Yohana 8
8
Yesu akanila mvyelengwa mhuza.
1Yesu azahita kwe mulima wa miziyaγembe. 2Kukicha azahita vituhu mwe vikilongwa, wantu woshe wazamtimila, azaikala akiwafuza. 3Watabaluwangwa na Mafaliseyo wazaleta mvyele agwizilweye akiγoshola kilanga. 4Wazamuti: Mfuzi, uyu mvyele agwizilwe aho akiγoshola kilanga. 5Miya Mose azatilaγiliza mwe mulomongwa, we ivyoho tiwakome na kuwahomela mawe. 6Lushe iwe uγambai? Ivyoho wazavilonga na kumγeza, kangwe waone ndivyo wamfyalime. Miya Yesu azainama na shi, azagonda na chala mwe shanga. 7Miya wakishedila kumwuza, azainuka, azawati: Inywi ashiye mhuza aandiile kumhomela iwe! 8Azainama vituhu akigonda haja shi. 9Waja wakiviiva wazalawa muṅwe muṅwe, waivotiγwe mwe myoyo yawe; waandiilewo ni waγolokezi; azaashiγwa ike, kangi yuja mvyele a haja gati. 10Yesu azainuka, azamuti: Mlala, waja wakufyalimewo wa kuhi? Nkakuna akulahileye? 11Angwe: Nkakuna, Zumbe. Angwe ni Yesu: Imi nami sikulaha; hita! Miya lushe hela kuγoshola uhuza!
Langaila ja inu shi.
12Yesu azawalonga vituhu angwe: Imi ni langaila ja inu shi. Mwenitongela nkeaange mve lwiza, miya ataona langaila ja nkalamo. 13Mafaliseyo wazamuti: Ukilongela uwona ṅwenye, uwona wako so wa kweli. 14Yesu azawalandula angwe: Hata nikikilongela uwona ṅwenye, uwona wangu ni wa kweli, kwa kuti nataila, nikoanduka nako, kangi nikohita nako; miya inywi nkamtaila, nikoanduka nako, kangi nikohita nako. 15Inywi mulaha kimuntu, miya imi sina, niyelaha. 16Ati imi nalaha, anga milahile yangu ni ya kweli, kwa kuti si ike, miya ni haṅwe na yuja anitumileye. 17Kangi mwe milomo yenyu mwigondiγwe kuti: Uwona wa wantu waili ni wa kweli. 18Imi nakilongela ṅwenye uwona, kangi Tate anitumileye anilongela uwona. 19Wazamuti: Isho a kuhi? Yesu azawalandula angwe: Imi nkamunitaila, hata Tate nkamumtaila; ati mwanitaila imi, Tate yohe mwangamtaila. 20Izi mbuli azilongile akifuza mwe vikilongwa he kisanduku cha ntogolo. Nkakuna amgwizileye, hambu hakwe nkahazati hakinte.
Kufa na uhuza.
21Azawalonga vituhu angwe: Imi nahita, inywi nemunilonde, miya nemufe na uhuza wenyu. Nikohita nako imi, inywi nkamdaha kukubula. 22Wayuda wazaγamba: Atakikoma ṅwenye, kwa kuti aγamba: Nikohita nako, inywi nkamdaha kukubula? 23Azawati: Inywi mwanduka uko shi, imi nianduka uko ulanga; inywi mwaanduka mwe inu shi, imi sianduka mwe inu shi. 24Kwa ivyoho nizamiti: Nemufe na uhuza wenyu! Hambu mkishetozesha, kuti ni miyo, nemufe na uhuza wenyu. Wazamuti: Iwe u ndai? 25Angwe ni Yesu: Ṅwande nizavimiγambila, kuti ni miyo ndai. 26Mbuli zenyu nyingi nina nazo za kulonga na za kulaha, miya yuja anitumileye ni mkweli; nami viya, niivilevyo kwakwe, navilonga kunu shi. 27Nkawataile, kuti azawalonga mbuli ya ishe. 28Yesu azawati: Aho ndiho nezemumkweze ṅwanangwa ywa muntu, ne ndiho mtaile, kuti ni miyo; imi ṅwenye sina nivyoγoshola, Tate anihinyizevyo, navilonga. 29Yuja anitumileye a haṅwe na imi, nkaniashize ike, hambu mishi yoshe naγoshola vyemtamila.
Vyetikombola kweli.
30Akilonga izi mbuli, wangi wazamtozesha. 31Yesu azawaγamba waja Wayuda wamtozeshewo: Ati inywi mwaikala na mbuli yangu, mu wahina wangu kweli; 32nemtaile vye kweli, kangi viya vye kweli vitamikombola. 33Wazamlandula angwe: Ti mbeleko ya Abulahamu, nkatina tiyemwikaila utuṅwa kale hoshe, lushe ulonga ywai kuti: Nezemkombolwe? 34Yesu azawalandula angwe: Kweli namiti: Kila mweγoshola uhuza ni mluṅwa ywa uhuza. 35Kangi mtuṅwa nkaikala kale na kale mwe iyo nyumba ṅwenga, ṅwana vyale aikala mumo kale na kale. 36Ati ṅwana vyale amikombola, ne mtakombolwa kweli. 37Nataila kuti: Mu mbeleko ya Abulahamu, miya mwalonda kunikoma, kwa kuti mbuli yangu nkaiikala kwenyu. 38Nienevyo kwa Tate, ne nivyolonga; lushe inywi mwivilevyo kwa Tate, viγosholei! 39Wazamlandula angwe: Tate yweshu ni Abulahamu. Yesu azawati: Ati mu wana Abulahamu, γosholai ndima za Abulahamu! 40Miya lushe mwalonda kunikoma imi muntu nimiγambileye vye kweli, niivilevyo kwa Tate. Abulahamu nkaγoshoh ivyoho.
Wana Satani.
41Inywi mwaγoshola ndima za ishe ywenyu. Angwe ndiwo: Nkativyelwe kihuza, tina tate yweshi muṅwe, ni Mulungu. 42Yesu azawati: Ati Mulungu ni ishe ywenyu, mwanganikunda. Hambu imi nilawile kwa Mulungu, ne nikoanduka; 43hambu siizile kwa mbuli yangu, yuja atenituma. 44Nini mkishetaila milongele yangu? Kwa kuti nkamdaha kuiva mbuli yangu. Inywi mwaanduka kwa ishe ywenyu, ni yuja ṅwenye leba, kangi mwakunda kuγoshola, ishe ywenyu avyoheheleziγwa ndivyo; yuja ne mkoma wantu hata kale, na viya vye kweli nkaikala navyo, kwa kuti ṅwenye vye kweli nkana navyo. Akilonga vye mambeza, alonga vyeanduka kwakwe ṅwenye, hambu ni mumambeza, ni ishe ja mambeza. 45Miya kwa kuti imi nilonga vye kweli, nkamunitozesha. 46Kwenyu kuna mwenibunkula uhuza? Ati nilonga vye kweli, nini inywi mkishenitozesha? 47Mweanduka kwa Mulungu aiva mbuli za Mulungu; kwa ivyoho inywi nkamziiva, kwa kuti nkamwanduka kwa Mulungu.
Yesu amzinka Abulahamu.
48Wayuda wazamlandula angwe: So kweli, tikilonga kuti: U Msamaliya, una mzimu? 49Yesu azawahitula angwe: Imi sina mzimu, miya nimgimbika Tate, miya inywi mwanieza. 50Imi silonda, nigimbikwe, kuna mwenilonda na kulaha. 51Kweli namiti: Ati muntu aγoja mbuli yangu, kifa nkeachione kale na kale. 52Wayuda wazamuti: Lushe tizataila kuti: Una mzimu. Abulahamu azafa, hata wateγanyingwa, kangi iwe waγamba: Ati muntu aγoja mbuli yangu, nkezeaone kifa kale na kale. 53Kumbe iwe u mkulu kumzinka tate yweshu Abulahamu afileye? Kangi wateγanyingwa wazafa; ukiγalusha ndai? 54Yesu azalandula: Ati imi nakigimbika ṅwenye, anga utana wangu ni wa bule; miya ni Tate mwenigimbika imi, ni yuja, muyelonga, kuti ni Mulungu ywenyu. 55Miya nkamumtaila, miva imi namtaila; ati naγamba: Simtaila, anga ni mumambeza sa inywi. Miya namtaila, kangi naγoja mbuli yakwe. 56Ishe ywenyu Abulahamu azatowa zumo, akiγambilwa, kuti neaone mushi wangu, kangi azauona, azatamilwa. 57Wayuda wazamuti: Nkuzati ubinde mavuli milongo mishano, uγambe, uzamwona Abulahamu? 58Yesu azawati: Kweli namiti: Abulahamu ashizati avyalwe, imi ni haho. 59Ne wahododola mawe, kangwe wamhomele, miya Yesu azafishiγwa, azalawa mwe vikilongwa.
موجودہ انتخاب:
Yohana 8: KISHNT05
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
New Testament in Kishambala © Bible Society of Tanzania, 2005.
