Mat 24

Yesu apani ní Yerusalem Lisɔligba lɛ kuyaʋi yɔ su

1Gi Yesu edo ní Yerusalem lisɔligba lɛ mɛ xe azaasɛ ɛ, yɛ badɔkpasi ba beti i pɔni yɛ si tɔ odi ligba lɛ 2Lɛ asi ba si, “Ee, pɔ̀ mlɛɛmɔ agba la ya petee e, mɛɛsi mlɔ si, sugba ɛ, akla ana petee biatsra la, lɛ litɔtɔ lítrawɔ ní litɔtɔ aʋa a.”

Yesu apani ní kunugu kpɛkpɛ ni keduyɔyɔ su

3Lɛ kede agi Yesu odi ni olif ye ise le lito le aʋa ɛ, yɛ badɔkpasi ba beti apɔni yɛ, lɛ beʋi ye si “Si blɔ lipoe lɛ gi eboa la petee aaba la mɛ ɛ. Lɛ kidiliɛ gi kiabu wɔ kubabaa ni kelea lidu le kubasɛ ɛ.”

4Yesu ebu le onu si, “Mleze ní aŋu plɛplɛ mɛ, tɔ mlakíki ɔnɔnɔ omeni mlo. 5Banɔ glegle biaba ní mɛ linyi ne me si, ba benu Kristo ye gi biameni banɔ glegle e. 6Mlaanu bigu ʋɛ ni agutaboe la onu ní idzage ne, pɔ̀ mledi lɛ aʋa si lifu likíku mlo, eboa la elu aaba la mɛ, pɔ̀ kelea lidupoe le liʋína a. 7Kese kiayɔ kedu ní kese su, lɛ kukusi kwiata kigũ ni kukusi, kuʋɛ kwiadɔ lɛ kese kiahwa ni ikɔ glegle e. 8Bɛya elue biaze ŋwisi kuyeʋiyeʋi ní kubipɔ mɛ.

9Lɛ biabu mlo kɔ si tɔ behe kutu aki mlɔ nì tɔ beye mlo, lɛ kelea pɔ kiatrɔ mlɔ ahwafi kɔkpɛ mɛ loso o. 10Ní lipoe lɛ klɔ mɛ ɛ, banɔ glegle biayurɔ ba kuziŋaa. Lɛ biatrɔ ba ahanuglɔ ba ahwafi, biabu ba ahanuglɔ ba kukɔ. 11Niteme si asia na beboedoplɛ ba biaŋwi gi biameni banɔ glegle e. 12Ɔkpɛ gi kuzimizi yo kwiasrɛ onu i, banɔ glegle ba kunɔdimɛnɔɔ onu kwiayɔ. 13Pɔ̀ ɔniliɛ gi aalɛ kɔzɛna ni lɛ ɔgù klɔ ɛ, Aya aabu ye. 14Lɛ Liboe Gbã nɛ ní Aya yɛ kaʋaŋaa gi kɛtraba su i, biapani lɛ klanɔ ní kelea mɛ petee gi liaki kudeonu si ɔnɔ kakaa aanu le e, xe ableke kelea kia gu u.

Litugu ne ní Yerusalem Lisɔligba lɛ mɛ

15Lɛ loso e, “Mletramɔ, ‘Litugu ne ní Yerusalem Lisɔligba lɛ mɛ’ ŋwisi kiliɛ gi oboedoplɛɛ Daniel apani i. Litralɛɛ ní ɔdradra klɔ.” ɔdɔkla yɛ ovu aŋu tɔ onu liboe lɛ ya ese. 16“Kɔlɔ ɛ, banama gi bali ní Yudea kesea mɛ ɛ, bese atrɛ ní eto la mɛ. 17Lɛ ɔniliɛ klɔ gi ɔtini yɛ ligba lɛ aʋa ɛ, ɔkizizi lipoe si yiple eku kepea mɛ tɔ yizɛɛkɔ yɛ bidɔ mɛ. 18Ɔniliɛ klɔ gi ɔlɛ ní yɛ ɔnyrɔ mɛ ɛ, ɔkidzi itrɛ kepea si yatrɛɛkɔ yɛ ewu la a. 19Liaze gagla ɛki bamɛdzɛ ba nì bebi ne ba ní ewe ala klɔ mɛ! 20Mleʋi Aya tɔ mlɔ kuseseo kukídɔ ní kublɔ lipoe le loo ní isu mɛ liyɔwe le aʋa! 21Lɛ ese linu si kupepeo ní lipoe lɛ klɔ mɛ ɛ, kwianyani sani kuliɔ gi kwiba edi i dɔni kelea mɛ okpese klɔ kɔna ni omono e. Lɛ kɔ elu kutrába liwewe tɔ ɔ. 22Pɔ̀ Aya atí ní ewe la aʋa kooko; xe ɔ́bitɛ nite e, ɔnɔnɔ ɔ́traze ligbã. Kɔkpɛ yɛ banɔxwaxwa ba, loso e Aya atráti ní ewe la aʋa.

23“Niteme si, xe ɔnutɔ asi wɔ si, ‘Di, imɔ Kristo ye ní ya!’ loo imɔ yɛ ní kɔlɔ ɛ!’ wukízɛ yɛ aʋa ŋa a. 24Nite si basia nɛ ba gi biaba ní mɛ linyi ne me si ba benu Kristo ye ni banama gi biayɔ ɔlɛɛ si benu beboedoplɛ; xe biabitɛ enugutseboe ni eboe gi banɔ bámɔedii tɔ bɛkɔ emeni Aya yɛ banɔxwaxwa ba, xe liasɔnɔ ɛ. 25Mlata kutu! Masi mlɔ xe ableke lipoe le liana a.

26“Lɛ loso e, xe banima biasi mlɔ si, ‘Dike, aŋwi ní ɔyaya klɔ ɛ’ mlakídzɛ niklɔ; loo xe bɛpani si, ‘Dike, ɔkpasi ligba ɛ lɛ ya mɛ ɛ!’ mlakízi lɛ aʋa ɛɛŋa. 27Lɛ ese linu si, Ɔnɔɛ Yebi ye e, aaba ŋwisi dzeni kifububu dɔni kewetu ya gi kizɛŋwi ni keweku ya kinɛ ɛ.

28“Niklɔ gi bidɔ tsetse ʋe bifini i, niklɔ opéte ʋa bizɛkpɛ likpɔ.

Ɔnɔɛ Yebi ye yɛ kubabàa

29“Kyɔŋ ní baxixa ba klɔ ʋa kede e, liwo le liamɔni kuyi lɛ kanɔa mɛ kialɔsi, ɔdzidzi yɛ kyɛ ɔ́trakle tɔɔ, aŋwi na aawɔli, lɛ Aya aasugu kidɔ kakaa ni lifunu ne. 30Ni lipoe lɛ klɔ mɛ ɛ, Ɔnɔɛ Yebi ye kubaba gyesi ye aaŋwi ní liwɔ lɛ mɛ; lɛ banima pɔ́ ní kesea aʋa biabemi gi bɛmɔ Ɔnɔɛ Yebi ye gi atrába ní lifunu ne aplɛ la mɛ ni kigagla ani kusudra glegle. 31Nite si aatsisi Aya yɛ baxwɛdzɛ ba ni kakuklui ole gagla ni kelea mɛ akɔtɔ tene la pɔ́ aʋa, lɛ biaxogo yɛ banɔxwaxwa ba dɔni kelea mɛ kapɛ tiele tsini ka kapɛ ʋla.

Kudɔkpasi dɔnɔ ní ogbose lo su

32Lɛ Yesu apani si, “Mlaki tɔ ogbose lo ɔbasɛ mlɔ bidɔ, xe lɔ aya la alɛ wɔwɔ, xe ose lo ɛɛtuma ɛ, kɔlɔ mlete si kedzenilea keti pɔnɔ. 33Niteme ke xe mlɛɛmɔ eboa la gi ɛɛba la mɛ ɛ, mlete si lipoe le lina, lɛ lina kevunu ya a. 34Mlaplɛ aŋu si eboa la ya pɔ́ aaba la mɛ, xe ableke banama gi balɛ ligbã́ nɛ abla ɛ biatse. 35Lifunu ne nì kesea biaza, pɔ̀ me eboe la atráza liwewe e.

Ɔnɔnɔ ote liwe le loo lipoe lɛ gi Yesu aaba

36“Ɔnɔnɔ ote, liwe le loo ɔnyɔsasa nɔ, Aya yɛ baxwɛdzɛ ba ní lifunu ne loo Ɔnɔɛ Yebi ye kyɛ béte e, Ɔka Aya tete ko ete. 37Ɔnɔɛ Yebi ye kubaba ɛ, kwiaze ko ŋwisi nite gi lize ní Noa lipoe le me e. 38Kpɛ ɔtɔ kí kuni yiyio e, banima bɛzɛŋa, lɛ bɛzɛŋwɛ kyɛ, benyime nì badzɛ bɛzɛgbani baglɔ ʋa, kɔzɛna nani liwe gɔgɔ lɛ aʋa gi Noa emu eku ní onitsahu lo me e. 39Pɔ̀ bamɔ liboe lɛ gi lizɛba egyesi kɔzɛna nani lipoe lɛ gi kuni yiyio kwiba ɛgba ba ɛsɛ nɔ ɛ. Nite ké litraze xe Ɔnɔɛ Yebi ye aaba a. 40Ní lipoe lɛ klɔ mɛ ɛ, benyime tiaʋa biazɛwa axwɛ ní ɔnyrɔ mɛ, biasɛ ni tole, lɛ ɔʋla ɛ, biayurɔ yɛ ɛ. 41Lɛ badzɛ tiaʋa biaze ní lihɔkla nɛ aʋa a; biasɛ ni tole, pɔ̀ ɔʋla ɛ, biayurɔ yɛ.

42“Lɛ loso e, mleze ní aŋu plɛplɛ mɛ, lɛ ese linu si mléte liwe lɛ klɔ gi mlɔ Ɔkaɛ aaba a. 43Xe kepea ɔkaɛ ete elesi la lipoe lɛ klɔ gi oze ye aaba ɛ, wɔaka ní lɛ aʋa si aaze ni aŋu, lɛ ɔ́traki kude xe oze ye aatiku ní yɛ kepea mɛ ɛ. 44Lɛ loso e, mlɔ fɛ mlabla aplɛ, lɛ ese linu si Ɔnɔɛ Yebi ye aaba ní ɔnyɔsasa lɔ klɔ aʋa gi mlaʋídi yɛ kudeo onu i.

Ɔnɔsumu ye osumu ní kude gyɔgyɔ aʋa

45“Nite kɔ ɛ, nyaŋwɛ onu ɔnɔsumu gbã nì oboete e? Yɛ onu ɔniliɛ gi yɛ ɔkaɛ akɔ edu ní banɔsumu dzedze ba onu u, tɔ aaki ba bá kiŋaŋaɛ ni lipoe le aʋa. 46Liaku ɔnɔsumu liɛ klɔ isami xe yɛ ɔkaɛ adziba tsani yɛ gi eedi kepea aʋa mumɔ ɛ! 47Sugba mɛsi mlɔ si, yɛ ɔkaɛ aakɔ̀ ɔnɔsumu liɛ klɔ du ní yɛ bidɔ mɛ petee onu. 48Pɔ̀ xe onu ɔnɔsumu nyani nyani i, aasi isu ya sì, yɛ ɔkaɛ ɔ́tratsɔ odzi i, 49kɔ ekpese yɛ bahanuglɔ banɔsumu ba kukusi, lɛ aaŋa kɔ aŋwɛ ni badaŋwɛmu ba ɛ. 50Xe ɔnɔsumu liɛ klɔ yɛ ɔkaɛ aadzi i liwe lɛ gi odi yɛ kudeo onu i, ní ɔnyɔsasa lɔ klɔ gi óte aʋa ɛ. 51Yɛ ɔkaɛ aatsà yɛ kukpe kukpe lɛ aaki si yɛ nì banɔ aŋu mɛ beboebitɛ ba biaze ní kakpá tiele me. Niklɔ aabemi xe aata yɛ ene na a.

موجودہ انتخاب:

Mat 24: avn

سرخی

شئیر

کاپی