T. LŪKÖS 20
20
Intönö Löktö Kanò-òṅ Yēsū
(Mt 21.23-27; Mk 11.27-33)
1Ngaich ik tö hĕng sakāmö hē u, hē Ò nö haköptö yik tarik nö ël ngam töhet chūök, nö mumkahten tö ngam tölöök inhānga; yihtöre ngaich yik mākūö kūönṙô, yik kamūich inrē. Nö holtö yik yöngṙen; 2Ngaich ṙô-òv cha-a nö ngö ṙô tö Ò, Ve-enynang ih Man, asuh öp chöngö Meh Öm ngatī? Achīö ap kame-eṅkūö Meh tö ngih chöngö?
3Ngaich sap ṙô cha Anga-aṅ nö ngö ṙô, Hĕng öp ṙô Chu inrē hatönö yīö; ve-enynang Chu pöchö. 4Ap tī Yôhan vinôkö, lamöktö el halīöngö ap? Lamöktö i tarik ṙöng? 5Ngaich cha-a nöng in re lōn nö ngö ṙô, Yē hī min ngö ṙô. Lamöktö el halīöngö; ngaich ngö ṙô min Anga-aṅ, Kūöyòh öi öt ṙātö ellōnre in ò? 6Yē hī ngö ṙô pöri min, Lamöktö i tarik; ṙòkhöre min vē tarik nö kulehe hī; pò cha nö akahaiṙen tö Yôhan nö pròfĕt. 7Ngaich sap ṙô Ò cha-a, töre nö öt akahalōn töp löktö e.
8Ngaich ngö ṙô Yēsū tö cha, Ötrēhĕn Chin Chu-ö hòṅ ve-eny nang yīö, tö löktö chöngö Chu öich la-evṙen tö në.
Inchōḵoṙô Tö Yik Mahayōm, Ök Panò-òṅ Vāīṅ
(Mt 21.33-46; Mk 12.1-12)
9Ngaich rĕhnyôre Anga-aṅ nö ṙô-òv tö yik tarik tö ngih inchōḵoṙô; Hĕng taka ök tarik tameūichtö angkūr; ngaich hayōmö tö yik mahayōm panô-òṅ; ngaich chuh tahëng pumnāmö anga-aṅ, nö marô-òngen. 10Ip hē anga-aṅ nö tīnngö kūönre, nö i yip mahayōm panô-òṅ pòn hōtu cha-a nö kē-ĕkūö ò tö ṙòng nup angkūr. Ngaich pöri më yōm panô-òṅ nö fëlan; ngaich tīnngen ò, nöng öt kūmuṙen, 11Hēk anga-aṅ nö tīnngö tahëng taka kūönre; ngaich fëlö anga-aṅ inrē tö cha; ngaich sumrōngikūö anga-aṅ; ngaich tīniyö nöng öt kūmuṙen, 12Hēk anga-aṅ nö tīnngö ngam linūöyö; anga-aṅ inrē tö hanyahka tö cha; ngaich ahōngen ò cha-a. 13Ngaich ngö ṙô ngam mā tö-angkūruvö. Sitih tī öichvö min? Hòṅ tīnngö ngòh hanāngenlōnre Chin kūönre; lohten yip min nö milēḵṙen tö ò. 14Höng meuktöre më yōm panô-òṅ tö ò; ngaich cha-a nöng in höö lōn, nö ngö ṙô, Ngòh ang yih tö-amīnu. Ta-a, töi fëlngen ò; hòṅ hī ayī-ö tö-amīnuvö. 15Ahōṙi ngaich anga-aṅ tö cha, nö ṙa-ang el ap panô-òṅ; ngaich fëli. Lökten, sitih tī ap min töpanô-òṅvö tö cha? 16Yih ap min nö fëlngö vē mahayōm; ngaich kētö ngam panô-òṅ min nö i tahëng, Höng hangtöre cha-a tö e, ngaich ngö ṙô, Öt ngatī an yēḵ nö hōḵ. 17Ngaich ngëichken cha anga-aṅ, ngaich ngö ṙô, Asuh öng ngih töngö kinūichngö, Ngòh ihong sahōḵo yip ma-mānö, ngaich anga-aṅ nö vīlöngö nö yöngkūö sinkeukngö. 18Ṙòkhöre yip tösuktöre nö i kui ngòh ihong min, nö laköl. Ap töfukkui pöri tö ò, ngaich panyāich min anga-aṅ tökūö ò.
Intönö I Alaha Kinëtö Ṙāi Masūl
(Mt 22.15-22; Mk 12.13-17)
19Ngaich yik kamūich, yik yöngṙen kūönṙô inrē, nö hòṅ kēḵ An hē e; pa-ekūö pöri cha-a tö yik tarik; pò cha nö akahalōn tö ngam ṙô Ò inchōḵṙô nö inlahen cha. 20Ngaich aṅten Ò cha-a; ngaich tīni yik töhaṙūöngka tarik, yik tökô-en tölōnre, nö kēḵ nup ṙô Ò; ngaich kēḵngen Ò im chöngö mahayöng. 21Ngaich cha-a nö hatönan, nö ngö ṙô, Mahaköphöti; akahalōn in töp ṙô Meh, Öm kô-en inrē haköphöti; öt tö-atöltukūö Man tö tarik; tökô-en pöri Öm haköptö talöökö ngam Tēv. 22Kô-òren öi kē-ĕkūö Kaisöör tö ṙehe inchūökkökūö panam? Rö-ö ṙöng?
23Ngaich akahalōn Anga-aṅ tö huneū-euṅ cha, ngaich ngö ṙô tö cha, 24Hameukhömat Chu ta-ih tö rupīö. Insā-a chīö? Kinūichö chīö öng ngam in e? Ngaich ngö ṙô cha-a, Kaisöör. 25Ngaich ngö ṙô Anga-aṅ tö cha, Kē-ĕkūö Kaisöör tö nup chehen Kaisöör. Kē-ĕkūö ngam Tēv tö nup chehen ngam Tēv.
26Ngaich öt kô cha-a nö kēḵ ṙô Ò nö i kūö më tarik; ngaich uṙeh alaha cha-a tö ṙô Ò nö sapṙô cha. Ngaich nöng öt ṙô-òv.
Intönö I Alaha Invanlö Tökapah
(Mt 22.23-33; Mk 12.18-27)
27Rēvre yik Satukī yamihtöre nö in Ò, yik töṙô-òvö tö törö-övö invanlö tökapah; ngaich hatönan cha-a nö ngö ṙô, 28Mahaköphöti; kūichhöti ök Môsös nö in ih, tö ngòh tarik tökapaha mëm, töpihövö, ngaich yē ò nö öt kūönu; hēk ngam kahëm ò nö kēḵ ngam pihö ò ngaich hakūöntö kūön ngam mëmre. 29Ngaich yik umuh tö sat tak tö mëmre, kēḵ pihöre ngam mu-urĕh; ngaich kapah nöng öt kūönuvö. 30Hēk ngam innëtö nö kēḵ an nö pihöre; ngaich kapah nöng öt kūönuvö, 31Hēk ngam linūöyö nö kēḵ an; ngatī nyöre nö sat tak, öt ṙahāngu tö kūönre, ngaich kapah. 32Unôichngöre inrē ngam kikānö nö kapah. 33Lökten, hē ap invanlö tökapah, pihö chīö ang min ngam kikānö tö cha; pò më tö sat tak nö kö pihöv tö ò.
34Ngaich ngö ṙô Yēsū tö cha, Pihöv yin vē kūön ngih panam; kē-ĕyö inrē nö im inpihö. 35Yip tökaheuktu pöri nö i yip tökô nö söllö nö i ngamū-aṅ panam, ngam invanlö tölöök inrē nö ṙā-ang i yip tö kapah; öt pihövö, ötrēhĕn nö kē-ĕyö nö im inpihö. 36Pò cha nö ötkô nö kapah nö hēk; pò cha nö ngaich nö asātöre nö i yip ma-ahānga, ngaich nö kūön ngam Tēv, pòn kūön ngam invanlö tökapah. 37Ngam invanlö vē tökapah pöri, hameukhumat öi ngaich tö Môsös, im, chūök inlahen ök töyul; hē ò nö havëkö ngam Mā. Ngam Tēv Aprahām, ngam Tēv Yāköp inrē. 38Rö-övö An nö Tēv yik tö kapah; Tēv vē ta aṅ pöri. Pò vē taṙòkhöre tarik nö aṅ nö in Ò.
39Rēvre yik kamūich tö ngö ṙô, Mahaköphöti; huveū-eu ṙô takô Man. 40Pò cha nö öt hòṅ hēk nö hatönan.
Intönö I Alaha Ngam Misāyā
(Mt 22.41-46; Mk 12.35-37)
41Ngaich ngö ṙô Anga-aṅ tö cha, Sitih ṙô aich tö Kristū nö kūön Tāvit? 42Tön ngö ṙô Tāvit nö i mat ngam Līpöre Salmai, Ngö ṙô An ngam Mā tö ngam Mā chu, Ūichngöre Man lahāmö Chu; 43Hanöng saha tī Chu vīten vē tökunyahaṅelmat tö Meh, nö ranöönö röön Meh. 44Yē Tāvit nö Mā-av ṙô tö Ò, sitih Ang nö kūön ò?
Ṙô Yēsū Tö Vē Mahaköp Tö Ngam Chöngö
(Mt 23.1-36; Mk 12.38-40)
45El nang yik tarik ṙô Anga-aṅ, nö ngö ṙô tö yik mahaköp. 46Haṙēmngenre yin tö vē kamūich, vē tö hòṅ maṙūnghöti inyut yĕn kiröönngöre, ane inrē töhāngenlōn tö sinlāmö nö i chūök mi-inyih; ane inrē töhāngenlōn tö nup lamākūö chūökö nö el chūök vine-eṅkūötēv, hē el nāhal inrē; 47Vē nyamā-ang inlahen vē tafīösi; ngaich hanyatkö-elmat inrē nö marôta ṙô nö ve-ekūötēv, cha-a yin ngaich min töpōyen ötinkôlò.
موجودہ انتخاب:
T. LŪKÖS 20: CANIBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
