:Jororn' 18
18
On kpon :Yusu' 'weh
(Mt 26.47-56; Mk 14.43-50; Lu 22.47-53)
1:Yeh :Yusu' gweh-a 'de Nyorsoa bo :wlu-eh 'i, :yee' or-: or-a'a: bo :na-nyor⧾-: on mu-', 'de on 'dhan 'ni-yu: an 'da-dih-a 'Kedlor, on pa 'de 'dhuu'-deh⧾-a' gba-dih-gba :or :ne-a 'o 'di. 2:Yee' :Juda' :or plo-a :Yusu', or yubo: 'o :dha 'o 'weh, deh no-eh, :Yusu'-: 'dekorn: or-a'a: bo :na-nyor⧾-: an 'gbon-dih 'o 'weh, 'do ti-a' klehkpeh bo. 3:Yee' :Juda' mu 'de 'dhuu'-deh⧾-a' gba-dih-gba :dao' bo 'weh, 'de or kpa 'Wloon-sorye' :noo'-: 'dekorn: Nyorsoa-a' 'sla-a' :poli'si: :noo'-: :yuh Nyorsoa-a' 'slaa: :za-nyor:⧾ :klaba'⧾-: 'dekorn: :Falasi'i-nyor⧾-: on dbo-a. An-a' klehkpeh :dao', on kpa :dhali-pu⧾-: 'nape⧾-: 'dekorn: :vorn-dih-deh⧾-: on 'ye :Yusu' kpon. 4:Yeh on 'ye :ao' no, :yee' :Yusu' yubo: deh⧾-a' klehkpeh :en mu-a :no-eh, 'do or 'bhun 'weh see. :Yeh or 'ye-uh'-a, :yee' or 'wluh 'de gba-dih-gba 'di 'weh, 'de or 'ya-dih-uh 'i. :Yee' or dhele-uh-: dih, or 'dae:, Nyor a 'bhorn 'kwla⧾-' dih :eh?
5'De on 'da, :Yusu' :or 'wluh-a 'Nazla, or-: 'o :a 'bhorn 'kwla⧾-' dih.
'De :Yusu' 'da, 'Mor-: :dhe dih.
:Yeh deh⧾ :daa, en mu-a 'dlu bo, :yee' 'do :wor :Juda' :or plo-a :Yusu', or :ne. 6:Yeh :Yusu' no-a, 'Mor-: :dhe dih, :yee' nyor⧾ :dao', on :za-dih: ken, 'de an-a' klehkpeh 'ga dih 'do 'bluhbor. 7:Yee' or dhele-uh-: dih :neheh', or 'dae:, Nyor a 'bhorn 'kwla⧾-' dih :eh?
'De on 'da, :Yusu' :or 'wluh-a 'Nazla :oo'.
8'De or 'da, 'On zela: a :gwluhuh' 'weh, 'on 'da, 'Mor-: :dhe dih. :Mor eh 'dhu 'mor-', a :taa 'kwla⧾-' dih 'bhorn, :yee' a 'tali: nyor⧾ :yuh :daa dih, on 'ye mu. ( 9Deh :daa, eh :no-eh:-', 'de or-a' wlu or :za-a-', on 'ye dhih 'jeh-' 'kpa, :eh 'dhu-a, 'On-ba:, nyor⧾ :on 'nyi-a 'on, 'on :se-' an-a' nyor :due' 'ma-dih:.)
10:Yeh eh no :ao', :yee' Samor' :Piteh' :or 'ble-a :bhla 'jlehn, :yee' or jli-eh 'de kpla-'-: dih, 'de or po-eh, or chehn 'o Nyorsoa-a' 'slaa: :za-nyor⧾-a' nyor :klaba'-a'a: 'bhoi-yu-a' :dila-dou'. 'Bhoi-yu: :dao', or-a' 'nyne :wor :Mala'ka:. 11Jorwor: :Yusu' :wlu-' 'de :Piteh' bo, or 'da, Po 'de :an-a'a: :bhla 'jlehn 'de kpla-' de. 'Kle 'ye-eh-a' 'korbuh 'On-ba: 'nyi-a 'on, 'on 'ye-a' 'di 'na-dih:, 'on :se-uh' 'di 'na-dih: i :e?
:Yusu' :nyna 'o 'Aneh ybei' dih
12:Yee' sorye' :dao'-: an-a'a: :janbe-: 'dekorn: :Jueh'-nyor⧾-a' :poli'si: :dao'-: mo-: kpon :Yusu'. 'De on san-or, 13on kpa-or 'de 'yu :due' an 'da-dih-a 'Aneh bo :zai'. 'Aneh no :Kai'fa-a'a: 'nynor :baa'. 'De :Kai'fa no Nyorsoa-a' 'slaa: :za-nyor⧾-a' nyor :klaba' 'do zon :dao' 'di. 14:Kai'fa-a' 'jeh :dao', or-: 'o, :or :wlu 'de :Jueh'-nyor⧾ bo :dee' see, or 'da, eh :nmor-: 'yi nyor :due' 'ye 'meh 'do :gwlor-nyor⧾-a' klehkpeh-a' dhih bo.
:Piteh' dhobo: :Yusu'-a' dhih-' 'weh
(Mt 26.69-70; Mk 14.66-68; Lu 22.55-57)
15:Yee' Samor' :Piteh'-: 'dekorn: :Yusu'-a'a: bo :na-nyor: :noror'-: mo-: zi 'o :Yusu' klei'. Jorwor: :ka Nyorsoa-a' 'slaa: :za-nyor⧾-a' nyor :klaba' yubo:-a bo :na-yu: :dao', :yee' or :due' mu 'o Nyorsoa-a' 'slaa: :za-nyor⧾-a' nyor :klaba'-a'a: 'gbu ybei', or zi 'o :Yusu' klei'. 16Jorwor: :Piteh' :se 'o mu. Or fuo-uh-: 'ken 'do gba-dih-gba-a' :kpaa' worn 'i, 'noror 'zorn. :Yee' :Yusu'-a'a: bo :na-yu: :dao', Nyorsoa-a' 'slaa: :za-nyor⧾-a' nyor :klaba' yubo:-a, or yi-: de, 'de or :wlu 'de 'nynor-kpao'-yu: :or 'dhu-a :kpaa' 'yli-eh bo, 'de or 'worn or 'ye :Piteh' :pa-dih:. 17:Yeh :Piteh' pa-a, :yee' 'nynor-kpao'-yu: :dao', or :wlu-' 'de or bo, or 'dae:, :On :se :Yusu'-a'a: bo :na-nyor⧾-a' nyor :due' ke :e?
'De :Piteh' 'da, 'Kei:. Eh :se 'mor-:.
18'Do ti :dao' 'di, :yee' :chehbe'-a: 'yle. Eh-: no-eh, 'de 'bhoi-nynuu-: 'dekorn: :poli'si: :dao'-: on dhba neh, 'de an 'wona. 'De :Piteh' mu 'o :ke, or 'ye 'wona:.
Nyorsoa-a' 'slaa: :za-nyor⧾-a' nyor :klaba' 'chleh :Yusu'
(Mt 26.59-66; Mk 14.55-64; Lu 22.66-71)
19:Yeh deh⧾ :daa, en mu-a 'dlu bo, :yee' Nyorsoa-a' 'slaa: :za-nyor⧾-a' nyor :klaba'-a 'chleh :Yusu', 'do or-a'a: bo :na-nyor⧾-: 'dekorn: or-a' nyor⧾ deh :torne-eh-: en-' dhih bo. 20:Yee' :Yusu' :wlu-' 'de or bo, or 'dae:, :Mor 'on :taa 'de nyor⧾ :on :ne-a dha 'kmo bo wlu, :yee' 'an nyna 'o :gwlor :gwea dih. 'Do ti-a' klehkpeh bo, 'an torne nyor⧾ deh, 'de :a-a'a: 'di :gweh-dih-sla⧾ 'zorn-: 'dekorn: 'do Nyorsoa-a' 'sla ybei'-: :dha :Jueh'-nyor⧾-a' klehkpeh, an 'kpa-dih-a :dha :due'. 'On 'see deh-' za, 'de 'gbu 'de. 21:Eh :korn dhih, 'de :an 'chleh 'on :eh? Dhele: nyor⧾ :on 'worn-a 'an wlu dih. On yubo: deh 'on :za-a-' 'weh.
22:Yeh :Yusu' :za-a deh :daa-', :yee' :poli'si-yu :due', :or :nyna-a 'o or 'bhun dih, or-: po-or 'kpa 'yli, 'de or 'da, 'Ka-: nyor no 'de Nyorsoa-a' 'slaa: :za-nyor⧾-a' nyor :klaba' bo :wlu-eh :e?
23'De :Yusu' 'da, :Mor 'on :za deh-zon-', :yee' za-eh'. Jorwor: :mor deh⧾ 'on :za-a-', :mor en 'dhu dhih 'jeh-', :yee' :eh :korn dhih, :on po 'on 'kpa 'yli :eh?
24:Yee' :ka on no-a or-a' san-a' :chio'lo:, :yee' 'ka-: or :ne, 'de 'Aneh dbo-or 'de :Kai'fa bo, :or no-a Nyorsoa-a' 'slaa: :za-nyor⧾-a' nyor :klaba'.
:Piteh' dhobo: :Yusu'-a' dhih-' 'weh :neheh'
(Mt 26.71-75; Mk 14.69-72; Lu 22.58-62)
25:Yeh deh⧾ :daa, en mu-a 'dlu bo, :yee' 'do :wor Samor' :Piteh' :ne, or 'wona 'gboror:, 'de on dhele-or dih, on 'da, :An-a' 'jeh :daa, :on :se :Yusu'-a'a: bo :na-nyor⧾-a' nyor :due' :ke :e?
:Yeh on dhele-or dih, :yee' or dhobo-ih' 'weh, or 'da, Keen'. Eh :se 'mor-:.
26:Yeh :Piteh' 'da :ao', :yee' Nyorsoa-a' 'slaa: :za-nyor⧾-a' nyor :klaba'-a'a: 'bhoi-yu :due', :or :ne 'yu :or :korn-a :dou' :Piteh' chehn-a 'o, on 'wluh-a, or-a' 'jeh :dao', or-: dhele: :Piteh' dih, or 'dae:, Eh :se :mor, 'on 'ye-a 'de 'dhuu'-deh⧾-a' gba-dih-gba 'di, 'do :Yusu' bo :e?
27:Yee' :Piteh' dhobo-ih' :neheh' :dele' ka. :Yee' 'do :dha :due' :dao', :soan'-beor zlo-'.
On kpa :Yusu' 'do Pale' ybei'
(Mt 27.1-2, 11-14; Mk 15.1-5; Lu 23.1-5)
28:Yee' :Jueh'-nyor⧾-a' nyor⧾ :na-dih-nyor⧾ :za 'de :Yusu' 'de :Kai'fa bo, 'de on kpa-or 'de 'Wloon-gomla-a' nyor :klaba'-a'a: 'sla bo, zorn bo-mlai'. Jorwor: :Jueh'-nyor:⧾ :dao', on :se-' 'bhorn on 'ye :kane' dih :ne. Eh-: no-eh, 'de on :se 'de 'sla :dao' ya 'ya. :Mor on no-eh, :yee' on se 'beh-dih: on 'ye 'Meh-a' :bla-dih: 'dlu dih-gor-a' dii-deh⧾ di. 29Eh-: no-eh, 'de Pale' :or no-a 'gomla-nyor⧾-a' nyor :klaba' :dao', or 'si 'noror on bo 'zorn dih, 'de or dhele-uh dih, or 'dae:, Deh 'i-deh: 'yu :daa, or no, 'de a ya-or 'noror 'on bo :eh?
30'De on 'da, :Mor or se deh-zon no :dee', :yee' :a :se-or' 'noror :on bo :ya i.
31:Yee' Pale' 'dae:, A-a' 'jeh 'yor-eh, a 'duo-or', a 'ye-or' zabe zi, :ka a-a'a: 'tele' no-a mu-a'.
'De on 'da, :A se 'kpih 'ble, :a 'ye nyor wlu 'ken chehn, or 'ye 'meh. ( 32Deh :daa, eh :no-eh:-', 'de deh :Yusu' :za-a-', 'de eh 'ye dhih 'jeh-' 'kpa, 'do 'meh-a' or mu-a 'meh-:, :ka or :korn or 'ye-a' :ne.)
33:Yee' Pale' 'ya 'de or 'bli 'sla ya-: de :neheh', 'de or 'da :Yusu' 'do or bo, or 'dae:, :Mor 'o, :or 'dhu :Jueh'-nyor⧾-a' 'keen-' :e?
34'De :Yusu' 'da, Deh :daa, :an dhele-a 'on dih, eh 'wluh 'o :an-a' 'jeh :gwlii' :e? :Ae' nyor⧾ 'sluh⧾ zela: :on :gwluhuh', 'an dhih?
35'De Pale' 'da, :Mor :on :taa 'ye, :yee' :on 'da, 'mor :Jueh'-yu :oo' :e? :An-a' 'jeh 'yor-eh-a'a: nyor⧾-: 'dekorn: Nyorsoa-a' 'slaa: :za-nyor:⧾ :klaba'⧾-: mo-: :za :on 'kwla 'noror 'on bo. Deh 'i-deh: :on no :eh?
36'De :Yusu' 'da, 'An nyor⧾ wlu 'ken :korn-eh se dha yao 'zorn :korn. :Mor eh 'dhu, eh :korn dha yao 'zorn :dee', :yee' 'an-a: bo :na-nyor⧾-a mu :vorn :dee', on :se-' 'worn-: i, nyor⧾ :se 'de 'on :Jueh'-nyor⧾-a' nyor⧾ :na-dih-nyor⧾ 'kwa :po i. Jorwor: 'an nyor⧾ wlu 'ken :korn-eh se dha yao 'zorn :korn.
37:Yeh or 'da :ao', :yee' Pale' 'da, :Yee' dhih 'jeh, :mor 'keen :oo' :e?
'De :Yusu' 'da, :Mor :on 'da, 'mor 'keen :oo', :yee' :on :se-' 'gbeh. Eh-a' dhih :oo', 'on 'wluh. 'De mor, eh-a' dhih :oo', 'on yi 'noror yao 'zorn :ke, 'on 'ye dhih-a' 'yor-eh ken dih zela:. Nyor⧾-a' klehkpeh :on :ne-a 'noror dhih-a' 'yor-eh-a' 'for bo, mo-: :an 'worn 'an wlu.
38:Yeh or 'da :ao', :yee' Pale' dhele-or-: dih, or 'da, :Eh 'dhu dhih-a' 'yor-eh-' :eh?
On chehn :Yusu' wlu 'ken, or 'ye 'meh
(Mt 27.15-31; Mk 15.6-20; Lu 23.13-25)
:Yeh Pale' :za-a deh :daa-', :yee' or 'si-: 'zorn, or mu 'de :Jueh'-nyor⧾ bo de :dele' ka, 'de or :wlu 'de on bo, or 'dae:, 'On :se-or' deh-zon 'bhun 'ye, :eh 'ye-eh' no, 'de zabe 'ye-or' kpon. 39Jorwor: :mor a-a' 'Meh-a' :bla-dih: 'dlu dih-gor-a' ti :taa 'o nyni 'o, zon 'o zon, :yee' 'an za 'de :kasue 'di nyor :due', :yor a 'bhorn-a, :or 'ye-a' 'de 'wluh. A 'bhorn 'on 'ye :Jueh'-nyor⧾-a' 'keen dih 'tali: 'do a bo :e?
40:Yeh or dhele-uh-a dih, :yee' on 'wor-', on 'dae:, 'Kei o. :A :se-or' 'bhorn. Jorwor: :Bala'ba:, or-: :a 'bhorn. (:Bala'ba: :dao', an 'bhorn-a, or no 'gomla worn :bla-dih-nyor⧾-a' nyor :due'.)
موجودہ انتخاب:
:Jororn' 18: TCHKR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
