Madiu 15
15
Yaubada yana vehimeya bwanenedeyao yadi dewa gitubuhegena.
Maki 7:1-13
1-2Tu tonagona tafatafalolodiyao adi egana Falisi kadu Mosese yana vehimeya ana tovehawala tufoidi Yelusalema hitauya Yesu againe hi'ela higahe higayo, “Gavadi-yo a tomuliya bwanenedeyao yadi dewa keke hida'itave'avini? Au ana toveya keke nimadi hida'ikolakola-yo hida'au'a, au hi'a'a-kawowo.”
3Yesu gigayo, “Kadu omi'iyao ma gavadi-yo taumiyao yami dewa tuwaina wa'ita'itave'avini-yo Yaubada yana vehimeya wayaweyawelini? 4#Yem 20:12Wa'ita, Yaubada givehimeyeda gigayo, Tama be hina unave'amohimohinedi. Kadu vehimeya sa'eyana ma, Gava kaliva tamana o ka'i hinana gina'ihawadamanedi, medema anafaiweya gida'alika. 5-6Tu omi'iyao ma wagahe vaita ka'i kaliva tamana o hinana ginagahedi ginagayo, Gavadi gavadi againe vaita gadavelugami, medema Yaubada againe gahawahegena fa'ina keke omi ganavelugami. Ka'i hidede amine ginagahe digo, ana vehimeya tamana o hinana adi veluga fa'ina gihavaina, au keke yana veluga againe ginave'amohimohinedi. Omi hidedemi wagahe tu yami gahe keke gidalubodani, fa'ina Yaubada yana vehimeya tamamiyao o hinamiyao adi ve'amohimohina fa'ina wayawelina be higa taumiyao yami vehawala wanakilakahina. 7#Ais 29:13Omi meyami luhei. Tuwai-mo'ena Yaubada bonana ana to'awatalatalaina ana egana Aiseya omi fa'imiya gigaheye-vagahina ada au gigahe velemo'ena gigayo,
8Hida yo'o miIsileli kebuladiya hive'amohimohineku
tu ase'asedi Iya agaikuya keke hidahawahegeni.
9Iya agaikuya hihawadavadava-kawowo.
Yadi vehawala ma taudiyao yadi vehimeya hikilakahina
ada hivewagana Iya Yaubada yaku vehimeya.”
Hidedemi Yaubada Aiseya awane gigahe tu Yesu Aiseya yana gahe giyakahina.
Gavadi kaliva ase'asene gidadauda, medema gikivekoyona.
Maki 7:14-23
10Tu Yesu yo'o gikovadi be Bana liline hi'ela ada gigahedi gigayo, “Wanogali be wanahalamanena. 11#Md 12:34Gavadi awamiya giluku-ma keke Yaubada matane ginakivekoyomi. Gavadi gavadi koyona awamiya giyemuyemu, medema Yaubada matane gikivekoyomi.”
12Hidedemi Yesu gigahe tu ana tomuliya Bana againe hi'ela higayo, “Ka'i uhalamanena mena ya gahe againe Falisi u'ive'ago'ugadi?”
13Yesu gigayo, “Ai sa'eyana sa'eyana Kamaku lobameya keke Tauna gidafahani-ma ganahabuna be ginahavaina. 14#Md 23:16Au badi Falisi fa'idiya keke wananuwanuwa. Badi tokivetuvetunu nonogana hivematakoyo, Yaubada yana nuwanuwa keke hida'itahalamaneni. Ka'i tomatakoyo tomatakoyohiyana edeya ginanagoyena, au adi'iselu awalolo againe hinabe'u.”
15Hidedemi Yesu gigahe tu Fita gigahena gigayo, “Mena gahetalahobuhobu ana nuwanuwa fa'ina unakivetuvetunuma.”
16Yesu gigahedi gigayo, “A! Ka'i omi tagami aimo keke gida'afoleni? 17Wanogali! A'a gavadi gavadi awamiya giluku, medema kamomi againe gihobu be wala'aiya wahegena. 18Atu gavadi gavadi awamiya hiyemuyemu, medema ase'asemiya hiyemuyemu ada medema gaitomai-dina Yaubada matane hikivekoyomi. 19#Ga 5:19-21Fa'ina gavadi gavadi koyona nuwahinagemiya wanuwenuwedi, medema yami dewa againe aimo wanaseyemaunedi, higa luve'alika kelele udo tulina tulina kai'afu gahe-kawowo kaliva yadi dewa fa'ina kadu veyaina. 20Mena gaitomai-dina Yaubada matane hikivekoyomi. Atu ka'i wanimabwanenemi a'a wana'ana, medema keke Yaubada matane ginakivekoyomi.”
VinemiKenani Yesu hivetumaganeni-yo natudi giyamumu.
Maki 7:24-30
21Tu Yesu mena melalai-nadi gihegena ana tomuliya buye hina Taiya Saidoni adi fafali againe. 22Mena fafali-nadi gimiyami tu vinemiKenani sa'eyadi yo'o tulidi keke Yuda kwamayokuna Bana againe hi'ela hikova'awafatafata higayo, “Ho Kauveya, O'eni Devida bwanenena ma udahinekalikaliyema. Natuku kwamayoku wayafunena gimimiyami, u'una gikoyo-mo'a.”
23Kwamayoku hikovakova tu Yesu give'amasedi. Ana tomuliya Bana againe hi'ela higayo, “Au yadi ve'o'ola unavenogalena be adifaiweya hinana yadi manuweya. Fa'ina himulimuliyeda tu hikovakova'awafatafata be dibuda hivetoyogina.”
24Yesu badi mali yo'o kwamayokuna fa'idiya gigayo, “Yaubada keke yo'o tulidiyao agaidiya gida'iveniniseku. Au miIsileli yami yo'o agaimiya gi'iveniniseku, gaveyao vaita sifi nunuhegediyao hi'abi'abinauna amine.”
25Gigahe-yo kwamayoku hi'ela Yesu againe hi'ibo'ula-mo'a higayo, “Kauveya, udavelugama.”
26Gigahedi gigayo, “Ka'i miYuda badi vaita we'owe'o amine adiga ganavaina be yo'o tulidiyao badi vaita galu'eta amine ganahegeve'abidi digo, medema keke gidalubodani.”
27Badi higayo, “Ika Kauveya, ugahe velemo'ena. Atu galu'eta nonogana wagadi adiga kwadakwadana babiya gibe'ube'u-ma hi'au'ana.”
28 #
Md 8:10,13 Hidedemi higahe-yo au Yesu gigayo, “Omi kwamayoku yami wavetumagana. Au omi wave'o'oleku amine ginalakayemu.” Ada medema kauwanai-nadi kwamayoku natudi giyamumu.
Yesu to'aulolo moya'aidi gisiveyawadi.
29Tu Yesu mena fafali-nadi gihegena tu gina Galili ana taliya againe ginudadana. Ginauna tu oyeya gilaka be givetoga. 30Ada yo'o lakahidi Bana againe hi'ela yadi to'aulolo moya'aidi hi'aliyedi, tovefela tomatakoyo totubukoyo to'agoseboda Yesu agene hisedi be Yesu gisiveyawadi. 31Badi yo'o ma hiyaulowoga. To'agoseboda hilulukahihi totubukoyo hiyamumu tovefela hinunudadana tomatakoyo hi'ita'italele ma hi'itadi-yo hiyaulowoga, ada au miIsileli yadi Yaubada ana egana hikilakahina.
Yesu kaliva fowa tausani give'adi.
Maki 8:1-10
32 #
Md 14:14
Tu Yesu ana tomuliya gikovadi be hi'ela-yo gigahedi gigayo, “Mene yo'o aiyeta tohiye Iya buye kamiyami tu adamoya adiga keke fa'ina gahinekalikaliyedi, keke nuwanuwaku mafu ginalaulaudi ma gana'atuhegedi. Ka'i mafu ginalaulaudi tu hinanauna, au edeya matadi ginaluwaliwaliliuga be hinabe'u.”
33Ana tomuliya higahena higayo, “Melalagaga againe kamimiyami. Ha'againe a'a kanavaini-yo hida yo'o lakahidi kanave'adi?”
34Yesu gigayo, “A'a gavaiyehi omi agaimiya gidadauda?” Badi higayo, “We'a a'a seveni kadu igana kabi'odiyao tufoidi.”
35Higahe-yo yo'o givenuwa'atadi be babiya hinavetoga. 36Hivetoga tu Yesu a'a seveni kadu igana givaidi digo Tamana againe givesiule gikihinehinedi, au ana tomuliya giveledi be yo'o agaidiya hifolakena. 37Moya'aidi hi'a be hi'ahiyauwa. Tomuliya hive'adi tu adi tufo kwadakwadana hiyaudi feyawa seveni hivemagana. 38Badi kaliva a'ai-nadi hi'a-ma adi kilagalaga 4,000 tu vevine we'owe'o buye'i a gavaiyehi. 39Ada au Yesu yo'o gi'atuhegedi gihobu wakeya giyage gina Magidala ana fafali againe gidamana.
موجودہ انتخاب:
Madiu 15: viv
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2003, Wycliffe Bible Translators, Inc. All rights reserved.
