Madiu 16
16
Yesu kaliva yadi ve'o'ola aituha fifiwalana fa'ina
keke gidavenogaleni.
Maki 8:11-13; Luke 12:54-56
1 #
Md 12:38; Yo 6:30 Tu tonagona tafatafalolodiyao adi yo'o luhei, Falisi kadu Sadusi tufoidi Yesu againe hi'ela be hinavebauna. Nuwanuwadi hinavebauna fa'ina hive'o'olena be tamo aituha fifiwalana ginafaisewana higa vaita Yaubada againe gidave'inuba.
2Yesu gigayo, “Mala gibobogi omi wagagahe wagagayo, Mala giyabelina fa'ina, bogiyadi mala yamumuna. 3Kadu mala gilalaulauna wagagayo, Mala giyabelina tu uyu'uyuyuna fa'ina, wehi ginalugaga. Hidedemi mala ana iya'iyaya wa'itahalamanena, tu Yaubada nimana ana iya'iyaya higa gavadi gavadi hida tova againe ginalakayemu-ma keke wada'itahalamaneni. 4#Yon 1:17Omi kaliva tova adamoya babiya watubuyemu-ma kaliva koyomi, keke Yaubada againe wadamiyave'avina fa'ina nimaku ana iya'iyaya walelelena. Atu keke mena iya'iyaya wana'itani. Au iya'iyaya sa'eyanaga ganavehawalemi, higa iya'iyaya Yaubada bonana ana to'awatalatalaina ana egana Yona againe gilakayemu-ma amine, aiyeta tohiye bogi tohiye.” Hidedemi gigahe tu gihegedi be gina.
Falisi Sadusi yadi gahe vaita isi amine.
Maki 8:14-21
5Tu Yesu ana tomuliya buye tobuya hidamana tu badi tomuliya nuwadi giulu be keke tamo a'a hidanauweni. 6#Lu 12:1Au Yesu gigahedi gigayo, “Taumiyao wana'itave'avimi be Falisi kadu Sadusi yadi isi keke nuwami ginavaini.”
7Badi tomuliya hivebutu buye hive'agahegahe higayo, “Keke tamo beledi kada'aliyeni fa'ina hidedemi gigahe.”
8Yesu yadi nuwanuwa gihalamaneni-yo gigahedi gigayo, “Omi kaliva yami vetumagana gavakabi'o. Gavadi-yo a'a nuwami giulu-ma fa'ina buye wave'agahegahe? 9#Md 14:17-21Ka'i tagami aimo keke gida'afoleni? Boi kaliva faifi tausani a'a faifi againe gave'adi-ma ma'i wanuwenuwena o ka'i keke? Adi tufo wakwakwa feyawa gavaiyehi? 10#Md 15:34-38Kadu kaliva fowa tausani a'a seveni againe gave'adi-ma ma'i wanuwenuwena o ka'i keke? Adi tufo wakwakwa feyawa gavaiyehi? 5,000 o 4,000 gave'adi amine omi kadu akufaiweya ganave'ami. 11Gavadi-yo yaku gahe keke wadahalamaneni? Keke a'a-mo'ena fa'ina gadagahe. E, taumiyao wana'itave'avimi be Falisi kadu Sadusi yadi isi keke nuwami ginavaini. Hidedemi gagahetalahobuhobu.” 12Gigahe-yo au hihalamanena higa keke vaita isi falawa againe hivilana-ma fa'ina taudiyao hina'itave'avidi. Au Falisi kadu Sadusi yadi vehawala fa'ina givenuwa'atadi.
Fita Yesu inubana fa'ina gihawavemogatala.
Maki 8:27-30; Luke 9:18-20
13Tu Yesu ana tomuliya buye hinauna tu Sisaliya-Filifai ana fafaliya hilakayemu-yo gitoliluveluvedi gigayo, “Iya Tohobu'ela inubaku fa'ina kaliva gavaimi higahe? Iya vaita hakwa'adi?”
14 #
Mk 6:14-15
Badi higayo, “Tufoidi higahe vaita O Yoni Tobafitaiso. Kadu tufoidi higahe vaita O Yaubada bonana ana to'awatalatalaina ana egana Elaiya. Kadu tufoidi higahe vaita O Yelemaiya o ka'i Yaubada bonana ana to'awatalatalaina kadu sa'eyana.”
15Yesu gigayo, “Tu omi'iyao Iya vaita hakwa'adi ma gavaimi wagahe?”
16 #
Yo 6:69
Saimoni-Fita gigahena gigayo, “O'eni Yaubada yana Tovegida higa Keliso. O Yaubada Tomiya-vagata Natuna.”
17 #
Md 17:5
Yesu gigayo, “Saimoni Yona natuna, o'eni kaliva ya wavemwamwala. Inubaku uyakahina-ma keke tamo kaliva o againiya gidahawavemogataleni. Au Kamaku lobameya gimimiyami-ma gihawavemogatalena. 18#1Ko 3:11; Af 4:10-12; Ef 2:20Kadu Iya ganagahe. O'eni Fita, a egana ana kaivila ma kuga. O unave'ogola ada tovetumagana ami yo'o higa yaku manuwa mena kuga give'ogola-ma againe ganakivemididimi. Aba'alika ana tofaiwala koyodiyao nuwanuwadi yaku manuwa hinaluyaweyawelimi tu keke adifaiweya, hinaga-wayoga. 19#Yo 20:23Kadu yaku manuwa ana kihi higa yaku yo'ogaga yadi luku o una'itave'avina. Gava dewa babiya unahawatana, medema kadu lobameya hinahawatana. Ada gava dewa babiya unahawahegena, medema kadu lobameya hinahawahegena.” Hidedemi Yesu gigahe. 20Kadu ana tomuliya gihawatadi be Bana au Yaubada yana Tovegida Keliso ma keke tamo hakwadi againe hina'awatalatalaineni.
Yesu yana aulolo yana alika gilukahihiyena.
Maki 8:31-33; Luke 9:21-22
21Ada medema tovai-nadi Yesu givebutu gavadi aimo Bana againe ginalakayemu-ma ana tomuliya gikivetuvetunudi gigahedi gigayo, “Aku vehimeya gavaina higa ganana Yelusalema againe kaliva lakahidiyao ada abaveyao ana tofaisewa kikaiwabudiyao kadu Mosese yana vehimeya ana tovehawala nimadiya aulolo tagiya moya'aina gananuhagana. E, nibaikweyao nimadiya hinahegenauweku be badi hinaluve'alikaku tu aiyeta anaveto againe Yaubada ginasivemididiku.” Au hidedemi Yesu givenuwa'atadi.
22Tu bana Fita Yesu gisi'aliyena ada givebutu gidakeyena gigayo, “Kauveya, keke hidedemi unanuwanuwa. Au Yaubada ginahawatadi. Mena aulolo alika ulukahihiyena-ma keke unanuhagani, keke-mo'a.”
23Tu Yesu gihagavilana Fita againe gigahe gigayo, “Setani, o una kwaukuya. Mena ya nuwanuwa ulukahihiyena-ma keke Yaubada yana nuwanuwa fa'ina yaku eda usebodana. Au o unuwanuwa tomiyababi hinuwanuwa amine.” Hidedemi Yesu Fita gidakeyena.
Yesu ana muliya fa'ina vita kananuhagana.
Maki 8:34-38; Luke 9:23-27; Yoni 12:23-26
24 #
Lu 14:27
Tu Yesu ana tomuliya agaidiya gigahe gigayo, “Gava kaliva nuwanuwana tavagiku ginamafuna, medema gilubodana be tauna yana nuwanuwa gidavenuwauluyena, ada Iya agaikuya gidavetomuliya-yo gidahawahegena be vita tulina tulina gidanuhagana. 25Ada gava kaliva keke nuwanuwana Iya agaikuya ginahawahegeni tu taunaga fa'ina ginanuwanuwa tova moya'aina, medema yawaina ginanuhegena. Atu gava kaliva ginahawahegena be aku vetumagana fa'ina yawaina ginanuhegena, medema yawai-vagahina ginanuhagana. 26Ka'i kaliva babi ana lokoloko matatabuna ginavai-'owona tu tauna alu'aluwana yana miya hagihagina ginanuhegena digo, keke tamo gavadi yamumuna ginanuhagani. Ka'i alu'aluwana yana miya yamumuna ginanuhegena digo, keke tamo laufata anafaiweya ginaseni-yo yawaina kadu ginanuhagani. 27#Lo 2:6; Ha 22:12Fa'ina aimo Iya Tohobu'ela Kamaku yana kikaiwabu ganavaini-yo ganahobu'ela-havagi. E, yaku tovenuwa'ata buye anahobu'ela be kaliva sa'eyana sa'eyana yadi dewa amine badi agaidiya ganalaufata. 28Kadu gagahe velemo'ena, tufoimi hidedei wamidimidi-ma aimo keke alika wananuhagani tu nagona Iya Tohobu'ela yaku wa'abavehimeya ganayemu ma wanamidi'itaku.” Hidedemi Yesu gigahe.
موجودہ انتخاب:
Madiu 16: viv
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2003, Wycliffe Bible Translators, Inc. All rights reserved.
