متّا 27
27
یهودانین اؤلومو
(حوارئلر 1:18-19)
1سحر آچیلاندا بوتون باش کاهئنلر و خالقین آغساقّاللاری عئسانی اؤلدورمک اوچون موشاوئره اتدئلر. 2عئسانی باغلادیلار و اونو والی پئلاطین یانینا آپاریب اونا تسلئم اتدئلر. 3او زامان اونو اَله ورن یهودا، عئسانین محکوم ادئلدئیئنی گؤروب پشمان اولدو و اوتوز گوموش پاراسینی باش کاهئنلر و آغساقّاللارا قایتاریب 4ددی: «من گوناه اتمئشم، چونکی تقصئرسئز قانی اَله ورمئشم.»
اونلار جاواب وردئلر: «بئزه نه؟ اؤزون بئل.»
5یهودا گوموشلری معبدئن ائچئنه آتیب اورادان چیخدی و گدئب اؤزونو آسدی. 6باش کاهئنلر گوموشو گؤتوروب ددئلر: «قان باهاسی اولدوغونا گؤره، بو گوموشلری معبدئن خزئنه‌سئنه قویماق جائز دیئل.» 7و موشاوئره ادئب قرئبلری دفن اتمک اوچون او پوللا کوزه‌گر زمئسئنی ساتین آلدیلار. 8بونا گؤره او زمئیه بو گونه قدر قان زمئسی دیئلئر. 9او واخت اِرِمیا پیغمبرئن واسئطه‌سئله دیئلمئش سؤز یرئنه یتئشدی:
«و اونلار اوتوز گوموش پاراسینی گؤتوردولر،
او آدامین قئیمتئنی کی، ائسرایئل اوغوللاری اونا قئیمت قویموشدولار. 10و ربّئن منه بویوردوغو کئمی کوزه‌گر زمئسی اوچون وردئلر.»#27:10 زِکَرئیّا ۱۱:۱۲ و ۱۳. اِرِمیا ۱۹:۱-۱۳، ۳۲:۶-۹.
عئسا روم والئسی پئلاطین قاباغیندا
11بو آرادا، عئسا والئنئن قاباغیندا دوردو. والی اوندان سوروشدو: «آیا سن یهودئلرئن پادشاهی‌سان؟»
عئسا اونا ددی: «ددئیئن کئمی‌دئر.»
12آمّا باش کاهئنلر و آغساقّاللار عئسایا بؤهتان ووران زامان دا، او هچ بئر جاواب ورمه‌دی. 13او واخت پئلاط اونا ددی: «اشئتمئرسن کی، سنئن ضئدّئنه نه قدر شهادت ورئرلر؟» 14آمّا عئسا اونا هچ بئر جاواب ورمه‌دی. والی بوندان چوخ تعجّوب اتدی.
15پاسخا بایرامیندا، والی عادتن خالقین ائسته‌دئیی زئندانی‌لردن بئرئنی آزاد ادردی. 16او زامان باراَبّا آدلی مشهور بئر زئندانی حبسده ساخلانیردی. 17بونا گؤره ده، جاماعات بئر یره ییغیلدیقلاری زامان، پئلاط اونلارا ددی: «هانسینی ائسته‌یئرسئنئز کی، سئزئن اوچون آزاد ادئم؟ باراَبّانی، یوخسا مسئح دیئلن عئسانی؟» 18چونکی بئلئردی کی، اونلار عئسانی پاخیلّیقدان اونا تسلئم ادئبلر.
19پئلاط حؤکم کورسوسونده اوتورموشدو کی، آروادی اونا خبر گؤندَ‌ردی: «بو صالح آداملا سنئن هچ بئر ائشئن اولماسین؛ چونکی بو گون اونون حاقّیندا یوخودا چوخ عذابلار چکمئشم.»
20آمّا باش کاهئنلر و آغساقّاللار جاماعاتی تحرئک ادئردئلر کی، باراَبّانی ائسته‌سئنلر و عئسانی اؤلومه ورسئنلر.
21او زامان والی اونلاردان سوروشدو: «ائکئسئندن هانسینی ائسته‌یئرسئنئز کی، سئزئن اوچون آزاد ادئم؟»
اونلار دا ددئلر: «باراَبّانی.»
22پئلاط اونلارا ددی: «بس مسئح دیئلن عئسایا نه ادئم؟»
اونلارین هامیسی ددئلر: «چارمیخا چکئلسئن.»
23والی ددی: «مگر او نه یامانلیق ادئب؟!»
آمّا اونلار داها اوجادان باغیریب ددئلر: «چارمیخا چکئلسئن.»
24پئلاط گؤردو کی، هچ بئر شی آرتیق فایدا اتمئر و عکسئنه ائغتئشاش داها دا گوجله‌نئر، سو گؤتوردو و خالقین قاباغیندا اَللرئنی یویوب ددی: «من بو صالح آدامین قانیندان تقصئرسئزم. اؤزونوز بئلئن!»
25بوتون خالق جاواب ورئب ددی: «اونون قانی بئزئم بوینوموزا و اوشاقلاریمیزین بوینونا اولسون!»
26او زامان پئلاط اونلارا باراَبّانی آزاد اتدی. و عئسانی، دؤیدورندن سونرا، چارمیخا چکئلمه‌یه تسلئم اتدی.
عسگرلر عئسانی تحقئر ادئرلر
(مرقوس 15:16-20، یوحنّا 19:2-3)
27او واخت، والئنئن عسگرلری عئسانی دئوانخانایا آپاردیلار؛ و بوتون فوج اونون باشینا ییغیلدی. 28اونو سویوندوروب، اونا قیرمیزی بئر شئنل گیدئردئلر. 29تئکانلاردان بئر تاج هؤروب، باشینا قویدولار، صاغ الئنه ده بئر قامیش وردئلر؛ اونو اَله سالیب قاباغیندا دئز چؤکوردولر و دیئردئلر: «سالام، ای یهودئلرئن پادشاهی!» 30اونا توپوردولر، قامیشی گؤتوروب باشینا ووردولار. 31اونو اَله سالاندان سونرا، شئنلی اَینئندن چیخاردیب، اؤز پالتارینی گیدئردئلر؛ و اونو چارمیخا چکمه‌یه آپاردیلار.
عئسا چارمیخا چکئلئر
(مرقوس 15:21-32، لوقا 23:26-43، یوحنّا 19:17-27)
32باییرا چیخاندا، شمعون آدلی کرِنِیلی بئر آدام تاپدیلار؛ اونو مجبور اتدئلر کی، عئسانین چارمیخینی داشیسین. 33جولجوتا، یعنی «کلّه یری» آدلانان یره گلدئکلری زامان، 34ائچمه‌یی اوچون اونا عؤد‌له قاریشیق تورش شراب وردئلر.#27:34 مزمور ۶۹:۲۱ عئسا اونو دادیب ائچمک ائستمه‌دی. 35اونو چارمیخا چکندن سونرا، پوشک آتیب پالتارلارینی آرالاریندا پایلادیلار. 36و اورادا اوتوروب اونون کشئیئنی چکدئلر. 37اونون باشی اوستونه تقصئرئنی یازیب ووردولار: «بودور یهودئلرئن پادشاهی عئسا.» 38او زامان اونونلا ائکی اوغرونو دا#27:38 یا دا «عوصیانچی» چارمیخا چکدئلر؛ بئری صاغیندا، بئری ده سولوندا. 39یانیندان کچنلر اونو سؤیوردولر و باشلارینی ترپه‌دئب، 40دیئردئلر: «ای معبدی ییخیب اوچ گونده تئکن! اگر تارینین اوغلوسان، اؤزونو خئلاص ات و چارمیخدان دوش!» 41باش کاهئنلر ده، دئن عالئملری و آغساقّاللارلا اونو اَله سالیب، دیئردئلر: 42«اؤزگه‌لری خئلاص ادئردی، آمّا اؤزونو خئلاص اده بئلمئر! اگر ائسرایئلئن پادشاهی‌دیر، قوی ائندی چارمیخدان دوشسون و بئز ده اونا ائمان گتئرک. 43تارییا بل باغلاییردی؛ اگر تاری اونو سِوئر، قوی ائندی اؤزو اونو خئلاص اتسئن. چونکی دیئردی من تارینین اوغلویام.» 44اونونلا چارمیخا چکئلن اوغرولار دا اونو سؤیوردولر.
عئسانین اؤلومو
(مرقوس 15:33-41، لوقا 23:44-49، یوحنّا 19:28-30)
45آلتینجی ساعاتدان دوقّوزونجو ساعاتا قدر،#27:45 مقصد گون اورتا اون‌ائکئدن ساعات اوچه قدردئر. بوتون اؤلکه‌یه#27:45 یا دا «یِر اوزونه» قارانلیق دوشدو. 46دوقّوزونجو ساعاتا یاخین، عئسا اوجا سَسله قیشقیردی: «ائلویی، ائلویی، لاما سَبَقته‌نی؟» یعنی «تاریم، تاریم، نه اوچون منی ترک اتدئن؟» 47اورادا دورانلاردان بعضئلری بونو اشئدنده ددئلر: «ائلیانی چاغیریر.» 48او آندا، اونلاردان بئری قاچیب بئر بولوط گؤتوردو، تورش شرابلا دولدوروب بئر قامیشا تاخدی و اونا اوزاتدی کی، ائچسئن. 49لاکئن قالانلاری دیئردئلر: «قویون گؤرک، آیا ائلیا اونو خئلاص اتمه‌یه گلئر؟» 50عئسا گئنه اوجا سَسله قیشقیریب روحونو تسلئم اتدی.
51او آندا معبدئن پرده‌سی یوخاریدان آشاغی‌یا قدر ائکی یره بؤلوندو. یر لرزه‌یه گلدی، قایالار چاتلادیلار. 52قبئرلر آچیلیب، وفات اتمئش بئر چوخ موقدّسئن جسدی دئرئلدی. 53اونلار قبئرلردن چیخیب، عئسانین دئرئلمه‌سئندن سونرا، موقدّس شهره گئردئلر و بئر چوخ آداملارا گؤروندولر. 54یوزباشی و اونونلا عئسانین کشئیئنی چکنلر، زلزله‌نی و واقع اولان شیلری گؤروب قورخدولار و ددئلر: «دوغرودان دا بو آدام تارینین اوغلو ائدی.» 55بئر چوخ آرواد کی، جلئلدن عئسانین دالینجا گلئب اونا خئدمت اتمئشدئلر، اورادا دوروب اوزاقدان تاماشا ادئردئلر. 56مجدللی مریم، یعقوبلا یوسانین آناسی مریم و زِبِدِیئن اوغوللارینین آناسی اونلارین آراسیندا ائدی.
عئسانین دفن اولونماسی
(مرقوس 15:42-47، لوقا 23:50-56، یوحنّا 19:38-42)
57آخشام دوشَنده یوسئف آدلی وارلی بئر آرئماتایلی گلدی کی، عئسانین شاگئردی اولموشدو. 58بو آدام پئلاطین یانینا گدئب عئسانین جسدئنی ائسته‌دی. او زامان پئلاط امر اتدی کی، جسد ورئلسئن. 59یوسئف جسدی آلیب تمئز بئر کتانا بورودو. 60اونو قایا ائچئنده تزه اووولموش اؤز مقبره‌سئنه قویدو و مقبره‌نئن گئرئشئنه بئر ائری داش دیرله‌دئب گتدی. 61مجدللی مریمله او بئری مریم اورادا، قبئرئن قاباغیندا اوتورموشدولار. 62او گونون صاباحی، یعنی حاضیرلیق گونوندن سونرا گلن گون، باش کاهئنلر و فرئسئلر پئلاطین یانینا ییغیلیب 63ددئلر: «جناب، بئز خاطیرلاییریق کی، او یالانچی، دئری اولان واختیندا دیئردی کی، اوچ گون سونرا دئرئله‌جه‌یم. 64بونا گؤره، امر ات کی، مقبره‌نی قوروسونلار. اولماسین شاگئردلری گلئب اونو اوغورلاسینلار و خالقا دسئنلر کی، او، اؤلولردن دئرئلدی. بو آزدیرماق اوّلکئندن ده داها پئس اولار.»
65پئلاط اونلارا ددی: «بئر دسته کشئچکی گؤتورون؛ گدئن بئلدئیئنئز کئمی مقبره‌نی قورویون.»
66اونلار گدئب مقبره‌نئن قاباغیندا کشئکچی قویدولار و مقبره‌نئن داشینی مؤهورله‌دئلر و بله‌جه مقبره‌نی بوتون خطرلردن قورودولار.
موجودہ انتخاب:
متّا 27: موقدس کتاب
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Elam Ministries 2013. All rights reserved.
