T. LŪKÖS 10
10
Tīnngö Yik Tö Sat Anāi Tumtak Ang Yēsū
1Keuheūthëṙen anū-ö, ngaich ngam Mā nö vīlö yik tahëng tö sat anāi; kö ka-anët taka cha-a nö tīnirit tö Ò, nö urēhĕkūö Ò, nö i nup panam, nup yahihih Ò Anga-aṅ inrē. Ngaich ngö ṙô Ò tö cha. 2Pōyen nun në sāiny; kūöṅnen pöri vē töla-evṙen. Ve-ekūö ngam Mā në sāiny yin lökten, hòṅ Ò nö tīntö töla-evṙen nö i minë sāiny Ò. 3Kiröönngöre yin kuṙòh, yĕh meuk; tīnngen yīö Chin, sā pököre nö el ṙôngö nup aṅ el-inchōn am. 4Ui kēḵ rupīö, ui inyūluvö, ui kunröpuvö, ane inrē ui salām tarik el talöökö. 5Yē ap töng chūök yīö min patī kuhēthötre, urĕh ngö ṙô, Kumchikṙen yēḵ i ngih patī. 6Yĕn aṅhaṅvö angū-ö tö kūön kumchikṙen, ngaich in e tī yī-ö töp kumchikṙen. Yĕn rö-övö pöri, ngaich havantu angū-ö nö hēk nö in yīö. 7Höngngöh, in e angū-ö patī. Nya-aṅv kūö, òk inrē, höng sā kine-eṅkūö yīö tö cha; pò ngòh töla-evṙen nö tö hòṅ ṙāyu. Ui kiröönngöre ṙāngö ngam töhĕng patī, öi chuh im tahëng. 8Yē öp töng panam chūök yanihih yīö, ngaich hōḵov yī-ö tö cha; nya-aṅvkūö tö nup töng silô tö cha nö i kūö yīö. 9Halanken tövahavö yip mi-in e; ngö ṙô tö cha inrē, Röhta yanihih an ngam pūlngö ngam Tēv, nö in yīö. 10Yē öp töng panam chūök yanihih yīö, ngaich öthōḵov yī-ö tö cha; kiröönngöre yī-ö ngaich el talöököre, öi ngö ṙô, 11Ötrēhĕn nun në pitung ngam panam yīö, nö köp nö i röön ih, chūtngö u in, minkahngö yīö. Akahalōn pöri yē tö ngih, tö ngam pūlngö ngam Tēv nö röhta yanihih nö in yīö. 12Ngö ṙô Chin tö yīö, Mööḵlö ṙôkhangen ötkanôlò an min angū-ö panam, tö Sôtöm, ip hē e angū-ö sakāmö.
Töt Kòlò Panam
(Mt 11.20-24)
13Tötkôlò man me-eṅ kòrasin, Petsĕitā. Pò nup la-en kanôlò öre nö ngaichngen nö i Tūrös, Sītōn inrē, nup tö ngaichngen nö in yīö; ngaich öre cha-a nö marô-angen nö havöötö ellōnre, ūichhaka nö inyut tö sāk, situm inrē. 14Mööḵlö ṙôkhāngen ötkanôlò pöri min Tūrös, Sītōn inrē, tö yīö ip hē öp kinṙôka, 15Me-eṅ inrē Kafarnahum; hapōilöngö öm min el halīöngö? Rö-ö; chuh el kitēlköre man min. 16Ngòh hamang ṙô yīö, ngaich hang ṙô Chu. Ngòh samôḵen yīö, ngaich samôḵen Chu. Ngòh samôḵen Chu, ngaich samôḵòṅ ngam tamīnngen Chu.
Invānö Yik Tö Satanāi Tumtak
17Holtö ṙanāmölōnre yik tö sat anāi nö havantöre; ngaich ngö ṙô cha-a, Mā; uroh yip sī-ö nö hang ṙô ih, i Mine-eny Meh. 18Ngaich ngö ṙô Anga-aṅ tö cha, Meuk ngam sī-ö Chin, nö suktöre, sā hanyālö, nö ṙā-ang el halīöngö. 19Yĕh meuk; ngaich Chin kē-ĕkūö yīö tö kanô-òṅ yīö rööntökui pēch, tökanaptöritre inrē, ane inrē i kumlēḵ ngòh tökunyahaṅelmat. Öt töchökhuṙenvö min tö yīö. 20Uh pöri öi ṙāmölōn i ngih, tö më sī-ö nö hang ṙô yīö; ṙāmölōn pöri tö kinūichngö nup minënyö yīö nö el halīöngö.
Ṙāmölōn Ang Yēsū
(Mt 11.25-27; 13.16-17)
21Ik hē e, Anga-aṅ nö ṙāmölōn nö im Töhet Fanöinylö, ngaich ngö ṙô Ò, Ha-öinyö Meh Chin, Ō Kayöngö, Mā ngam halīöngö, ngih tumlat inrē; pò Meh hayunngö në i vē tö-akaha, ane inrē vē tö-akaha-elnang; hameuktu pöri anū-ö, nö i nyīö. Hôṅ, Kayöngö; pò e nö tölöök nö i kūö meh.
22Ṙòkhöre nun në chehen nö kētuvö nö in Chu, tö ngam Yöng Chu. Ngaich öt hĕng tak tö-akahakūö tö ngam Kūön, höng ngam Yöng; ane inrē öt hĕng tak tö-akahakūö tö ngam Yöng, höng ngam Kūön, ngaich yip töhōḵov tö ngam Kūön nö hameukhumat.
23Havööhöl Anga-aṅ tö kūöre nö i yik mahaköp, ngaich ngö ṙô Ò, nö ulāikôre, Tökôlò nup mat, nup mameuk në maheuṅk yīö. 24Ngö ṙô Chin tö yīö, Maṙôngö yik misī pròfĕt, tö hòṅ meuk në maheuṅk yīö; ngaich nö öt meūkö u; tö hòṅ hang në ahang yīö inrē ngaich nö öt hāngö u.
Tö Akāha Aṅ Samarīa (Inchōḵoṙô)
25Hĕng taka ök mahaköptö ngam chöngö, samöklöre nö kalah, nö ngö ṙô. Asuh ap min la-en chu hòṅ chu amīnuvö tö ngam tö-örheūheu-aṅ nômö? 26Ngaich ngö ṙô Anga-aṅ tö ò, Asuh ap tökūichiyö nö im chöngö? Sitih ṙô öm ve-ekūö e? 27Ngaich anga-aṅ nö sapṙô Ò, nö ngö ṙô, Hāngenlōn man tö ngam Mā Tēvre, holtö ellōnre, holtö nômöre, holtö kanô-òṅre; holtö kuilōnre; ane inrē hāngenlōn tö holre, sāre töre. 28Ngaich Anga-aṅ nö ngö ṙô tö ò, Huveū-eu ṙô man, sāpö e. Ngatī man yēḵ; ngaich min öm aṅ. 29Ngaich pöri anga-aṅ nö hòṅ halöököre, ngaich ngö ṙô ò tö Yēsū, Achīö ap hol chu?
30Ngaich Yēsū, nö sap ṙô ò nö ngö ṙô, Hĕng taka ök tarik, ṙamā-ang Yerūsalem, nö chuh Yerikō; ngaich kööḵlö anga-aṅ tö yik tötūmu, yik lamuhngö hilā ò, ngaich fëlan; kiröönngöre ngaich, ṙāngen ò nö öhngen nö kapah. 31Ngaich i inmahten hĕng taka ök kūönṙô lamök im talöökö; höngmeuktöre anga-aṅ tö ò, ngaich chööḵngen ò, nö hakūnngöre. 32Ngatī inrē hĕng taka ök kūön Lēvī, hē ò nö yihtöre nö im chūök ò, ngaich meūkan, chööḵngen ò ngaich nö hakūnngöre. 33Hĕng taka pöri ök aṅ Samariā, hē ò nö kiröönngöre, ngaich lök in ò; höng meuktöre anga-aṅ tö ò, ngaich, aheūkölōn. 34Yih töre ngaich nö in ò, haṙung nuk vah ò ngaich, fòhtukūö anū-ö tö tavī-i, vāin inrē. Ha-ūichlöng anga-aṅ ngaich nö i uk ök chūök ò chehechōn; kētuvö ngaich anga-aṅ, nö ël ap chūök haneūheuṅ patī; ngaich meukṙen ò. 35Im huṙöich anga-aṅ nö nët tāk kahënyi tö rupīö ngaich kētö u nö ik yōm ngam patī, nö ngö ṙô, Meukṙen ò; kē-ĕkūö meh chin min yē meh pōihangen tī, yē chu min hēk havantöre.
36Ök yòh ök tö më tö lūöi taka, lōn meh, hol ò ök tökööḵlö tö tötūmu. 37Ngaich ngö ṙô anga-aṅ, Anga-aṅ ngam tö aheūkölōn tö ò. Ngaich ngö ṙô Yēsū tö ò, Kuṙòh; ngatī man yēḵ me-eṅ.
Chöhken Mārtha Nāṅ Mëri Ang Yēsū
38Ngaich hē cha nö kiröönngöre, kuhēt ngaich nö ik tö hĕng tuhēt; ngaich hĕng taka ök kikānö, Mārta ök mine-eny ò, hachūöklen Ò anga-aṅ nö i patīre. 39Hĕng taka ök kanānö ò, Mariā ök mine-eny ò, ök töng amūichhaka nö i röön ök Mā, nö hang ṙô Ò. 40Ngaich ang Mārta nö rëtnyi elmat nö meukṙen nya-aṅkūö. Ngaich yihtöre nö in Ò, nö ngö ṙô, Mā, rö-ö Öm hòṅ vëkö ngam kahëm chu, tö ò nöng ṙāngen chu hĕng taka, öich meukṙen. Lökten Man yĕh tölṙô ò, hòṅ ò nö holṙen chu.
41Ngaich ngö ṙô ngam Mā, nö sapṙô ò, Mārta, Mārta; törëtnyi-elmat, ane inrē famëkö tökeuheūttöre chehen. 42Hĕngtöre öp tö hòṅ in meh; ngaich an Mariā nö kēḵ ngam tölöök lā-a, ngam tötkanëḵngen min nö in ò.
موجودہ انتخاب:
T. LŪKÖS 10: CANIBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
