Luke 14
14
Jesus Iłuaqsigaa Naŋittuaq Iñuk
1Iḷaŋanni Jew-guruat savairvianni, Jesus niġiqatauyaqtuġman igluanun atanaurauruam iḷauvluni Pharisee-ñun, iñuich Jesus naipiqtupiaŋagaat. 2Tavra tavrani, iñuk qaiŋaruq Jesus-mun immaqaġniqsuaq iluqaani timimiñi. 3Tavra Jesus apiġiŋagai pitquranik iḷisaurrich Pharisee-ḷḷu, uqallakłuni, Nalaunŋava iłuaqsiriruni Savaiññiġmi, naagga nalaunŋaitpa? 4Tavra kiuŋaitkaat. Tavraniasii Jesus aksiuŋagaa naŋittuaq aasii iłuaqsivḷugu aullaqtiłługulu. 5#Mt 12.11.Tavra Jesus uqallautiŋagai iñuich, Nalliqsi iġñiqaġumi naagga qimuktiqaġumi kataktuamik nivviamun savaiññivsiññi, tavrauvvaa nuqitchaqtuġniaŋitpauŋ? 6Iliŋisa kiuŋaitkaat taavrumuuna.
Tukkuliiñiq Kamanaġniaŋiññiġlu
7Tavra Jesus iḷitchuġivlugich iḷaŋich aiyugaaqtauruat, iniksraqtuqtuat inigigñiqsranik, quliaqtuaġutiŋagai uuktuunmik iluqaisa. 8#Pr 25.6, 7.Qakuguliqaa aiyugaaqpasi katirrusiqivlutiŋ niqinaqiruat, aquvinnasi inigigñiqsramun. Iḷaanni naumalluktuat ilivsiññiñ aiyugaaŋaviaġmigai. 9Aasii taimma taavruma aiyugaaqłiŋaruam iluqavsiññik ullaglusi uqallautilusi, Iniksritchiuŋ una iñuk, taimaasii ilivsi kanŋutchautigillaan inillaaqsiḷusi kamanaiññiqsramun inimun. 10Aglaan aiyugaaqtauguvsi, aquvitchumausi kamanaiññiqsramun inimun, taavruma aiyugaaqtivsi qaiḷuni uqallautiyumagaasi, Avilaitqaan, qaiḷaaġiñ inigipayaamun. Tavraniasii kamanaqsiḷaaqtauniaqtutin takkuanni iluqaġmiŋ aiyugaaqtauruat. 11#Mt 23.12; Lk 18.14.Qanuq kiñaliqaa kamanaqsiḷiqtuaq inmiñik kamanaiqsauniaqtuq, suli kiñaliqaa kamasaaŋitchuaq inmiñi kamanaqsiḷiqtauniaqtuq.
12Jesus suli uqallautiŋagaa aiyugaaqtini, Niġipkaiguvich naagga niqinaqurriguvich, aiyugaaġnagich avilaitqatitin naagga aniqatiitin, naagga nanmiñiq iḷatin naagga suġalliruat siḷallisin, ilaisaptauq aiyugaaqpiaġmigaatin paaqłiqsaġlutin. 13Aglaan niqinaqurriguvich, aiyugaakkich iḷiappaich, qilluutituqtuat, tusiattuat, ayauŋaruat, 14aasii quviatchaktitauniaqtutin, qanuq ilaisa paaqłiġumiñaitkaatin. Tavra God-im paaqłiġñiaġaatin aŋikpata tuqqunmiñ nalaunŋaruat.
Uuktuun Niqinaqiqpaktuatigun
(Matthew 22.1-10)
15Tavra iḷaŋata niġġiviŋñi aquppiqatauruam Jesus-mun tusaakamiuŋ taamna, uqallaŋaruq ilaanun, Quviasuglich iñuich niġiyumiñaġniaqtuat God-im atanniqsimaviani. 16Tavrali Jesus kiuŋagaa uuktuusiqł̣uni, Iñuk iḷaanni niqinaqusiuqpaŋaruq, aasii aiyugaaqługich iñugiaktuat iñuich. 17Tavra piñaqsimman niqinaqiniksraq, ilaan tiliŋagaa kivgani uqallautitquvlugich aiyugaaqtauŋaruat, Qaiñaqsigaasi. Supayaat paŋmapak itqanaiqsut. 18Tavra iluqaġmiŋ atisivḷutiŋ patchisiqsurraqsiŋarut. Sivulliq uqallaŋaruq kivgamun, Nunasiŋaruŋa, aullaqtuksraupiaqtuŋa tautugiaġlugu. Apiġigikpiñ suliqutiginaŋa. 19Allasuli uqallaŋaruq, Tauqsiŋaruŋa tallimaiñik igḷugiiñik qimuktinik, aullaqtuksrauruŋa uuktuaġiaġlugich. Apiġigikpiñ suliqutiginaŋa. 20Allasuli uqallaŋaruq, Nuliaqqammiqsuŋa. Taamna pisigivlugu, aiyugaaqtauyumiñaitchuŋa. 21Tavra kivgam utiqami quliaqtuaġiŋagai taapkua ataniġmiñun. Tavrani atanġa iglum qinnaliŋaruq aasii uqallakłuni kivgamiñun, Aullaġiñ qilamik apqutiŋiñun apqugauraŋiñullu iniqpaum, aasii qaġġisilugich iḷiappauruat qilluutituqtuallu ayauŋaruallu tusiattuallu. 22Tavra kivgam utiqami uqallautiŋagaa, Ataniiq, piraksriutin pianiktuq, aasii iniqaqtuq suli. 23Tavra atanġa uqallaŋaruq kivgamun, Aullavsaaġiñ apqutinun apqugauranullu siḷataanun iniqpaum aasii araglugich iñuich qaipkakkich, igluga siḷivitchumauq iñuŋnik. 24Uqallautigivsi, nalliat unnii taipkua aiyugaaqtaugaluaqtuat niġiyumiñaiññiaqtut niqinaqusiuqtamnik. Tainna piñiaġmiuq God-im atanniqsimaviani.
Siġḷiġnaġaluaqtuq Iḷitchitqurauniq Jesus-mun
(Matthew 10.37-38)
25Tavra iñugiapiaġataqtuat iñusalaich iglauqasiŋagaat Jesus, aasii ilaan kiŋiaqługich uqallautiŋagai, 26#Mt 10.37.Kiñaliqaa qairuaq uvamnun iḷitchitquraġiyumiñaitkiga piviuttaġiłhaaġumiñaitpaŋa ilaan aapamiñiñ, aakamiñiḷḷu, nuliamiñiḷḷu, miqłiqtumiñiḷḷu, aniqatiimiñiḷḷu, inmiñiñunniiḷu. 27#Mt 10.38; 16.24; Mk 8.34; Lk 9.23.Kialiqaa iqsriutiŋitkumiuŋ aŋarraurani tuqutauyumaliġḷuniunnii pisigiluŋa, nalliummatiŋitchuq iḷitchitqurauyumiñaġluni uvamnun. 28Qanuq nalliqsi, nappaiyumaalliġumi nasiqsruġviŋmik, aquptaaġluni kisitchiqqaaġniaŋitpa qanutun akisutilaaksraŋanik naamaniaġaluaġmagaaġmi naatchumiñaġlugu? 29Tainna piŋisuaġumi, maŋŋuliqsiññaġlugu naatchiyumiñaiññiqpan, iñuich tautukkumirruŋ kipautigirraqsiñiaġaat, 30uqaġlutiŋ, Iñugliuna nappaisaġaluaqłuni, naatchiyumiñaiḷḷaġmi pimmiñiqsuq. 31Naagga kisu umialik, aŋuyaqatiqaqsaġumaagaqsigumi allamik umialiŋmik, naipiqtuqqaaġniaŋitpa isumalaaġutigiaqsiḷugu igḷutuutiyumiñaġniaqtilaamiñik 10,000-mik aŋuyaktiqaġluni 20,000-mik aŋuyaktiqaqtuamun. 32Igḷutuutiyumiñaiññiaġumi, uŋasisugruŋŋaan akiḷḷiñi, ilaa tilisiñiaqtuq kivgamik umialiŋmun apiqsrisaqłuni aŋuyaŋirrutiksramik. 33Tavra Jesus uqallaŋaruq, Tainnatun kiñaliqaa ilivsiññi suksraaġiŋitkumi supayaanik pigikkaġmiñik, iḷitchitqurauyumiñaitchuq uvamnun.
Anniqsuutauŋitchuaq Taġiuq
(Matthew 5.13; Mark 9.50)
34Taġiuq nakuuruq, aglaattauq taġiuq taġiuġniiġumi, qanuġlugu taġiuġniḷitqikkumiñaitchuq. 35Anniqsuutauyumiñaitchuq nunamun naagga nagguksautauyumiñaġluni nunamun. Aglaan naavitaksrauruq asiñun. Ilivsi iḷitchitquratka taġiutun ittusi nunam iñuŋiñun. Tavraasii siutiqaqtusi tusaggatiksragnik, Naalaġnisiŋa.
موجودہ انتخاب:
Luke 14: INUPIAQ
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
