Luke 16
16
Suġautchiqiri Pitqiksiġaqtuaq
1Jesus uqallautivsaaŋagai iḷitchitqurani uuktuusiqł̣uni, Iñuqaŋaruq suġalliruamik suġautchiqiriqaqtuamik. Aasii uqallautiŋagaat suġalliruaq suġautchiqiriŋa aŋalatchiḷḷuataŋiññivḷugu maniŋiñik. 2Tavra suġalliruam ququaqługu uqallautiŋagaa, Sunaimña tusaavigu ilipkun? Qaitkich aglaich suġautchiqiraunipkun, qanuq tavraŋŋaaglaan suġautchiqirigiŋaiġñiaġikpiñ. 3Tavra suġautchiqiri isumalaaŋaruq, Suniaqpik? Umialiŋma anitkaqsigaaŋa savaamniñ. Kurriḷguiñmiuŋa, kanŋugimmigiga piatchiaqtaġniq. 4Sivunnianiktuŋa suniaqtilaaksramnik, savaagiġuma avilaitqatiqaġumiñaqsiḷuŋa paġlariksramnik aimaaġviŋiññun. 5Tavra qaitquŋagai umialiŋmi akiiḷaqtuqtiŋi atausiullaavlugich. Sivulliq uqallautiŋagaa, Qanutun akiiḷaqpiuŋ umialiga? 6Ilaa uqallaŋaruq, Tallimakipiatun qattaġruayaanik olive uqsrunik. Tavra suġautchiqirim uqallautiŋagaa, Uvva akiiḷatin, aquvillutin qilamik aglakkich akiiḷatin avvaŋich piiyaġlugich. 7Tavra uqallautilgitkaa alla, Qanutulli akiiḷaqaqpich? Ilaa uqallaŋaruq, 1,000-tun bushels palauvaksranik. Suġautchiqirim uqallautiŋagaa, Iḷaŋich piiyaġlugich aglagiñ 800-mik. 8Tavra atanġata pisaasuġniŋagaa pitqiksiġayuktuaq suġautchiqiri sivunniuġutaagun. Iñuŋi mattuma nunam aŋalatchisułhaaqtut suġaliġmiŋnik ukpiqtuaniñ.
9Tavra Jesus uqallavsaaŋaruq, Uqallautigivsi, avilaitqasiuġitchi ilivsiññun nagliktuġlugich iñuich suġalivsiññiñ. Tavraasii suġalisi nuŋukpata, paġlapiaġniaġaasi isuitchuamun aimaaġviŋmi. 10Kiñaliqaa ukpiġnaqtuaq mikiruurakkaluakun, ukpiġnaqtuagummiuq aŋiruakun. Aasiivsauq kiñaliqaa pitqiksiġaġuuruaq mikiruurakkaluakun, pitqiksiġaqtuagusuummiuq aŋiruatigun. 11Tavraasii ilivsi ukpiġnaġniaŋaitkuvsi aŋalatchiñivsiññi nunami suġaliġnik, qanuġlusi ukpiġnaġniaqpisi aŋalatchisaġuvsi qiḷaum iḷumun ittuanik suġaliŋiñik? 12Suli ukpiġnaŋaitkuvsi aŋalatchiñivsigun God-im piŋiñik maani, aitchuusiaqaġniaŋitchusi ilivsi pivsiññik taimanigu. 13#Mt 6.24.Kiñaliqaa savakkumiñaitchuq malġugnik ataniqaġluni atautchikun, qanuq ilaan uumiginiaġaa igḷua aasii piviaġilugu igḷua. Naaggaunnii qiksiksrautiqaġluni igḷuanun aasii suuŋiḷaġilugu igḷua. Savautiyumiñaitkiksi God suġallagniaġniġlu atautchikun.
Iḷaŋat Jesus Uqaluŋisa
(Matthew 11.12-13; 5.31-32; Mark 10.11-12)
14Pharisees piqpaksriruat maniŋmik, tusaaŋagaich taapkua iluqaisa uqaluich aasii ilaisa Jesus kipagiŋagaat. 15Tavra ilaan uqallautiŋagai, Ilivsi patchisaiññisuurusi takkuanni iñuich, aglaan God-im iḷisimapiaġai iñuutchisi, qanuq suna kamanaqsiḷiqtauruaq akunġanni iñuich naġġugipiaġataġaa God-im.
16 #
Mt 11.12, 13. John Paptaiqsim alġaqsruisaġniŋanun aglaan, Moses aglaaŋi uqaqtiŋisalu God-im uqaluŋich aŋalatigiŋagisi. Aglaan John aullaqisaaŋagai tusaayugaaġiksuat God-im atanniqsimmataagun qaigaqsiruakun. Aasii paŋmapak piyumalaaqtuat iñusalaich siġġaqiŋarut God-mun atanniqsimatquvlutiŋ. 17#Mt 5.18.Aglaan siġḷiġnaił̣haaqtuq qiḷaglu nunalu piiqsaqpaŋnik, atausiuraqunnii God-im pitquraŋiñi naumaŋiññiqsrauruaq piiġñiksraŋaniñ. 18#Mt 5.32; 1 Co 7.10, 11.Kiñaliqaa avittuaq nuliamiñiñ aasii tuvaaqasitqikł̣uni allamik allatuqtuaguruq, suli iñuk tuvaaqasiqsuaq aġnamik avitaŋanik uiŋata, allatuqtuaguruq.
Suġalliruaġlu Lazarus-lu
19Suġalliruaqaŋaruq annuġaaqaqtuamik akisupiaġataqtuanik, suli uvlutuaġman niqinaqiugaqłuni iḷaŋaniñ. 20Aasii iñuk iḷiappak kiḷḷiġruaqtuqtuaq atiqaqtuaq Lazarus-mik, qaġġisisuuniġaat uvlutuaġman paaŋanun suġalliruam. 21Niġiyumasuugaluaġniqsuq kataktuanik unnii suġalliruam niġġiviŋiñiñ. Aasii qimmich qaimmiraġniqsut aluktuqługich kiḷḷiŋi. 22Tavra iḷiappauruaq iñuk tuquŋaruq suli isaġulgich aullautiŋagaat Abraham saniġaanun niqinaqiruanun qiḷaŋmi. Suġalliruaq tuquŋammiuq aasii iḷuviŋagaat. 23Tavra Nagliksaaġviŋmi nagliksaaqłuni, aaġluŋaruq aasii tautukługu Abraham uŋasiñun Lazarus-lu saniġaaniittuaq. 24Tavra ilaa ququulaŋaruq, Aapauruatiin Abraham, nagligiŋŋa. Tilliuŋ Lazarus misullagiaqulugu argani imiġmun aasii niglaqtaaġlugu qaniġa, qanuq uvva iłuiḷḷiuqpaktuŋa uumani igniġmi. 25Tavra Abraham uqallaksiññaŋaruq, Iġñiiŋ, itqaġiñ iñuuniġni aitchuusiaqaġuuruatiin nakuuruanik sunik, aasiiḷi Lazarus tainnatuttauq pigiitchuanigli. Aasii paŋmapak quviasaaġusiaqaqtuq uvani, aasiiḷi ilivich nagliksaaġnami ittutin. 26Aasii taamnatualuuŋitchuq, akunnaptiŋni uvagullu iliviḷḷu kamanaqtuaq qutaiḷaq ittuq savaaq, tamatkua ikaaġukkaluaqtuat maaŋŋa ilivsiññun piyumiñaiqsaqługich, suli kiñaunnii ikaaġumiñaiqł̣ugu ilivsiññiñ uvaptiŋnun. 27Tavra suġalliruaq uqallaŋaruq, Tainnaitpan aapauruatiin, qiññuaġvigigikpiñ tilitquvlugu Lazarus aapama igluanun, 28qanuq samma tallimanik aniqatiqaqtuŋa, ilaan kiliktuġumagai, iḷaanni uvuŋaqpiaġmiut nagliksaaġviŋmun. 29Tavra Abraham uqallautiŋagaa, Aniqatiivich pigigaich aglaaŋi Moses uqaqtiŋisalu God-im kiliktuiruat iliŋiññik. Aniqatiivich naalaġniḷisigik taiguaqpatigik. 30Suġalliruam kiuŋagaa, Aapauruatiin Abraham, naalaġniyumiñaitchut, aglaan iñuk ullautikpan inmiŋnun tuquŋaruaniñ aŋiluni, isumalitqigñiaqtut. 31Abraham kiuŋagaa, kamagiyumiñaitkumisigik aglaaŋi Moses uqaqtiŋisalu God-im, qanuqpisiiḷḷirauyumiñaiñmiut iñuk aŋigaluaqpan tuqqunmiñ.
موجودہ انتخاب:
Luke 16: INUPIAQ
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
