Mat 23

Yesu asi banima si bedi mumɔ ní Ɔsã nɔ Badɔbasɛ ba ni Farisianɛ ma su u

1Lɛ ya kede e, Yesu apani aki anɔkpi la ni yɛ badɔkpasi ba si, 2“Ɔsã nɔ badɔbasɛ ba ni Farisianɛ ma ba bɛki kigaglɛ tɔ bebu Mose isã nɛ ese. 3Lɛ loso e, lilɛ si mlabitɛ kidɔ kakaa gi biasi mlɔ si mlabitɛ ɛ aʋa, tɔ mlezeni liboe kakaa gi biasi mlɔ si mlabitɛ kude e; pɔ̀ mlakikpasi ba kiboebitɛ ɛ, lɛ ese linu si baʋíga ní ba bidɔbasɛbasɛ ʋɛ aʋa a. 4Ba isã nɛ ese kubùbù yo kuzɛɛkɔ si banima baʋítani lɛ aʋa kuga a, gi bilɛ ko ŋwisi adɔtu nyipu u gi bɛtrɔ ba kinɛ ɛ. Pɔ̀ bápɛ si bɛkpɛ ɔwla tɔ béfeke loo tɔ bɛpɔni ba tɔ betu la a.

5“Bizɛbitɛ liboe kakaa tɔ banima bamɔ ba. Mledi igɛmi nɛ gi bɛŋwlimi Aya liboe le ni lɛ aʋa a gi bizɛkɔ ɛ nya ba kutu yo, ni ba iwla lɛ, tɔ mlevu aŋu ní kiliɛ gi bikeme su i! Able mlevu aŋu dzɛ tɔ mledi kiliɛ gi ba igɛmi nɛ idze ní ba ewu la su i! 6Bɛdimɛ ni izekɔ gyɔgyɔ lɛ ní bidɔ mɛ iŋaklɔ nì egbo gbã na ní Yudanɛ ma itsaklɔ ɔ; 7Bízɛpɛ si ba pani ba nì kubùbù ní ene na mɛ nì tɔ baxwa ba si, ‘Ɔdɔbasɛ yɛ.’ Líma si baxwa mlɔ si.

8“ ‘Ɔdɔbasɛ yɛ’ lɛ ese linu si mlɔ pɔ́ ɛ, benemi ko mlenu lɛ ɔdɔbasɛ tole ko ɔlɛ ní mlɔ awla. 9Lɛ mlakíxwa ɔnɔnɔ ní kesea aʋa ya si, ‘Ɔka a’, lɛ ese linu si Ɔka tole ko ɔlɛ ní mlɔ awla ní lifunu ne. 10Lɛ loso mlakíki si baxwa mlɔ si, ‘Ɔnɔgbanɔ’, lɛ ese linu si mlɔ ɔnɔgbanɔ tolee ko onu Kristo ye. 11Lilɛ si, ɔnɔ ʋidi ye ní mlɔ kusi i, yɛ oze mlɔ ɔnɔsumu ye. 12Ɔniliɛ gi aabitɛ isu ya ɔnɔ ʋidi i, Aya aaple ni ye lɛ ɔniliɛ gi aaple ni isu ya ɛ, Aya aamu ni ye.

Yesu ebu kusɔliɔ baka ba gi benu aŋu mɛ beboebitɛ ba lipɔ ɔ

13“Litraze gagla ɛki mlɔ Ɔsã nɔ badɔbasɛ ba ni Farisianɛ ma! Mlɔ banɔ aŋu mɛ beboebitɛ ba! Mlɛda lifunu ne kaʋaŋaa opupo lo ekpɛ banima lɛ mlɔ ɔtutɔ pɔ̀ mlaʋíti iku u, lɛ mlaʋíki si banama gi beekeni idi i kyɛ, si beti eku u!

14“Litraze gagla ɛki mlɔ ɔsã nɔ badɔbasɛ ba ni Farisianɛ ma banɔ aŋu mɛ beboebitɛ ba. Mlɛtrɛ ní batrɛtrɛ ba bedze ba klɔ si mlɛɛpɔni ba, pɔ̀ kɔ ɛ, mlemeni ba kɔ mlɛzi ba kudɔkpa ɛ. Kɔ lɛ kede kɔ mlalɛ ni banima aŋu na mɛ, kɔ mlɛɛxwa Aya lipoe gblamadza tɔ mlɛkɔ emeni ba. Mlɔ kutuhehe o kɔ kwianyani sanɔ.

15“Litraze gagla ɛki mlɔ ɔsã nɔ badɔbasɛ ba ni Farisianɛ ma! Mlɔ banɔ aŋu mɛ beboebitɛ ba! Mlɛdzi kaale ni kaʋa tɔ mleekyi ɔnɔ, pɔ̀ xe mlemɔ ɔnɔ ɛki Aya ɛ, kɔ mlɛbitɛ yɛ ɔnɔ zimizi gi aasɔ̀ ni kifumoni ye me sani mlɔ tutɔ lɔ ɛ!

16“Litraze gagla ɛki mlɔ kuŋupoo, gi mlɛɛgbani banima ɛ! Mlɛɛbasɛ si, ‘Xe ɔnutɔ aka kitamu ni Yerusalem Lisɔligba lɛ ɛ, kitamu yɛ kínya yɛ; pɔ̀ xe aka kitamu ni Yerusalem Lisɔligba lɛ mɛ sika ɛ, kɔlɔ kitamu yɛ kinya yɛ.’ 17Kuŋupo ni baga! Liwoli lisa ɛveve e, sika yɛ loo Yerusalem lisɔligba lɛ gi lɛ liki si sika yɛ su adra na a? 18Mlɛɛbasɛ dzɛ si, ‘Xe ɔnutɔ aka kitamu ni ɔdɔpɔʋisuʋɔ lɔ ɛ, ɔsã nɔ óvu ye e; pɔ̀ xe aka kitamu ni bidɔ kɔkɔ ní ɔdɔpɔʋisuʋɔ lɔ aʋa ɛ, kitamu yɛ kivu ye.’ 19Kitɛ mlɔ bimbi ʋe bini te! Biwoli bísaɛ veve e, bidɔkɔkɔ ʋɛ loo ɔdɔpɔʋisuʋɔ lɔ gi lɔ ɛki bidɔkɔkɔ ʋɛ su bidra na a? 20Niteme si, xe ɔnutɔ aka kitamu nì ɔdɔpɔʋisuʋɔ lɔ ɛ, aka kitamu ni ɔsuʋɔ lɔ ni kidɔ kakaa gi bɛki ní lɔ aʋa ɛ; 21lɛ xe aka kitamu ni Yerusalem Lisɔligba lɛ ɛ, aka kitamu yɛ ni lɛ ni Aya, gi yɛ yɛ̀ ozekɔ ɛ; 22lɛ xe ɔnutɔ aka kitamu ni lifunu ne e, aka kitamu ni Aya yɛ likusigbo le ni Aya gi yɛ odi ní lɛ aʋa ɛ.

23“Litraze gagla ɛki mlɔ, Ɔsã nɔ badɔbasɛ ba ni Farisianɛ ma! Mlɔ banɔ aŋu mɛ beboebitɛ! Mlɛzɛɛki Aya oni me bikpɛdɔ flafla dɔni mlɔ inyɔ nɛ mɛ bɛ kapɛ liɔfɔa, pɔ̀ mlɛyurɔ Ɔsã nɔ bidɔbasɛbasɛ ʋɛ bɛ likenè ŋwisi, eboe me kutsatsa gbã, asigagadidi ni kuʋaziŋa. Mlabitɛ ní la ya aʋa pɔ̀ mlakiyurɔ agɔgɔ la a. 24Kuŋupo banɔgbanɔ ba! Mlɛyurɔ eboe nyipu nyipu na lɛ mleeti eboe fiteete la xunyɔ ɛ!

25“Litraze gagla ɛki mlɔ, ɔsã nɔ badɔbasɛ ba ni Farisianɛ ma! Mlɔ banɔ aŋu mɛ beboebitɛ ba! Mleplo mlɔ kupliʋi yo ni kuzi yo kedea, pɔ̀ kɔmɛ kwiyi ni bidɔ bɛ klɔ gi mlɛzɛ ni kigagla ni kuŋazi i. 26Wɔ Farisiɔnɛ! kaŋupo! Plo kepliʋia ni kezia mɛ gbã, kɔ ka kedea kyɛ kɛdra ɛ!

27“Litraze gagla ɛki mlɔ, ɔsã nɔ badɔbasɛ ba ni Farisianɛ ma! Mlɔ banɔ aŋu mɛ beboebitɛ ba! Mlalɛ ŋwisi idrɔ lɛ gi bedzà akalo ekɔ kinɛ, gi iipedi ní oge no o pɔ̀ ni kimɛ mɛ kɔ ɛ, iyí ni bekpo ba axwa ni bidɔ fumufumu. 28Niteme ké, ní oge no e, mlɛŋwi kí ɔnɔ kakaa sì mlɛpɛ̀, pɔ̀ ní kimɛ mɛ ɛ, mleyi ni aŋu mɛ kiboebitɛ ni etukpo me gagla.

Yesu apani aplɛ si Aya atráhe kutu i ki ɔsã nɔ badɔbasɛ ba ni Farisianɛ ma

29“Litraze gagla ɛki mlɔ, ɔsã nɔ badɔbasɛ ba ni Farisianɛ ma! Mlɔ banɔ aŋu mɛ beboebitɛ ba, Mlɛwa Aya yɛ beboedoplɛ ba idrɔ lɛ, lɛ mlɛlulɔ banɔ gbã ba idrɔ lɛ kyɛ ɛ; 30Lɛ mlɛsi isu ya si, atɛsi kwize blɔ baka ba lipoe le e, nya kúkpɛ inugu ni Aya yɛ beboedoplɛ ba kuyeye me. 31Nite si mlɛzi lɛ si mlɔ mlenu besoebi ba aki banama gi bá beye Aya yɛ beboedoplɛ ba a! 32Kɔlɔ mlatrɛ ní lɛ aʋa, tɔ mlagù eboa la gi mlɔ bakatsitsi ba bekpese e! 33Mlɔ bagblaga ʋa ni bagblaga bebi ʋa! Kitɛ mlegyo edi si mlaase ní lipɔ bubu le gi liakpɛ mlɔ ní kifumoni ye me na a? 34Lɛ loso e, mɛɛsi mlɔ si mɛɛtsisi mlɔ Aya yɛ beboedoplɛ ba ni beboete ba ani badɔbasɛ ba; mlɛtraye bátɔ, ku batɔ ni ise su, mlafiaʋi batɔ biseʋi ni Yudanɛ ma itsaklɔ, lɛ mlakpikpini batɔ dɔni ɔma mɛ kɔtsinɔ ɔma mɛ ɛ. 35Gani lɛ mɛ ɛ, kutuhehe kí banɔgbã̀ ba gi mleye e, kwiaba mlɔ aʋa, dɔni Abel dradra yɛ aʋa kɔzɛna ni Zakaria Baraxya yebinyime gi mleye ní Yerusalem lisɔligba lɛ ni ɔdɔpɔʋisuʋɔ lɔ kusi i aʋa. 36Mɛɛsi mlɔ ní lɛ mɛ si: sugba ɛ, kutuhehe kí kunɔye uliɔ pɔ́ kwiba mlɔ abla bebi ba pɔ́ aʋa a!

Yesu yɛ kulɔlɔɔ ki Yerusalem

37“Yerusalem, Yerusalem! Wɔ gi wòye Aya yɛ beboedoplɛ ba, xe wɔ̀sa Aya yɛ banɔkpɛkpɛ ba gi atsisi wɔ ɛ, akla na! Tasɛ mapɛ si mikpɛ wɔ bebi ba likpɔ, ŋwisi kiliɛ gi ɔkukɔne lɔ izeewe lɔ bebi ʋa ni siwlasasa sɛ, pɔ̀ wɔ́ki mɛ kude e! 38Dike, Aya edo ní mlɔ lisɔligba lɛ mɛ, lɛ loso e lilɛɛ ki mlɔ pluplu. 39Dɔnɔ abla kɔtsinɔ ɛ, mɛsi mlɔ si, mlatrámɔ mɛ tɔɔ kɔzɛna ni lipoe lɛ gi mlaapani si, ‘Aya ɔkrira ɔniliɛ gi atrába ní Ɔkaɛ linyi ne me e.’ ”

موجودہ انتخاب:

Mat 23: avn

سرخی

شئیر

کاپی