:Jororn' 17
17
:Yusu'-a wlu 'de Nyorsoa bo, 'do or-a'a: bo :na-nyor⧾-a' dhih bo
1:Yeh :Yusu' gweh-a deh⧾ :daa, en-' :za-a' 'i, :yee' or pobo: 'de Nyorsoa 'bli yai', 'de or :wlu, or 'da, 'On-ba:, ti nyni 'o 'weh :naa. 'Nyi 'mor :or 'dhu-a :an-a' 'Yu-', 'an 'nyne dhih-a' 'i 'beh-a', 'de 'on 'ye :an-a' 'nyne dhih-a' 'i 'beh-a' 'nyi :ke. 2Deh no-eh, :on 'nyi 'on 'kpih 'do :gwlor-nyor⧾-a' klehkpeh ken, 'de 'on 'ye nyor⧾-a' klehkpeh :on 'nyi-a 'on, 'kmo :sie: :febeh' 'nyi. 3'Kmo :sie: :febeh' :wor 'dhu, on 'ye :on yubo:, :mor :or 'dhu-a Nyorsoa :due' 'klein' 'jeh ka, 'de on 'ye 'mor :or 'dhu-a :Yusu' 'Klae-', :on dbo-a yubo: :ke. 4'On 'nyi :an-a' 'nyne dhih-a' 'i 'beh-a' 'weh, dha yao 'zorn, 'do :koan: :on 'nyi-a 'on, or-a' 'yi :gweh-eh bo. 5:Yee' 'On-ba:, 'nyi 'an 'nyne dhih-a' 'i 'beh-a' :naa 'do :on ybei'. 'Nyi 'on dhih-a' 'i 'beh-a' :daa 'on 'ble-a 'de :on bo, 'de jorwor: 'bluhba-a mu-a :no-eh.
6Nyor⧾ :on 'nyi-a 'on, :on :za-a: 'de 'kmo 'di, mo-: 'on no-eh, 'de on yubo: :on deh 'jeh. On :korn 'de :on bo, 'de :on 'nyi-uh 'on, 'de on dhe 'o :an-a' wlu dih. 7:Yee' on yubo-eh' :naa, :ka deh⧾-a' klehkpeh :on 'nyi-a 'on, en 'wluh-a 'de :on bo. 8Deh no-eh, wlu :on 'nyi-a 'on, mo-: 'on 'nyi-uh, 'de on kpon-uh dih. :Yee' on yubo-eh' deh 'jeh neh, :ka 'on 'wluh-a 'de :on bo. 'De on po-eh dhih 'jeh-', :ka eh 'dhu-a :on mor-', :or dbo-a 'on.
9'An wlu 'de :on bo, 'do an-a' dhih bo. Eh :se 'kmo-a' dhih, 'on :se 'de :on bo :wlu. Jorwor: :yuh :on 'nyi-a 'on, an-a' dhih, 'an wlu 'de :on bo. Deh no-eh, on :korn 'de :on bo. 10Nyor⧾-a' klehkpeh 'on 'ble-a, on :korn 'de :on bo. 'De mor nyor⧾-a' klehkpeh :on 'ble-a, on :korn 'de 'on bo :ke. Nyor⧾-a' 'jeh :dao', mo-: :to-dih-eh nyor⧾ 'i, :ka 'an dhih 'beh-a 'i. 11'On :se-' dha yao 'zorn :ne i :neheh'. 'An yi 'de :on bo 'weh :naa. Jorwor: on :mloo', on sie dha yao 'zorn 'weh 'gboror:. 'On-ba: :or :ne-a gban 'i, :an-a' 'worn-:-' deh-a' :no-uh', de :an-a' 'yor-eh-a' 'kpih :on 'nyi-a 'on 'di. 'De :ka :a no-a nyor :due', on 'ye :ao' :ne :ke. 12Ti 'on :ne-a 'de on bo, 'on :se-' 'worn deh :se-uh' no, 'de 'kpih :on 'nyi-a 'on 'di. 'On pobo: 'o on bo dih 'weh, 'de an-a' nyor :ne-' 'ma. Jorwor: :yor :or :korn-a :or 'ye-a' gbe :zie:, 'de deh :an-a' 'chlee-deh :za-a-', eh 'ye-a' dhih 'jeh-' 'kpa, or :due' :oo', :or 'ma. 13'An yi 'de :on bo 'weh :naa. 'An za deh :daa-' 'weh :naa, :ka 'on :ne-a 'noror yao 'zorn 'gboror:, 'de 'an 'mona 'ye-uh' dih 'yi-dih: 'gabaa. 14'On po :an-a' tubo-wlu⧾ 'weh, 'noror on bo. Eh-: :korn dhih, 'de 'kmo 'nyeh-uh'. Deh no-eh, on se 'de 'kmo 'di :ne, :ka 'on no-a, 'de 'on se-a 'de 'kmo 'di :ne :ke. 15'On :se-' :on dih dhele:, :on 'ye-uh 'noror 'kmo bo :za, jorwor: :on 'ye-uh 'ku bo dih :tehn-dih:. 16On se 'de 'kmo 'di :ne, :ka 'on no-a, 'de 'on se-a 'de 'kmo 'di :ne :ke. 17:An-a' wlu no dhih-a' 'yor-eh:. :Yee' no :an-a' wlu :daa, 'de nyor⧾ :daa, on 'ye 'for 'i :dhe-dih-eh: 'do :on bo. 18:Ka :on no-a, 'de :on dbo-a 'on, 'noror 'kmo bo, 'ka-: 'o, 'on no, 'de 'on dbo-uh 'noror 'kmo bo :ke. 19'On dhe-dih: 'an 'jeh 'for 'i 'do :on bo, 'do an-a' dhih bo, 'de an-a' 'jeh :ke, on 'ye 'for 'i :dhe-dih-eh: 'jeh ka 'do :on bo.
20Eh :se 'an-a: bo :na-nyor:⧾ :daa, an-a' dhih :due', 'on :se 'de :on bo :wlu. 'An wlu 'de :on bo 'weh, 'de :yuh :an mu-a 'on dhih 'jeh-' :po, :mor on 'worn tubo-wlu:⧾ 'an-a: bo :na-nyor⧾-a mu-a :po, 'de on bo. 21'Nyi an-a' klehkpeh no nyor :due', 'On-ba:, :ka :on :ne-a 'on-', 'de 'on :ne-a :on-' :ke. :Yee' 'nyi on :ne :a no nyor :due', 'de 'kmo 'ye-eh' dhih 'jeh-' po, :ka eh 'dhu-a :on mor-', :or dbo-a 'on. 22Dhih-a' 'i 'beh-a' :on 'nyi-a 'on, or-: 'on 'nyi-uh :ke. 'De :ka :a no-a nyor :due', on 'ye :ao' :ne :ke. 23'On ne-uh' 'weh, 'de :on :ne 'on-'. :Yee' 'nyi on no nyor :due' 'jeh ka, 'de 'kmo 'ye-eh' yubo: :ka eh 'dhu-a :on mor-', :or dbo-a 'on, 'de :on ybeh-uh-a-', :ka :on no-a 'an :ybeh-a' :ke.
24'On-ba:, 'an 'bhorn nyor⧾ :on 'nyi-a 'on, :dha 'on :ne-a, on 'ye 'o :ne :ke, 'de an-a' 'yli 'ye 'an dhih-a' 'i 'beh-a' 'ye. Dhih-a' 'i 'beh-a' :daa, :mor 'o :or 'nyi-eh 'on, deh no-eh, :on :ybeh 'on-' 'weh, 'de jorwor: 'bluhba-a mu :no-eh. 25'On-ba:, :or 'sleh-a 'i, keen' :mloror' 'kmo se :on yubo:, jorwor: 'on yubo: :on 'weh. 'De mor nyor⧾ :on 'nyi-a 'on, on yubo-eh' :ka eh 'dhu-a :on mor-' :or dbo-a 'on. 26'On no-eh', 'de 'kmo yubo: :on, 'de mor 'an mu-eh :no :chio'lo:, on 'ye :on yubo:, 'de jorwor: :ybeh-a' :on 'ble-a 'do 'on bo, eh 'ye-uh' :ne, 'de 'an 'jeh 'yor-eh 'ye-uh' :ne :ke.
موجودہ انتخاب:
:Jororn' 17: TCHKR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
