Mat 21

Yesu eti eku ní Yerusalem ŋwisi okusi kinɛ ɛ

1Agi Yesu ni yɛ badɔkpasi ba beetipɔni Yerusalem i, bɛba ɛna Betfage ní olif ye ise le ketokpaa su. Niklɔ Yesu akpɛ yɛ badɔkpasi tiaʋa ní ɔtɔ nɔ ɛ. 2Lɛ asi ba si, “Mlatrɛ ní ɔmaa nɔ klɔ gi ɔlɛ mlɔ ɔtɔ nɔ mɛ ɛ. Xegi mleku ko e, mlaamɔ tedzi ɔtɔ gi bɛkpɛ ní ogbe no me nì Yebi ye. Mleble ʋa tɔ mlagbani ʋa amani mɛ. 3Lɛ xegi ɔnutɔ eʋi mlo liboetɔ ɛ, mlasi yɛ si, ‘Ɔkaɛ yɛ aziã ʋa a,’ nite si aayurɔ ba ɔki mlɔ kyɔŋ.”

4Liba lɛ mɛ nite atɔ Aya yɛ oboedoplɛ yɛ eboe la aba la mɛ si:

5“Mlasi Yerusalem ɔma ʋidi no me bezeze ba si,

Mledi, mlɔ okusi ye atrába ní mlɔ klɔ!

Epleni isu ya, lɛ ɔtini ní tedzi

ni yebi ye aʋa.”

6Nite si badɔkpasi tiaʋa ba bɛzɛ bitɛ kiliɛ gi Yesu asi ba ɛ: 7Begbani tedzi ye ni yebi ye manɔ, bɛkɔ ba bidɔkpɛkpɛ ʋɛ ɛtrɔ ní ba aʋa lɛ Yesu emu atrɔ ɛ. 8Banɔ glegle ni linɔkpi le me bebu ba bidɔkpɛkpɛ ʋɛ ɛplɛ ní kudeo me, lɛ banɔatɔ fɛ bɛtsà kuwlakpasa ɛplɛ ní kudeo me ɛki yɛ tɔ ɔga ɛ. 9Anɔkpi ala gi eze ní Yesu ɔtɔ nɔ ni yɛ kedea bekpese ɔsaye kukpɛ si, “Hosana ki Dawid yɛ lipo me obi ye! Aya ɔkrira ɔniliɛ gi atrába ní Ɔkaɛ yɛ linyine me! Biakpɔ Aya ní Lifunu ne ɔgyɔgyɔ klɔ ke!”

10Agi Yesu eti eku Yerusalem i, ɔma nɔ pɔ́ ɛkpa ge. Lɛ banima beʋi si, “Nyaŋwɛ iliɛ ya lee e?” 11Lɛ linɔkpi le libu le onu si, “Yɛ onu Aya yɛ oboedoplɛ ɛ Yesu gi ádɔ ní Nazaret ní Galilea a.”

Yesu akpikpini badɔda ba ní kasɔlipea mɛ

12Yesu etiku ní Yerusalem Kasɔlipea mɛ lɛ akpikpini banama petee gi bɛɛda bidɔ mɛ ní banama gi beedzi bidɔ mɛ ni níklɔ ɛ. Ekyi banama gi bɛɛyaʋi bibɔ ʋɛ ba ikplɔ nɛ ewe e, lɛ etutru banama gi bɛɛda akpakpo la ba egbo la eʋe e. 13Lɛ asi ba si, “Bɛŋwlimi kpɛ ni Aya yɛ liboe le me sì Aya apani sì, ‘Mɛ Lisɔligba lɛ ɛ, biaxwa lɛ si, ligba gi biazesumu me ní lɛ mɛ ɛ. ‘Pɔ̀ mlɛ kɔ lɛ ɛbitɛ okpokɔ ki beze ba!”

14Kuŋupoo ni banama gi báʋitani kuga ɛ, bɛba yɛ klɔ ní Kasɔlipea mɛ, lɛ ayɔ ni ba ɛ. 15Kusɔliɔ baka ba ni Ɔsã nɔ badɔbasɛ ba bɛmɔ kusuyeʋi gi bɛmɔ enugutseboe ala gi azɛɛbitɛ ɛ, ni banuvɔ ba gi bɛzɛkpɛ ozi ní Kasɔlipea mɛ si, “Hosana kí Dawid yɛ lipo me Obi ye e!” 16Lɛ loso beʋi Yesu si, “Dani woenu eboa la gi banuvɔ ba ya bɛɛpani i?”

Lɛ Yesu ebu le onu si, “Ee menu.” “Mlaʋíkla Aya liboe le oʋídi si, ‘Mlɛ basɛ banuvɔ ba nì bebi ba sì biaki kukpɔ̀kpɔ̀ liɔ gi kwiflɔ na a?’ ”

17Lɛ Yesu asɛ ní banima su ní Yerusalem lisɔligba lɛ mɛ xe edo ní Yerusalem atrɛ ní Betania ɔma nɔ mɛ, niklɔ azɛɛfɛ.

Yesu exo ifi akpɛ ogbose lo

18Agi Yesu edziitrɛ Yerusalem keletitia livlɛ lɛ ɛ, kuʋe kwizeeku ye. 19Amɔ ogbose ní kedèpɛa lɛ atrɛ ní lɔ su i, pɔ ɔ́mɔ lisebi tɔ́tɔ ni lɔ mɛ sani awlakpa tsali. Lɛ asi ose lo si, “Wɔtrayo esebi liwewe tɔ ɔ!” Kyɔŋ klɔ ko e ogbose lo etse.

20Agi badɔkpasi ba bɛmɔ te e, ba inugu etse. Lɛ beʋi ye si, “Kitɛ lize xe ogbose lo etse kpla te na a?”

21Yesu ebu le onu si, “Matrɔ likla lɛ aʋa aki mlɔ si, xe mlɛziŋa a xe mlɛ́keɖi i, mlaatani kidiliɛ gi mabitɛ aki ogbose lo e, kubitɛ. Aní lɛ tete, pɔ̀ mlaatani ketokpa lia ya kyɛ kusɛ si, ‘Kpaʋi tɔ zɛɛŋwia isu ya akpɛ ní axu la mɛ,’ lɛ lia ba lɛ mɛ ɛ. 22Xegi mlɛziŋa ɛ, kidɔ kakaaɛ liɛ gi mlaʋi i xe mlɛxwa Aya ɛ, mlamɔ kɛ.”

Kuʋiʋi ní Yesu yɛ kigaglaɛ su

23Yesu edzi aba Yerusalem Kasɔlipea mɛ; lɛ gi azɛɛbasɛ bidɔ mɛ ɛ, kusɔliɔ baka ba ni banɔ tsitsi ba bɛba yɛ klɔ lɛ beʋi ye si, “Kigagla woli wɔmɔ xe wɔɛbitɛ eboa la ya elu u? Lɛ nyaŋwɛ aki wɔ kudeo?”

24Yesu ebu le onu si, “Maʋi mlo liboe tile ko, lɛ xe mlebu le onu i kí mɛ ɛ, maasi mlɔ kigaglaɛ liɛ klɔ gi kilɛ mɛ awla xe mɛkɔ ɛbitɛ eboa la ya a. 25Nifɔ Yohanes yɛ kigaglɛ ki dɔ gi kɛ azɛɛkɔ akpɛ kuni yo aki banima: Aya klɔ loo banima klɔ na?”

Lɛ bekpese eboe la kuŋwlɛ ní ba atsali kusi si, “Liboe woli lɛ kwiapani i? Xe kwibu le onu si, ‘Dɔni Aya kɔ ɛ,’ aaʋi blo si, ‘Kɔ ege lɛ loso mlázi Yohanes kuni yo ɔkpɛkpɛ aʋa ɛɛŋa ɛ?’ 26Pɔ̀ xe kwipani si, ‘Dɔni banɔ kɔ ɛ,’ kwise lifune kidiliɛ gi banima biabitɛ ɛ, lɛ ese linu si ba petee bɛzi lɛ si Yohanes onu Aya yɛ oboedoplɛ.” 27Lɛ loso e, bebu le onu ki Yesu si, “Kúte.”

Lɛ asi ba si, “Lɛ kɔ mɛ fɛ, mátrasi mlɔ, kigaglaɛ liɛ gi mɛkɔ ɛbitɛ eboa la ya a.

Abee ní bebinyime tiaʋa ba su

28Yesu ebu abee si, “Abla ɛ kitɛ mlegyo edi ni liboe lɛ ya su u? Onyime ɔtɔ eze gi bebinyime tiaʋa beze ni yɛ awla a. Adzɛ otsitsi ye klɔ lɛ asi yɛ si, ‘Mobi ye, trɛ tɔ zɛɛwa axwɛ na ní wain yɛ ɔnyrɔ nɔ mɛ omono.’ 29Ebu le onu si, ‘Mápɛ si miwa axwɛ,’ pɔ̀ lɛ kede e, ekyi yɛ kugyodi yo lɛ atrɛ ɛ. 30Lɛ yɛka atrɛ ní obinyime ʋlaɛ klɔ, lɛ asi yɛ nite me liboe le ké. Ebu le onu si, ‘yoo, mɔka maadzɛ,’ pɔ̀ ɔ́dzɛ ɛ. 31Ba tiaʋa ɛ, bamɛ owoli abitɛ ní yɛka kupɛpɛɔ aʋa na a?”

Bebú le onu si, “Obinyime tsitsi ye.”

Lɛ Yesu asi ba si, “Sugba, mɛsi mlɔ si: babɔgyɔ ba ni bawawadze ba betu ɔtɔ ɛki mlɔ lɛ beti eku ní Aya yɛ Kaʋaŋaa mɛ. 32Lɛ ese linu si gi Yohanes kuni yo okpɛkpɛɛ aba mlɔ klɔ xe azaabasɛ mlɔ kude gbã gi mlaga ɛ, mlázi yɛ aʋa ŋa; pɔ babɔgyɔ ba ni bawawadze ba bɛzi yɛ aʋa ɛɛŋa. Lɛ gi mlɛmɔ nite fɛ ɛ, mlékyi mlɔ begyodi ʋa xe mlazi yɛ aʋa ŋa a.

Abee ní wain ɔnyrɔ nɔ aʋa bedidi ba su

33Yesu apani si, “Mlata kutu tɔ mlenu abee dzedze. Kese onete ɔtɔ eze, lɛ awà wain ɔnyrɔ ɔ, akpɛ kuka aklà ni lɔ̀, lɛ etu lizokpo akí wain yɛ kukakà ɛ, lɛ awa ɔnyrɔ nɔ bepepe ba ligba gyɔgyɔ ɛtɔ ɛ. Lɛ ahayi wain yɛ ɔnyrɔ nɔ akí ɔnyrɔ nɔ aʋa bedidi ba, lɛ atrɛ ní kude me e. 34Agi lipoe le lina kí wain yɛ kugugu yɔ ɛ, akpɛ yɛ baxwɛdzɛ ba atsisi yɛ ɔnyrɔ nɔ aʋa bedidi ba klɔ atɔ bazɛ yɛ ɔgyɔ lɔ amani yɛ. 35Lɛ ɔnyrɔ nɔ aʋa bedidi ba bevu yɛ baxwɛdzɛ ba a, bekusi tole, beye ɔtɔ, lɛ bɛsa ɔtɔ fɛ akla na ɛ. 36Onyimee edzi akpɛ yɛ baxwɛdzɛ dzedze batɔ gi bɛsrɛ sani batɔpu ba, lɛ ɔnyrɔ nɔ aʋa bedidi ba bɛ bitɛ ba nite me ke. 37Gɔgɔɛ, atsisi yebinyime ní baklɔ. Maka lɛ aʋa si, ‘biakpɛ kubùbù yo ní mobi ye su.’ 38Pɔ̀ gi ɔnyrɔ nɔ aʋa bedidi ba bɛmɔ obinyime e, bɛpani ni bahanuglɔ ba kusi sì, ‘Ɔnyrɔ nɔ onetee Yebi ye iliɛ ya, yɛ atráŋa ɔnyrɔ nɔ. Mlaki tɔ kuye ye, atɔ kuzi yɛ ɔŋa klɔ!’ 39Nite si bɛ ʋã yɛ gbli, bu ye dono ní wain yɛ ɔnyrɔ nɔ mɛ ɛ, lɛ beye ye e.

40Lɛ Yesu eʋi ba si, “Abla xe wain yɛ ɔnyrɔ nɔ onetee aba ɛ, ege aabitɛ ɔnyrɔ nɔ bepepe ba na a?”

41Lɛ bebu le onu si, Lɛ mɛ lidra si aaye benyime zimizi ba klɔ ʋa, kɔ akɔ wain yɛ ɔnyrɔ nɔ aki ɔnyrɔ aʋa bedidi dzedze, gi bakɔ biakɔ yɛ ɔgyɔ lɔ mani yɛ xe wain yɛ ligúpoe le lina ɛ.”

42Yesu asi ba si, “Mlaʋíkla e ʋidi ní Aya yɛ liboe le me si,

‘Likla ɛnɛ klɔ gi beglitrɔ ba

begbe si líma ní liboeboe me e,

lɛ lidzi likla veve le koŋ

ní la petee kusi.

Ɔkaɛ yɛ abitɛ lɛ nite;

linu liboe gi litu blo kugyɔ ɔ!’

43“Lɛ loso mɛɛsi mlɔ si, Aya yɛ Kaʋaŋaa ɛ biazɛ ka ní mlɔ awla kɔ kí banama gi biayo esebi gbã na ɛ.”

44“Ɔniliɛ gi aagleʋe dɔ ní likla ɛlɛ ya aʋa ɛ, avini kukpe kukpe. Pɔ̀ xe likla ɛ lɛ ya lia wɔli dɔ ɔnutɔ aʋa ɛ, liahɔ yɛ pliplipli.”

45Agi Kusɔliɔ baka ʋidi ba ni Farisianɛ ma benu Yesu yɛ abee liɛ ɛ, betè si ba su azeegu kunugu yo, 46lɛ loso bɛ pɛ si beevu ye. Pɔ̀ bezese linɔkpi le, gi lizi lɛ si Yesu onu Aya yɛ oboedoplɛ ɛ.

موجودہ انتخاب:

Mat 21: avn

سرخی

شئیر

کاپی