JOHANE 2

Arusi muzinyi Kana

1Ituku ja kadadu korekoghe na arusi Kana muzi ghwa Galilaya, na mae Jesu orekoghe ahoeni. 2Jesu na wanughi wake wori werewangiloghe. 3Divei iendasia, mae Jesu ukamzera, “Ndewina divei.” 4Jesu ukamzera, “Ngamao agho ni ghaki? Ngelo yapo ndeivikie anduangi.” 5Niko aho mae Jesu ukawizera wadumiki, “Bonyenyi ijo jose uchaamzera.”

6Na aho korekoghe na mbuta irandadu ra magho riwikilo kunughana na mzango ghwa Wayahudi ghokuelesha, kula mbuta idimagha kungira sa lita ighana ra machi. 7Jesu ukawizera wadumiki, “Churenyi iri mbuta machi.” Nao wikarichura pacha. 8Ukawizera, “Idana daenyi mumghenjere m'baa wa arusi.” Nawo wikamghenjera. 9Hata iji m'baa wa arusi watoa agho machi ghiwurie divei, nao usemanyagha andu ifumie, (ela awo wadumiki werekoghe wikimanya) ukammbanga uja bwana arusi, 10ukamzera, “Kula mundu wadaneka wandu divei iboie kiimbiri, wandu wikanywa na ndighi, niko uredagha ija ya machi-machi. Ela oho kwaduagha na divei iboie hata idana!”

11Mwakilimbiti uhu wa imbiri, Jesu orem'bonyereghe aja Kana muzi ghwa Galilaya; ukaghuwonyera wubaa ghwake, na wanughi wake wikamrumiria.

12Nyuma ya agho, Jesu, na mae, na waruna, na wanughi wake, wikasea cha Kafarnaumu; wikakaia aho kwa matuku matini.#Mat. 4.13

Jesu kughenda Hekalunyi

(Mat. 21.12-13; Mk. 11.15-17; Lk. 19.45-46)

13Ngelo ya Ndima ya Pasaka ya Wayahudi erekoghe yavika kaavui, na Jesu ukajoka Jerusalemu.#Kuf. 12.1-27 14Nao aja Hekalunyi ukakua wandu wikiuza ng'ombe, na ng'ondi, na maringo; na awo wibadilishanagha pesa wiko kidombo mezenyi kwawo. 15Nao Jesu ukaboisa kiboko cha mirizi, ukawifunya Hekalunyi wose, na ng'ondi na ng'ombe; ukaridia pesa ra awo werekoghe wikibadilishana, ukaribingilisha meza rawo; 16ukawizera awo werekoghe wikiuza maringo, “Rifunyenyi noko iri rose, msakeibonya nyumba ya Aba ikaie nyumba ezoghoria.” 17Wanughi wake wikakumbuka seji iandikilo huwu, “Iriso jeikunda nyumba yako janibwagha.”#Zab. 69.9

18Nao Wayahudi wikamkotia, “Ni alamaki kuibonyagha idiwonyere angu koko na hachi ebonya maza iri?” 19Jesu ukawizera, “Inonenyi Hekalu ihi, nani nichaiagha kwa matuku adadu.”#Mat. 26.61; 27.40; Mk. 14.58; 15.29 20Nao Wayahudi wikaghamba, “Kwadima kuiagha Hekalu ereaghiloghe kwa miaka mirongo ina na irandadu kwa matuku adadu?” 21Ela Jesu odeghora Hekalu ya mumbi ghwake. 22Kwa huwu, iji warukishwa kufuma kwa wafu, wanughi wake wikakumbuka seji oreghorieghe huwo; wikaghirumiria maandiko na ilagho ijo Jesu orejighorieghe.

Jesu kurimanya tabia ra wandu wose

23Nao iji Jesu orekoghe Jerusalemu kwa Ndima ya Pasaka, wandu wengi weremrumirieghe kwa kuwona awo weke mwakilimbiti orewibonyereghe; 24ela Jesu nderewirumirieghe awo, angu orewimanyireghe wose. 25Hata nderekundieghe mndungi umghorie maza ra wandu anduangi, angu oremanyireghe rose riko andenyi ya mdamu.

موجودہ انتخاب:

JOHANE 2: TAITA

سرخی

شئیر

کاپی