Mat 22

Abee ní lidzɛgbanɔwe le su

1Yesu egu kunugu yo aki ba dzɛ ní abee ʋa mɛ si, 2Aya yɛ kaʋaŋaa kalɛ ŋwisi nite gi okusi ɔtɔ eze e xe azɛɛgbani ɔdzɛ aki yebinyime e. Lɛ edu ɔdɔŋakplɔ aki banima a. 3Akpɛ yɛ banɔsumu ba sì bazɛ si banɔxwaxwa ba tɔ baba kudzɛgbanɔɔ ɔdɔŋa klɔ, pɔ̀ bádimɛ ní lɛ aʋa a. 4Lɛ loso akpɛ banɔsumu dzedze nì ole kí banɔxwaxwa ba si: ‘Mɛ ɔdɔŋakplɔ nɔ ni kidɔ kakaa kiflɔ; meyé mɛ egumenyime na nì ádzɛ la gi eku kumu yɔ ɛ, lɛ kidɔ kakaa kina a, mlaga ba ní kudzɛgbanɔɔ liwe le me.’ 5Pɔ̀ banɔxwaxwa ba báfuɛ ɛ, ba axwɛ na ɔza ko bezee di: batɔ bɛtrɛ ní ba inyrɔ nɛ mɛ, batɔ kyɛ bɛtrɛ ní ba axwɛ na mɛ, 6lɛ banɔ gɔgɔ ba bevu yɛ banɔsumu ba, bebu kinie ɛki ba lɛ beye ba ɛ. 7Isu iyeʋi okusi ye nyani nyani; niteme si akpɛ yɛ baguta ba lɛ beze ye banɔye ba klɔ ɔ xe bɛkani ba ɔma nɔ ɛ. 8Lɛ axwa yɛ banɔsumu ba lɛ asi ba si, ‘Mɛ obi ye kudzɛgbanɔɔ liwe le lina, pɔ̀ banama gi maxwa ɛ bégyeno aki lɛ ɛ. 9Le loso e, mlatsanì ɔma nɔ bede ʋa tɔ mlaxwa banima kisrɛsrɛ liɛ ko gi mlamɔ ɛ amani kudzɛgbanɔɔ liwe le me. 10Niteme si banɔsumu ba bɛtrɛ ɔma nɔ enè na mɛ ni bede ʋa aʋa, lɛ bɛkpɛ banama gi bɛmɔ ɛ likpɔ, bagbã̀ ni banyaninyani pɔ́, niteme si, kudzɛgbanɔɔ kepea keyi ni banɔxwaxwa ba.

11Pɔ̀ gi Okusi ye etiku tɔ yidi bababa ba ɛ, amɔ onyime ɔtɔ gi ɔ́kpɛ kudzɛgbanɔɔ liwu le e. 12Okusi ye eʋi ye si, ‘ɔʋia, kitɛ lize xe woti oku ní ya gi wɔ́kpɛ kudzɛgbanɔɔ liwu na a?’ Pɔ̀ onyimee óbu le onu u. 13Lɛ okusi ye asi yɛ banɔsumu ba si, ‘Mlanya yɛ ikli ni iwla, tɔ mlakɔ yɛ aŋwia kpɛ oŋwe no ní litumu ne me. Niklɔ kubemi ni ene kutàtà kwiaze.’ ”

14Lɛ Yesu agù yɛ liboe le si, “Bɛxwa banɔ glegle pɔ̀ basisamiatɔ ko bebú ba mɛ ɛ.”

Yesu apani ní igyɔ kutsatsa su

15Lipoe tɔ kede, Farisianɛ ma bɛsɛ lɛ bɛzɛbitɛ kunyanya tɔ bɛkɔ ɛ punu Yesu i vu gani beʋiʋi me. 16Lɛ bɛkpɛ ba badɔkpasi ba ni banɔatɔ gi bɛdɔ Herodes yɛ likpɔkpɛkpɛ lɛ mɛ ní Yesu klɔ ɔ, lɛ bɛpani si, “Ɔdɔbasɛ yɛ, kwite sì wónu ɔsia nɛ ɛ. Lɛ wɔ kudɔbasɛ yɔ kuli ní Aya yɛ kudeo aʋa ní anukwarɛɛ mɛ, wɔʋíkpɛ isu kunugu ní ɔnɔ gbagbe yɛ begyodi ba su u, lɛ ese linu si wɔkɔ litɔtɔ lɛ mɛ ɛki ba ozekɔ 17Si blɔ, kitɛ wogyodi? Liyɔ kedu ní blɔ ɔsã nɔ su si kutsa ɔgyɔ ɔki Roma banɛ ma ɔʋaŋaɛ loo kukí tsa na a?”

18Pɔ̀ gi Yesu kɔɔ, ete ba batrɔtrɔ nyani nyani ʋa loso e, apani si, “Mlɔ banɔ aŋumɛboebitɛ ba! Ege lɛ loso mlɛpɛ si mlefeke me edi i? 19Mlabasɛ mɛ kibɔ ɛ liɛ klɔ gi bizɛ kɔ ɛtsa ɔgyɔ lɔ ɛ!” Agi bɛkɔ kibɔɛ mani yɛ ɛ, 20eʋi ba si, “Nyaŋwɛ aŋu mɛ ni linyi bɛ ya a?”

21Bebu le onu si, “Kaisaro binɛ.” Lɛ Yesu asi ba si, “Nite kɔ ɛ, mlakɔ kidiliɛ gi kinu Kaisaro kiniɛ akí Kaisaro, tɔ mlakɔ Aya kiniɛ akí Aya.”

22Agi benu liboe lɛ ya ɛ, litu ba kugyɔ, lɛ bɛyurɔ yɛ xe bɛsɛ ɛ.

Yesu apani ní bekpo ʋa kuyɔyɔ su

23Ní liwe lɛ klɔ ke aʋa ɛ, Zadukianɛ batɔ gi bizedo si bekpo ʋa batrádzi ligbã́ tɔ ɛ, bɛba Yesu klɔ nì kuʋíʋi sì 24“Ɔdɔbasɛ yɛ, Mose asi blɔ sì xe onyime ɔtɔ agbani ɔdzɛ pɔ̀ bápɔ bebi xe etse e, lilɛ si yɛ oneminyime ɔgbani ɔtrɛtrɛ yedze tɔ bapɔ bebi aki yɛ ɔtrɛtrɛɛ. 25Abla ɛ, beneminyime tiegloele beze ní blɔ kusi. Otsitsi ye agbani ɔdzɛ pɔ̀ ɔ́pɔ bebi xe etse e, lɛ ayurɔ yedze aki yeneminyime e. 26Nite ke liba lɛ mɛ ɛki yeneminyime ʋla ɛ ní ɔtanɛ aʋa a, riɖiɖi kɔzɛna ogloele aʋa, ba tiegloele ba petee bɛgbani ɔdzɛɛ. Pɔ̀ ɔtɔtɔ ɔ́pɔ obi xe etse e. 27Gɔgɔ ɛ, ɔdzɛɛ kyɛ etse. 28Abla ní liwe lɛ klɔ aʋa gi bekpo ʋa biayɔ ɛ, ní banɔ tiegloele ba kusi bamɛ owoli yedze ɔdzɛɛ aaze? Gi ba pɔ́ bɛgbani yɛ edi na a?”

29Yesu ebu le onu aki ba si, “Mlɛ ta kese koŋ! Lɛ ese linu si mléte Aya yɛ liboe le loo Aya yɛ kigagla ɛ. 30Lɛ ese linu si xe bekpo ʋa bɛyɔ xe bedzi ligbã́ nɛ ɛ, biaze ŋwisi Aya yɛ baxwɛdzɛ ba kinɛ ní lifunu ne lɛ batrá gbani badzɛ loo zeni benyime. 31Ableke ní bekpo ʋa kuyɔyɔɔ su i, mlaʋíkla ʋídi liboe lɛ gi Aya asi mlɔ na a? Apani si, 32‘Mɛ menu Aya akí Abraham, Aya akí Isak, ni Aya akí Yakob.’ Yɛ onu Aya akí banɔ gbagbe ba, aní kí bekpo ʋa.”

33Agi linɔkpi le linu liboe le e, ba inugu itse ní yɛ bidɔbasɛbasɛ ʋɛ su.

Yesu abasi bidɔ ní ɔsaa nɔ gi ɛsa kedzi kuzɛ ɛ su

34Agi Farisianɛ ma benu si Yesu amwa ene na akpɛ Zadukianɛ ma onu i, bɛ kpɛ likpɔ, 35lɛ ba mɛ tole, ɔsã nɔ ɔdɔbasɛ ekeni edi si yipunu yɛ ni kuʋiʋi. 36Eʋi ye si, “Ɔdɔbasɛ yɛ, Ɔsã woli ɛsa kedzi kuzɛ na a?”

37Yesu ebu le onu si, ‘Lɔ wɔka Aya nì wɔ ɔna nɔ pɔ́, ni wɔ esobo la petee, ani wɔ begyodi ʋa pɔ́.’ 38Lɔ ya onu ɔtɔpu nɔ gi ɛsa kedzi kuzɛ ní isã nɛ kusi i. 39Ɔʋla lɔ gi eyi lo o lɔ onu si: ‘Lɔ wɔ ɔhanuglɔɛ ŋwisi wɔ ɔtutɔ wɔ isu ya.’ 40Mose yɛ Isã nɛ pɔ́ nì Aya yɛ beboedoplɛ ba ba bidɔbasɛbasɛ ʋɛ bɛ like ne lɛ ya.”

Nyaŋwɛ Yebi onu Kristo ye

41Agi Farisianɛatɔ bɛkpɛ likpɔ ɛ, Yesu eʋi ba si, 42“Kitɛ mlebu ní Kristo su u? Nyaŋwɛ Yebi onu u?”

Bebu le onu si, “Dawid yɛ lipo me obi onu.”

43Yesu eʋi ba si, “Kɔlɔ ege lɛ loso Aya yɛ Ɔfuɛfuɛ nɔ ɛki si Dawid ɔxwa yɛ si, ‘Ɔkaɛ’? Lɛ ese linu si Dawid apani si,

44“Ɔka Aya asi mɛ Ɔkaɛ si:

‘Ze niya ní mɛ kaŋa mɛ

kɔkpɛ ni lipoe lɛ klɔ gi makɔ wɔ ahwafianɛ ma kukpɛ ní wɔ kukliseo.’ 45Xe nite Dawid axwa yɛ si, ‘Ɔkaɛ’, kɔ kitɛ mɛ Kristo aaze Dawid yɛ lipo me obi i?”

46Ɔnɔnɔ ɔ́tani le onu kubu kí Yesu u, lɛ dɔnɔ liwe lɛ klɔ aʋa kɔtsinɔ ɛ, ɔnɔnɔ ɔ́tani yɛ liboeboe kuʋi tɔ ɔ.

موجودہ انتخاب:

Mat 22: avn

سرخی

شئیر

کاپی