Lucas 21
21
1Cꞌacꞌariꞌ ecꞌo juleꞌ biyomaꞌ xerutzꞌat pon, ejeꞌeꞌ quimajon ryaꞌic ja cofrenda chipan ja rcꞌolbal tak ofrenda. 2Cꞌo cꞌa jun ixok ti malcaꞌn xutzꞌat in ti mebaꞌ, arjaꞌ cꞌo caꞌiꞌ tak pwok rcꞌan in xuyaꞌ chipan ja rcꞌolbal ofrenda. 3Ja cꞌa Jesús xbij:
—Tetzꞌataꞌ mpeꞌ ja ti malcaꞌn ixok leꞌ, arjaꞌ más na nim rukꞌij chwach Dios ja xuyaꞌ chipan ja rcꞌolbal ofrenda chwach ja queyaꞌ canojelal ja juleꞌ chic. 4Queriꞌ nbij chewe como ja juleꞌ chic xa jariꞌ queyaꞌ tre ja Dios ja totajnak pro arjaꞌ masqui xa ti mebaꞌ pro xuyaꞌ nojel ja cꞌo ruqꞌuin ja ntzukbej ti riꞌ, neꞌe ja Jesús.
* * * * * * * * * *
5Ecꞌo cꞌa juleꞌ ja quimajon rtzꞌatic ja nimlaj templo xin Dios, quewaꞌ netajini nquibij riꞌ:
—Congana banon rbanic ja templo leꞌ, congana buen tak abaj ocnak in cꞌoli buen tak nakun rcꞌan chakajaꞌ ja sipan cumal ja winak, necheꞌe. Ja cꞌa Jesús quewaꞌ xbij chique riꞌ:
6—Ja remajon rtzꞌatic leꞌ nerilaꞌ na jun kꞌij ja tok xtiyojtaji nojelal, ni majun abaj xtiriklaꞌ chi ta riꞌ, neꞌ chique.
7—Pro tabij chake Maestro ¿nak kꞌij xtibantaji jalaꞌ ja cꞌa xabij kaj chake leꞌ? In chakajaꞌ ¿nak chi retalil nwinakari ja ncꞌutu rxin chi xajalal majaꞌn tibantaj cumplir nojelal ja cꞌa xabij chake? xecheꞌ tre. 8In xbij chic chique:
—Kas tebanaꞌ jutzꞌit cuenta ewiꞌ, maxta cꞌo jun quixbano engañar. Queriꞌ nbij chewe como e qꞌuiy ja winak nepi na jeꞌe in xa queyon nquecoj quiꞌ chi e Cristo, quewaꞌ nquibij chique ja winak riꞌ: —Anin in Cristo, necheꞌ na chique, owi: —Xurwilaꞌ ja tiempo chi npeti ja Cristo, xquecheꞌe. Pro ixix maxta tenimaj ja nquibij. 9Cꞌo nimak tak chꞌaꞌoj xtiban na in chakajaꞌ e qꞌuiy ja winak xqueyictaj na trij ja quigobierno jeꞌe pro ja tok xtekaj rbixic ewqꞌuin maxta texbej ewiꞌ rmal como ni rjawaxic wiꞌ chi nbantaj cumplir nojel awaꞌ wariꞌ nabey pro jariꞌ ma qꞌuisbal rwachꞌulew ta como cꞌa después na ja qꞌuisbal rwachꞌulew. 10Cꞌo jeꞌe tinamit xtiyictaj na trij juleꞌ chic tinamit in chakajaꞌ ja gobierno jeꞌe nyictaj trij juleꞌ chic gobierno. 11Cꞌo nimak tak cubarkan xtibantaj na in chakajaꞌ cꞌo nimak tak rcꞌayewal xtiwinakar na pa tak lugar jeꞌe caniꞌ tre nimak tak waꞌal in nimak tak yobil. Cꞌo nimak tak retal ja xtiwinakar na chicaj ja congana nquixbej quiꞌ ja winak rmal.
12Pro ja tok majaꞌn tibantaj cumplir nojel awaꞌ ja cꞌa xinbij chewe riꞌ cꞌo jeꞌe rpokonal netij na pa quekꞌaꞌ ja winak. Nixquechap na, nixquecꞌamel pa tak jay xin molbal riꞌil, nixquecoj pa tak cheꞌ, nixquecꞌamel chiquewach rey, nixquecꞌamel chiquewach gobernador pro mwal anin tok xtiban queriꞌ chewe. 13Pro ma chaka ta queriꞌ ja tok nixcꞌamarel chiquewach rey in chiquewach gobernador como tokoriꞌ nixcowini nemaj ntzijoxic anin chiquewach. 14Pro bien techꞌoboꞌ kaj pa tak ewanma camic chi ma rjawaxic ta chewe chi xtechꞌob pon ta nak chi tzijal ja xtetobej ewiꞌ chiquewach 15como anin xquinyoꞌ chewe nak chi tzijal ja xtebij chique, anin xquinyoꞌ chewe ja renaꞌoj triꞌ. Rmalcꞌariꞌ tok ja recꞌulel ma xticanoy chi ta cumal nak ja xtiquibij chic chewe, xtetzꞌapij quechiꞌ. 16Nixjach na pa quekꞌaꞌ ja recꞌulel cumal etataꞌ eteꞌ, cumal ewachꞌalal in cumal ewamigo chakajaꞌ. Ecꞌoli necamsax na chewe. 17Xa itzel nixtzꞌat na cumal canojel ja winak pro mwal anin ja tok xtiban queriꞌ chewe. 18Pro jariꞌ nixtacꞌa cꞌo ta jun ti rsamal ewiꞌ xtitzak ta chwach ja Dios. 19Ja cꞌa wi necochꞌ ja npi chewij jariꞌ newil ja utzlaj cꞌaslemal ja mta qꞌuisic trij.
20Ja cꞌa tinamit Jerusalén tok xtetzꞌat chi sutin chic rij cumal juleꞌ soldado ja nurquibanaꞌ ja chꞌaꞌoj, triꞌ tewotakij wiꞌ chi xa nnakajinto ja tiempo ja nyojtaj wiꞌ ja tinamit. 21Ja cꞌa neban triꞌ, ja rixcꞌo chipan ja departamento Judea mejor quixanmaji, tewawaj ewiꞌ pa tak cꞌachelaj. Ja cꞌa rixcꞌo chipan ja tinamit Jerusalén triꞌ mejor quixelel chipan. Ja cꞌa rixcꞌo pa tak kꞌayis triꞌ mejor ma quixmelojpi chi ta chipan ja tinamit Jerusalén. 22Queriꞌ nbij chewe como ja tok xterilaꞌ ariꞌ tiempo ja cꞌa xinbij chewe riꞌ tokocꞌariꞌ cꞌo jun nimlaj juicio nkajto na parwiꞌ ja tinamit Jerusalén utzcꞌa chi nbantaj cumplir nojel ja tzꞌibtal can tre chipan ja rtzobal Dios. 23Anin congana npokonaj quewach ja rixokiꞌ ja xajalal majaꞌn queqꞌuejeꞌ tak cal triꞌ in chakajaꞌ ja recꞌo chic tak yaquiꞌaꞌ chwaquekꞌaꞌ. Npokonaj quewach como ja raj Israel triꞌ congana npi ryewal ja Dios chiquij, congana jun nimlaj tijoj rpokonal nkajto parwiꞌ ja quitinamit. 24Ecꞌoli chique necamsax na tzaꞌn tak espada in juleꞌ chic chique neꞌoquel preso in necꞌamarel chipan nojel tak nación. Ja cꞌa tinamit Jerusalén jariꞌ noc na pa quekꞌaꞌ ja nación jeꞌe ja ma e aj Israel ta, cꞌa tokoriꞌ xtel pa quekꞌaꞌ ja tok xtocꞌowi ja tiempo jeꞌe ja xtiyataj tre ja nación rmal ja Dios.
* * * * * * * * * *
25Cꞌo jeꞌe retal ja xtiwinakar chicaj chipan ja kꞌij, chipan ja icꞌ in chique chꞌumil chakajaꞌ. Ja cꞌa chwachꞌulew ja winak ja recꞌo pa tak nación ma xticanoy chi ta cumal nak la nqueban, xa nsach quinaꞌoj rmal ja nimak tak baloj pa mar congana nteneni. 26Ja tok xtiquemaj rchꞌobic ja nimak tak rcꞌayewal ja penak chwach ja rwachꞌulew xa ncapuj na quecꞌuꞌx in congana nquixbej na quiꞌ rmal. Queriꞌ xtiqueban como ja nimak tak poder rxin ja caj nusil na riꞌ. 27Cꞌacꞌariꞌ nquetzꞌat na ja Ralcꞌwalaxel ja xoc alaxic cuqꞌuin ja winak, arjaꞌ cꞌamonto rmal juleꞌ sutzꞌ, janila jun nimlaj poder cꞌo chic pa rukꞌaꞌ in congana nim chic rukꞌij. 28Ja tok xtimajtaj rbanic cumplir nojel awaꞌ ja cꞌa xinbij kaj chewe riꞌ quixcaꞌy chicaj in quixquicoti como triꞌ nnakajinto wiꞌ ja tiempo ja tok xquixwasaxel libre chijutij chipan ja tijoj rpokonal. Queriꞌ xbij ja Jesús chique.
29Cꞌacꞌariꞌ cꞌo jun cꞌambal tzij xbij chique quewariꞌ: —Bien tewasaj enaꞌoj trij ja jun cheꞌ higuera owi xa nak ta chi cheꞌal, 30ja tok npulani jariꞌ bien nchꞌobtaj emwal eyon chi xa nnakajinto ja rtiempo cꞌatan. 31In queriꞌ cꞌa tre chakajaꞌ ja tok xtemaj rtzꞌatic chi majtajnak rbanic cumplir nojel awaꞌ ja cꞌa xinbij chewe riꞌ jariꞌ retal nucꞌut chewach chi xa nnakajinto ja gobierno xin Dios. 32Ni katzij wiꞌ ja xtinbij chewe riꞌ, ja tinamit Israel ejeꞌeꞌ cꞌa ecꞌo na ja tok nbantaj cumplir nojel awaꞌ wariꞌ, ma chupnak ta quewach. 33Ja caj in rwachꞌulew jariꞌ xa nchup na rwach pro ja ntzobal anin jariꞌ ni matichup wiꞌ rwach, mta ariꞌ ja maquita nbantaj cumplir.
34Tebanaꞌ jutzꞌit cuenta ewiꞌ, maxta xa jaꞌ tibe ecꞌuꞌx trij nimak tak waꞌim in tijoj tak yaꞌ, maxta xa jaꞌ tebisoj ja xin rwachꞌulew. Maxta cꞌa jaꞌ tenaꞌ ja tok xterilaꞌ ja kꞌij ja tok xtipi chic jutij ja Ralcꞌwalaxel ja xoc alaxic cuqꞌuin ja winak. 35Queriꞌ nbij chewe como ja kꞌij ja cꞌa xinbij chewe riꞌ njunsaj ruqꞌuin jun trampa chapbal chicop como ja tok xterilaꞌ ja kꞌij necha̱p na ja winak rmal pro canojel ja winak ja recꞌo nojel nat nakaj chwach ja rwachꞌulew. 36Quixcꞌascꞌot cꞌa, xajutij temajaꞌ rbanic ja roración utzcꞌa chi Dios nuyaꞌ chewe chi netoꞌ ewiꞌ chwach nojel awaꞌ ja xinbij kaj chewe riꞌ ja penak chwach ja rwachꞌulew utzcꞌa chakajaꞌ chi nixcꞌuli ja tok nixekaj chwach ja Ralcꞌwalaxel ja xoc alaxic cuqꞌuin ja winak. Queriꞌ xbij ja Jesús chique.
37Ja pa kꞌij nertijoj ja winak chipan ja nimlaj templo xin Dios. Ja cꞌa chakꞌaꞌ nbe chipan ja lugar ja bar cꞌo wiꞌ ja jayuꞌ rbinaꞌan Rjayuꞌal Olivo in triꞌ nqꞌuejeꞌ wiꞌ. 38Ja pa tak akꞌabil chanim neꞌekaji canojel ja winak ruqꞌuin chipan ja templo chi rcꞌaxaxic ja tijonem nuyaꞌ.
Поточний вибір:
Lucas 21: tzjW
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2010, Wycliffe Bible Translators, Inc. All rights reserved.
