Kenese 4
4
O le Tala ‘iā Kaino ma Apelu ma Lameko
1‘Ua iloa e Atamu lana avā o Eva,#4.1 ‘ua iloa e Atamu lana avā o Eva po o ‘ona feusua‘i ai lea o Atamu ma lana avā o Eva. ‘ona tō ai lea o ia, ‘ona fānau mai lea e ia o Kaino,#4.1 Kaino: mai le gagana Eperu “‘ua maua.” ‘ua ia fa‘apea ane fo‘i, “‘Ua ‘ou maua le tagata mai le ALI‘I.” 2‘Ua toe fānau mai fo‘i e ia o lona uso o Apelu. O Apelu fo‘i, o le leoleo mamoe o ia; a o Kaino, o le galue fanua ia. 3‘Ua o‘o ‘ina ‘atoa o aso, ‘ona avatu ai lea e Kaino o le fua o le fanua o le taulaga i le ALI‘I. 4A o Apelu, ‘ua ia avatu fo‘i ulua‘i tama a lona lafu, o ē pepeti ai lava. ‘Ua silasila mai le ALI‘I ‘iā Apelu, ‘atoa ma lana taulaga;#Epe 11.4 5‘ae peita‘i o Kaino ma lana taulaga, ‘ua ia lē silasila i ai. ‘Ona ita tele ai lea o Kaino, ‘ua fa‘a‘ū‘ū lava ona mata. 6‘Ona fetalai atu lea o le ALI‘I ‘iā Kaino, “Se a le mea ‘ua e ita ai? Se a fo‘i ‘ua fa‘a‘ū‘ū ai ou mata? 7Pe ‘āfai ‘e te amio lelei ‘e te lē maua ‘ea le fiafia? ‘Ae ‘āfai ‘e te lē amio lelei o lo‘o ta‘oto i le faitoto‘a le agasala. E ua‘i atu lona mana‘o ‘iā te oe, ‘e te pule fo‘i oe ‘iā te ia.”
8‘Ua fai mai fo‘i Kaino ‘iā Apelu lona uso, ‘ua i ai fo‘i i lā‘ua i le fanua, ‘ona tula‘i atu lea o Kaino ‘iā Apelu lona uso ma fasioti ‘iā te ia.
9‘Ua fetalai atu le ALI‘I ‘iā Kaino, “O fea o i ai Apelu lou uso?”
‘Ona tali mai lea o ia, “‘Ou te le‘i iloa, o a‘u ‘ea le leoleo o lo‘u uso?”
10‘Ua fetalai atu o ia, “Se a le mea ‘ua e faia? O lo‘o ‘alaga mai ‘iā te a‘u mai le ‘ele‘ele le leo o le toto o lou uso.#Epe 12.24 11O lenei, ‘ua malaia oe mai le ‘ele‘ele, ‘ua fa‘amaga mai lona gutu e tali a‘i le toto o lou uso mai lou lima. 12A e galue i le ‘ele‘ele, e lē toe fua lelei mai ona fua ‘iā te oe; e ‘avea oe ma maumausolo ma fa‘asevasevaloaina i le lalolagi.”
13‘Ona tali mai lea o Kaino i le ALI‘I, “‘Ua sili la‘u agasala, ‘ou te lē lavātia. 14Fa‘auta ‘ua e tulia a‘u i le aso nei a‘i le fogā‘ele‘ele; o le a lilo a‘u ai ou fofoga; o le a ‘avea a‘u ma maumausolo ma fa‘asevasevaloaina i le lalolagi; ‘ai se maua a‘u e fasiotia a‘u e ia.”
15‘Ua fetalai atu le ALI‘I ‘iā te ia, “O lenei, ‘ai se fasioti ‘iā Kaino e tauia fa‘afitu o ia.” ‘Ona tu‘uina lea e le ALI‘I le fa‘ailoga ‘iā Kaino e lē fasiotia o ia e sē maua o ia. 16‘Ona alu atu lea o Kaino ai luma o le ALI‘I, ‘ua mau fo‘i o ia i le nu‘u o Nota i le itū i sasa‘e o Etena.
O le Gafa o Kaino
17Na momoe Kaino ma lana avā; ‘ona tō ai lea o lana avā, ‘ona fānau mai lea e ia o Enoka. ‘Ua faia e ia le ‘a‘ai, ‘ua fa‘aigoa atu fo‘i e ia o le igoa o le ‘a‘ai i le igoa o lona atali‘i, o Enoka. 18‘Ua fānaua e Enoka o Irata; ‘ua fānaua e Irata o Mekuala; ‘ua fānaua e Mekuala o Metusaeli; ‘ua fānaua fo‘i e Metusaeli o Lameko. 19O Lameko fo‘i ‘ua fai ana avā e to‘alua; o le igoa o le tasi o Ata, o le igoa fo‘i o le isi o Sela. 20‘Ua fānau fo‘i e Ata o Iapalu; o le tupuga ia o ē mau i fale ‘ie, ma ‘ua fai lafu manu. 21O le igoa o lona uso o Iupalu lea, o le tupuga ia o i latou uma o ē fai kitara ma fa‘aili. 22O Sela fo‘i na fānau e ia o Tupalu-kaino, o le tufuga ia e fai mea uma lava ‘ua faia i ‘apamemea ma u‘amea; o le tuafafine fo‘i o Tupalu-kaino o Naama lea.
23Na fai atu Lameko i ana avā,
“Ata ma Sela e, fa‘alogologo mai ia i lo‘u leo, avā e a Lameko, ua‘i mai ia o ‘oulua taliga i la‘u ‘upu; auā na ‘ou fasiotia le tagata ‘ona o lo‘u manu‘a, o le taule‘ale‘a fo‘i ‘ona o lo‘u fasiga.
24‘Āfai e fa‘afitu ‘ona tauia o se fasiga o Kaino,
e fa‘afitugafulu ma le fitu o se taui o se fasiga o Lameko.”#Mata 18.22
O Setu ma Enosa
25‘Ua toe iloa e Atamu lana avā; ‘ua fānau fo‘i e ia lana tama tane ma ‘ua fa‘aigoa ‘iā te ia o Setu;#4.25 Setu: mai le gagana Eperu “‘ua tofia” po o “‘ua foa‘iina mai.” auā na fa‘apea ia, “‘Ua tofia mai e le Atua ‘iā te a‘u le tasi tama o le sui o Apelu, o lē ‘ua fasiotia e Kaino.” 26‘Ua fānaua fo‘i e Setu lona atali‘i, ‘ua fa‘aigoa fo‘i ‘iā te ia, o Enosa. O ona po ia ma amata ai ‘ona vala‘au tagata i le suafa o le ALI‘I.
Поточний вибір:
Kenese 4: RSCB
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Revised Samoan Catholic Bible © Bible Society of the South Pacific, 2010.