Yoa 5

Yesũ Aivosya Mũndũ Vakuvĩ na Ndia yĩtawa Mbethisatha#5.1 Mbethisatha: Maandĩko angĩ ma tene ma Ndeto ya Ngai mamĩtĩte Mbethisaita

1Ĩtina wa maũndũ asu, Yesũ nĩwaendie Yelũsalemu kwondũ wa mboka yaĩ kw'o ya Ayuti. 2Kũu Yelũsalemu vakuvĩ na mũvĩa wĩtawa Mũvĩa wa Malondu, vaĩ ndia ya kĩw'ũ yeetawa kwa Kĩevelania Mbethisatha, na ũtee wayo kwaĩ kũndũ kũtano kwakitĩtwe kwa kwĩkala. 3Kũndũnĩ kũu kwakomangaa andũ aingĩ mũno awau na ilalinda, andũ maĩ na maũũ mathũku, na andũ maĩ na mamutha monzu. [Andũ asu meethĩawa meteelete kĩw'ũ kĩkwaithangw'e, 4nũndũ mũlaĩka wa Ngai nĩwatheeaa mavinda amwe akalika ndianĩ ĩsu akamĩkwaithangya. Mũwau ũla walikaa ndianĩ ĩsu mbee, kĩw'ũ kyakwaithangw'a nĩwavoaa ũwau ũla eĩ naw'o.]#5.4 Maandĩko amwe ma tene ma Ndeto ya Ngai nĩmatiĩte ndeto ii syĩ nthĩnĩ wa [ ] 5Vau vaĩ mũndũ ũmwe wekalĩte e mũwau vandũ va myaka mĩongo ĩtatũ na nyanya. 6Yĩla Yesũ woonie mũndũ ũsu na amanya kana atwĩe akomete vau vandũ va ĩvinda ĩasa nĩwamũkũlilye atĩĩ, “Nũkwenda kũvow'a?”

7Mũndũ ũsu amũsũngĩa, “Mũnene, nyie ndi na mũndũ wa kũndikya ndianĩ yĩla kĩw'ũ kyakwaithangw'a, na ngilasya ngyenda kũlika mũndũ ũngĩ ailika mbee wakwa.”

8Yesũ amwĩa atĩĩ, “Ũkĩla! Kua mũkeka waku na ũithi.” 9O vau kwa vau, mũndũ ũsu nĩwavoie na akua mũkeka wake athi.

Mũthenya ũla maũndũ asu meekĩkaa waĩ wa Savato. 10#Nee 13.19; Yel 17.21 Kwoou atongoi ma Ayuti meea mũndũ ũsu wavoiw'e atĩĩ, “Ũmũnthĩ nĩ mũthenya wa Savato, na mĩao ndĩũkwĩtĩkĩlya ũkue mũkeka waku.”

11Ĩndĩ mũndũ ũsu amea atĩĩ, “Mũndũ ũla wambosya ambĩa, ‘Kua mũkeka waku na ũithi.’ ”

12Namo mamũkũlya, “Mũndũ ũsu wakwĩa, ‘Kua mũkeka waku na ũithi nũũ?’ ”

13Mũndũ ũsu wavoiw'e ndeesĩ mũndũ ũsu wamũvosya, nũndũ Yesũ aĩ anauma vau akalikana na ĩkomano ya andũ yĩla yaĩ vau.

14Masaa angĩ, Yesũ nĩweethĩie mũndũ ũsu Ĩkalũnĩ na amwĩa atĩĩ, “Nũkwona nũvoie; ndũkatate kwĩka naĩ ĩngĩ ndũkakwatwe nĩ ũndũ ũngĩ mũthũku mbee wa ũsu.”

15Mũndũ ũsu nĩwaendie atavya atongoi ma Ayuti kana Yesũ nĩwe ũmũvoisye. 16Kwoou Ayuti nĩmambĩĩie kũmũthĩny'a Yesũ, nũndũ wa kwĩthĩwa eekie ũndũ ũsu mũthenyanĩ wa Savato. 17Yesũ nĩwamasũngĩie amea atĩĩ, “Ĩthe wakwa o nayu nũkũtethya wĩa, nakwa o ta ũu nĩngũtethya wĩa.”

18Ũneeni ũsu wa Yesũ nĩwatumie atongoi ma Ayuti mathũkĩĩa mũno mayenda kũmũaa, tyo kwondũ wa kũtũla mwĩao wa mũthenya wa Savato, ĩndĩ o ta ũu kwondũ wa kwĩta Ngai Ĩthe wake, na kwa nzĩa ĩsu eeyĩanany'a na Ngai.

Ũkũmũ wa Mwana wa Ngai

19Yesũ nĩwameie atĩĩ, “Nĩmũtavya w'o, Mwana ndatonya kwĩka ũndũ wake mwene ate o ũla woona Ĩthe ayĩka, nũndũ kĩla Ĩthe wĩkaa nokyo Mwana o nake wĩkaa. 20Asa nũmwendete Mwana na nũmwonasya maũndũ onthe ala we mwene wĩkaa, na akamwony'a maũndũ manene kwĩ aa o nenyu mũseng'e. 21O ũndũ Asa ũthayũũkasya andũ ala akw'ũ na kũmanenga thayũ, now'o o nake Mwana ũnengae thayũ andũ ala ũkwenda. 22Asa nde mũndũ ũsilĩlaa; wĩa wa kũsilĩla w'onthe amũnengete Mwana, 23nĩ kana andũ onthe matonye kũmũnenga Mwana ndaĩa, o ũndũ manengete Asa ndaĩa. Mũndũ ũla ũtanengae Mwana ndaĩa ndanengae Asa ũla ũmũtũmĩte ndaĩa.

24“Nĩmũtavya w'o, kĩla ũmwe ũla wĩw'aa ndeto syakwa, na ũĩkĩĩaa ũla wandũmie e na thayũ ũtathela. Ndakasilĩlwa, ĩndĩ nũminĩte kuma kĩkw'ũnĩ akalika thayũnĩ. 25Nĩmũtavya w'o, ĩvinda nĩyũkĩte o na yu nĩ ĩviku, yĩla akw'ũ makew'a wasya wa Mwana wa Ngai, namo ala makawĩw'a makeethĩwa thayũ. 26O ũndũ Asa mwene nĩwe kĩtina kya thayũ, now'o wamũtwie Mwana wake ethĩwe kĩtina kya thayũ. 27O ta ũu nĩwamũnengie ũkũmũ wa kũsilĩla andũ, nũndũ we nĩ Mwana wa Mũndũ. 28Mũikaseng'we nĩ ũndũ ũũ, nũndũ ĩvinda nĩyũkĩte yĩla akw'ũ onthe makew'a wasya wake, 29#Nda 12.2 na mayuma mbũanĩ syoo. Ala mekaa meko maseo makathayũũka na kwĩkalaa thayũ, namo ala mekaa meko mathũku makathayũũka na kũsilĩlwa.

Ngũsĩ sya Yesũ

30“Nyie vai ũndũ ndonya kwĩka na ũkũmũ wakwa mwene; nĩsilaa o ũndũ neew'a kuma kwa Asa, na kwoou ũsili wakwa nĩ wa w'o, nũndũ ndyendaa kwĩka kwenda kwakwa, ĩndĩ kwenda kwa ũla wandũmie.

31“Ngeyumĩsya ũkũsĩ nyie mwene, ũkũsĩ wakwa ndũtonya kwĩthĩwa wa w'o. 32Ĩndĩ ve ũmwe ũla ũngũsĩĩaa, na nĩnĩsĩ kana ũkũsĩ ũla wumasya ĩũlũ wakwa nĩ wa w'o. 33#Yoa 1.19-27; 3.27-30 Inyw'ĩ nĩmwatũmanie kũla kwĩ Yoana nake akũsĩĩa ũla w'o. 34Ti atĩ nĩ na vata wa kumĩw'a ũkũsĩ nĩ andũ, ĩndĩ nĩneena maũndũ aa nĩ kana mũtonye kũtangĩĩwa. 35Yoana aĩ ta taa wakene na kumya kyeni, nenyu nĩmweeyũmbanĩtye kũtanĩa kyeni kĩu kwa kavinda. 36Ĩndĩ nyie nĩ na ũkũsĩ mũnene ĩũlũ wakwa kwĩ ũla wa Yoana, nũndũ mawĩa ala ngwĩka, namo nĩ mawĩa ala Asa wanengie nĩke, nĩmeũkũsĩĩa kana Asa nĩwe ũndũmĩte. 37#Mat 3.17; Mk 1.11; Lk 3.22 Asa ũla ũndũmĩte o nake nĩwumasya ũkũsĩ ĩũlũ wakwa. Inyw'ĩ mũyaaĩw'a wasya wake kana mũkona wũmbo wake, 38o na ndeto syake iitwĩe nthĩnĩ wenyu, nũndũ mũiĩkĩĩaa ũla ũtũmĩtwe nĩwe. 39Mũsomaa Maandĩko Matheu na kĩthing'ĩĩsyo, nũndũ mwonaa kana nthĩnĩ wamo nĩmũtonya ũkwata thayũ ũtathela. Ĩndĩ namo Maandĩko o asu makũsĩĩaa ĩũlũ wakwa, 40nenyu mũyĩtĩkĩla kũka kwakwa mũkwate thayũ.

41“Nyie ndiũmantha ndaĩa kuma kwa andũ. 42Ĩndĩ nĩnĩsĩ kana ngoonĩ syenyu mũimwendete Ngai. 43Nyie nũkĩte na ĩsyĩtwa ya Ĩthe wakwa, ĩndĩ inyw'ĩ nĩmũleete kũnthokya; mũndũ ũngĩ akoka na ĩsyĩtwa yake mwene, ũsu no mũmũthokye. 44Mũkatonya ata ĩndĩ kũĩkĩĩa, inyw'ĩ andũ mũmanthaa ndaĩa kuma kwenyu ene, na mũimanthaa ndaĩa kuma kwa ũla nowe e weka Ngai. 45Mũikasũanĩe kana nyie ngamũsikata kũla kwĩ Asa; Mwose ũla inyw'ĩ mwĩkwatasya nĩwe ũkamũsikata. 46Kethĩwa kwa w'o nĩmwamũĩkĩĩie Mwose, no mũndĩkĩĩe o nakwa, nũndũ Mwose aandĩkaa ĩũlũ wakwa. 47Ĩndĩ ethĩwa mũiĩkĩĩaa kĩla waandĩkie, mũkaĩkĩĩa ndeto syakwa ata?”

موجودہ انتخاب:

Yoa 5: KAMBA

سرخی

شئیر

کاپی