KA ʻEUANELIO I KĀKAU ʻIA AI E IOANE 4
4
MOKUNA IV.
1 Hele akula ʻo Iesū mai Iudea a Galilaia. 7 Kāna ʻōlelo me ka wahine no Samaria. 39 Nui nā mea o ko Samaria i manaʻoʻiʻo iā ia. 46 Hoʻōla ʻo Iesū i ke keiki a kekahi aliʻi.
1¶ A ʻike aʻela ka Haku, ua lohe ka poʻe Parisaio, he nui nā haumāna a Iesū i hoʻohaumāna ai, a i bapetizo ai hoʻi, a he hapa kā Ioane;
2(ʻaʻole naʻe ʻo Iesū iho i bapetizo ai, ʻo kāna poʻe haumāna nō,)
3haʻalele ihola ia iā Iudea, a hoʻi akula i Galilaia.
4A he pono nō ia ke hele aku ma waena o Samaria.
5A hiki akula ia i kekahi kūlanakauhale o Samaria, ʻo Sukara ka inoa, e kokoke ana i ka ʻāina a Iakoba i hāʻawi aku ai no kāna keiki no Iosepa.
6I laila ka pūnāwai o Iakoba. No ka māluhiluhi o Iesū i ka hele ʻana, noho ihola ia ma ua pūnāwai lā; ʻo ke ono paha ia o ka hora.
7Hele aʻela kekahi wahine no Samaria e huki wai; ʻī maila ʻo Iesū iā ia, “Hō mai noʻu e inu.”
8No ka mea, ua hala aʻela nā haumāna āna i ke kūlanakauhale e kūʻai i ʻai.
9A laila nīnau akula ka wahine no Samaria iā ia, “No ke aha lā ʻoe, he Iudaio, e noi mai nei iaʻu, i ka wahine no Samaria, i mea inu?” No ka mea, ʻaʻole e launa pū nā Iudaio me ko Samaria.
10ʻŌlelo maila ʻo Iesū iā ia, ʻī maila, “Inā ua ʻike ʻoe i ka makana o ke Akua, a i ka mea hoʻi e ʻōlelo ana iā ʻoe, ‘Hō mai noʻu e inu;’ inā ua noi mai ʻoe iā ia, a ua hāʻawi aku ia i ka wai ola nou.”
11ʻŌlelo akula ka wahine iā ia, “E ka Haku, ʻaʻole ou bākeke, a ua hohonu ka pūnāwai; no hea lā e loaʻa ai iā ʻoe ua wai ola lā?
12“Ua ʻoi aku anei ʻoe ma mua o Iakoba o ko mākou kupuna, nāna i hāʻawi kēia pūnāwai no mākou, a nāna hoʻi i inu i ka wai, a me kāna poʻe keiki, a me kāna poʻe holoholona?”
13ʻŌlelo maila ʻo Iesū, ʻī maila iā ia, “ʻO nā mea a pau e inu i kēia wai, e make wai hou aku nō ia.
14“Akā, ʻo ka mea e inu i ka wai aʻu e hāʻawi aku ai iā ia, ʻaʻole loa ia e make wai hou aku; akā, ʻo ka wai aʻu e hāʻawi aku ai iā ia, e lilo ia i wai puna i loko ona e pipiʻi ana i ke ola mau loa.”
15ʻŌlelo akula ka wahine iā ia, “E ka Haku, hō mai noʻu ua wai lā, i ʻole e make wai hou aku au, i ʻole hoʻi e hele hou mai i ʻaneʻi e huki.”
16ʻŌlelo maila ʻo Iesū iā ia, “Ō hele, e kāhea aku i kāu kāne, a e hele hou mai i ʻaneʻi.”
17ʻŌlelo akula ka wahine, ʻī akula, “ʻAʻohe aʻu kāne.” ʻĪ maila ʻo Iesū iā ia, “He pono kāu i ʻī mai nei, ‘ʻAʻohe aʻu kāne’;
18no ka mea, ʻelima aʻe nei āu mau kāne, a ʻo kāu mea i kēia manawa, ʻaʻole ia ʻo kāu kāne; he ʻoiaʻiʻo kāu i ʻī mai nei.”
19ʻŌlelo akula ua wahine lā iā ia, “E ka Haku, ke ʻike nei au he kāula ʻoe.
20“Ma luna o kēia mauna ko mākou poʻe mākua i hoʻomana ai; akā, ke ʻōlelo mai nei ʻoukou, aia ma Ierusalema kahi pono e hoʻomana aku ai.”
21ʻŌlelo maila ʻo Iesū iā ia, “E ka wahine, e manaʻoʻiʻo mai i kaʻu, e hiki mai auaneʻi ka manawa, ʻaʻole ma kēia mauna, ʻaʻole hoʻi ma Ierusalema e hoʻomana aku ai ʻoukou i ka Makua.
22“Ke hoʻomana nei ʻoukou i ka mea a ʻoukou i ʻike ʻole ai; ke hoʻomana nei mākou i ka mea a mākou i ʻike ai; no ka mea, no nā Iudaio mai ke ola.
23“Akā, e hele mai ana ka manawa, a ʻo nei hoʻi ia, ʻo ka poʻe hoʻomana ʻoiaʻiʻo, e hoʻomana lākou i ka Makua me ka ʻuhane a me ka ʻoiaʻiʻo; no ka mea, ʻo ia ka poʻe a ka Makua i makemake ai e hoʻomana aku iā ia.
24“He ʻUhane ke Akua; a ʻo ka poʻe hoʻomana iā ia, he pono nō lākou e hoʻomana aku iā ia me ka ʻuhane a me ka ʻoiaʻiʻo.”
25ʻŌlelo akula ka wahine iā ia, “Ua ʻike nō au e hele mai ana ka Mesia, ka mea i ʻōlelo ʻia ʻo Kristo; aia hiki mai ia, nāna nō e hoʻākāka mai nā mea a pau iā mākou.”
26ʻŌlelo maila ʻo Iesū iā ia, “ʻO wau nō ia, ka mea e kamaʻilio pū ana me ʻoe.”
27¶ A laila hoʻi maila kāna poʻe haumāna, a kāhāhā ihola ko lākou naʻau i kāna kamaʻilio pū ʻana me ka wahine; ʻaʻole naʻe kekahi i nīnau aku iā ia, “He aha kāu e ʻimi nei? A no ke aha lā kāu e kamaʻilio pū me ia?”
28No laila haʻalele ka wahine i kona ipu wai, a hoʻi akula i ke kūlanakauhale, a ʻōlelo akula i nā kānaka,
29“E hele mai, e ʻike i ke kanaka, nāna i haʻi mai iaʻu nā mea a pau aʻu i hana ai; ʻaʻole anei ʻo ia ka Mesia?”
30A laila puka mai lākou no loko mai o ke kūlanakauhale, a hele i ona lā.
31A ma waena iho, nonoi akula kāna poʻe haumāna iā ia, ʻī akula, “E Rabi, e ʻai.”
32ʻĪ maila ʻo ia iā lākou, “He ʻai kaʻu e ʻai ai, ka mea a ʻoukou i ʻike ʻole ai.”
33No ia mea, nīnau aʻela nā haumāna kekahi i kekahi, “Ua lawe mai anei kekahi i ʻai nāna?”
34ʻŌlelo maila ʻo Iesū iā lākou, “ʻO kaʻu ʻai kēia, e hana au i ka makemake o ka Mea nāna au i hoʻouna mai, a e hoʻopau hoʻi i kāna hana.
35“ʻAʻole anei ʻoukou e ʻōlelo, ‘ʻEhā malama i koe, a hiki mai ka ʻohi palaoa ʻana?’ Aia hoʻi, ke ʻōlelo aku nei au iā ʻoukou, e ʻalawa aʻe ko ʻoukou mau maka, a e nānā i nā mahina ʻai; ua keʻokeʻo mai ʻānō no ka ʻohi ʻana.
36“A ʻo ka mea ʻohi, loaʻa nō iā ia ka uku, a hōʻiliʻili ia i ka hua no ke ola mau loa; i ʻoliʻoli pū ai ka mea nāna i lūlū me ka mea nāna i ʻohi.
37“No ka mea, pēlā i akāka ai, he ʻoiaʻiʻo ka ʻōlelo, ‘Na kekahi e lūlū, na kekahi mea ʻē hoʻi e ʻohi.’
38“Ua hoʻouna aku au iā ʻoukou e ʻohi i ka mea a ʻoukou i luhi ʻole ai; na haʻi i hana, a komo ʻoukou i loko o kā lākou hana.”
39¶ A nui ko Samaria poʻe o ua kūlanakauhale lā i manaʻoʻiʻo iā ia, no ka ʻōlelo a ka wahine i hōʻike aku ai, “Ua haʻi mai ia iaʻu i nā mea a pau aʻu i hana ai.”
40A ʻo ko Samaria i hele aku i ona lā, nonoi akula lākou iā ia e noho me lākou; a noho ihola ia ma laila i nā lā ʻelua.
41A nui loa nā mea ʻē aʻe i manaʻoʻiʻo ma kāna ʻōlelo.
42ʻĪ akula lākou i ka wahine, “ʻAʻole mākou i manaʻoʻiʻo ma kāu ʻōlelo wale nō; no ka mea, ʻo mākou iho kekahi i lohe, a ʻike hoʻi, ʻo ka Hoʻōla ʻoiaʻiʻo kēia o ke ao nei, ʻo ka Mesia.”
43¶ A ma hope iho o nā lā ʻelua, hele akula ia mai laila aku, a hiki i Galilaia.
44No ka mea, na Iesū nō i hōʻike mai, ʻaʻole mālama ʻia ke kāula ma kona ʻāina iho.
45A hiki maila ia i Galilaia, hoʻokipa maila ko Galilaia iā ia, no ko lākou ʻike ʻana i nā mea a pau āna i hana ai ma Ierusalema i ka ʻahaʻaina; no ka mea, ua hele nō lākou i ua ʻahaʻaina lā.
46¶ A hele hou akula ʻo Iesū ma Kāna i Galilaia, kahi āna i hoʻolilo ai ka wai i waina. A ua maʻi ke keiki a kekahi aliʻi ma Kaperenauma.
47A lohe aʻela ia, ua hiki mai ʻo Iesū i Galilaia mai Iudea mai, hele akula ia i ona lā, nonoi akula iā ia, e iho aʻe ia e hoʻōla i kāna keiki; no ka mea, ua kokoke ia e make.
48ʻĪ maila ʻo Iesū iā ia, “Inā ʻaʻole ʻoukou e ʻike i nā hōʻailona a me nā mea kupanaha, ʻaʻole ʻoukou e manaʻoʻiʻo mai.”
49ʻŌlelo aku ua aliʻi lā iā ia, “E ka Haku, e iho aʻe ʻoe, o make ʻē kuʻu keiki.”
50ʻŌlelo maila ʻo Iesū iā ia, “Ō hoʻi; ua ola kāu keiki.” A manaʻoʻiʻo aku ua kanaka lā i ka ʻōlelo a Iesū i haʻi mai ai iā ia, a hoʻi akula.
51A i kona iho ʻana, hālāwai maila kāna mau kauā me ia, haʻi maila lākou, ʻī maila, “Ua ola kāu keiki.”
52Nīnau akula ʻo ia iā lākou i ka hora ona i maha ai. ʻĪ maila lākou iā ia, “I nehinei i ka hiku o ka hora, i haʻalele ai ke kuni iā ia.”
53No ia mea, ʻike ihola ka makua kāne, ʻo ia ka hora i ʻōlelo mai ai ʻo Iesū iā ia, “Ua ola kāu keiki”; a manaʻoʻiʻo ihola nō ia, a me kona ʻohana a pau.
54ʻO kēia ka lua o ka hana mana a Iesū i hana ai, i kona hele ʻana i Galilaia mai Iudea mai.
موجودہ انتخاب:
KA ʻEUANELIO I KĀKAU ʻIA AI E IOANE 4: KBH
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ka Baibala Hemolele © Partners Development Foundation, 2018.
