Yohana 7
7
Yesu ahita kwe mviko Yelusalemu.
1Vikibinda Yesu azaanga kuja Galileya, hambu nkakundile kuanga uko Yudeya, kwa kuti Wayuda wazalonda, ndivyo wamkome. 2Miya uja mviko wa Wayuda weikailwa mwe makumbi ne ui hehi. 3Wanduγuze wazamuti: Uka kunu, uhite Yudeya, wahina wako waone ndima, uzoγoshola. 4Hambu nkakuna mweγoshola mbuli na kuzifisha akikunda kutailikana. Ati viya waviγoshola, lawila inu shi ṅwenye! 5Hambu wanduγuze ne washizati wamtozeshe. 6Yesu azawati: Mishi yangu nkainati, miya mishi yenyu i haho mishi yoshe. 7Inywi inu shi nkaidaha kumishuka, miya imi yanishuka, kwa kuti nailonga uwona, kuti miγoshwele yakwe ni mibada. Inywi hitai kwe uwo mviko! 8Imi seninekwela kwe unu mviko, hambu mishi yangu nkainati itimize. 9Akibinda kuwalonga ivyoho azananyamala Galileya. 10Wanduγuze wakibinda kukwela kwe uja mviko, yohena azakwela, miya nkalawile cha sale, atekifishafisha. 11Wayuda wazamlonda mishi ya uja mviko, wazaγamba: Yuja a kuhi? 12Hambu kwa wantu kuna nkanani nyingi kwa mbuli yakwe, kuṅwe wazaγamba: Ni muntu mtana, kuṅwe wazaγamba: Sivyo, aazaγanya wantu. 13Miya nkakuna alongileye mbuli yakwe cha sale kwa kuogoha Wayuda.
Yesu afuza mifuzize ye nguvu.
14Mishi ya uja mviko ikibula gati, Yesu azakwela mwe vikilongwa, azafuza. 15Wayuda wazamaka angwe: Uyu ataila zeze ugondengwa, kangi nkaufuziγwe? 16Yesu azawahitula, azawati: Mifuzize yangu so yangu, ni ya yuja anitumileye. 17Ati muntu akunda kuγoshola, yuja avyokunda, atataila mifuzize yangu, ati ianduka kwa Mulungu, ati nilonga yangu ṅwenye. 18Mwelonga vyakwe ṅwenye alonda, agimbikwe ṅwenye; miya mwelonda, yuja amtumileye agimbikwe, uyu ni mkweli, kangi ubada nkana nawo. 19So Mose aminkileye vitigo? Kangi inywi nkakuna mweγoshola vitigo. Mulondelai kunikoma? 20Wantu wazamlandula, wazamuti: Una mzimu! Mwelonda kukukoma ni ndai? 21Yesu azawalandula angwe: Ndimaṅwenga nizaiγoshola, mzaimaka nyoshe. 22Mose akimilaγiliza kushenga wana, so kwa kuti ni mbuli ya yuja Mose, ni ya wakale; kangi inywi mushi wa sabato mwashenga muntu. 23Ati ṅwana ashengwa mushi wa sabato, kangwe kitigo cha Mose chishebaniγwe, lushe ni zeze, mkikwelwa ni maya na imi, kuti nizahonya muntu mgima mushi wa sabato? 24Mshehakilahila kwa viya, muvyoona! Miya lahai masa yeagiza!
Yesu aanduka kwa Mulungu.
25Wayelusalemu kuṅwe wazaγamba: Uyu so yuja, wayelonda kumkoma? 26Kangi shivyo: Alonga cha sale, kangi nkawamlandula. Wafuṅwa watetaila kweli kuti: Uyu ni Kilisito? 27Miya uyu tamtaila, akoanduka nako, miya Kilisito ahozaizila, nkakuna mwetaila, akoanduka nako. 28Yesu azabilikila mwe vikilongwa na kufuza angwe: Kweli imi mwanitaila, mwataila, nikoanduka nako! Siizile kwa mbuli yangu, kuna mkweli anitumileye, mushimtailaye. 29Imi namtaila, hambu nianduka kwakwe, yuja ne anitumileye. 30Wazalonda ndivyo wamgwile, miya nkakuna amtozizeye na mkono, kwa kuti haja hakwe nkahazati habule.
Wantu wavyokunda kumgwila Yesu.
31Miya wantu wangi wazamtozesha angwe: Kilisito ahozaizila neaγoshole ntangilo zekula kuzinka ziya, uyu azoγoshola? 32Mafaliseyo wazaiva, kuti wantu wanoṅonezanya mbuli yakwe ivyoho, ne wavikizi wakulu na Mafaliseyo wahotuma waluγojo, kangwe wamgwile. 33Yesu azalonga: Mishi miγeke nike kwenyu, vikibinda nahita kwa yuja anitumileye. 34Nemunilonde, miya nkemunione; hambu ndiko niikale, inywi nkamdaha kukubula. 35Wayuda wazalonga mwe myoyo yawe angwe: Uyu aunga kuhita nahi, ndiko ishwi tishemwone? Akunda kuhita kwa weshu waasakanewo kwa Wagiliki, afuze Wagiliki wohe? Inu mbuli alongileyo, ina bontokelo ani? 36Kuti: Nemunilonde, miya nkemunione, kangi: Ndiko niikale, nkamdaha kukubula?
Yesu akoma nkilu.
37Mushi wa bindiliziza uja mviko ni mkulu kuzinka weyae; sho Yesu azaγoloka akibilikila angwe: Mwena nkilu aize kwangu, anywe! 38Mwenitozesha, sa ugondengwa uvyolonga, mwe ṅwili wakwe mtalawa mito migima ya mazi ye moyo. 39Ivyoho alongile kwa mbuli ya mpehongwa, ndiyo wakiunga kuinkwa waja wemtozesha. Hambu mpehongwa ne ishizati ioneke, kwa kuti Yesu nkazati agimbikwe.
Mkanano kwa mbuli ya Yesu.
40Wantu kuṅwe wakiiva izi mbuli wazaγamba: Uyu ni mteγanyingwa kweli. 41Watuhu wazaγamba: Uyu ndiye Kilisito; watuhu wazaγamba: Kumbe Kilisito aanduka Galileya? 42Ugondengwa nkauγamba kuti: Mwe mbeleko ya Dawidi na mwe muzi wa Betelehemu ne Kilisito amoanduka namo? Ivyoho wantu wazapangana kwa 43mbuli yakwe. 44Waja kuṅwe wazakunda kumgwila. Miya nkakuna amtozizeye na mikono.
45Waja waluγojo wazauya kwa wavikizi wakulu na kwa Mafaliseyo; waja wazawati: Nini mkishemleta? 46Angwe ni waluγojo: Kale hoshe nkakuna muntu alongileye ivyoho, sa uyu muntu avyolonga. 47Mafaliseyo wazawalandula: Kumbe hata inywi mzaazaγanyiγwa? 48Wafuṅwa ao Mafaliseyo kuna mwemtozesha? 49Ni waja wakiwa du washitailawo mulomongwa, wailaniγwe. 50Nikodemo, yuja shitileye kwakwe aho kale, ni ṅwiyae ywawe, awati: 51Kumbe milomo yetu yamlaha muntu, aishiuziγwe bosi, aishibunkuke aγosholevyo? 52Wazamlandula angwe: Kumbe iwe nawe u Mgalileya? Dosa baluwangwa, neuone kuti: Galileya nkakulawa mteγanyingwa! 53Ne wahohita kila muntu na kwakwe kaya.
موجودہ انتخاب:
Yohana 7: KISHNT05
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
New Testament in Kishambala © Bible Society of Tanzania, 2005.
