Matayo 13

Tʼadi ya mutsanga udzo na mutsanga ui

(Mariko 4:1-9; Luka 8:4-8)

1Tsʼiku yiyo Jeso ariphotuwiwa ni ameye na nduguze, ndiyolaa mumo nyumbani achenda hata kʼanda-kʼanda ya ziya ra Galilaya achisagala. 2#Luk 5:1-3Phapho atʼu achiloka kuloka hata vichimuhenda Jeso aphenye mashuwani, achisagala mumo. Atʼu ao achiima kuko kʼanda-kʼanda, 3naye Jeso achiaambira maneno manji chitʼadi. Yiye waamba:

“Mundimwa mumwenga wakwendamwagira mbeyuze. 4Ariphokala unamwagira ziratʼu mbeyu, zinjine zagwa njirani, na nyama a kuburuka achidzazichotʼa. 5Zinjine zichigwa mutʼu mokala muna mawe, murimo mutsanga wakala ni uchache, na zichimera kare maruru, kwakukala, mutsanga wa mumo wakala ni uchache. 6Ela dzuwa riripholaa, yiyo mimera yafinyalala hata yichiuma, mana, yakala kʼayimitʼire mizi. 7Zinjine za zizo zagwa kati-kati ya mizi ya mihi ya miya, yiyo mizi yichifundula na yichikula, na yichigwira yiyo mimera. 8Ela zinjine za zizo zagwa phenye mutsanga udzo, zichimera, zichikula, na kati ya zizo, zinjine zichivyala mavuno machache, zinjine zichivyala mavuno manji, na zinjine zichivyala manji muno.” 9Ndo kumarigiza Jeso achiamba, “Musikizi naasikire!”

Lengo ra kufunza chitʼadi

(Mariko 4:10-12; Luka 8:9-10)

10Jeso ariphomarigiza kugomba gago, watuwiwa ni anafunzie achiuzwa vivi, “Kwadze unaafunza chitʼadi ano atʼu?” 11Jeso achiaudzidza achiaamba, “Mwimwi mwajaliwa kumanya njama za Ufalume wa Mulungu, ela ao kʼaajaliwirwe. 12#Mat 25:29; Mar 4:25; Luk 8:18; 19:26Maana, yuyatʼu amanyaye kare undakaza kungʼazirwa amanye manji muno, ela yetsʼimanya na kʼenzi kumanya, undakaza kufimbirwa. 13Aa mino ninaafunza chitʼadi, kwakukala, anaona, ela kʼaamanya nini, na anasikira, ela kʼaamanya chitʼu. 14#Isa 6:9, 10Na gaga ganachimiza maneno ga mugomvi wa Mulungu Isaya. Isaya waamba,

‘Kusikira mundasikira, ela kʼamundaelewa,

na kulola mundalola, ela kʼamundamanya nini.

15Maana, myoyo yao yikala mifu,

kʼaahega masikiro gao chividzo,

na kʼaaenzi kugalolatʼo gago agaonago.

Kalapho tsʼi vivyo, ao angari kona na matso gao,

angari kusikira na masikiro gao,

kumanya mwao myoyoni,

na phapho angari kugaluka kwangu,

nami ningari kwaphoza.’

16 # Luk 10:23, 24 “Ela baha mwimwi, mana, munalola chividzo na matso genu kwa mumanye, na munagahegera masikiro kwa mugasikire. 17Ninamwambira jeri mino, agomvi a Mulungu anji na atʼu anji a haki, ákala anatamani muno agaone gaga mugaonago, ela kʼaagaonere. Achitamani asikire gaga mugasikirago, ela kʼaagasikirire vivyo.

18“Kwa vivyo, mwimwi sirikisani nimungʼazire tʼadi ya mumwagiri. 19Atʼu anjine anga dza muratʼu mutʼu njirani mogwa mbeyu zinjine. Atʼu dza ao anasikira neno dzulu ya Ufalume wa Mulungu, ela kʼaarelewa, na ndo Shetani nikudza, akadzarilavya riro neno roaphenya mwao myoyoni. 20Anjine anga dza muratʼu mutʼu mokala muna mawe. Atʼu dza ao achirisikira riro neno ra Mulungu, anariphokera kare na raha. 21Ela kwakukala, riro neno kʼarimitʼa mizi mumo mwao myoyoni, akuluphira tsʼiku chʼachʼe tu, na ahenderwapho mai na mauku kwa anarikuluphira riro neno, nikuuya nyuma phapho kare. 22Atʼu anjine nao, anga dza muratʼu mutʼu mokala ni kati-kati ya mizi ya mihi ya miya. Atʼu dza ao anasikira neno, na chidzako nikukala chimoyomoyo kwa mazagazi ga phapha duniani, akaphenywa ni chipherephere cha kupata utajiri, na phapho riro neno nikugwirwa, na rikatsʼavyala. 23Ela atʼu anjine, anga dza muratʼu mutʼu mokala muna mutsanga udzo. Ao achisikira riro neno anarelewa, na kurituwa jeri-jeri. Ndo ao chidzako nikukala dza yiyatʼu mimera yiriyo minjine yavyala mavuno machache, minjine yichivyala mavuno manji, na minjine yichivyala mavuno manji muno.”

Tʼadi ya muhama na nyasihama

24Jeso ariphomarigiza kwangʼazira tʼadi yiyo, waambira tʼadi yinjine. Yiye waamba, “Ufalume wa Mulungu unaidima kuhwalanishwa na tʼadi yiyi. Tsʼiku mwenga, mutʼu wakwendamwagira mbeyu ya muhama kwakwe mundani. 25Ela usiku phokala chila mutʼu urere, mudawawe achendamwagira nyasihama naye mokala mwenye umwagira muhama, na chisha achiuka. 26Ndo uo muhama wamera na uchikula hata uchitsamula, ndipho atʼu achimanya kukala, rinjine rakala ni nyasihama. 27Ahendikazi a yiye mwenye munda achendamwamba vivi yiye mwenye, ‘Bwana, uwe wamwagira muhama tu kuko kwako mundani. Sambi vino, heka nyasihama naro ri tele?’ 28Yiye achiaudzidza achiaamba, ‘Manyani kare kukala, mutʼu ariye ni mudawa kwangu, ndiye yiye kwendarimwagira kuko.’ Ndo ao ahendikazie achimwamba, ‘Sambi, hwende hukaringʼole sino riro nyasihama?’ 29Yiye achiaamba, ‘Hʼa-a, tsʼendeni, mana, muchendaanza kuringʼola tu, mundangʼola hata uo muhama. 30Riro riricheni rikule tu hata ukati wa kutosa muhama ufike. Phapho ndipho nindaamba atosi, atose muhama hata amale, chisha akautiye maguniani. Chidzako, akaritsenge riro nyasihama, na aritiye moho.’ ”

Tʼadi ya mbeyu tʼide ya haradali

(Mariko 4:30-32; Luka 13:18-19)

31Jeso ariphomarigiza kwaambira atʼu tʼadi yiyo, waambira yinjine. Yiye waamba, “Ufalume wa Mulungu unaidima kuhwalanishwa na tʼadi ya mbeyu ya haradali. Mutʼu mumwenga wayihwala mbeyu yiyo achendayiphanda kwakwe mundani, na 32haradali ndiyo mbeyu tʼide kamare kuriko mbeyu zosini. Ela yichiphandwa, nikumera na kukula hata ukachira muhi wa mwatsaka, na nyama a kuburuka nikudzajenga nyumba zao mumo mwakwe vitaini.”

Tʼadi ya kufutuka kwa hamira

(Luka 13:20-21)

33Jeso ariphomarigiza kwaambira atʼu tʼadi yiyo, waambira tʼadi yinjine. Yiye waamba, “Ufalume wa Mulungu unaidima kuhwalanishwa na tʼadi yiyi. Tsʼiku mwenga, muchetʼu wahwala hamira, achiyitsanganya phamwenga na unga wa nganu daba mwenga, achiukanda, na yiyo nganu yosi yichikolea hamira.”

Chotuma hata Jeso afunze chitʼadi

(Mariko 4:33-34)

34Maneno gago gosi, Jeso wagafunza atʼu osi chitʼadi. Yiye kʼaafunzire rorosi dzulu ya Ufalume wa Mulungu photsʼihumira tʼadi. 35#Zab 78:2Na Wagahenda gago kuchimiza maneno ga Mulungu gogombwa ni mugomviwe kukala,

“Nindagomba namwi kwa kuhumira tʼadi,

na nindamwambira maneno gokala gafitsika kulaa hangu urumwengu wumbwe.”

Tʼadi ya muhama na nyasihama yinangʼazwa

36Jeso wariricha phapho riro duu ra atʼu achiuya kuko nyumbani kokala ulaa. Anafunzie achimutuwa achendamwamba, “Hungʼazire yiya tʼadi ya nyasihama.” 37Jeso achiudzidza achiamba, “Mumwagiri wa mbeyu ya muhama ni mimi Mutʼu yelaa dzulu. 38Munda ni dunia. Mbeyu ya muhama ni aratʼu atʼu ario ni a Ufalume wa Mulungu. Ela riro nyasihama, ni aratʼu atʼu ai acherio kutawalwa ni Shetani. 39Na yiye mudawa yekwendarimwagira riro nyasihama ni Shetani. Ukati wa kutosa ni musindikizo wa urumwengu, na atosi ni malaika a Mulungu. 40Viratʼu nyasihama ritsengwavyo na kutiywa moho, ndivyo vyondakala ukati wa musindikizo wa urumwengu. 41-42Mimi Mutʼu yelaa dzulu nindaahuma malaika angu akatsoletsole atʼu osi aahendao atʼu ahende dambi, na osi ahendao mai aalavye kwangu Ufalumeni, na akaatsuphe moho wa Jahanamu, na kuko andadzuta na arire hata ga milatso. 43Ela aratʼu ario anahenda ga haki andasala Ufalumeni mwa Abayao Mulungu, na ametemete dza dzuwa. Musikizi naasikire!”

Tʼadi ya madini

44Jeso waamba, “Ufalume wa Mulungu bee unaidima kuhwalanishwa na tʼadi yiyi. Kwakala kadzungu ka madini kozikwa mundani. Ndo tsʼiku mwenga, mutʼu wakala unarimira phapho, na achikaona, naye achikaza kukasirira. Aripholaa phapho, wakala unahamirwa muno hata achendaguza vyosi vyokala unavyo, achidzagula uo munda.

45“Chisha, Ufalume wa Mulungu unaidima kuhwalanishwa na tʼadi yiyi ya muchuzi wa mawe ga rubi. 46Yiye aonapho mutʼu aguzaye rubi yenye, nikwendaguza miyoye yosi akadzayigula.”

Tʼadi ya avuwi

47Jeso waenderera kugomba achiamba, “Chisha, Ufalume wa Mulungu unaidima kuhwalanishwa na tʼadi yiyi. Tsʼiku mwenga, chimia chatsuphwa baharini ni avuwi, na chichigwira nyama a madzini a chila namuna. 48Chiriphoudzala, avuwi achivuha hata kʼanda-kʼanda, achisagala, na achitsagula mabeshe na kugatiya mwao vikaphuni. Ela aratʼu okala tsʼi mabeshe, achiatsupha. 49Bee, ninamwambira mino, vivyo ndivyo vyondakala ukati wa musindikizo wa urumwengu. Malaika a Mulungu andalairira, adze aatsole-tsole atʼu ai osi hata asale aratʼu ahendao ga haki. 50Na ao ai bee andakwendatsuphwa moho wa Jahanamu ni ao malaika, kuriko andadzuta, na arire hata ga milatso.”

Nguma Mbidzo na Lagano ra Kare

51Jeso ariphomarigiza kugomba gago, waauza anafunzie vivi, “Mudzigaelewa gano maneno gosi godzimwambira?” Ao achimuudzidza achimwamba, “Ee hudzigaelewa.” 52Ndo Jeso achiaamba, “Chila mwalimu wa shariya yefunzwa ujeri dzulu ya Ufalume wa Mulungu, unga dza mwenye chitsaga cha miyo, na mumo nikulavya miyo miphya, na ya pʼindi.”

Jeso unaremwa kwao Nazareti

(Mariko 6:1-6; Luka 4:16-30)

53Jeso ariphomala kwaambira atʼu tʼadi zizo, waphauka phapho, 54-55achenda kwao Nazareti, na kuko achendaafunza atʼu mwao sinagogini, na osi osikira mafunzoge áangalala, hata achiuzana enye kwa enye vivi, “Chisha, samba yuno ni mwana wa yuya fundi wa mbao? Na ameye samba ni Maryamu, na nduguze a chilume ni ano Jakobo, Jesefu, Simoni, na Juda? Hʼaya bee wayipataphi hekima yino, na vilinge vino? 56Na hata chisha, nduguze osi a chiche samba asagala phapha? Hʼaya wagalavyaphi maneno gano gosi yuno?” 57#Joh 4:44Na phapho achimurema tsetsetse. Ela Jeso yiye achiaamba, “Mugomvi wa Mulungu ni mutʼu aishimiwaye, itsʼiphokala kʼaishimiwa kwao, na kʼaishimiwa ni atʼu a phao phenye.” 58Na phapho Jeso kʼahendere vilinge vinji, kwakukala, kʼaamukuluphirire ao.

موجودہ انتخاب:

Matayo 13: CHIDUR

سرخی

شئیر

کاپی