Jenesis 13
13
Ebram mo Lot, tufala i seraot
1Nao Ebram wetem woman blong hem, mo Lot ya we i pikinini blong brata blong hem, trifala i tekem olgeta samting we trifala i gat, wetem ol slef* blong trifala, nao olgeta oli aot long Ijip, oli wokbaot i go long not, gogo oli kamtru long kantri ya Kenan* bakegen, long haf blong hem long saot. 2Ebram ya, hem i wan rijman, we i gat ol sipsip, mo ol nani, mo ol buluk blong hem, wetem ol silva mo ol gol blong hem tu. 3Nao oltaem, olgeta oli go stap lelebet long wan ples, gogo oli girap, oli wokbaot, nao oli go stap lelebet bakegen long narafala ples, gogo oli girap, oli wokbaot bakegen. Nao long fasin ya, oli stap wokbaot blong kambak bakegen long Betel. Oli stap wokbaot sloslo olsem, gogo oli kamtru bakegen long ples ya long medel blong tufala taon ya Betel mo Eae, we Ebram i bin mekem ples blong hem long hem bifo, 4mo i bin wokem wan olta long hem blong mekem wosip long Hae God. Nao hem i mekem wosip bakegen long Hae God long ples ya.
5Nao Lot tu i gat ol sipsip, mo ol nani, mo ol buluk blong hem, wetem woman blong hem, mo ol pikinini blong hem, mo ol slef blong hem. 6Be gras blong ples ya i no naf blong Ebram mo Lot, tufala i stap wanples long hem, from we ol anamol blong tufala oli plante tumas. 7Nao oltaem, ol man we oli stap lukaot long ol anamol blong Ebram mo ol man we oli stap lukaot long ol anamol blong Lot oli stap raorao long olgeta. Long taem ya, ol laen* blong Kenan, wetem ol laen blong Perij oli stap yet long kantri ya.
8Nao Ebram i talem long Lot se, “Lot. Yumitufala i wan famle nomo, be oltaem, ol man blong mi mo ol man blong yu oli stap raorao long olgeta. Hemia i no stret ya. 9I moa gud yumitufala i seraot. Olgeta graon ya i stap. I gud yu yu jusumaot haf we yu yu wantem, nao mi bambae mi tekem narafala haf. I stap long yu nomo blong yu jus.”
10 #
Jen 2.10
Nao Lot i luklukraon, i luk we bigfala levelples ya daon, klosap long Jodan Reva, i go olwe kasem vilej ya Joa long saot, hem i ples blong gudfala wota. Hem i luk we ples ya i olsem gudfala ples ya we Hae God i bin wokem fastaem, long Iden, mo i olsem gudfala graon ya long Ijip tu. Long taem ya, Hae God i no bin spolem tufala taon ya Sodom mo Gomora yet. 11-12Nao Lot i jusumaot olgeta graon long levelples ya daon, saed i go long is, klosap long Jodan Reva se i blong hem, nao i aot long ples ya we tufala i stap long hem, i wokbaot i go long ples ya. Ebram i stap long kantri ya Kenan, be Lot i wokbaot, i go stap long medel blong ol taon long bigfala levelples ya daon. Hemia nao fasin we tufala i seraot. Nao Lot i go mekem ples blong hem klosap long taon ya Sodom. 13Be ol man Sodom ya oli man nogud, oltaem oli stap mekem sin agens long Hae God.
Ebram i aot long ples ya, i go stap long Hebron
14Nao taem Lot i goaot finis, Hae God i talem long Ebram se, “Yu luklukraon, yu lukluk i go long olgeta graon ya we yu save luk. 15#Wok 7.5Olgeta graon ya evriwan, bambae mi mi givim i go long yu wetem olgeta we bambae oli stap kamaot biaen long yu, nao graon ya bambae i blong yufala gogo i no save finis. 16Bambae mi mekem olgeta ya we bambae oli kamaot biaen long yu oli kam plante we plante, we bambae i no gat man i save kaontem olgeta. Bambae i strong tumas blong kaontem olgeta, olsem we i strong tumas blong kaontem asis blong graon. 17Yu yu mas wokbaot blong lukluk olgeta graon ya, from we bambae mi mi givim olgeta evriwan i go long yufala.” 18Nao Ebram i aot long ples ya, i go mekem ples blong hem long Hebron, long graon blong wan man, nem blong hem Mamre. Long ples ya, wan man bifo i bin planem ol tri blong mekem wan tabu ples, mo ol man oli stap mekem wosip long ol tri ya, olsem ol god blong olgeta. Nao long ples ya, Ebram i wokem wan olta bakegen blong mekem wosip long Hae God.
موجودہ انتخاب:
Jenesis 13: BBR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bislama Revised Bible © Bible Society of the South Pacific, 2012.