Jenesis 12
12
Hae God i singaot Ebram blong i kam man blong hem
1 #
Wok 7.2,3; Hib 11.8 Nao Hae God i talem long Ebram se, “Ebram. Yu mas aot long ples ya blong yu, mo long ol famle blong yu, mo long haos blong papa blong yu, nao bambae yu mas go long wan narafala kantri, we mi bambae mi soemaot long yu. 2Bambae mi mi mekem we yu yu gat plante pikinini we bambae oli kamaot biaen long yu, nao bambae olgeta ya oli kam plante we plante. Bambae oli kam wan strongfala laen.* Mi bambae mi blesem yu, mo bambae mi mekem we plante man oli savegud nem blong yu, blong yu bambae yu kam olsem rod blong mi blong mi blesem plante man.
3 #
Gal 3.8
Olgeta we oli singaot long mi
blong mi blesem yu, mi bambae mi blesem olgeta,
be olgeta we oli singaot* trabol i kam long yu,
mi bambae mi mekem trabol i kam long olgeta.
Mi bambae mi yusum yu blong blesem ol man
blong olgeta narafala kantri long wol.#12.3: Narafala rod blong tanem tok ya long las haf blong vas ya i olsem. Bambae ol man blong olgeta narafala kantri long wol oli stap taltalem long olgeta se, ‘I gud Hae God bambae i blesem yu olsem we i blesem Ebram.’”
4-5Nao long taem we Ebram i gat seventi faef yia blong hem, hem i aot long ples ya Haran olsem we Hae God i talem long hem. Hem i tekem Sarae we i woman blong hem, mo Lot we i pikinini blong brata blong hem, tufala i biaen long hem, mo i tekem olgeta samting we trifala i bin kasem long taem ya we trifala i stap long Haran, wetem olgeta slef* blong trifala. Nao olgeta evriwan oli aot long Haran, oli wokbaot blong go long kantri ya Kenan.*
Nao taem olgeta oli kamtru long kantri ya Kenan, 6oli wokbaot i go long Sekem. Nao oli go kasem tabu ples ya More, we i gat wan olfala tri i stap long hem. Long taem ya, ol laen blong Kenan oli stap yet long ples ya. 7#Wok 7.5; Gal 3.16Nao Hae God i kamtru long Ebram long ples ya, i talem long hem se, “Hemia nao graon ya we mi bambae mi givim long olgeta we bambae oli kamaot biaen long yu.” Nao Ebram i wokem wan olta long ples ya blong mekem wosip long Hae God long hem. 8Biaen, olgeta oli stap wokbaot i go long saot, nao oli go long ples blong hil, klosap long taon ya Betel, long saed i go long is. Nao Ebram i mekem ples blong hem long medel blong tufala taon ya Betel mo Eae, we Betel i stap long wes mo Eae i stap long is. Nao long ples ya tu, hem i wokem wan olta, mo i stap mekem wosip long Hae God long hem. 9Mo biaen, hem i aot bakegen, i stap wokbaot blong go long haf blong kantri ya long saot.
Ebram i go long Ijip
10Nao long taem ya, olbaot long kantri ya Kenan,* i gat hadtaem blong kasem kakae, mo from samting ya, Ebram olgeta oli stap go moa long saot, gogo oli go kasem kantri ya Ijip, nao oli stap lelebet long ples ya. 11Be taem oli no kasem kantri ya yet, Ebram i talem long Sarae, woman blong hem se, “!Yu luk! Yu yu naes tumas, 12mo sipos ol man Ijip oli luk yu, bambae oli talem se, ‘Woman ya i woman blong man ya ya,’ nao bambae oli kilim mi mi ded, be oli livim yu yu stap laef. 13#Jen 20.2; 26.7I gud yu talem long olgeta se yu yu sista blong mi, nao bambae oli letem mi mi stap laef, mo bambae oli stap mekem i gud long mi from tok ya.”
14Nao taem olgeta oli gotru long Ijip, ol man Ijip oli luk we woman ya i naes tumas. 15Mo taem ol haeman blong king oli luk hem, oli go talemaot long king se, “King. Wan woman we i jes kam i naes we i naes.” Nao king i tekem hem i go stap wetem hem long haos blong hem. 16Mo from woman ya, king i stap presen long Ebram long ol sipsip, mo ol nani, mo ol buluk, mo ol dongki, mo ol kamel, wetem ol man mo ol woman blong oli slef* blong hem.
17Be from we king i tekem Sarae i go stap wetem hem, Hae God i stap sanem ol rabis sik i kam, i stap spolem hem wetem ol man blong hem. 18Nao hem i singaot Ebram i kam long hem, mo i tok long hem, i talem se, “!Ei! ?Weswe yu mekem olsem? ?From wanem yu no talemaot long mi we woman ya i woman blong yu? 19Yu yu talem se hem i sista blong yu, nao mi mi tekem hem i woman blong mi. !Be woman blong yu ya! !Yu tekem hem, yutufala i go!” 20Nao king i talem long ol man blong hem blong oli tekem Ebram wetem woman ya blong hem mo olting blong hem, oli sanemaot olgeta oli gowe long kantri ya, mo olgeta oli mekem olsem we hem i talem.
موجودہ انتخاب:
Jenesis 12: BBR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bislama Revised Bible © Bible Society of the South Pacific, 2012.