KU̧U̧NAŊMƆ 2
2
1Hegɔ dee yiwese in nù in o mɔ nɛ a̧a̧ sɛnɛ lɛŋ kaɗa. 2Sɔ̧ kaɗa tom sɛn tɛ mɔɔrɔ-ɗoŋ-yiitoo ɔɔ-zɛ; nɛ́ tɛ́ mɔɔrɔ-ɗoŋ-yiitoo ɔɔ-zɛ‘i a̧ Sɔ̧ ɔma nɛ̀ tɛ̀.#Heb 4.4,10#Gboa-a 20.11 3Ɓɛɛ Sɔ̧ tok de yoŋgo zu mɔɔrɔ-ɗoŋ-yiitoo ɔɔ-zɛ‘i, ɓɛɛ a̧ e wese'i nɛtɛ; wen nɛ́ wese'i á̧ a̧ kaɗa nɛ tom lɛŋ n'aa dea. 4Ku̧u̧naŋ yiwese in nù, ŋgimbi nɛ Sɔ̧ dee nɛ wa nɛ́ mɔ‘i.
Fɔ Edɛn
Ŋgimbi nɛ GASA WAN dee nɛ nù in yiwese, 5ŋma be te kpɔk tɛ bo so sɛn zaŋnu na, kóó ŋma be bɔr-mɔ tɛ hɔ sɛn kpɛɛfɔ hɔ̧ɔ̧ na mbɛt, wen GASA WAN Sɔ̧ tɛ de ha̧ kórò mɛ hɔ zu nù hɔ̧ɔ̧ na, in bíí tɛ bo so wen waa fɔ hɔ̧ɔ̧ na mbɛt. 6Ŋgimbi'i dɔka yì gbo o nɛ ɗɔɔ nù pii zan, ɓɔ nɛ nù lɛŋ.
7GASA WAN Sɔ̧ ɓoo nɛ fuunu de nɛ bíí. A̧ ɔma si kɔ̧ zɔ̧ɔ̧-a̧a̧ ha̧ nɛ̀ ɔmi duka-kpasa ha̧ a̧, ɓɛɛ bíí ku̧ naŋ duka kpasa.#1 Kɔr 15.45
8Nɛ́ mɔ'ɔ nɛ GASA WAN Sɔ̧ dee fɔ sɛn Edɛn, nɛ war daŋa-wese; ɓɛɛ a̧ e bíí n'aa dea sɛnɛ. 9GASA WAN Sɔ̧ dee ha̧ o te nɛtɛ nɛtɛ lɛŋ nɛ ɔ dee wen zɔka-a in wen nyɔŋa-a mbɛt mɛ dɛm sɛn kpɛɛfɔ‘i; te duka-kpasa a̧a̧ sɛn see fɔ, in te iŋa mgbara demɔ in ɗaŋmɔ a̧a̧ sɛnɛ mbɛt.#Tɔ̧ɔ̧ Hu̧ 2.7; 22.2,14
10Ŋma nana-yì gboa nɛ Edɛn wen ha̧ nù mɛ́ mɔk, ɓɛɛ gba er naar. 11Nin kuti yì nɛ́ Pisɔŋ; mɛ̀ nɛ́ a̧ á̧ zika nú Hawila nɛ a̧a̧ nɛ lɔr nyɛmna. 12Lɔr tɛ nù‘i ɔ dee nyɛmna, in sɔ̧ɔ̧-te nɛ‘i sa'e delium in o de tu̧ ta mbɛt. 13Nin yiitoo-aa nɛ́ Gihɔŋ; a̧ fok zik nɛ nù Kus lɛŋ. 14Nin taar yì nɛ́ Tigrɛ; a̧ fok ti Asur nɛ war daŋa-wese. Nin naar nana-yì nɛ́ Efrat.
15GASA WAN Sɔ̧ ee bíí sɛn kpɛɛfɔ Edɛn wen waa a̧ in pɛma a̧ mbɛt, 16ɓɛɛ GASA WAN Sɔ̧ mbo nú wi’ɛi hee mɔ'ɔ ga: «O waya-te kpɛɛfɔ lɛŋ, mɛ́ nyɛma nyɔŋa-a, 17ɓɛɛ mɛ́ beka nyɔŋ waya-te iŋa mgbara demɔ in ɗaŋmɔ na; wen wese nɛ mɛ tɛ́ nyɔŋ, mɛ́ tɛ́ fe.»
18Ɓɛɛ GASA WAN Sɔ̧ tɔ̧: «Bó nɛ́ ɔ dee ha̧ wiwii mɛ duk ɛ̀nɛ̀-a na. Mi tɛ́ de ŋma bíí nɛ tɛ gbam in a̧ in nɛ tɛ gbak a̧.» 19GASA WAN Sɔ̧ ɓoo nù de nɛ saɗi in o nɔ̧́í̧ lɛŋ, ɓɛɛ kai tɛnɛ ha̧ wi’ɛi wen ha̧ a̧ mɛ zɔk hee mɔ'ɔ n'aa tɛ a nɛ nin-wa ga. Mɔ lɛŋ nɛ duk kpasa baa so kànà nɛ nin nɛ bíí aa ha̧ a̧. 20A̧ aa nin ha̧ o gasa saɗi, o nɔ̧́í̧ lɛŋ in o saɗi-zaŋbɛɛ lɛŋ; ɓɛɛ war kɔ̧-a̧ nɛ tɛ-a, a̧ kpa ŋma bíí nɛ tɛ gbam in a̧ mɛ gbak a̧ na.
21Ɓɛɛ GASA WAN Sɔ̧ de ha̧ gasa ya mɛ ba wi’ɛi, ɓɛɛ a̧ ɔ ya. Sɔ̧ baa gba̧a̧ ŋgazi-a kpɔk, ɓɛɛ kpe oi-aa nɛ mur-tɛ-a. 22GASA WAN Sɔ̧ baa gba̧a̧ ŋgazi wiwii,#2.22 wiwii: nɛ̀ nú hébreu, mɔ nɛ‘i sa'e wiwii in okoo tɛ̀ɛ́ hɔ ŋmaa. de nɛ okoo, ɓɛɛ mgbɔ tɛnɛ ha̧ a̧. 23Wiwii tɔ̧a̧:
«Zɔ́k kinii gba̧a̧'ɛ nɛ́ gba̧a̧-tɛ‘m
in mur’ɛ nɛ́ mur-tɛ‘m;
wi’ɛ wi tɛ́ sa a̧‘e okoo,
wen mɛ̀ nɛ́ sɛn tɛ wiwii a̧ wa dee nɛ a̧.»
24Mɛ̀ nɛ́ wen hegɔ wiwii tɛ e dáà in nàà kɔ‘i duk, ha̧ a̧ mɛ́ ndaɗi in kóò kɔ̧-a̧ wen ha̧ wa mɛ́ duk nɛ́ kiitɛ kpɔk.#Mt 19.5; Mk 10.7-8; 1 Kɔr 6.16; Ef 5.31 25Wa yiitoo lɛŋ yaa so nɛ̀ mgbii, wíì in kóò de foe yí ŋmaa na.
Поточний вибір:
KU̧U̧NAŊMƆ 2: GB11
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.