KA ʻEUANELIO I KĀKAU ʻIA AI E IOANE 3
3
MOKUNA III.
1 No Nikodemo. 3 ʻO kā Iesū aʻo ʻana iā ia i ke ʻano o ka hānau hou. 16 No ke aloha o ke Akua. 18 Ka mea i hoʻohewa ʻia ai nā kānaka. Ka hope o ka poʻe manaʻoʻiʻo, a me ka poʻe manaʻoʻiʻo ʻole.
1¶ ʻO kekahi kanaka o ka poʻe Parisaio, ʻo Nikodemo kona inoa, he aliʻi o nā Iudaio;
2hele akula ia i o Iesū lā i ka pō, ʻī akula iā ia, “E Rabi, ua ʻike mākou he kumu ʻoe i hele mai nei mai ke Akua mai; no ka mea, ʻaʻole e hiki i kekahi kanaka ke hana i kēia mau hana mana āu e hana nei, ke ʻole ke Akua me ia.”
3ʻŌlelo maila ʻo Iesū iā ia, ʻī maila, “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoe, inā e hānau hou ʻole ʻia ke kanaka, ʻaʻole e hiki iā ia ke ʻike aku i ke aupuni o ke Akua.”
4Nīnau akula ʻo Nikodemo iā ia, “Pehea lā e hiki ai i ke kanaka ke hānau ʻia i kona wā kahiko? E hiki anei iā ia ke komo hou i loko o ka ʻōpū o kona makuahine, a e hānau ʻia mai?”
5ʻŌlelo maila ʻo Iesū, “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoe, inā e hānau ʻole ʻia ke kanaka i ka wai, a me ka ʻUhane, ʻaʻole e hiki iā ia ke komo i loko o ke aupuni o ke Akua.
6“ʻO ka mea i hānau ʻia na ke kino, he kino nō ia; a ʻo ka mea i hānau ʻia na ka ʻUhane, he ʻuhane ia.
7“Mai kāhāhā kou naʻau i kaʻu i ʻōlelo aku ai iā ʻoe, ‘E pau ʻoukou i ka hānau hou e pono ai.’
8“Ke pā nei ka makani i kāna wahi i makemake ai, a lohe nō ʻoe i kona halulu, ʻaʻole naʻe ʻoe i ʻike i kāna wahi i hele mai ai, ʻaʻole hoʻi i kāna wahi e hele aku ai; pēlā hoʻi nā mea a pau i hānau ʻia e ka ʻUhane.”
9ʻŌlelo akula ʻo Nikodemo, ʻī akula, “Pehea lā e hiki ai kēia mau mea?”
10ʻŌlelo maila ʻo Iesū, ʻī maila iā ia, “He kumu ʻoe na kā ʻIseraʻela, ʻaʻole anei ʻoe i ʻike ia mau mea?
11“ʻOiaʻiʻo, he ʻoiaʻiʻo kaʻu ʻōlelo aku nei iā ʻoe, ʻo kā mākou mea i ʻike ai, ʻo kā mākou ia e ʻōlelo nei, a ʻo kā mākou mea i nānā ai, ʻo ia kā mākou e hōʻike nei; ʻaʻole hoʻi ʻoukou i hoʻomaopopo i ka mea a mākou e hōʻike nei.
12“Inā ua ʻōlelo wau i nā mea o kēia ao, a manaʻoʻiʻo ʻole ʻoukou, pehea lā ʻoukou e manaʻoʻiʻo ai, ke ʻōlelo wau iā ʻoukou i nā mea i loko o ka lani?
13“ʻAʻohe kanaka i piʻi i luna i ka lani, ʻo ka mea wale nō i iho mai, mai ka lani mai, ʻo ke Keiki a ke Kanaka, ʻo ka mea i loko o ka lani.
14“A e like me kā Mose kau ʻana i ka nahesa i luna ma ka wao nahele, pēlā e pono ai ke Keiki a ke Kanaka e kaulia ai;
15i ʻole e make ka mea manaʻoʻiʻo iā ia; akā, e loaʻa iā ia ke ola mau loa.
16¶ “No ka mea, ua aloha nui mai ke Akua i ko ke ao nei; no laila, ua hāʻawi mai ʻo ia i kāna Keiki hiwahiwa, i ʻole e make ka mea manaʻoʻiʻo iā ia; akā, e loaʻa iā ia ke ola mau loa.
17“ʻAʻole nō hoʻi i hoʻouna mai ke Akua i kāna Keiki i ke ao nei, i hoʻohewa ai ʻo ia i ko ke ao nei; akā, i ola ai ko ke ao nei ma ona lā.
18“ʻO ka mea manaʻoʻiʻo iā ia, ʻaʻole ia e hoʻāhewa ʻia; akā, ʻo ka mea manaʻoʻiʻo ʻole, ua hoʻāhewa ʻia ʻo ia ʻānō, i kona manaʻoʻiʻo ʻole i ka inoa o ke Keiki hiwahiwa a ke Akua.
19“Eia ka mea i hoʻāhewa ʻia ai; ua hiki mai ka mālamalama i ke ao nei; akā, ua makemake nā kānaka i ka pouli, ʻaʻole i ka mālamalama; no ka mea, ua hewa nā hana ʻana a lākou.
20“ʻO ka mea e hana ana i nā mea ʻino, ʻo ia ke hoʻowahāwahā i ka mālamalama, ʻaʻole hoʻi ia e hele mai i ka mālamalama, o ʻikea auaneʻi kāna hana ʻana.
21“Akā, ʻo ka mea e hana ana ma ka ʻoiaʻiʻo, ʻo ia ke hele mai i ka mālamalama, i akāka ai kāna hana ʻana, ua hana ʻia ma kā ke Akua.”
22¶ A ma hope iho o kēia mau mea, hele akula ʻo Iesū me kāna poʻe haumāna i ka ʻāina ʻo Iudea; a noho ihola ia i laila me lākou, a bapetizo ihola.
23A e bapetizo ana nō hoʻi ʻo Ioane ma ʻAinona e kokoke ana i Salima; no ka mea, ua nui ka wai ma laila; a hele mai lākou, a bapetizo ʻia ihola.
24No ka mea, ʻaʻole i hahao ʻia ʻo Ioane i loko o ka hale paʻahao ia manawa.
25Ia wā hoʻopaʻapaʻa aʻela nā haumāna a Ioane me nā Iudaio no ka hoʻomaʻemaʻe ʻana.
26A hele akula lākou i o Ioane lā, ʻī akula iā ia, “E Rabi, ʻo ka mea me ʻoe ma kēlā kapa o Ioredane, nona āu i hōʻike ai, aia hoʻi, ke bapetizo lā ʻo ia, a ke hele nei nā kānaka a pau i ona lā.”
27ʻŌlelo maila ʻo Ioane, ʻī maila, “ʻAʻole e hiki i ke kanaka ke lawe wale i kekahi mea, ke hāʻawi ʻole ʻia mai ia nāna mai ka lani mai.
28“ʻO ʻoukou nō koʻu poʻe hōʻike i kaʻu i ʻōlelo ai, ‘ʻAʻole wau ka Mesia,’ akā, ‘Ua hoʻouna ʻia mai au ma mua ona.’
29“ʻO ka mea nāna ka wahine mare, ʻo ke kāne mare ia; akā, ʻo ka hoaaloha o ke kāne mare e kū ana, a e hoʻolohe ana iā ia, ʻo ia ke ʻoliʻoli nui i ka leo o ke kāne mare. Ua loaʻa hoʻi iaʻu kēia ʻoliʻoli.
30“E māhuahua ana nō ʻo ia; akā, e emi iho auaneʻi hoʻi au.
31¶ “ʻO ka mea no luna mai ma luna ia o nā mea a pau; ʻo ka mea no ka honua, no ka honua ia, a no ka honua hoʻi kāna ʻōlelo; ʻo ka mea no ka lani mai, ma luna ia o nā mea a pau.
32“ʻO ka mea āna i ʻike ai, a i lohe ai hoʻi, ʻo ia kāna e hōʻike ai; ʻaʻole naʻe kekahi mea i mālama i kāna mea i hōʻike ai.
33“ʻO ka mea e mālama i kāna mea i hōʻike mai ai, ʻo ia ke ʻae mai, he ʻoiaʻiʻo kā ke Akua.
34“No ka mea, ʻo kā ke Akua mea i hoʻouna mai ai, ʻo kā ke Akua ʻōlelo kāna e ʻōlelo ai; no ka mea, ʻaʻole ke Akua e hāʻawi liʻiliʻi mai i ka ʻUhane iā ia.
35“Ke aloha nei ka Makua i ke Keiki, a ua hāʻawi hoʻi ia i nā mea a pau i loko o kona lima.
36“ʻO ka mea manaʻoʻiʻo i ke Keiki, he ola mau loa kona; akā, ʻo ka mea manaʻoʻiʻo ʻole i ke Keiki, ʻaʻole ia e ʻike i ke ola; e kau mai ana ka inaina o ke Akua ma luna iho ona.”
موجودہ انتخاب:
KA ʻEUANELIO I KĀKAU ʻIA AI E IOANE 3: KBH
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ka Baibala Hemolele © Partners Development Foundation, 2018.
