متّا 26
26
1عئسا بوتون بو سؤزلری بئتئرندن سونرا، شاگئردلرئنه ددی: 2«نجه کی، بئلئرسئنئز ده، ائکی گوندن سونرا پاسخا بایرامی باشلاناجاق و ائنسان اوغلو چارمیخا چکئلمک اوچون اَله ورئله‌جک.»
3او زامان باش کاهئنلر و خالقین آغساقّاللاری قیافا آدلی باش کاهئنئن سارایینا ییغیشدیلار 4و مصلحتلشدئلر کی، نجه عئسانی حئیله ائله توتوب اؤلدورسونلر. 5آمّا ددئلر: «بو ائش بایرامدا اولماسین، یوخسا خالق آراسیندا ائغتئشاش باش وِرَر.»
6عئسا بیت عنیادا، جوذاملی شمعونون اِوئنده اولان واخت، 7بئر آرواد اونون یانینا گلدی. آرواد مرمر بئر قابدا چوخ قئیمتلی بئر عطئر گتئرمئشدی. عئسا سوفره‌ده اوتورارکن، آرواد عطئری اونون باشینا تؤکمه‌یه باشلادی. 8شاگئردلر، بونو گؤرن واخت، قضبله‌نئب ددئلر: «بو ائصراف نه اوچون؟ 9اولاردی کی، بو عطئر باها بئر قئیمته ساتیلیب یوخسوللارا ورئلسئن.» 10آمّا عئسا بونو بئلئب اونلارا ددی: «نه اوچون بو آروادی ائنجئدئرسئنئز؟ او منه یاخشیلیق اتدی. 11یوخسوللار همئشه یانینیزدادیرلار، لاکئن من همئشه یانینیزدا دیئلم. 12بو آرواد بو عطئری منئم بدنئمه تؤکمکله منی دفن اوچون حاضیرلادی. 13دوغروسونو سئزه دیئرم: ائنجئلئن بو خوش خبری دونیانین هاراسیندا وعظ ادئلسه، بو آروادین اتدئیی ده دیئلئب خاطیرلاناجاق.»
یهودانین خیانتی
(مرقوس 14:1-11، لوقا 22:3-6)
14او زامان اون‌ائکئلردن، یهودا ائسکاریوت آدلانان بئری، باش کاهئنئن یانینا گدئب ددی: 15«اونو اَله ورسم، منه نه وِرَرسئنئز؟» اونلار دا یهودایا اوتوز گوموش پاراسی وعده وردئلر. 16او واختدان یهودا، عئسانی اَله ورمک اوچون فورصت آختاریردی.
پاسخا یمه‌یی
(مرقوس 14:12-26، لوقا 22:7-23، یوحنّا 13:21-30، 1قور. 11:23-25)
17فطئر بایرامینین بئرئنجی گونونده شاگئردلر عئسانین یانینا گلئب ددئلر: «هارادا ائسته‌یئرسن کی، سنئن اوچون پاسخا یمه‌یئنی حاضیرلایاق؟»
18عئسا دا ددی: «شهره گئرئب فئلانکسئن یانینا گدئن و اونا دیئن: ”اوستاد دیئر؛ واختیم یاخیندیر. شاگئرلرئمله بئر یرده پاسخانی سنئن اِوئنده یرئنه یتئره‌جه‌یئک.“»
19شاگئردلر عئسانین اونلارا امر اتدئیی کئمی ادئب پاسخانی حاضیرلادیلار. 20آخشام دوشَنده، عئسا اون‌ائکی شاگئردی ائله یمه‌یه اوتوردو. 21یمک یئینده عئسا ددی: «دوغروسونو سئزه دیئرم: سئزلردن بئری منی اَله وره‌جک.» 22اونلار چوخ پرت اولدولار و هر بئرئسی «حتمن کی، من دیئلم، یارب؟» دمه‌یه باشلادی. 23عئسا جاواب ورئب ددی: «اَلئنی منئمله بوشقابا اوزادان، منی اَله وره‌جک. 24ائنسان اوغلو نجه کی، اونون باره‌سئنده یازیلیب، گدئر. آمّا وای او آدامین حالینا کی، ائنسان اوغلو اونون واسئطه‌سئله اله ورئلئر! او آدام هچ آنادان اولماسایدی، اونون اوچون داها یاخشی اولاردی.»
25اونو اله ورن یهودا ددی: «حتمن کی، من دیئلم، اوستاد؟»
عئسا دا اونا ددی: «ددئیئن کئمی‌دئر.»
26اونلار یمک یئیرکن، عئسا چؤره‌یی گؤتوردو و برکتله‌یئب پارچالادی و شاگئردلره ورئب ددی: «آلین، ییئن! بو منئم بدنئمدئر.» 27بئر پئیالا ده گؤتوروب شوکور اتدی و اونلارا ورئب ددی: «بوندان هامینیز ائچئن. 28چونکی بو منئم قانیمدیر، عهدئن قانی کی، گوناهلارین باغیشلانماسی اوچون بئر چوخلاری یولوندا تؤکولور. 29سئزه دیئرم: اوزوم آغاجینین بو محصولوندان آرتیق ائچمیه‌جه‌یم، او گونه کئمی کی، اونو آتامین پادشاهلیغیندا سئزئنله برابر تزه‌سئنی ائچئم.»
30و ائلاهی ماهنی‌لار اوخویاندان سونرا زیتون داغینا گتدئلر.
پطروسون ائنکار اتمه‌سی قاباقدان خبر ورئلئر
(مرقوس 14:27-31، لوقا 22:31-34، یوحنّا 13:36-38)
31او زامان عئسا اونلارا ددی: «بو گجه هامینیز مندن دؤنه‌جکسئنئز. چونکی یازیلیب:
”چوبانی ووراجاغام،
و سورونون قویونلاری داغیلاجاق.“#26:31 زِکَرئیّا ۱۳:۷
32آمّا من، دئرئلندن سونرا، سئزدن قاباق جلئله گده‌جه‌یم.»
33پطروس جاواب ورئب ددی: «هامی سندن دؤنسه ده، من سندن اصلا دؤنمه‌یه‌جه‌یم.»
34عئسا اونا ددی: «دوغروسونو سنه دیئرم: اِله بو گجه، خوروز بانلامامیشدان سن منی اوچ دفه ائنکار اده‌جکسن.»
35پطروس اونا ددی: «منه سنئنله بئر یرده اؤلمک لازیم گلسه بله، سنی اصلا ائنکار اتمه‌یه‌جه‌یم.» شاگئردلرئن هامیسی دا اِله ددئلر.
جِتسئمانی باغیندا
(مرقوس 14:32-42، لوقا 22:39-46)
36او زامان عئسا اونلارلا جتسئمانی آدلانان بئر یره گلئب شاگئردلرئنه ددی: «من اورایا گدئب دوعا ادرکن، سئز بورادا اوتورون.» 37پطروسلا زِبِدِیئن ائکی اوغلونو اؤزو ائله گؤتوردو. قم و ائضطئراب عئسایا حاکئم اولماغا باشلامیشدی. 38او واخت اونلارا ددی: «جانیم اؤلوم درجه‌سئنده قمگئندئر. بورادا دورون و منئمله اویاق قالین.» 39و بئر آز ائره‌لی گتدی، اوزو-اوسته یره دوشوب دوعا اتدی: «ای آتام، اگر مومکوندور، قوی بو پئیالا مندن کچسئن، آمّا منئم ائسته‌دئیئم کئمی یوخ، سنئن ائسته‌دئیئن کئمی اولسون.»
40شاگئردلرئنئن یانینا قاییتدی و اونلاری یوخولامیش تاپدی. پطروسا ددی: «منئمله بئر ساعات دا اولسا، اویاق قالماغا قادئر دیئلدئنئز؟ 41اویاق قالین و دوعا ادئن کی، ائمتاحانا#26:41 و یا «وسوسه» دوشمه‌یه‌سئنئز. روح راضی، لاکئن جئسم ضعئفدئر.»
42عئسا ائکئنجی دفه گدئب دوعا اتدی: «ای آتام، اگر مومکون دیئل کی، او پئیالا من اونو ائچمه‌دن کچسئن، قوی سنئن ائسته‌دئیئن اولسون.» 43و قاییدیب اونلاری گئنه یوخولامیش تاپدی، چونکی اونلارین گؤزلری آغیرلانمیشدی. 44اونلاری قویوب گئنه گتدی و اوچونجو دفه دوعا ادئب گئنه همن سؤزلری ددی. 45او واخت شاگئردلرئنئن یانینا گلئب اونلارا ددی: «سئز حله ده یاتیب ائستئراحت ادئرسئنئز؟ باخین، ساعات یاخینلاشیب و ائنسان اوغلو گوناهکارلارین الئنه تسلئم ادئلئر. 46دورون گدک! باخین، منی تسلئم ادن گلئر!»
عئسا توتولور
(مرقوس 14:43-50، لوقا 22:47-53، یوحنّا 18:3-12)
47عئسا حله دانیشیردی کی، اون‌‌‌ائکی‌لردن بئری اولان یهودا گلدی؛ یانیندا قیلینجلی و دینکلی بؤیوک بئر جاماعات وار ائدی کی، باش کاهئنلر و خالقین آغساقّاللاری طرفئندن گؤندَ‌رئلمئشدئلر. 48اونو تسلئم ادن اونلارا بئر علامت ورئب دمئشدی کی، «کئمی اؤپسم، اودور؛ اونو توتون.» 49و او آندا عئسایا یاخینلاشیب «سالام، اوستاد!» ددی و اونو اؤپدو. 50عئسا دا اونا ددی: «دوستوم، نه اوچون گلدئیئنی ات!» او زامان اونلار عئسایا یاخینلاشدیلار و ال آتیب اونو توتدولار. 51عئسا ائله اولانلاردان بئری ال آتیب، قیلینجینی چکدی و باش کاهئنئن نؤکرئنی ووروب قولاغینی کسدی. 52او زامان عئسا اونا ددی: «قیلینجینی یرئنه قوی، چونکی بوتون قیلینج چکنلر قیلینجلا هلاک اولاجاقلار. 53مگر اله گومان ادئرسئنئز کی، قادئر دیئلم آتامدان کؤمک ائسته‌یم؟! ائسته‌سم، اله همئن بو آن منه ائکی قوشوندان چوخ ملک گؤندَ‌رَر. 54اوندا بس نجه یازیلار دوغرو چیخاردی کی، بله اولماسینین لازیم اولدوغونو دیئر؟»
55او زامان عئسا جاماعاتا ددی: «منی توتماغا اله قیلینجلار و دینکلرله گلئبسئنئز کی، اله بئل اوغرو توتماغا چیخیبسینیز. من هر گون معبدده اوتوروب تعلئم ورئردئم، لاکئن منی توتمادینیز. 56آمّا بونلارین هامیسی اونون اوچون باش ورئر کی، پیغمبرلرئن یازیلاری یرئنه یتئشسئن.»
او زامان شاگئردلرئن هامیسی عئسانی قویوب قاچدیلار.
عئسا مئلّت شوراسینین قاباغیندا
(مرقوس 14:53-65، لوقا 22:54-55، 63-71، یوحنّا 18:13-14، 19-24)
57عئسانی توتانلار اونو باش کاهئن قیافانین یانینا گتئردئلر. دئن عالئملری و آغساقّاللار دا بورادا ییغیلمیشدیلار. 58پطروس باش کاهئنئن سارایینا قدر اوزاقدان عئسانین دالینجا گتدی و ائچه‌ری گئرئب، ائشئن آخیرینی گؤرمک اوچون موحافئظلرئن یانیندا اوتوردو. 59باش کاهئنلر و بوتون شورا عئسانی اؤلدورمک اوچون اونون ضئدّئنه یالان شهادت آختاریردیلار. 60اورتایا بئر چوخ یالانچی شاهئدلر چیخدیغی حالدا، آختاردیقلارینی تاپا بئلمه‌دئلر. نهایت ائکی یالانچی شاهئد گلئب ددی: 61«بو آدام ددی کی، ”من تارینین معبدئنی ییخیب، اوچ گونده تئکه بئله‌رم.“»
62باش کاهئن آیاغا قالخیب عئسایا ددی: «سن هچ جاواب ورمئرسن؟ بونلارین سنئن ضئدّئنه وردئکلری شهادت نه‌دئر؟»
63آمّا عئسا سوکوت اتدی. باش کاهئن اونا ددی: «سنی آند ورئرم یاشایان تارییا، بئزه ده گؤرک، آیا سن تارینین اوغلو مسئحسن؟»
64عئسا اونا ددی: «ددئیئن کئمی‌دئر. حتّا بونو دا سئزه دیئرم؛ بوندان سونرا ائنسان اوغلونو گؤره‌جکسئنئز کی، قادئرئن صاغیندا اوتوروب، گؤیون بولودلاری اوستونده گلئر.»
65او زامان باش کاهئن اؤز پالتارینی جیریب ددی: «او کوفر دیئر، داها شاهئدلره نه احتئیاجیمیز وار؟ باخین، اله ائندی اونون کوفر ددئیئنی اشئتدئنئز. 66سئزه نجه گلئر؟»
اونلار جاواب ورئب ددئلر: «او، اؤلومه لایئقدئر.»
67او زامان عئسانین اوزونه توپوروب، اونا یومروق ووردولار. بعضئلری ده اونون اوزونه شئلّه ووروب، 68دیئردئلر: «ای مسئح، بئزه پیغمبرلئیئنی گؤرسد گؤرک، سنی ووران کئمدئر؟»
پطروس عئسانی ائنکار ادئر
(مرقوس 14:66-72، لوقا 22:56-62، یوحنّا 18:15-18، 25-27)
69بو زامان پطروس اشئکده، حیطده اوتورموشدو. بئر کنئز اونا یاخینلاشیب ددی: «سن ده جلئللی عئسا ائله ائدئن.»
70آمّا او، هامینین قاباغیندا ائنکار ادئب ددی: «سنئن نه ددئیئنی باشا دوشمورم.» 71سونرا دروازایا طرف گتدی. اورادا آیری بئر کنئز اونو گؤروب اوراداکی‌لارا ددی: «بو دا ناصئره‌لی عئسا ائله ائدی.»
72او، گئنه ائنکار ادئب آند ائچدی: «او آدامی تانیمیرام.»
73بئر آز سونرا اورادا دورانلار گلئب پطروسا ددئلر: «دوغرودان سن ده اونلاردانسان، چونکی دانیشیغین سنی ائفشا ادئر.»
74او زامان پطروس لعنت وره-وره آند ائچمه‌یه باشلادی: «او آدامی تانیمیرام.» و او آندا خوروز بانلادی. 75پطروس عئسانین سؤزونو خاطیرلادی کی، اونا دمئشدی؛ «خوروز بانلامامیشدان سن منی اوچ دفه ائنکار اده‌جکسن.» و اورادان چیخیب آجی-آجی آغلاماغا باشلادی.
موجودہ انتخاب:
متّا 26: موقدس کتاب
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Elam Ministries 2013. All rights reserved.
