T. LŪKÖS 9
9
Tīn-ngö Yik Tönëtsīön Tak Ang Yēsū
(Mt 10.5-15; Mk 6.7-13)
1Have-eti Anga-aṅ tö yik tö nët sīön taka, nö ṙòkhöre ngaich kē-ĕkūö cha tö kanô-òṅ ane inrē minhôiṅyö tö sī-ö, ane inrē inlanken invah. 2Tīnirit cha-a ngaich tö Ò, nö mumkahten tö ngam pūlngö ngam Tēv, ane inrē halanken tövahavö. 3Ngaich ngö ṙô Ò, tö cha, Ui kahëkuvö öi im kinṙönngöre un rēhĕn tinkung, un rēhĕn inyul, un rēhĕn nya-aṅ, un rēhĕn rupīö, ui rēhĕn nëtö inyut. 4Ngaich yē nup töyô-òv patī chūök yīö kuhēthötre, in e ngaich höngngöh; ngaich hēk kiröönngöre. 5Ngaich yē ṙôngö yip samôḵen yīö yē yīö pöchö kiröönngöre ṙāngö ngam panam, pitōngngö pitung kunröönre pöichö, minkahngö cha.
6Kiröönngöre cha-a, ngaich lök i nup tuhēt, mumkahten tö ngam tölöök inhānga, ane inrē keuheūt chūökre nö halanken tövahavö.
Pinhe-eṅkūö Heròt
(Mt 14.1-12; Mk 6.14-29)
7Hang nup töngaichngen ang Hērôt ök kun rācha, ngaich pa-ekūö anga-aṅ; pòn rēvre yik tö ngö ṙô, tö Yôhan nö havanlöre, nö ṙā-ang yik tökapah. 8Rēvre töng ṙô, tö Ēlaicha nö meūkö; rēvre yik tahëng tö ngö ṙô, Hĕng taka An aṅ i yip höteh pròfĕt mahavanlöre. 9Ngaich töngö ṙô Hērôt röki likeun ök Yôhan tö chu. Achīö angvö ngòh, ngam ahang inlahen chu tö töngatī. Ngaich hòṅ meukkūö Ò anga-aṅ.
Hanëṅlö Yik Tö Taneūi Köṅny Ang Yēsū
(Mt 14.13-21; Mk 6.30-44; Jn 6.1-14)
10Ngaich yik tanīnöṙô, tö invantöre, nö vë-eny nang Ò tö nuk tö ngaich ngen la-en re kē-ĕyö ngaich cha-a tö Ò, nö ṙuhöyö nö ip panam Petsĕitā. 11Akaha lōn pöri yik tömaṙôngö ngaich tömrit Ò; ha-öinytu yanihi cha-a ngaich tö Ò; ngaich vënyu nang cha-a tö ngam pūlngö ngam Tēv, ngaich yik tö hòṅ halankaṙen, nö halankaṙen tö Ò.
12Ngaich ngam sakāmö nö hòṅ harap. Yihtöre ngaich yik tö nët sīön taka, nö ngö ṙô tö Ò, Tīnngörit më tömaṙôngö; hòṅ cha nö chuh tuhēt, tavat inrē tö röhta; nö chūökuvö, kēḵ nya-aṅkūöre inrē; tön el-inchōn ön ngih chūök hī ihih. 13Ngaich ngö ṙô Anga-aṅ tö cha, Kētö nya-aṅkūö cha yin yī-ö. Ngaich ngö ṙô cha-a, Öt sinṙaklukūö nun në in ih, töng tamneui ròtī, ma-anët nòng kāḵ, yē ih öt kiröönngöre öi havah nya-aṅkūö më tö maṙôngö tarik. 14Pò cha nö taneui köṅny tum taka. Ngaich ngö ṙô Anga-aṅ tö yik mahaköp, Ha-ūichngen cha nö kö taneui anāi i töhĕng mūl. 15Ngaich ngatī cha-a, nö ha-ūichngen cha nö ṙòkhöre. 16Kētam Anga-aṅ tö minë tö taneui ròtī, minë tönët nòng kāḵ inrē ngaich môklökūöre nö el halīöngö, hakôlò u Anga-aṅ; ngaich tikāchö u, ngaich kē-ĕti nö i yik mahaköp nö kē-ĕkūö yik tömaṙôngö. 17Nyā ngaich cha-a, ngaich ṙòkhöre nö tööḵngen, ngaich kē-ĕ nuk chööḵkūö cha, nuk töng laköla, nët sīön kumvôkö.
Ṙahônyö Pītör Tö Yēsū
(Mt 16.13-19; Mk 8.27-29)
18Ngaich hē Ò nöng hĕng taka nö ve-ekūötēv, hōlu. Anga-aṅ tö yik mahaköp, ngaich hatönö cha Anga-aṅ nö ngö ṙô, Achīö öich kan, tö ṙô vē tömaṙôngö? 19Ngaich ngö ṙô cha-a, nö sapṙô Ò, Yôhan Öp Vamôk; rēvre pöri yip tö ngö ṙô, Ēlaicha; hēk yip tahëng tö ngö ṙô, Hĕng taka ap aṅ i yip höteh pròfĕt, mahavanlöre. 20Ngaich ngö ṙô Anga-aṅ tö cha, Achīö öich rih Chu-ö tö ṙô yīö? Ngaich ang Pītör nö sapṙô Ò nö ngö ṙô, Kristū ngam Tēv Man.
Ṙôtö Ngam Kanihngen Tö Ngam Kinpāhare Ang Yēsū
(Mt 16.20-28; Mk 8.30—9.1)
21Ve-evkūö ngaich cha-a tö Ò, nö sōtu nö ve-eny e nö i tarik. 22Nö ngö ṙô, Pōyen kanihngen ön min ngòh Kūön Tarik: sōḵovö ön min tö yip mākūö, yip kūönṙô, yip kamūich inrē; fëli ngaich; im linūöi sumkam nö hachohlöngö.
23Ngaich ngö ṙô Anga-aṅ tö cha nö ṙòkhöre, Yē ngòh tarik tö hòṅ yihtöre nö tömrit Chu, hökngen ò nö hayëḵngenre, nö kēḵ ngam töhakālö örheūheu, ngaich tömrit Chu. 24Pò ngòh tö hòṅ hayööken nômöre, nö ötteūngen min tö e; ngòh tö-ötteūngen pöri tö nômöre min, tö pòkūö Chu, anga-aṅ min mahayööken e. 25Asuh ap öre kanôlò ngòh tarik, yē ò nö teūngen töng taṙòkhöre panam; ngaich pöri nö ötteūngen tö nômöre, nö ötinkôlò? 26Pò ngòh tösirōngkūö min tö Chu, tö në ṙô Chu inrē; anga-aṅ min tösumrōngikūö tö ngòh Kūön Tarik, yē Ò nö yihtöre nö ip kanôlòre, kanôlò ngam Yöng inrē, yip töhet ma-ahānga inrē. 27Tökô-ò ṙô Chin tö yīö, Rēvre yip samökhaka in yīö nö ihih, yip tö öthōḵ nö kapah hanöng saha mat cha nö meuk ngam pūlngö ngam Tēv.
Ngam Inṙīngöre Yēsū
(Mt 17.1-8; Mk 9.2-8)
28Ngaich hëvhöre hang sumkam, tökinheūṅten në ṙô, ngaich Anga-aṅ nö holten Pītör, Yôhan, ane inrē Yāköp, nö yônlö nö i kui rôngö, nö ve-ekūötēv. 29Ngaich hē Ò nö ṙòngmö ve-ekūötēv, ngaich haṙī-ingre ök kūö Ò nö isoh, pachālamat inrē. 30Ngaich nët taka nak tarik vame-eṅkūö Ò, nā Môsös, nā Ēlaicha; 31Nak tömeūkö nö im kanôlò; nö ve-ekūö Ò tök kinpaha Ò, ök keuheūtngen Ò nö i Yerūsalem. 32Ngaich ang Pītör, nak hol ò inrē, nö kalēḵ ĕmat nö haṙòh. Ngaich hē cha nö aṅhen takô, ngaich meuk kanôlò Ò cha-a nak tö nët taka inrē tarik hol Ò nö sökhaka. 33Ngaich ik chanuhu cha nö ṙāngen Ò, ngö ṙô ang Pītör tö Yēsū, Mahaköphöti; kuchīken in öre öi ihih. Ta-a, töi lūöyö vahī tö inrūkui; hēngö inrūkui Me-eṅ, hēngö inrūkui Môsös, hēngö inrūkui Ēlaicha; nöng öt akahalōn tö ṙôre. 34Ṙònghöichṙô anga-aṅ tö u, chalôḵ ngaich ök taṙul, ngaich hanyattökui cha. Ngaich pa-ekūö cha-a, tö inlahenre nö ël ök taṙul. 35Ngaich hĕng ök ṙô lamöktö ël ök taṙul, töngö, Kūön Chu Ön ngòh, katöllö Chu; hang ṙô Ò yin.
36Keuheūthëṙen ngam ṙô, ngaich Yēsū nöng hĕng tit taka. Höng öt ṙô-òv cha-a, ngaich öt vahënyu nang tö tarik inrē hē-e, tö nuk töngaichngen maheuṅk cha.
Halanken Ök Kun Nyīö Tö Aṅhav Alaha Tö Sī-ö
(Mt 17.14-18; Mk 9.14-27)
37Ngaich im tahëngngöre sumkam, hē cha nö yônti, nö ṙā-ang kui ap ṙôngö; höngökūö Anga-aṅ ngaich tö yik tömaṙôngö tarik. 38Ngaich hĕng taka ök tarik i më tömaṙôngö, töngö ṙô, Mahaköphöti; ve-ekūö Meh chin, Öm ngëichkö ngòh kūön chu; tön töng humeng maneuk ön, nö kūön chu. 39Ngaich kē-ĕyö anga-aṅ tök sī-ö, ngaich hönglūk anga-aṅ nö hūḵa; pilönö anga-aṅ tö ò, ngaich atēngakūö; kihngen chanuhu anga-aṅ nö ṙā-ngen Ò, ngaich pōihangentī tö ò nö taleuich. 40Ve-ekūö më mahaköp chin nö in Meh taheui, nö kēḵngen ò; ngaich rö-ö cha-a nö kô.
41Ngaich sapṙô ò Yēsū nö ngö ṙô, Ō tötmikahavö tūmö tövāchöku-ö; i rô-òten Öich min holtöṙah yīö? I rô-òten manöiyö Öich min in yīö? Kētö ngam kūönre man ihih.
42Ṙòngmöng yihtöre anga-aṅ, ngaich ngam sī-ö nö afukngen ò, ane inrē pilönan nö kalē-ĕtī. Vëka pöri ngam tötlöök sī-ö tö Yēsū; ngaich lööken ngam nyīö, ngaich kētuvö tö Ò nö ik yöngre. Ngaich cha-a nö ṙòkhöre nö pingangkūö tö kanôlò ngam Tēv. 43Ngaich ṙòngmöng pingangkūö cha-a tö nuk tī Ò,
Ṙôtö Ngam Kinpāhare Hēk Angā-aṅ
(Mt 17.22-23; Mk 9.30-32)
ngaich ngö ṙô Anga-aṅ tö yik mahaköp, 44Hökngen në ṙô yin nö meuthöt nö elnang yīö; pò ngòh Kūön Tarik min nö kētuvö nö eltī tarik. 45Öt akaha el nang pöri cha-a tö ṙô Ò; hayūni ök nö in cha; lökten cha nö öt kô nö meukö e; ngaich pa-ekūö cha-a nö hatönan tö e.
Achiö Ap Tö Pōiyö?
(Mt 18.1-5; Mk 9.33-37)
46Ap yòh ap vö min töpōyö tö cha ngö lōn cha-a nö in re. 47Ngaich hē Yēsū nö meuk ngam lōn cha, hĕng tak kahëḵ Anga-aṅ tö kun nyīö, ngaich ha-ūichlöngö tö Ò nö i taseū Ò. 48Ngaich ngö ṙô Ò tö cha, Yē ngòh hamôḵòṅ ngòh kun nyīö min, nö i Mine-eny Chu, ngaich hamôḵen Chu. Ngòh hamôḵen Chu min, ngaich hamô-òṅ ngam tamin ngen Chu. Pò ngòh tökūöṅnö nö in yīö ṙòkhöre, anga-aṅ tö pōyö.
Ngòh Töt Lā-al Hī Holhī Anga-aṅ
(Mk 9.38-40)
49Ngaich ngö ṙô Yôhan nö sapṙô Ò, Mahaköphöti; hĕng taka ök maheuṅk ih, maha-ōngö sī-ö nö i Minënyö Meh. Ngaich sōtu anga-aṅ tö ih, pò ò nö öt tömrit ih.
50Ngö ṙô pöri Yēsū tö ò, Un sōtu ap; tön ngòh tötmirëich tö yīö, anga-aṅ an lamā in yīö.
Öt Hōḵen Yēsū Yik Aṅ Samarīa
51Ngaich hē ranöhta yanihih sakāmö Ò, nö kēḵlöngö; hachip kū-öre Anga-aṅ nö chuh Yesūsalem. 52Ngaich tīnngö ma-ahānga nö urēhĕkūö Ò. Kiröönngöre cha-a ngaich, ngaich kuhēthötre nö i tuhēt yik aṅ Samariā, nö halēnken yanihih Ò. 53Ngaich öt hōḵovö Anga-aṅ tö cha, pò Ò nöng sā tö kū-ötö Yerūsalem nö kiröönngöre. 54Höng meuktöre nak mahaköp nāṅ Yôhan, nāṅ Yāköp, tö e, ngaich ngö ṙô cha-a tö Ò, Mā, hōḵ Öm öre tö ih tölṙô tameūyö öp ṙamā-ang el halīöngö, nö famöngngen cha; sā tī Ēlaicha
55Havöölökūöre Anga-aṅ, ngaich vëken cha; ngaich ngö ṙô Ò, Rö-ö yin akahalōn tö fanöinylö löknyö yīö öi havëkö e. 56Pò ngòh Kūön Tarik nö öt yamih nö famël, mahayööken unhôṅmö tarik pöri. Ngaich cha-a nö chuh ik tahëng tuhēt.
Yip Töhòṅ Tömrit Yēsū
(Mt 8.19-22)
57Ngaich hē cha nö ṙòngmö kiröönngöre nö el talöökö, ngaich hĕng taka ök tarik töngö ṙô tö Ò, Mā hòṅ tömrit Meh chin, yē öp töng kū-ö Meh kiröönngöre. 58Ngaich ngö ṙô Yēsū tö ò, Kilmīṙu nun në am aṅ el-inchōn; fônguvö në chehechōn; ötrēhĕn pöri ngòh Kūön Tarik nö chūöku ṙanôlngö kui. 59Ngaich ngö ṙô Ò tök tahëng taka, Tömrit Chu man. Ngö ṙô pöri anga-aṅ, Mā; hökngen chu, urĕh kiröönngöre, öich ulngö öp yöngre. 60Ngaich ngö ṙô Anga-aṅ tö ò, Hökngen yip tökapah nö ulngö kupahre. Kiröönngöre pöri me-eṅ, kuṙòh; ahangkö ngam pūlngö ngam Tēv, i tömaṙôngö. 61Hĕng taka ök tö ngö ṙô inrē. Mā; hòṅ tömrit Meh chin; hökngen chu pöri urĕh, öich have-engritre i yip aṅ patī chu.
62Ngaich ngö ṙô Yēsū tö ò, Öt tarīkuvö kamëkö sanapre nö eltīre, ngaich tēk unôch, nö töhōḵovö nö im pūlngö ngam Tēv.
موجودہ انتخاب:
T. LŪKÖS 9: CANIBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
