لوقا ۱۸
۱۸
سمچٚ وِئوه زنأکٚ جأ مٚثٚل اَوردن
۱ عیسی خو شاگردأنٚ رِه ایتأ مٚثٚل بأورده تا اوشأنَ حألی بوکونه کی وأستی همیشه دوعا بوکونید و هیوخت دیل‌سردَ نیبید. ۲ بفرمأسته: «ایتأ شهرٚ دورون ایتأ قاضی ایسَه‌بو کی نه خودا جأ ترسی دأشتی و نه مردومٚ گبأنَ توجه کودی. ۳ هو شهرٚ دورون، ایتأ وِئوه زنأی زندگی کودی کی همیشه قاضی ورجأ اَمویی و اونَ گفتی: ‹می حقَ می دشمنٚ جأ فیگیر.› ۴ قاضی خیلی مدت زمأت اونٚ گبأنَ محل نوکودی. بأزین آخرٚ سر خو اَمرأ بوگفته: ‹گر چی من خودا جأ نترسم و خلقٚ خودایم محل ننم، ۵ ولی چون اَ وِئوه زنای مِره دردسر بوبوسته، بهتره کی اَنٚ دادَ فأرسم کی اَنٚ شوئون و اَمون مرَ زله نوکونه.›»
۶ عیسایٚ خوداوند خو شاگردأنَ بوگفته: «بیشتأوستیدی اَ بی‌اینصافٚ قاضی چی بوگفته؟ ۷ اگه اَ جور آدم، مردومٚ داد فأرسه، ینی خودا او کسأنٚ داد کی خودش اینتخاب بوکوده و شبأنه روز اونٚ ورجأ ایلتماس کونیدی، فئنرسه و اوشأنَ کومک نوکونه؟ ۸ یقین بدأنید کی خودا خیلی زود به دادٚ اوشأن فأرسه. ولی می سؤال اَنه: وختی من کی اینسأنٚ پسرم بأیم، چن نفرَ تأنم پیدا بوکونم کی خودا کارأنَ ایمأن بدأرید؟»
فریسی و باجگیرٚ دوعا کودنٚ جأ مٚثٚل اَوردن
۹ عیسی او کسأنی‌رِه کی خوشأنَ دیگرأنٚ جأ پیله‌تر و پرهیزکارتر دأنستیدی و بقیه آدمأنَ کوچیک‌تر، اَ مٚثٚلَ بأورده: ۱۰ «دو نفر دوعا کودنٚ وأسی معبدٚ صحنٚ دورون بوشویید، ایتأ فریسی بو و اویتأ باجگیر. ۱۱ فریسی خوره ایتأ کنار بِیسه و اَطویی دوعا بوکوده: ‹خودایا، ترَ شوکر کونم کی دیگرأنٚ مأنستن مخصوصاً اَ باجگیرٚ مأنستن گوناهکار نی‌یم، نه دوزدی کونم، نه کسی‌یَ ظلم کونم، نه زنا کونم. ۱۲ ایتأ هفته دورون، دو وار روزه گیرم و جٚه هرچی کی بدس اَورم می ده یکم فدم.› ۱۳ ولی او باجگیر دور بِیسه و جرأت نوکوده خو سرَ آسمانٚ طرف راستَ گیره. خجالت و غم و غورصه اَمرأ خو سینه‌یَ زه‌یی و گفتی: ‹خودایا، من گوناهکارم. مرَ رحم بوکون!› ۱۴ شمرَ گم، خودا او باجگیرٚ گونایأنَ ببخشه و اون بوشو بخانه. ولی او فریسی گونایأن ببخشه نوبوسته. هر کی بخوأیه خورَه پیله کس نیشأن بده کوچیکَ بِه و هر کی‌یم خورَه کوچیکَ کونه، پیله کس بِه.»
عیسی مسیح کوچه زأکأنَ برکت دهه
۱۵ مردوم خوشأنٚ زأکأنَ عیسی ورجأ اَوردید کی عیسی اوشأنٚ سر دس بنه و برکت بده. وختی عیسی شاگردأن اَ منظره‌یَ بیده‌ییدی، اوشأنٚ پئر و مارأنَ سرزنش بوکودیدی کی چره عیسی رِه موزاحم بیدی. ۱۶ ولی عیسی، زأکأنَ خو ورجأ بخوأسته و خو شاگردأنَ بوگفته: «وئلید زأکأن می ورجأ بأیید و اَشأنٚ جُلُویَ نیگیرید، چونکی خودا پادشایی اَ جورٚ کسأنٚ شینه.#۱۸:۱۶ کوجه زأکأن خوشأنٚ سادگی اَمرأ روحأنی حقیقتأنَ قوبیل کونیدی، هَطویم کسأنی‌یَ کی اوشأنَ تعلیم دیهیدی وابسته بیدی و ایطمینانٚ کامل دأریدی. ۱۷ آمین شمرَ گم کی هر کی خودا پادشایی‌یَ ایتأ کوجه زأکٚ مأنستن قوبیل نوکونه، هیوخت نتأنه اونٚ دورون بشه.»
خودا پادشایی و پولدارٚ آدمأن
۱۸ ایروز ایتأ پیله‌دأنه کس عیسی جأ وأورسه: «اَی اوستادٚ نیکو، چی وأ بوکونم کی اَبدی حیات می ارث ببه؟» ۱۹ عیسی اونَ بوگفته: «چره مرَ ‹نیکو› دوخوأنی؟ هیکس جز خودا نیکو نی‌یه. ۲۰ حوکمأنَ تو دأنی: ‹زنا نوکون، قتل نوکون، دوزدی نوکون، شهادتٚ دورُغ نوأ دَئن، تی پیر و مارَ ایحترام بنه.›» ۲۱ او مردای بوگفته: «همه‌تأنٚ اَشأنَ جٚه وختی کی زأی بوم تا هسأ انجام بدَم.» ۲۲ عیسی بفرمأسته: «امّا ایچی کم دأری. تومامٚ تی مال و منالَ بوفروش و فقیرأنٚ میأن سأم بوکون کی آسمانٚ دورون گنج بدأری و بأزین بیأ می جأ پیروی بوکون.»
۲۳ وختی او مردأی عیسی گبأنَ بیشنأوسته، اونٚ دیلَ غم دکفته چونکی مال و منالٚ زیادی دأشتی. ۲۴ عیسی اونَ فندرسته، بوگفته: «چی سخته کی پولدارٚ آدمأن بتأنید خودا پادشایی دورون بیشید ۲۵ شوتورٚ رِه سوزنٚ سولاخٚ جأ دوأرستن آسانتره تا کی پولدارٚ آدم بتأنه خودا پادشایی دورون رأ بیأفه.»
۲۶ کسأنی کی عیسی گبأنَ ایشنأوستن دیبید وأورسه‌ییدی: «بأزین کی نجات یأفه؟» ۲۷ عیسی بفرمأسته: «اونچی کی اینسأنٚ رِه ایمکأن نأره، خودا رِه ایمکأن دأره.» ۲۸ پطرس عیسایَ بوگفته: «بیدین، اَمأن اَمی خانه و زندگی‌یَ ولَ کودیم و تی جأ پیروی کودَن‌دریم.» ۲۹ عیسی بفرمأسته: «آمین شمرَ گم هر کی خودا پادشایی وأسی، شیمی مأنستن خو خانه و خو زن و زأکَ و خو پئر و مار و برأر و خأخورأنٚ جأ دس بکشه، ۳۰ اَ دونیا میأن چندین برابر عوض فیگیره و او دونیا دورون، اَبدی زندگی‌یَ بدس اَوره.»
عیسی مسیح سومی وار خو مردن و ویریشتن جٚه مورده‌یأنٚ دونیایَ پیشگویی کونه
۳۱ بأزین عیسی خو دوازده‌تأ رسولَ ببرده ایتأ گوشه و اوشأنَ بوگفته: «هسأ اورشلیم شوئون دریم و اونچی کی انبیا درباره‌یٚ من، کی اینسأنٚ پسرم بوگفتید و پیشبینی بوکودید به انجام فأرسه. ۳۲ اینسأنٚ پسرَ غیرٚ یوهودیأنٚ دس ایسپأریدی، اونَ توهین کونیدی و دس پرَ گیریدی و اونٚ سر فیلی فوکونیدی، ۳۳ اونَ شلاق زنیدی و کوشیدی. بأزین کی بمرده، سوّمی روزٚ رِه مورده‌یأنٚ دونیا جأ ویریزه.» ۳۴ ولی شاگردأن عیسی گبأنٚ جأ چیزی نفهمستید. او گبأنٚ معنی اوشأنٚ رِه گنگ بو کی راجع به چی گب زِئن دره.
ایتأ کورٚ شفا گیفتن
۳۵ هَطو کی اَریحا شهرَ فأرسئن‌دیبید، ایتأ کور اوشأنٚ رأ کنار نیشته‌بو کی گدایی کودن دوبو. ۳۶ وختی او جمعیتٚ صدایَ بیشنأوسته کی جٚه اویه ردَ بوستن دیبید، وأورسه: «چی خبر بوبوسته؟» ۳۷ اونَ بوگفتید: «عیسی ناصری جٚه اَ رأ شوئون دره.» ۳۸ بأزین او کور ایجگره زنان بوگفته: «اَی عیسی، اَی داوودٚ زأی، مرَ رحم بوکون!» ۳۹ کسأنی کی جمعیتٚ جُلُو شوئون دیبید اونَ تشر بزه‌ییدی و بوگفتیدی کی ساکیتَ به ولی اون ویشتر ایجگره زه‌یی و گفتی: «اَی داوودٚ زأی، مرَ رحم بوکون!» ۴۰ عیسی خو جا سر بِیسه و بفرمأسته: «اَ مردأکَ می ورجأ بأورید.» وختی اونَ بأوردید، عیسی اونٚ جأ وأورسه: ۴۱ «چی خوأیی تِره بوکونم؟» او مردای وأگردسته بوگفته: «اَی آقا، خوأیم کی می چومأن بیدینه.» ۴۲ عیسی اونَ بفرمأسته: «بینا بوبو، تی ایمأن ترَ نجات بدَه.» ۴۳ هو لحظه اونٚ چومأن وازَ بوسته و تأنستی بیدینه و هَطویی کی خودایَ شوکر کودی عیسی دونبألسر رأ دکفته بوشو. مردوم کی اَ ماجرایَ بیده‌ییدی، همه‌تأن خودایَ ستایش بوکودیدی.
موجودہ انتخاب:
لوقا ۱۸: گیلکی (رشتی)
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2010-2019 Gilak Media
