MAKI 9

1Ziizɛ ɣɛni sa te ma, “Gè bo wiɛ ga gaama, nui taniga ta loni vɛ te ga numaitiɛ tɛ lɛ saa wɛ̃ɛga tɔ teɣa vɛɛ wɛlɛzu Gala na masadai va nii é vaazu vaazu gaa‐ƃai zu.”

Ziizɛ maa‐ʋeli fai

2Tei sa folo lɔzita wuloni su, Ziizɛ Pite ziɣini ta Jìi é vɛɛ Jɔ̃ va é lɛ ga tiɛ ta letele gizi gwala ta ma gwala logɛi. Na ɣa ɣɛɛ na Ziizɛ maa ʋelini te ɣaazu. 3Ná seɣei ɣɛni ʋoluzu gwala yiɛ wele ga ʋikɛ ga nu nɛpɛ gɛ lɛ zui ɣa ɔ́ kɛ seɣe ɔ́ wele ga na ɣavelei ɣɛ. 4Yiilaija ƃɔga Mooze te wuloni sa te ɣaazu tiɛ laa wɔlɔ Ziizɛ wɔ. 5Pite ɣɛ sa Ziizɛ ma, “Kala‐mɔi, de ɣɛɛ ʋai vɛ gaa nɛɛvɛ. Ƃe ba gé kwɔta saagɔ lo vɛ, gila ge ɣɛ è ʋaa ma, gila ge ɣɛ Mooze ʋaa ma, gila ge ɣɛ Yiilaija ʋaa ma.” 6Nii Pite ɣɛni bosu ɛ́ lɛ ŋɛni gaa ɣaazu ƃɔɔ ya, toku ge zei ga te nu saagɔ pɛ te ɣɛni luozu ga ʋikɛ. 7Tine ƃiligi yiini é te maa ƃoale. Woo ta wulo tine ƃiligi zu yíɛ ɣɛ tea, “Nii ɣa é ga ẁõila lui. A wui to góo ma.” 8Tei te wɛlɛni woba va ʋili ɣa, tɛ lɛ wɛlɛni nu nɛpɛ ba sa woba é wulo Ziizɛ tɔ ɣilekpu pulu.

9Tei sa te ɣɛni gizigi yiizu, Ziizɛ maazu ɣilini te ya ga nii te pɛtɛga te mɛ lɛ bo nu nɛpɛ ma é yɛsu nu ƃuse lui wu ziɣi saa ya. 10Na ʋaa ma te laa wuluni maʋai ma ƃɔɔ ya tiɛ bo ga gaa‐zaɣa‐kɛɛ ga, “Bu‐ziɣi‐saa‐ya ʋai nii zu‐wulo‐zu ɣa ga minɛ?” 11Tɔwɔ te gáa zaɣa kɛɛni te ɣɛ ma, “Zɛƃɛ ɣa é kɛɛ tɔ‐dɛɛ ɣala‐mɔitiɛ te bo ga kɛni dɛ Yiilaija ɣa va ɣavu pa?” 12É ɣɛni te ma, “Yiilaija ɣa va ga maa wũ pa ga é fai pɛ gaa zei ga sei vele. Tɔwɔ tɔ ɣɛ le mu ponɛi é vile nu ƃuse lui va ga towaa laa nɔwɔ wo faa lamaa zu te so ga ƃaa‐wulo‐ma vele? 13Kɛ̀ gè bo wiɛ, Yiilaija vaa sa. Nii nɛpɛgi é laani te yii ma towa te kɛɛni la, è ɣɛ velei ponɛi la Gala kɔlɔi zu é vile bá.”

Ziizɛ zunu lomai nii valoni gɔʋɛ yowũi ɣɛni pulu

14Tei te vaani kala dopoitiɛ wɔ vɛ, te wɛlɛni kpɔ gwala va na, tɔ‐dɛɛ ɣala‐mɔitiɛ tiɛ sakpe dɔ te la. 15Tei ƃɔɔ nɔ kpɔgi Ziize vɛtɛni, maʋai wala wuloni ga tiɛ ga maa ʋilea. Te ƃizeni sa te li te tuo. 16É te ɣaa zaɣa kɛɛni é ɣɛ tea, “Zɛƃɛ ɣa wo pili‐pilisu yɔɔzu wa tiɛni?” 17Nui gila ge wuloni kpɔgi zu é gaa wote zéea é ɣɛ ma, “Kala‐mɔi, gè vaa ga dùu zunui è wɔ. Ƃɔvɛlaale gɔʋɛ yowũi ɣa púlu yíɛ kɛ ɛ́ lɛ ƃɔɛɛ. 18Vɛ nɛpɛ yá ɣizi na ma towaa su ʋala daa‐ʋũi wulo yíɛ yĩ gaa mi yíɛ ƃaa‐ƃaa. Nà wɔ gè boni yà ɣala dopoitiɛ ma ga te kpɛ pulu, kɛ̀ tɛ lɛ zooni.” 19Ziizɛ te woi ɣaa woteni é ɣɛ tea, “Ee zei‐zaa vea, wai ŋɛ ni zee‐la‐ma lɛ wo ya. Debi tiigo zɛƃɛ ɣa pagɛi gè bo wo woba? Debi tiigo zɛƃɛ ɣa pagɛi gè bo laa zeizu la faa wu wo ya? A vaa ga lopoi pɔ̀ vɛ.” 20Te va sa ga zunu lomai pɔ́. Tei gɔʋɛi wɛlɛni Ziizɛ va, é zunu lomai looni ga maa ʋilea nà yìɛ ƃeli yiɛ ɣili‐kili daa‐ʋũi yìɛ wulo. 21Ziizɛ zunu lomai keea ɣaa zaɣa kɛɛni é ɣɛ ma, “Seeƃɛi nii vɛi ma ba ná zu ɣɛɛ sa zɛli kɛ le?” Kéea ɣɛ ma, “É ziɣi ƃɔɔ ná lopo wolo ziɛ su ma. 22É lebiga pilisu ŋabu ɣa é vɛɛ ziɛ wu va ga é su ƃɔnɔ wo. Kɛ̀ ani yà zoo è faa nɛpɛ kɛ maʋai zu, gé ɣaazu‐maa‐wõi ɣa è ƃɔ giɛ.” 23Ziizɛ ɣɛ ma,“? Yà ɣɛɛzu tea, ‘Ani yà zoo’? Nui zee‐la‐ma zéea, faa pɛ ka zolowo zéea.” 24É lobani ga maa ʋilea é ɣɛ tea, “Gè siɣia ga gaama. Ƃɔ bà nà zee‐la‐ma lala ʋai zu!” 25Tei Ziizɛ wɛlɛni na va ga kpɔgi ɣɛni ɣaa lɛɛzu ba ga maa ʋilea, é yii ɣaa wãlani gɔʋɛ yowũi ma é ɣɛ ma, “Yài ŋɛ ni è ga gɔʋɛi yá nu mumu é gui ʋoole, gè ɣɛ yia, ziɣi pulu! Mɛ lɛ sa wɔlɔ‐wɔlɔ vile pulu wɔnɔ!” 26Tei gɔʋɛi lobani é lopoi loo é kpeli ga ʋikɛ, é ziɣini sa pulu. Zunu lomai maʋaa wuloai ɣɛ è ɣɛ poma. Na ma nu lamaa ɣɛni tea, “Saavɛ.” 27Kɛ̀ Ziizɛ soni zee va yíɛ bu ziɣi. É ɣaa lɔ sa é lo. 28Tei Ziizɛ liini pɛlɛi wu, ná kala dopoitiɛ te gaa zaɣa kɛɛni ta lee‐lee ŋada ɣila te ɣɛ ma, “Zɛƃɛ ɣa é kɛ gɛ́ lɛ zooni gɔ́ gɔʋɛi ƃɛ pulu?” 29É ɣɛni te ma, “Nu lɛ zooga ɔ́ na mazii ƃɛ nu wulu ga ŋɛni ta ƃɔnɔ nɛpɛ é wulo Gala‐felia wulu.”

Ziizɛ ƃɔɛni wɔnɔ é vile ná saa ʋai va

30Te ziɣini sa na te li te leve Geealali. Ziizɛ lɛ ŋɛni wõizu nu nɛpɛ gɔ su wɛ̃ɛ. 31Ƃɔvɛlaale é ɣɛni ná kala dopoitiɛ ɣala bosu yíɛ ɣɛ te ma, “Ta vaazu nu ƃuse lui yee laazu nu ƃusea ya. Na ɣa ɣɛɛ na ta paa. Tɔwɔ ta paa na folo saagɔ wulo su, towaa wu ziɣi saa ya.” 32Kɛ̀ tɛ lɛ woi nii ɣaa ɣaani. Tɔwɔ te ɣɛni luozu ga te gaa zaɣa kɛ.

Ƃɛ ɣa teʋegɛi baa pɛ ba?

33Te vaani Kapɔɔnia. Tei te ɣɛni pɛlɛi wu, é ná kala dopoitiɛ ɣaa zaɣa kɛɛni é ɣɛ te ma, “Zɛƃɛ ɣa wo ɣɛni pili‐pilisu yɔɔzu pelei ma?” 34Kɛ̀ te ná ɣɛɛni ƃu, ƃɔvɛlaale tei te ɣɛni pelei ma, te ɣɛni pili‐pilisu yɔɔzu ga ƃɛ ɣa é ga nu walai te pɛ te zaama. 35É zeini sa é kala dopo puugɔ kai felegɔi lili é ɣɛ te ma, “Nui nɛpɛ é wõini é ɣɛ ga nu wala baa pɛ ba, kɛni dɛ yá yii baa pɛ bu é ɣɛ ga te pɛ ta mɔɔlɛ‐wo nu.” 36É lopo wolo ziɣini sa é pile te zaama, é siɣi é sei yee lɔkɔ zu é ɣɛ te ma, 37“Nui nɛpɛ yá yee zei nii ɣavele lopo woloi ta wu nà daa‐zeigi zu manui yee zeiya bù. Tɔwɔ nui nɛpɛ yá yee zei bù, nà lɛ na ɔ́ yee zei bù. Kɛ̀ nui é tèvega tɔ na é yee zeiya bu.”

Nui lɛ wɔɔzu de wɔ tɔ de ʋaa ma

38Jɔ̃ ɣɛni Ziizɛ ma, “Kala‐mɔi, gé wɛlɛni nu ta va yíɛ gɔʋɛ yowũa ƃɛ numaa wulu yà laa‐zeigi zu. Tɔwɔ gé kpe teveni nà ɣɛɛ va, ƃɔvɛlaale ɛ́ lɛ vɛɛni de va.” 39Kɛ̀ Ziizɛ ɣɛni tea, “A mɛ lɛ kpe teve nà ɣɛɛ va. Ƃɔvɛlaale nu nɛpɛ gɛ lɛ maa‐wɔlɔ‐wɔlɔ tii ɣɛɛ nà daa‐zeigi zu ɔ́ zoo ƃɔɔ nɔ ɔ́ ziɣi na ɔ́ faa yowũ wo ga dà. 40Toku ge zei ga nui lɛ wɔɔzu de wɔ tɔ de ʋaa ma. 41Gè bo wiɛ ga gaama, nui nɛpɛ yá kɔpu gila fe wo ya kpoale yiɛ zu ga wo kpoale Kolai na daa‐zeigi ɣɛɛ ʋai zu wo va, manui leve pɛ ma pɛ ná faa‐nɛi zu‐lɔnɔi lɛ viliga bɛ́.

Tɛ‐gai yá wo ga nu ga é faa yowũ ɣɛ

42Ziizɛ ɣɛni tea, “Lopa woloi niitiɛ te màʋaa ziɣia ga gaama, nui nɛpɛgi yá kɛ ta ziɣi pele va, ɔ́ ɣɛ ga faa vagɔ manui ʋaa ma ga te kwɔti vii‐vii sɛlɛ kɔgi va te lii la te pili yuwu wu. 43Tɔwɔ ani è yee ɣa ɣɛɛzu ga zaƃu ga è ziɣi pele va, teve va. Tɔ ga faa vagɔ è ʋaa ma ga è ɣɛ ŋeteai zu é vaazu vaazu ga nui zee leveai é leve è lia va ga yee ɣaa‐wooliga daa‐nɔwɔ‐wo ŋada laavɛ vɛ ŋabui nii na gaa lɛ liʋiga, [ 44vɛ duuli woi gɛ lɛ zaa ná, ŋabu lɛ liʋiga ná.] 45Ani è wɔwɔi ɣa ɣɛɛzu ga zaƃu ga è ziɣi pele va, teve va. Tɔ ga faa vagɔ è ʋaa ma ga è ɣɛ ŋeteai zu é vaazu vaazu ga nui kɔwɔ leveai é leve è wɔwɔ felegɔ ɣaa‐wooliga va te è vili daa‐nɔwɔ‐wo ŋada laavɛ. [ 46Vɛ duuli woi gɛ lɛ zaa ná, ŋabu lɛ liʋiga ná.] 47Ani wɔnɔ è ɣaazu ɣɛzɛgi ɣa ɣɛɛzu ga zaƃu ga è ziɣi pele va, kulo na. Tɔ ga faa vagɔ ga è lɛ Gala na masadai zu ga ɣaazu ɣile é leve è ɣaazu ɣɛzɛ felegɔi pɛ zɛga va è wũ ba te è vili daa‐nɔwɔ‐wo ŋada laavɛ 48vɛ duuli woi gɛ lɛ zaa na, ŋabu lɛ liʋiga na. 49Kɛni ŋabu ɣa lɔ nu pɛ ba è ɣɛ velei kpolo ɣa wulo la daa‐mii ŋɛni va. 50Kpolo vagɛ. Kɛ̀ ani kpolo mayɛmi ka wulo na ba, wa sa wa leve kɛ le é ɣɛ ba? Pagɛ wo yɛmi è ɣɛ kpolo, wiɛ zii‐laa luo wo ga ɣiini.”

موجودہ انتخاب:

MAKI 9: DN1971

سرخی

شئیر

کاپی