MAKI 8

Ziizɛ nu wulu naagɔ wɔ̃nɔ kuloni

1Na maziɛgi zu kpɔ gwala ɣaa lɛɛni ba Ziizɛ ma kɔnɔ. Ŋɛni lɛ ŋɛni te ya tɔ mi. Na ʋaa ma Ziizɛ é ná kala dopoitiɛ lilini pɔ́ vɛ é ɣɛ te ma, 2“Kpɔgi ɣaazu‐maa‐wõi ɣa mà, ƃɔvɛlaale te kɛɛ sa bà ga folo saagɔ, ŋɛni nɛpɛ pɔ gɛ lɛ te ya tɔ mi. 3Ani gà te leve na te wɔ taa‐zuvɛtiɛ ga pulu, ta vata pelei ma. Tɔwɔ taniga te ziɣivɛ ŋada wooza.” 4Ná kala dopoitiɛ te gaa woteni zéea te ɣɛ ma, “Nu ɣa leve ɣɛ le é kpoolo‐ʋɔɔ wulo niitiɛ vɛ kpooʋei zu?” 5É te ɣaa za ɣa kɛ é ɣɛ tea, “Kpoolo‐ʋɔɔ ƃume liide ɣa é wo ga?” Te ɣɛ tea, “Dɔfela.” 6Ziizɛ boni kpɔgitiɛ ma ga ta zei zuwãvɛ. É kpoolo‐ʋɔɔ lɔfelai ziɣini. Tei sa é mama feeni Gala bɛ, é te zu ɣale‐ɣaleni é te ʋe ná kala dopoitiɛ ya ga te te zei numaitiɛ laa wu. Natiɛ te sei sa kpɔgi laa wu. 7Feza pɛlɛ‐vɛlɛ gile‐gile ge ɣɛni te ya. Tei sa é Gala felini, é boni ga te te zei numaitiɛ laa wu ƃalaa pɛ. 8Te miini te vile. Te mavɛnɛi yɛvɛ é ɣɛ ga kpɔlɔ dɔfela. 9Mii veaitiɛ tɔ ziiti nu wulu naagɔ zu. É te leveni sa te li. 10É vilini sa kẽegi zu ga maa ʋilea ná kala dopoitiɛ te vɛɛ ba te li Damanuta ligi zu.

Faʋilesiitiɛ te faa maa‐wɔlɔ‐wɔlɔ kɛɛ ʋaa ɣalama maa velini

11Faʋilesiitiɛ te vaani te vɛɛ Ziizɛ la ga daaza tiɛ pele ɣaa ziɛ ga é faa ta ɣɛ é wulo Gala ta ga é dɛ ga kpɔɔ maa zeele. Te nii ɣɛɛni su‐wɔ̃ɔ faa ma. 12É yɛʋu lɛɛni ga su wooza é too ga zii zuuli é ɣɛ tea, “Zɛƃɛi é kɛɛ nii zu ʋala‐wonɛɛgitiɛ te faa‐ɣɛɛzu ɣaa ziɛzu ga seele. Gè bo wiɛ ga gaama, faa maa‐wɔlɔ‐wɔlɔ nɛpɛ gɛ lɛ ɣɛɛ ʋala wonɛɛgi niitiɛ ɣaazu.” 13É te ɣɛni sa na é vili kẽegi zu kɔnɔ é ziɛi leve ga zɔlaavɛ vele.

Faʋilesiitiɛ ʋɛɛ Yɛloo ʋa te luo ʋelei

14Ziizɛ na kala dopoitiɛ te yeemani tɛ lɛ liini ga kpoolo‐ʋɔɔ. Kpoolo‐vɔɔ ɣilekpu kpẽe ka é ɣɛ te ya kẽegi zu. 15É ɣɛni te lɛnɛsu yíɛ ɣɛ te ma, “A wɛlɛ ƃɔɔ wũ maazu va wo kɛsɛ ga Favilesiitiɛ é vɛɛ Yɛloo va, niitiɛ te maʋai wuloai ga kpoolo‐ʋɔɔ ƃokolo ŋɛni.” 16Te boni ɣii ma tiɛ ɣɛ tea, “Kpoolo‐ʋɔɔ lɛ de ya.” 17Ziizɛ gaa ɣaani é ɣɛ te ma, “Aƃɛi é kɛɛ wo bosu ɣiini ma ga kpoolo‐ʋɔɔ lɛ wo ya? A wɛ lɛ dɛ wɛlɛni fai nii va ɔ́ nɔ ɣɛ ga wo gaa ɣa? Wa ʋaa ɣaa‐ɣaazu ƃaavɛ ʋaa ve? 18Gaazu ɣa wiɛ, wa wɔ wɛ lɛ wɛlɛɛ? Gui ɣa wo wũ ba, wa wɔ wɛ lɛ faa mɛniga? Wo ɣi gɛ lɛ laani? 19Tei gè kpoolo‐ʋɔɔ looluoi zu ɣale‐ɣaleni nu wulu dooluoi vɛ, mavɛnɛi wo zɛvɛni é ɣɛni ga kpɔlɔ diide?” Te ɣɛ ma, “Kpɔlɔ puugɔ kai fele.” 20É te ɣaa zaɣa kɛɛni wɔnɔ é ɣɛ te ma, “Zɔ ƃoolo‐ʋɔɔ lɔfelai é ɣɛni nu wulu naagɔi ʋaa ma, mavɛnɛi wo zɛvɛni é ɣɛni ga kpɔlɔ diide?” Te ɣɛ ma, “Kpɔlɔ dɔfela.” 21É ɣɛ te ma, “A wɛ lɛ dɛ fai nii ɣaa ɣaani?”

Ziizɛ gaazu‐wuu nui ʋaloni Bɛseeda

22Ziizɛni te vaani Bɛseeda. Nu taniga te va ga gaazu‐wuu nu pɔ te pee ʋe bɛ́ ga é ʋowũ ba. 23É gaazu‐wuu nui zoni zee va é wulo la tai va. Tei é laa yiɛ wuuni gaazu ɣɛzɛgitiɛ ma é yeetiɛ vɛɛ te ma, é gaa zaɣa kɛɛni é ɣɛ ma, “È wɛlɛɛ ŋɛni ta nɛpɛ ba?” 24Gaazu‐wuu nui wũ bu ziɣini é ɣɛ tea, “Gè wɛlɛɛ numaa va. Kɛ̀ te wulovɛ è ɣɛ gulua tiɛ ziɛ.” 25Ziizɛ yeetiɛ vɛɛni kɔnɔ gaazu ɣɛzɛgitiɛ ma. Gaazu‐wuu nui ɣaazu ƃakoni sa ná va gaazuvɛ ƃɛtɛ ga kavele é wɛlɛ ŋɛni ƃɔgɔpɛ ba kalãi. 26Ziizɛ teveni pɔ́ taa zu é ɣɛ ma, “Mɛ lɛ lɛ ƃalaa tai nii zu.”

Nii Pite kuloni la é bo é vile Ziizɛ va

27Ziizɛ ƃɔga ná kala dopoitiɛ te liini Sɛsɔluiya Felepai laitiɛ zu. Tei te ɣɛni pelei ma, é te ɣaa zaɣa kɛɛni é ɣɛ te ma, “Ƃɛ ɣa numaitiɛ te bou ga gà le?” 28Ná kala dopoitiɛ te ɣɛ ma, “Ta bosu ga yà ga Bataize‐ɣɛɛ Jɔ̃, taniga te ɣɛ yà ga Yiilaija, taniga wɔ tiɛ bo ga yà ga Gala daa woo‐wo beaitiɛ te ɣile.” 29E kala dopoitiɛ ɣaa zaɣa kɛ sa é ɣɛ te ma, “Wa wɔ ƃɛ ɣa wo bosu ga gà le?” Pite gaa wote zéea é ɣɛ ma, “Yà ɣa è ga nui Gala zee ƃakogɛi ba ga masagi, na ɣa ga Kolai.” 30Ziizɛ maazu ɣilini te ya ga te mɛ lɛ faa wo nu ta nɛpɛ ma ɔ́ vile ba.

Ziizɛ ƃɔɛni é vile na daa‐nɔwɔ‐wo fai va ta ná saa ʋai

31Ziizɛ vɛɛni sa ga te ɣala boga ga kɛni nu ƃuse lui ɣa laa nɔwɔ wo faa lamaa zu. Zuu wũgitiɛ ta ɣɛlɛ ba ta laa‐ʋaale gwalaitiɛ. Na ɣa ɣɛɛ na ta paa. Tɔwɔ folo saagɔ ɣa leve na, towaa wu ziɣi wɔnɔ saa ya. 32É nii woni é gaa wodo kalãi. Pite siɣini é vɛɛ ga kpɛɛ da. 33Kɛ̀ Ziizɛ liteni é wɛlɛ ná kala dopoitiɛ va é yii ɣaa wãla Pite ma é ɣɛ ma, “Ziɣi pùlu, Seeta ƃɔɔ! Ƃɔvɛlaale ɛ̀ lɛ ga Gala pɔ vele, nu ƃusea ɣa è ga te wɔ vele.” 34É kpɔgi lilini ta ná kala dopoitiɛ é ɣɛ te ma, “Ani nu nɛpɛ ka ɣɛ na é vile pùlu, pagɛ manui ɣi kulo ƃɔɔ ʋaa zu é ná pɛɛ‐pulu wulu likpii ziɣi é vile da pùlu. 35Toku ge zei ga nui nɛpɛ yá ɣɛ é ƃaa yɛʋui maazu towaa ɣɛ pilisu. Nui wɔgi yá yɛʋui vili màzaƃu ma ta woo niinɛ vagɔi towaa yɛ zéea. 36Su‐wulo‐zu ɣa ga nii. Zɛƃɛ ɣa yá ɣɛ ga mawulo‐nu‐mai nu vɛ ga é zui ɣaazɔ zɔlɔ wo é vala yɛʋui ma? 37Zɛƃɛ ɣa nu ɣa zoo é fe ga yɛʋui maa‐ʋeli? 38Nui nɛpɛ màʋai ɣa wũfe ta gòitiɛ Gala tuo‐wo tala ziɛgi nii zu é ga tuƃo‐vele‐yowũ‐wulo ziɛgi, towa máʋai ɣa ẁũfe ƃalaa pɛ, nài gè ga nu ƃuse lui, gà vaa na kèea Gala na saala‐malai zu gá ná keelaitiɛ.”

موجودہ انتخاب:

MAKI 8: DN1971

سرخی

شئیر

کاپی