لوقا ۱۹
۱۹
عیسی مسیح و زکی‌یٚ باجگیر
۱ عیسی اَریحا دورون بوشو تا اورشلیمٚ طرف بشه. ۲ هو شهرٚ دورون ایتأ مردای زندگی کودی کی اونٚ نام زکی بو. اون، باجگیرأنٚ رئیس بو و مال و منالٚ زیادی دأشتی. ۳ زکی خوأستی عیسایَ بیدینه کی اونَ بشنأسه ولی چون پاچٚ قد بو جمعیتٚ میأنی نتأنستی. ۴ هَنٚ وأسی بودُوٚسته جُلُو، بأزین اَنجیلٚ دار#۱۹:۴به فارسی: انجیر سیکامور وأچُکسته بوشو بوجور کی عیسایَ بیدینه، چونکی جٚه هو رأ دوأرستَن دوبو. ۵ وختی کی عیسی نزدیکَ بوسته، بوجورَ فندرسته و بفرمأسته: «زکی، هسأ بیأ بیجیر! ایمروز وأ تی خانه مهمان ببم.» ۶ زکی عجله اَمرأ بیجیر بمو و خوشحالی اَمرأ عیسایَ خو خانه ببرده. ۷ تومامٚ کسأنی کی اویه ایسَه‌بید وختی اَ ماجرایَ بیده‌ییدی، گله و شکایتٚ اَمرأ بوگفتیدی: «اون ایتأ گوناهکار آدمٚ خانه مهمانی بوشو.» ۸ ولی زکی جٚه خو جا ویریشته، بپا بِیسه و عیسایٚ خوداوندَ بوگفته: «اَی آقا جان، نیصفٚ می دارایی‌یَ فقیرأنَ بخشم و هر کسٚ جأیم کی ناحق چیزی فیگیفتم، چار برابر اونَ وأگردأنم.» ۹ عیسی بفرمأسته: «ایمروز نجات اَ خانه دورون بمو، چره کی اَ مردأکم جٚه ایبراهیمٚ نسله ۱۰ چونکی اینسأنٚ پسر بمو تا اونی‌یَ کی اویرَ بوسته پیدا بوکونه و نجات بده.»
شیمی آسمانی اربابٚ رِه مفید بیبید
۱۱ وختی عیسی اورشلیمَ نزدیکَ بوسته، مردوم فیکر کودیدی کی خودا پادشایی شروع بوستَن دره. پس عیسی او کسأنی‌رِه کی اونٚ گبأنَ ایشنأوستیدی ایتأ مٚثٚل بأورده ۱۲ و بفرمأسته: «ایتأ نجیب‌زاده ایسَه‌بو کی سفرٚ دور و درازی بوکوده، بوشو پایتخت کی امپراطور اونَ پادشا چأکونه و بأزین وأگرده. ۱۳ قبلٚ اَنکی بشه، ده‌تأ جٚه خو غولامأنَ دوخوأده، هر کودامَ ایتأ سکه‌یٚ طلا فدَه و بوگفته: ‹تا می وأگردستن، اَ پولٚ اَمرأ تجارت بوکونید.› ۱۴ اونٚ هموطنأن کی اونٚ جأ نیفرت دأشتیدی قاصدأنی امپراطورٚ ورجأ اوسه کودید کی بیگید: ‹اَمأن نخوأیم کی او نجیب‌زاده اَمی پادشا ببه.› ۱۵ ولی او شخص پادشایی مقام فأرسه و بأزین وأگردسته خو شهر و دیار و خو غولامأنَ کی اوشأنَ سکه‌یٚ طلا فدَه‌بو، وأورسه: ‹چقدر سود بوکودید؟› ۱۶ اوّلی بوگفته: ‹سرور، شیمی ایتأ سکه ده‌تأ سکه سود بوکوده.› ۱۷ پادشا بوگفته: ‹آفرین، تو غولامٚ خوبی ایسی. تو ایتأ کوجه کارٚ رِه دوروستکار و امین بی، پس ده‌تأ شهرَ ترَ ایسپأرم تا او شهرأنٚ حاکم بیبی.› ۱۸ دوّمی بوگفته: ‹سرور، شیمی ایتأ سکه، پنج‌تأ سکه سود بوکوده.› ۱۹ پادشا اونَ بوگفته: ‹تو پنج‌تأ شهرٚ حاکم بوبو.› ۲۰ سوّمی بمو بوگفته: ‹سرور، اَنم شیمی سکه. اونَ ایتأ پارچه دورون وأپیختم و بدأشتم. ۲۱ شیمی جأ ترس دأشتیم چونکی آدمٚ سختگیری ایسید. چیزی‌یَ کی ننَه‌یی، اوسأنی و اونچی‌یَ کی نکاشتی، وَوینی.› ۲۲ پادشا اونَ سرزنش بوکوده و بوگفته: ‹اَی غولامٚ بد ذات، تو تی اَ گبأنٚ اَمرأ خودتَ محکوم بوکودی. تو کی دأنستی من سختگیرٚ آدمم، چیزی‌یَ کی ننَم، اوسأنم و چیزی‌یَ کی نکاشتم، وَوینم، ۲۳ چره می پولَ صرافأنٚ بازارٚ ورجأ ننَه‌یی تا وختی کی وأگردستم اونٚ سودَ فیگیرم؟› ۲۴ بأزین وأگردسته، اوشأنی‌یَ کی اویه ایسَه‌بید بوگفته: ‹او سکه‌یَ اونٚ جأ فیگیرید و فدید او غولامی‌یَ کی ده‌تأ سکه سود بوکوده.› ۲۵ اوشأن بوگفتید: ‹اَی پادشا، اون ده‌تأ سکه دأره.› ۲۶ پادشا وأگردسته بوگفته: ‹شمرَ گم اونی کی ویشتر دأره، اونَ ویشتر فدَه ببه و او کسی‌یم کی ایپچه دأره، هونم اونٚ جأ فیگیفته به. ۲۷ هسأ اوشأنی کی نخوأستیدی من اوشأنٚ پادشا ببم، می ورجأ بأورید و بوکوشید.›» ۲۸ عیسی اَ نقلَ بوگفته و جُلُوتر جٚه اوشأن، اورشلیمٚ رایَ پیش بیگیفته.
عیسی شه اورشلیم و مردوم شادی کونیدی
۲۹ وختی عیسی بیت‌فاجی و بیت‌عنیا دیهأتأن کی زیتونٚ کوه دامنه سر نهَه‌بید نزدیکَ بوستَن‌دوبو، دوتأ جٚه خو شاگردأنَ اوسه کوده ۳۰ و اوشأنَ بفرمأسته: «بیشید او دیهأتی کی شیمی جُلُو نهَه. وختی اویه فأرسه‌ییدی، ایتأ کرّه اولاغ اویه دٚوٚسته نهَه کی هیکس تا هسأ اونَ سوارَ نوبوسته. اونٚ لافندَ وازَ کونید و بأورید اَیه. ۳۱ اگه اینفر وأورسه: ‹چره اونَ وأکودَن دریدی؟› بیگید: ‹اَمی سرور، اَنَ لازم دأره.›» ۳۲ او دوتأ شاگردأن بوشوییدی و هو چیزأنی‌یَ هوطویی عیسی بفرمأسته‌بو بیده‌ییدی. ۳۳ وختی کرّه اولاغٚ لافندَ وأکودن دیبید، اونٚ صاحابأن وأورسه‌ییدی: «چره او کرّه اولاغَ وأکودَن دریدی؟» ۳۴ شاگردأن بوگفتید: «اَمی سرور اونَ لازم دأره.» ۳۵ بأزین کرّه اولاغَ بأوردید، خوشأن لیباسأنَ اونٚ رو تأودَه‌یید و عیسایَ اونٚ سر سوارَ کودید. ۳۶ هَطو کی عیسی رأ دکفته، مردومأن خوشأنٚ لیباسأنَ رأ سر وأشأدید. ۳۷ وختی کوهٚ زیتون سراجیری‌یَ فأرسه، همه‌تأنٚ اونٚ شاگردأن عیسی عجیبٚ کارأنٚ وأسی کی بیده‌بید شادی و صدای بولندٚ اَمرأ خودایَ شوکر کودیدی ۳۸ و گفتید:
«موبارکه پادشایی کی خوداوندٚ نامٚ اَمرأ اَیه!#۲۱:۹ مزمور ۱۱۸ آیه ۲۶
سلامتی آسمانٚ جور و جلال بوجورترین جاجیگایأنٚ دورون ببه!»
۳۹ بأزین بعضی جٚه فریسیأن کی مردومٚ میأنی ایسَه‌بید، عیسایَ بوگفتید: «اَی اوستاد، تی شاگردأنَ دستور بدن کی ساکیتَ بید.» ۴۰ عیسی وأگردسته بوگفته: «شمرَ گم اگه اَشأن ساکیت بیبید، سنگأن فریاد زنیدی.»
۴۱ هَطو کی عیسی اورشلیمَ نزدیکَ بوستَن دوبو و شهرَ بیده، گریه بوکوده#۱۹:۴۱ عیسی گریه کودنٚ دلیل اَن بو کی دأنستی اورشلیم تنبیه به، اَطو کی چهل سالٚ بعد خودا ایجازه بدَه کی رومٚ ارتش، اورشلیمَ ویرانَ کونه چونکی عیسایَ قوبیل نوکوده‌بید. ۴۲ و بوگفته: «اَی اورشلیم، کاش بتأنسته‌بی تشخیص بدی کی اَ روز چی چیزی تِره صلح و سلامتی اَوره ولی افسوس کی هسأ تی چومأنٚ جأ پنهانه. ۴۳ زمأنی فأرسه کی تی دوشمنأن تی دور سنگر چأکونیدی و جٚه هر طرف ترَ محاصره کونیدی. ۴۴ بأزین ترَ خاکٚ اَمرأ یکسان کونیدی و تی ساکنأنَ به خاک و خون فأکشیدی. حتی ونألیدی سنگ، سنگٚ سر بمأنه، چونکی جٚه او فرصتی کی خوداوند ترَ فدَه‌بو، غافل بی.»
عیسی مسیح، فروشنده‌یأن و کاسبأنَ معبدٚ صحنٚ جأ بیرونَ کونه
۴۵ بأزین عیسی بوشو معبدٚ صحنٚ دورون و کسأنی‌یَ کی قوربانی کودنٚ وسایلَ فروختن دیبید، بیرونَ کوده ۴۶ و بفرمأسته: «خودا کلامٚ دورون بینیوشته بوبوسته کی: ‹می خانه، دوعا خانه‌یه›#۲۱:۱۳ اِشعیا بابٚ ۵۶ آیه ۷ولی شومأن اونَ دوزدأنٚ لانه چأکودید.»#۲۱:۱۳ اِرمیا بابٚ ۷، آیه ۱۱ ۴۷ عیسی همه‌تأ روزأن معبدٚ صحنٚ دورون تعلیم دَیی. پیله کاهنأن، دینٚ علما و قومٚ پیله کسأن سعی بوکودید اونٚ هلاک کودنٚ رِه ایتأ رأ بیأفید، ۴۸ ولی رأهی پیدا نوکودید، چونکی بیده‌یید مردوم اونٚ دور و ور ایسَه‌یید و علاقه اَمرأ عیسی گبأنَ گوش دهیدی.
موجودہ انتخاب:
لوقا ۱۹: گیلکی (رشتی)
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2010-2019 Gilak Media
