw'a nthakame yakwa, atwĩe nthĩnĩ wakwa nakwa nthĩnĩ wake. 57O tondũ Asa ũla wĩ thayũ ũndũmĩte na nyie ndwĩe thayũ nũndũ wake, now'o o nake mũndũ ũla wĩndya wĩtũa thayũ nũndũ wakwa. 58Kwoou ũũ nĩw'o mũkate ũla watheeie kuma ĩtunĩ. Ndũilyĩ ta mana ĩla aaũmae menyu maĩe na mesa kũkw'a; mũndũ ũla ũĩsaa mũkate ũũ akeethĩwa thayũ tene na tene.”

59Yesũ aneenie maũndũ asu aimanyĩsya e Kavelinaũmu nyũmbanĩ ya Ayuti ya kũthaithĩa na kũmbanĩa.

Ndeto sya Thayũ Ũtathela

60Aingĩ ma amanyĩw'a ma Yesũ meew'a ndeto isu nĩmaisye atĩĩ, “Ũũ nĩ ũmanyĩsyo mũmũ mũno; nũũ ũla ũtonya kwĩtĩkĩlana naw'o?”

61Yesũ ateũtavw'a nĩ mũndũ nĩwamanyie kana amanyĩw'a make menyungunyĩsya nũndũ wa ndeto isu, na kwoou amakũlya atĩĩ, “Mwĩenda kwĩkya ngoo nũndũ wa ndeto isu? 62Nao kethĩwa nĩmwona Mwana wa Mũndũ akyambata asyoke kũla waĩ mbeenĩ? 63Veva nĩwe ũetae thayũ; andũ mo ene vai ũndũ meyĩka. Ndeto ila namũtavya nĩ Veva na nĩ thayũ. 64Ĩndĩ katĩ wenyu kwĩ amwe matekũndĩkĩĩa.” Kuma mwambĩlĩĩlyonĩ Yesũ nĩweesĩ andũ ala mataĩ mamũĩkĩĩa, na ũla ũkamũthoosya kũla kwĩ amaitha. 65Nĩvo ĩndĩ Yesũ wameie atĩĩ, “Kĩu nĩkyo kĩtumi nĩmwĩie kana vai mũndũ wũka kwakwa atatonyethetw'e nĩ Asa.”

66Kumana na ndeto ila Yesũ waneenie, aingĩ ma aatĩĩi make nĩmamũtiie makola kũendanasya nake. 67Nĩvo ĩndĩ wakũlilye ala amanyĩw'a ĩkũmi na elĩ atĩĩ, “O nenyu nĩmũkwenda kũthi?”

68 # Mat 16.16; Mk 8.29; Lk 9.20 Simioni Vetelo amũsũngĩa amwĩa atĩĩ, “Mwĩai, tũthi kwaũ? We nue wĩ na ndeto sya thayũ ũtathela. 69Ithyĩ nĩtũĩkĩĩaa na nĩtũmanyĩte kana we nue ũla Mũtheu wumĩte kwa Ngai.”

70Yesũ amasũngĩa amea atĩĩ, “Ninyie namũnyuvie mwĩ ĩkũmi na elĩ, ĩndĩ ũmwe wenyu nĩ wa Satani!” 71Aneenaa ũu ĩũlũ wa Yutasi mwana wa Simioni Ĩsikalioti, nũndũ we, e ũmwe wa ala amanyĩw'a ĩkũmi na elĩ, nĩwe wĩmũthoosya kũla kwĩ amaitha.

موجودہ انتخاب:

Yoa 6: KAMBA

سرخی

شئیر

کاپی