JOHANE 1

Ilagho ja Irangi

1Aho kuzoenyi, Ilagho orekoghe aeni, na Ilagho orekoghe andwamweri na Mlungu, nao orekoghe ni Mlungu moni. 2Kufuma kuzoya, orekwanyeghe na Mlungu. 3Kwa chia yake Uo, vilambo vose vereumbiloghe ni Mlungu, hata kuseko Uo ndechereumbiloghe kilambo chingi anduangi. 4Andenyi kwake Uo korekoghe na Irangi, najo ijo irangi jerekoghe mwengere ghwa wadamu. 5Nagho mwengere ghwadalangala kirenyi, na kira ndechighusimie jingi anduangi.

6Mlungu oremdumieghe mndumu uwangwagha Johane,#Mat. 3.1; Mk. 1.4; Lk. 3.1-2 7nao orechieghe kuwighoria wandu malagho gha ugho mwengere, awo wose wimsikiragha wipate kurumiria. 8Uo nderekoghe ugho mwengere anduangi, ela oredumiloghe ughushuhudie ugho mwengere. 9Ugho mwengere ghorekoghe ghwa loli, ghuchee wurumwengunyi kumlangalishira kula mdamu.

10Uo Ilagho orekoghe wurumwengunyi, na wurumwengu ghoreumbiloghe kwa chia yake Uo, elaima ndeghoremmanyireghe anduangi. 11Orechieghe kwa isanga jake, ela wandu wake weni ndeweremmbusireghe anduangi. 12Elaima awa weremmbusireghe, wikarumiria kwake, orewinekieghe ndighi rewuya wana wa Mlungu. 13Awo werewurieghe wana wa Mlungu, si kwa ndighi ra kidamu, angu kwa ndighi ra mumbi, hata kwa lukundo lwa mdamu anduangi, ela kwa Mlungu.

14Nao Ilagho ukawuya mdamu uchue mvono na loli; ukakaia aghadi kodu, nesi dikaghuwona wubaa ghwake; nagho ni wubaa sa ghwa mwana wa ititi ufumie kwa Aba. 15Johane ukamghora ukighamba, “Uhu nuo moni neremghoragha ngighamba, ‘Kuchagha mndumu nyuma yapo uko m'baa kunichumba ini, angu orekoghe imbiri nisevalo.’”

16Kwa kuchua kwake, dapatire mvono isi diwose ghusesiagha jingi. 17Angu Mlungu orefunyireghe Sharia kwa chia ya Musa, ela mvono na loli verechieghe kwa chia ya Jesu Kristo. 18Jingi mndungi nderemmbonieghe Mlungu anduangi, ela Mwana wa ititi, uhu uko laghenyi kwa Aba, nuo ummanyishire.

Wushuhuda ghwa Johane M'baputizi

(Mat. 3.1-12; Mk. 1.1-8; Lk. 3.1-18)

19Ughu nigho wushuhuda ghwa Johane, iji wabaa wa Wayahudi weredumieghe Wakohani wabaa na Walawi kwake kufuma Jerusalemu kumkotia; “Welee, oho koko ani?” 20Nao moni ukawishuhudia worinyi, ukighamba, “Ini suo ungi Kristo.” 21Nawo wikamkotia, “Da koko ani? Oho ko Elija?” Johane ukawitumbulia, “Ini suo ungi.” Wikamkotia, “Oho ni uja mlodi?” Ukaghamba, “Hata.”#Wuk. 18.15,18; Mlk. 4.5 22Nao wikamzera, “Dighorie-cho ngera oho nani; dipate kuwighoria awo wididumie. Kwawuyaghamba oho ko ani?” 23Johane ukawitumbulia, “Ini ne uja mundu malagho ghake ghereghoreloghe ni mlodi Isaya huwu:

‘Lwaka lwa mndumu lwasikirika kireti;

ghoruonyi chia ya Bwana.’”#Isa. 40.3

24Wandu awo weredumiloghe ni Mafarisayo. 25Wikamkotia Johane, “Ikakaia oho kuseko Kristo angu Elija, angu uja mlodi-lee, kwaki sena kubaputizagha?” 26Nao Johane ukawitumbulia, “Ini nabaputiza kwa machi, ela koko umu kimusi aghadi konyu msemwichi. 27Nao nuo uchagha nyuma yapo, nisefwane hata kufungua vadu vake.”

28Maza iri rerebonyekieghe Bethania, kimonu cha moda ghwa Jordani andu Johane orekoghe ukibaputiza.

Mwana wa ng'ondi wa Mlungu

29Nakesho yaro, Johane ukammbona Jesu ukimchea ukaghamba, “Zighanenyi Mwana wa ng'ondi wa Mlungu, uinjagha kaung'a ra wurumwengu. 30Uhu nuo moni neremghoriagha, ‘Mndumu ucha nyuma yapo uko m'baa kunichumba ini, angu orekoghe imbiri nisevalo.’ 31Ini seremmanyireghe ngera uo moni nani, ela nerechieghe ngibaputiza kwa machi, eri nim'bonye uo umanyike kwa Israeli.”

32Nao Johane ukashuhudia ukighamba, “Neremmbonieghe Roho sa mbughi ukisea kufuma mlungunyi na kukaria aighu yake. 33Hata ini seremmanyireghe; ela Uo orenidumieghe nibaputize kwa machi orenizerieghe huwu, ‘Uo mundu kuchaammbona Roho ukimseria kufuma mlungunyi na kukaria aighu kwake, nuo moni ubaputizagha kwa Roho Mweli.’ 34Nani nawonie, niko nashuhudia angu uhu ni Mwana wa Mlungu.”

Wanughi wa imbiri wa Jesu

35Nakesho yaro sena Johane orekoghe kimusi ahoeni na wawi wa wanughi wake. 36Ukamzighana Jesu ukighenda ukaghamba, “Zighanenyi Mwana wa Ng'ondi wa Mlungu.” 37Waja wanughi wawi wikamsikira Johane ukighora, wikamnugha Jesu. 38Jesu ukaghaluka ukawiwona wikimnugha, ukawikotia, “Niki mlolagha?” Wikamtumbulia, “Rabi (kutambua kwaro Mwalimu) kwakaiagha hao?” 39Nao ukawizera, “Choonyi mmbone.” Nawo wikaghendanya wikawona andu ukaiagha, na ngelo iyo erekoghe sa saa ikumi, wikasindanya ijo ituku. 40Umu wa waja weremsikireghe Johane ukishuhudia malagho gha Jesu ima wikamnugha, orekoghe Andrea, mruna Simoni Petro. 41Imbiri ukammbona mruna Simoni, ukamzera, “Dammbona Masiha.” (Kutambua kwaro ni Kristo.) 42Ukamghenja kwa Jesu. Nao Jesu ukamzighana ukaghamba, “Oho ko Simoni mwana wa Johane, ela kuchawangwa Kefa” (kutambua kwaro ni Petro, angu Igho.)

Jesu kuwiwanga Filipo na Nathanaeli

43Jesu ukawona uaghenda Galilaya, ukammbona Filipo ukamzera, “Kuninughe.” 44Filipo orekoghe mundu wa Bethsaida muzi ghwa weke Andrea na Petro. 45Filipo ukammbona Nathanaeli ukamzera, “Dammbona Uo Musa oremuandikieghe sharienyi, na wokoni oreandikiloghe andenyi ya vuo va walodi; nao ni Jesu mwana wa Josefu, mundu wa Nazareti.” 46Nathanaeli ukamzera, “Idimika kilambo chingi chiboie chifume Nazareti?” Filipo ukamzera, “Choo kuwone.” 47Nao iji Jesu wammbona Nathanaeli ukimchea, ukamghora ukighamba, “Wonenyi Muisraeli wa loli, usene wukalo ghungi andenyi kwake anduangi.” 48Nathanaeli ukamzera, “Kwanimanya wada?” Jesu ukamtumbulia, “Nakuwonieghe aisi ya mtini imbiri Filipo usekuwangie.” 49Nathanaeli ukamzera, “Mwalimu, oho ko Mwana wa Mlungu! Ko Mzuri wa Israeli!” 50Jesu ukamzera, “Welee, kuarumiria angu nakuzera nakuwonieghe aisi ya mtini? Kuchawona maza mbaa kuchumba iri.” 51Nao ukachuria kughamba, “Namghoria loli, mchawona mlungunyi kukirughuka, na weke malaika wa Mlungu wikijoka na kusea aighu ya Mwana wa Mdamu.”#Kuz. 28.12

موجودہ انتخاب:

JOHANE 1: TAITA

سرخی

شئیر

کاپی