Yohana 6
6
Yesu aiγusha wantu 5000.
1-15.
1Mishi ikizinka, Yesu azaomboka bahali ya Galileya yeitangwa ya Tibeliya. 2Wantu wangi wazamtongela, kwa kuti wazaona ntangilo, aγosholezo na kuhonya watamu. 3Yesu azakwela mwe mulima, kuja azaikala na wahina wakwe. 4Uja mviko mkulu wa Wayuda wa Pasa ne ui hehi.
5Yesu akiinula mesho yakwe, akiona, kuti wantu wangi waiza kwakwe, azamγamba Filipo: Tikaγule hi nkande, awa waje? 6Azalonga ivyoho na kumγeza; hambu ṅwenye aitaile, ndivyo aγoshole. 7Filipo azamlandula angwe: Nkande za shilingi magana maili nkazibesha, kila muntu akiγuwa vidashi du. 8Mhina ywakwe muṅwe, ni Andeleya, nduγuye ja Simoni Petelo, amuti: 9Kuna kabwanga kunu kena migate mishano ya ngano na vikapala vili, miya ivi ni mbwai kwa wantu weinga aha? 10Angwe ni Yesu: Lekai, wantu waikale ndala ndala! Haja hantu hana lwanda lukulu. Wazaikala ndala ndala, waγoshi du wazaγelemuka makulija mashano. 11Yesu azaγuwa ija migate, azalavya ntogolo, azaiinkila kwa waja waikalewo, vivyoho hata viya vikapala, sa wavyokuna. 12Wakiiγuta, azawaγamba wahina wakwe: Dodolai mpuγutishi zishiγalezo, kangwe kusheoneke vyebanika! 13Wazadodola, wazamemeza ngahu kumi na mbili na mpuγutishi za ija migate mishano ya ngano; ne zishiγalezo, waja wakija. 14Wantu wakiona lwitangilo, aγosholeio, wazaγamba: Kweli uyu ni mteγanyingwa mweunga kuiza mwe inu shi. 15Yesu akitaila, kuti waunga kuiza, wamwinule, wamγalushe zumbe, azahita vituhu kwe uja mulima ṅwenye ike.
Yesu aγenda mwe bahali ulanga.
16-21.
16Kukishwa wahina wakwe wazasheela na kwe bahali, 17wazaingila mwe chombo, waomboke baliali na sheja na kuja Kapelinaumu. Lwiza lwigwele. Miya Yesu nkazati abule kwawe. 18Bahali izainulwa maimbi, mpeho ikiisa kukunta, 19wakibinda kuiγala chombo chawe luγendo lwa hindi ja saa ao kuzinka hadodo, wazamwona, avyoγenda mwe bahali ulanga; akibula hehi na chombo, wazaogoha. 20Yuja azawati: Ni miyo, msheogohe! 21Wazakunda kumhokela mwe chombo, viya du lushe chombo chiibuzile mwe ija shi, wabashizeyo. 22Keloi jakwe wantu wazaγoloka sheja he bahali, wazaona chombo kiṅwe du, nkawaene chombo kituhu kuja, kangi waiene, kuti Yesu nkaingile haṅwe na wahina wakwe mwe chombo, wazaona, kuti waja wazahita wenye du. 23Kuzaiza vyombo vya Tibeliya hehi na haja hantu, wajileho nkande, Zumbe akilavya ntogolo. 24Wantu wakiona, kuti Yesu nkaho, hata wahina wakwe nkawaho, wenye wazaingila mwe viya vyombo, wazahita Kapelinaumu kwa mlonda Yesu. 25Wakimwona sheja ja bahali, wazamuti: Mkulu, uizile zeze na kunu?
Nkande ya kweli.
26Yesu azawahitula angwe: Kweli namiti: Mkinilonda, so kwa kuti mzaona lwitangilo, ni kwa kuti mzaja nkande, mzaiγuta. 27Tendai nkande! Miya ija yebanika siyo, ni ija yeikala mpaka kwe nkalamo ya kale na kale, ṅwanangwa ywa muntu ayominka, ija ndiyo. Hambu uyu Mulungu Tate azamshungula ivyoho. 28Wazamuti: Titende zeze, kangwe tiγoshole ndima za Mulungu? 29Yesu azawahitula angwe: Inu ni ndimaya Mulungu, mkimtozesha yuja, amtumileye. 30Wazamuti: Uγoshole lwitangilo ani, tiluone, tikutozeshe? Una ndima ani? 31Watate zeshu wazaja mana mwe nyika, sa vigondiγwevyo: Azawainka nkande ilawileyo mwe lwingu, waje. 32Yesu azawati: Kweli namiti: Mose siye aminkileye ija nkande ilawileyo mwe lwingu, ni Tate mweminka nkande ya kweli ilawileyo mwe lwingu. 33Hambu nkande ya Mulungu ni yuja asheeleye mwe lwingu, ne mweinka inu shi nkalamo. 34Wazamuti: Zumbe, tinke mishi yoshe iyo nkande!
Nkande ya nkalamo.
35Yesu azawati: Imi ni nkande ya nkalamo; mweiza kwangu nkezeaone sala, mwenitozesha nkezeaone nkilu. 36Miya nizamiti: Mzaniona, kangi nkamunitozeshe. 37Vyoshe, Tate avyoninka, vyaiza kwangu, kangi mweiza kwangu, senimubente na se. 38Hambu nizasheela mwe lwingu, so kuγamba: Niγoshole nivyokunda imi, miya yuja anitumileye avyokunda. 39Ivi ne yuja anitumileye avyokunda: Vyoshe, avyoninka, nishevimwazize, miya nivifufule mushi wa bindilizo. 40Hambu ivi ne Tate avyokunda: Kila mwemwona ṅwanangwa akimtozesha ainkwe nkalamo ya kale na kale, kangi imi nitamfufula mushi wa bindilizo.
41Wayuda wazaṅuna, kwa kuti azalonga: Imi ni nkande ilawileyo mwe lwingu, 42wazaγamba: Uyu siye Yesu, ṅwana Yosefu? Ishwi nkatimtaila ishe na nine? Lushe alonga ywai kuti: Nizasheela mwe lwingu? 43Yesu azawalandula angwe: Msheṅunane! 44Nkakuna mwedaha kuiza kwangu, ati Tate anitumileye ashemhuna, nami nikimfukila mushi wa bindilizo. 45Kwa wateγanyingwa kuigondiγwe: Woshe nezewaikale waihinyiγwe ni Mulungu. Kila mweiva mbuli zelawa kwa Tate na kuzihina aiza kwangu. 46Muntu nkamwene Tate, amweneye ni yuja, ndiye akiikala kwa Mulungu; uyu ne amweneye Tate. 47Kweli namiti: Mwetozesha ana nkalamo ya kale na kale. 48-49Imi ni nkande ya nkalamo. Waishe zenyu wazaja mana uko nyika, wazafa. 50Shinu nkande ilawileyo mwe lwingu, kangwe ndiye aije, ashefe.
Nwili na mpome ya Yesu.
51Imi ni nkande ya moyo ilawileyo mwe lwingu; ati muntu aja inu nkande, atatenda nkalamo ya kale na kale. Nkande, ndiyo niminke, ni ṅwili wangu weinkilwa, kangwe inu shi itende nkalamo. 52Wayuda wazakanana lushe kuγamba: Uyu adaha zeze kutinka ṅwili wakwe, tiuje? 53Yesu azawati: Kweli namiti: Ati nkemuje ṅwili wa ṅwanangwa ywa muntu, ati nkemunywe mpome yakwe, nkamna nkalamo kwenyu. 54Mweja ṅwili wangu, mwenywa mpome yangu, ana nkalamo ya kale na kale, nami nitamfufula mushi wa bindilizo. 55Ṅwili wangu ni uje we kweli, mpomeyangu ni unywewe kweli. 56Mweja ṅwili wangu, mwenywa mpome yangu ana imi, nami nina naye. 57Sa Tate mwe moyo anitumilevyo, sa nivyona nkalamo kwa mbuli ya Tate, vivyoho yuja, ndiye anije, atatenda nkalamo kwa mbuli ya imi. 58Inu ni nkande ilawileyo mwe lwingu, so sa viyaho vya waishe zenyu wajilevyo, kangi wazafa. Ndiye aje inu nkande, atatenda nkalamo ya kale na kale. 59Ivi azavilonga akifuza vikiloi kuja Kapelinaumu.
Wahina waṅuna.
60Wahina wakwe wangi wakiviiva wazaγamba: Mbuli inu ni ndala, mwedaha kuiiva ni ndai? 61Yesu akitaila ṅwenye, kuti wahina wakwe wamṅuna, azawati: Ivi vyamiihila? 62He ati mwamwona ṅwanangwa ywa muntu, akikwela na kuja, ndiko akiikala? 63Mpehongwa ne yeinka wantu nkalamo, ṅwili siwo, nkauna bontokelo. Mbuli ziya, nimiγambilezo, ni za kimpeho, ni za nkalamo. 64Miya kuna wenyu washitozeshawo. Hambu Yesu aho kivoko aitaile waja, ndiwo washetozeshe, aimtaile yuja, ndiye nezeamwinkile. 65Azalonga: Kwa ivyoho nitamiγamba kuti: Nkakuna mwedaha kuiza kwangu, ati nkashungulwe ni Tate. 66Haja wahina wakwe wangi wazauya na nyuma, wazaleka kuanga naye.
Petelo alaviliza kuti Yesu ni Kilisito.
67Ne Yesu ahowati waja kumi na waili: Kumbe hata inywi mwakunda kuhita? 68Simoni Petelo azamlandula angwe: Zumbe, tihite na kwa ndai? Hambu mbuli uzolonga ni za nkalamo ya kale na kale. 69Kangi ishwi tiitozeshe, tiitaile kuti: Iwe u mṅazi ywa Mulungu. 70Yesu azawahitula angwe: Imi simishaγule kumi na waili? Kangi ṅwenyu muṅwe ni ṅwenye leba. 71Miya azamlonga Yuda, ṅwana Simoni, yuja Isikaliyota. Hambu yuja ne amwinkileye uko nyuma, waja kumi na waili ni ṅwiyae ywawe.
موجودہ انتخاب:
Yohana 6: KISHNT05
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
New Testament in Kishambala © Bible Society of Tanzania, 2005.
