Mat 20
20
Liʋɛ tsatsa ki baxwɛwa ba ní wain yɛ ɔnyrɔ mɛ
1Yesu atrɛ lɛ aʋa si “Aya yɛ Kaʋaŋaa kalɛ nite e. Livlɛ ɛtɔ lɛ onyime ɔtɔ edo atrɛ gi azɛɛkɔ apaa benete tɔ bawa axwɛ aki yɛ ni yɛ wain yɛ ɔnyrɔ mɛ 2Adimɛ si yɛ atsa liwe le apaa yɛ kibɔɛ aki ba; lɛ atsisi ba ní yɛ wain yɛ ɔnyrɔ nɔ mɛ ɛ. 3Edzi atrɛ ní ablɔ yɛ mɛ ní ɔnyrɔ ɔgɔtole me, lɛ azɛɛmɔ benyimeatɔ gi balɛɛ kididɔ mɔbitɛ ɛ. 4Lɛ loso e, asi ba si, ‘Mlɔ fɛ mlazɛwa axwɛ na ní mɛ wain yɛ ɔnyrɔ nɔ mɛ ɛ, atɔ maatsa liʋɛɛ nɛ gi ligyeno e ɛki mlɔ ɔ.’ 5Lɛ bɛtrɛ ní ɔnyrɔ nɔ mɛ ɛ. Nite ke atsisi banɔatɔ ní ɔnyrɔ nɔ mɛ ɛ, ní inyɔ liɔfɔ ni tiʋa ani inyɔ tita mɛ dzɛ. 6Agi inyɔ titsu iha kusa ɛ, edzì atrɛ ní ablɔ ʋa aʋa dzɛ lɛ azɛɛtsani benyime dzedzeatɔ gi balɛɛ ni niklɔ ɔ, lɛ eʋi ba si, ‘Ege lɛ loso mleezizi liwe zizi nɛ kidiidɔ mɔbitɛ na a?’ 7Lɛ bebu isu ya onu si, ‘Ɔnɔnɔ ɔ́ki blɔ lixwɛxwɛ ɛ.’ Lɛ asi ba si, ‘Lipɛ, nite kɔ mlɔ fɛ mlazɛwa axwɛ na ni mɛ wain yɛ ɔnyrɔ mɛ ɛ.’
8“Agi ɔlagɔ lɔ inyɔ tiglo isã ɛ ɔnyrɔ nɔ, onetee asi yɛ axwɛ na aʋa odidi ye si, ‘Xwa baxwɛwa ba tɔ tsa ba aʋɛ na kí ba. Kpese ní baxwɛwa gɔgɔ ba aʋa zɛkɔna ni baxwɛwa tɔpu ba aʋa a. 9Benyime ba klɔ gi bɛtrɛ ní axwɛ na mɛ, ní inyɔ titsu le me e, bɛtsa liwe le liʋɛ nɛ ɛki ba mɛ ɔkakaa. 10Lɛ gi lina banɔ tɔpu ba aʋa ɛ, begyo edi si ba liʋɛ nɛ liakeme ɔsanɔ; pɔ̀ ba fɛ ɛ, liwe tile liʋɛ ko bɛtsa ɛki ba mɛ ɔkakaa. 11Agi bɛzi ba kibɔɛ ɛ, beku kutɛ mɛ. 12Ba liboe le linu si, ‘Benyime ba ya gi bɛba kudegba ɛ, ɔnyɔsasa tole ko bɛwa axwɛ na a; lɛ blɔ kɔ ɔ kwize kuweo me e, wa axwɛ na liwe zizi nɛ petee. Pɔ̀ liʋɛ lide tile ko wɔtsa aki blɔ petee!”
13Lɛ ɔnyrɔ nɔ onete ebu le onu ki ba mɛ tole si, ‘Ta kutu, ɔʋiaa. Mába wɔ kura. Wɔtutɔ, wɔdimɛ si, wɔawa liwe tile axwɛ ɛ ki liwe le liʋɛ nɛ. 14Lɛ loso e, zi wɔ liʋɛ nɛ tɔ sɛ. Mɛ mapɛ si miki ɔxwɛwa gɔgɔɛ nite gi maki wɔ ɔ. 15Aloo mámɔ kude gi maabitɛ kidiliɛ gi mapɛ ni mɛ ɔtutɔ mɛ kibɔɛ na a? Kɔ ege lɛ loso wɔzã kimbi ní mɛ lipomepɛpɛ lɛ su i?’ ” 16Lɛ Yesu agù yɛ liboe le si, “Lɛ loso e, banɔ gɔgɔ ba biadzi batɔpu ba, lɛ banɔ tɔpu ba biadzi banɔ gɔgɔ ɔ.”
Yesu apani yɛ kutseo su kutanɛ ɛ
17Agi Yesu azeemu atrɛ ní Yerusalem i, ebu yɛ badɔkpasi liɔfɔ ni tiaʋa ba kuka ní kudeo aʋa, lɛ apani aki ba ɛ. 18Asi ba si, “Mlata kutu! Kwimu itrɛ ní Yerusalem. Niklɔ biakɔ Ɔnɔɛ Yebi ye kukpɛ awla ɔki kusɔliɔ baka ba ni Ɔsã nɔ badɔbasɛ ba. Biatsa kutsépia ɔki yɛ. 19Kɔ bɛkɔ yɛ kpɛ́ awla ɛki banama gi bénu Yudanɛ ɛ. Ba kyɛ ɛ, biakpɛ yɛ kakpaa kɔ bekusi ye e; gɔgɔ ɛ, kɔ beku ye ní ose lo su i. Pɔ̀ liwe tanɛ we le aʋa ɛ, Aya aayɔ ni yɛ ɛ dɔni bekpo ʋa mɛ.”
Yakobo ni Yohanes ba onee eʋi kupɔnɔ aki yɛ bebi tiaʋa ba
20Lɛ Zebedeo yedze aba Yesu klɔ ni yɛ bebinyime tiaʋa ba ɛ. Edu yɛ aklamasi na kesea akí yɛ, lɛ eʋi si ɔpɛ lipo me ɔki yɛ ɛ.
21Yesu eʋi ye si, “Ege wɔɛpɛ si mibitɛ ki wɔ ɔ?”
Lɛ ebu le onu si, “Kaplɛ ki mɛ si, mɛ bebínyime tiaʋa ba ya ɛ, biaze ni wɔ kaŋaa ni wɔ kabaa mɛ xegi woku wɔ kaʋaŋaa mɛ ɛ.”
22Lɛ Yesu ebu le onu aki bebinyime ba si, “Mléte kidiliɛ gi mleeʋi i, mlaatani ɔzia nɔ lidɔtu ilɛ gi matratu i, kutu na?”
Bebu le onu si, “Ee, kwiatanɔ.”
23Lɛ Yesu asi ba si, “Mlaatani mɛ lidɔtu le kutu baa; Pɔ̀ kigagla kíma ní mɛ awla si mikyá ɔniliɛ gi yɛ aaze ní mɛ kaŋaa loo kabaa mɛ ɛ. Banɔaklɔ gi Mɔka abla izekɔɛ lɛ klɔ akɔ ɛ, ba ko biatani niklɔ kuze e.”
24Agi badɔkpasi liɔfɔ gɔgɔ ba benu liboe le e, bɛmɔ kusuyeʋi ní beneminyime tiaʋa ba su. 25Lɛ loso Yesu axwa badɔkpasi ba akpɛ likpɔ, lɛ asi ba si, “Mlete si banama gi bizɛ ŋa banama gi bénu Yudanɛ ma aʋa ɛ, bizɛɛŋa kuka ní ba aʋa, lɛ ba onu bezeze ba ɛ, bɛmɔ kigagla ní ba aʋa a. 26Pɔ̀ líma si lize ní mlɔ kusi nite e. Lɛ loso xe mlɔ mɛ ɔtɔ apɛ si yize ɔnɔ ʋidi i, lilɛ si oze ɔnɔsumu ɔki mlɔ bagɔgɔ ba; 27Lɛ xe mlɔmɛ tole apɛ si yize ɔtɔpu i, lilɛ si oze ŋwisi ɔnɔ dzidzi kí mlɔ bagɔgɔ ba a. 28Lilɛ si mlabitɛ nite lɛ ese linu si Ɔnɔɛ Yebi ye ɔ́ba si besumu ye e, boŋu i, aba si tɔ yisumu atɔ yikɔ yɛ ligbã nɛ ɛkɔ ɛki banɔ glegle ba ligbã kuzɛɛzɛ.”
Yesu ayɔ ni kuŋupo tuʋa
29Agi Yesu ni yɛ badɔkpasi ba bɛzɛɛ sɛ ní Yerixo e linɔkpi ʋidi itɔ lize ni Yesu kude. 30Lɛ benyime tiaʋa gi beze kuŋupo e, beze ní kudeo su, lɛ gi benu si Yesu azɛɛza ɛ, bekpese ozí kukpɛ si, “Ɔkaɛ Dawid yɛ lipo me obi ye, di blɔ asigaga.”
31Linɔkpi le litɛni ba lɛ lisi ba si bagɔ tsriɖi. Pɔ̀, bɛkpɛ ozi gaglaa ɛsanɔ dzɛ si, “Ɔkaɛ Dawid yɛ lipo me obi ye e! Dí blɔ asigaga!”
32Yesu alɛɛ, lɛ axwa ba xe eʋi ba si, “Ege mlɛɛpɛ si mibitɛ ki mlɔ ɔ?”
33Bebu le onu si, “Ɔkaɛ, kwipɛ si kí tɔ kumɔ!”
34Yesu edi ba asigaga lɛ agbɔni ba bimbi ʋe e; kyɔŋ klɔ ko e, ba bimbi ʋe bidra, lɛ bekuni Yesu kude e.
موجودہ انتخاب:
Mat 20: avn
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
