Matayo 14

Chifo cha Johana Mubatizi

(Mariko 6:14-29; Luka 9:7-9)

1Jeso phokala unafunza na kuhenda vilinge kuko Galilaya, Herode Anitipa#14:1 Chiyunani chinaamba: mufalume Herode. yekala ndiye mufalume wasikira ngumaze. 2Ndo achiaamba ahendikazie vivi, “Mutʼu yiye nimusikiraye ngumaze, bee ni Johana Mubatizi. Ninaona tu wafufulwa kulaa kuzimu, na gago ndigo gatumago hata unahenda vilinge.” 3#Luk 3:19, 20Maana, kuko nyuma Herode Anitipa wakala udzimulagizira Johana achigwirwa, na achifungwa, kwa amuhamye Herodiya, mukaza nduguye aihiwaye Filipu. 4#Alaw 18:16; 20:21Herode wahenda vivyo, mana, Johana wakala achimwamba, “Tsʼiyo shariya uwe kumuhwala mukaza nduguyo na mwenye ucheri moyo!” 5Herode wakala hata uhenza ahendemuulaga, ela waogopha anatsʼi tu kwakukala, ákala anakuluphira kukala, Johana wakala ni mugomvi wa Mulungu.

6Ndo tsʼiku mwenga, Herode Anitipa wakala unausa shuhuli ya kuvyalwakwe, na mwana wa chiche wa Herodiya achivina mbere za osi okala a phapho shuhulini, hata achimuhamya Herode Anitipa. 7Phapho Herode achilapha kumupʼa chochosi chondavoya yiye musichana. 8Naye musichana achituwa ga ameye, ndo hata achimwamba, “Ninahenza unipʼe chitswa cha Johana Mubatizi ndani ya bakuli.” 9Phapho yiye mufalume achishononeka, ela kwakukala, wakala udzimulaphira, chisha mbere za ajenie, achigakubali vivyo gokala uvoya. 10Ndo Herode Anitipa achimulagiza mutʼu achendamutosa chitswa Johana kuko jela, 11na achidza nacho bakulini, achidzamupʼa yiye musichana, naye musichana achimuphirikira ameye. 12Anafunzi a Johana ariphogasikira gago, ákwendaluhwala lufulwe achendaluzika. Chisha achendamwambira Jeso naye.

Atʼu odzichira helufu tsʼano anahewa leu

(Mariko 6:30-44; Luka 9:10-17; Johana 6:1-14)

13Jeso ariphokwendaambirwa kukala Johana wakala udziulagwa, waphenya mashuwani achiuka na anafunzie, achenda kutʼu kotsʼi atʼu kwa hata akale hicheye. Ela atʼu ariphomanya kukala yiye wakala udziuka, álaa midzini achitsegatsega riro ziya nao kumutuwa, na hata achifika na chimbere kuko. 14Ndo Jeso naye unafika kuko na yiyo mashuwaye, walaa na achiona duu bomu ra atʼu hata achirigwizira mbazi, naye achiaphozera akongo ao.

15Dzuwa phokala riphenduka, anafunzie ámwendera achimwamba, “Vivi bee kunatswa, na phapha huripho kʼaphana mudzi wa mutʼu phephi. Ndo ela tsʼi baha walage ano atʼu ende vidzidzini akadzigulire vyakurya?” 16Ela Jeso yiye achiaamba, “Ao kʼaatakiya kuuka, hata nimwapʼe leu mwimwi arye.” 17Ao achimuudzidza achimwamba, “Bee naswi huriyo nayo phapha ni mikahe mitsano, na mabeshe mairi tu.” 18Jeso achiaamba, “Rehani phano yiyo mikahe na gago mabeshe.” 19Chisha, achiaamba ao atʼu asagale nyasini ahewe leu. Ndo ariphohwala yiyatʼu mikahe mitsano na garatʼu mabeshe mairi, walola dzulu mulunguni achilavya mumvera kwa Mulungu, chisha achanza kuyimega-mega yiyo mikahe, na achiapʼa anafunzie aapʼe atʼu agavyane. 20Phapho atʼu osi achirya hata achimvuna. Anafunzi a Jeso achitsola-tsola visiku vya mikahe na vya gago mabeshe vyokala visala, na achiudzaza vikaphu kumi na viri. 21Alume hichiyao orya photsʼiatara achetʼu na anache, ákala anapata helufu tsʼano.

Jeso unaenenda dzulu-dzulu ya madzi

(Mariko 6:45-52; Johana 6:16-21)

22Chisha, Jeso achiaamba anafunzie aphenye mashuwani, amulongolere kwenda ngʼambo ya ziya, ukati yiye unalagana na riro duu ra atʼu. 23Na ariphomala kulagana na ao atʼu, waambuka dzulu mwangoni hicheye, achendavoya na achikala kuko hata usiku. 24Uo usiku uriphofika, ao anafunzie ákala afika kure na yiyatʼu mashuwa, na maimbi gákala ganayipiga yiyo mashuwa, mana, vuto rakala rinapiga voro. 25Ndo kunamba kunahendawewe, Jeso achenenda dzulu-dzulu ya madzi kwatuwa. 26Ela ao anafunzi ariphomona unaenenda dzulu-dzulu ya madzi, áogofyerwa muno hata achipiga kʼululu achiamba, “Ni tunusi!” 27Ela Jeso achigomba nao maruru achiamba, “Phenywani ni moyo ndimi, mutsʼogophe!” 28Pʼetero achimwamba, “Bwana, chikala ni uwe jeri, namba nenende dzulu-dzulu ya madzi nidze kuko kwako.” 29Jeso achimwamba, “Hʼaya nzo.” Ndo Pʼetero achilaa mumo mashuwani, achenenda dzulu-dzulu ya madzi kwenda kuko kwa Jeso. 30Ela ariphoona maimbi gapigavyo, waahukwa ni moyo, na phapho achanza kuhoha. Ndo achipiga kʼululu achiamba, “Bwana, nitivya!” 31Phapho Jeso achigolosa mukonowe, achimugwira na achimwamba, “Heka uwe hata kuluphiroro ni dide vino! Kwadze udzikala na shaka moyoni?” 32Ndo osi airi achiphenya mumo mashuwani, na vuto richiricha. 33Na osi okala a mumo mashuwani achimwabudu, na chisha achimwamba, “Uwe u Mwana wa Mulungu jeri!”

Jeso unaphoza akongo boma ra Genesareti

(Mariko 6:53-56)

34Ariphovuka ziya, áfika phatʼu phaihiwapho Genesareti, 35na achina kuko ámukumbikira Jeso. Ndo phachilaa atʼu achenda achisema boma riro rosi kukala Jeso wakudza. Atʼu nao achihwala akongo ao achimuphirikira. 36Akongo achimuvoya akumbe tu hata kumba ni mutse wa valore, nao osi ariomukumba, áphola kamare.

موجودہ انتخاب:

Matayo 14: CHIDUR

سرخی

شئیر

کاپی