Lugu 20

Gin siŋgamoŋ lə Jeju lé

Mat 21.23-27, Mar 11.27-33

1Ndɔ kára bèe loo gə́ Jeju si ndoo koso-dəwje ta mee kəi-Ala’g ləm, yeḛ ɔr goo tagə́maji ar dee ləm tɔ ndá mbai dɔ njékinjanéməsje-je ləm, gə njéndaji-maktubje ləma, gə ŋgatɔgje ləm tɔ lé rəm pər gə́ rəa’g 2ndá deḛ dəjee pana: Ula sí ar sí j’oo səi, see torndu na̰ ɓa i ra ne néje gə́ togə́bè wa. Esé see na̰ ɓa un ndia ari gə mba kari ra ne néje gə́ togə́bè lé wa.

3Yeḛ tel ila dee keneŋ pana: Ma kara m’a dəji sí ta kára koo tɔ. 4Batɛm lə Ja̰ lé see ḭ dara əsé ḭ rɔ dəwje’g wa. Ilamje’g amje m’oo ɓa.

5Deḛ jém ta gə na̰ pana: Ɓó lé j’a kilá keneŋ pana: Ḭ dara ndá yeḛ a kila sí’g pana: Bèe ŋga see ban ɓa jeḛ j’ɔm meḛ sí dəa’g el wa. 6Nɛ ɓó lé j’a kilá keneŋ pana: Batɛm lə Ja̰ lé ḭ rɔ dəwje’g ndá kara koso-dəwje lai neelé d’a tila sí gə kɔri-ər mbata deḛ lé d’oo Ja̰ gə́ njetegginta gə́ gəd ya.

7Yen ŋga deḛ d’ila Jeju’g pana: Jeḛ n’gər loo gə́ batɛm lə Ja̰ lé ḭ keneŋ el. 8Togə́bè Jeju tel ila dee keneŋ pana: Ma kara m’a kula sí ri yeḛ gə́ njekun ndia karm m’ra ne néje neelé el tɔ.

Gosɔta lə njéndɔ-nduúje gə́ meḛ dee yèr lé

Mat 21.33-46, Mar 12.1-12

9Jeju un gosota nee si ndoo koso-dəwje pana: Dəw kára bèe wa ndɔ ma̰a nduú keneŋ, ɓa yeḛ wa ndɔ-nduú lé ula ji njéndəaje’g, ɔd par aw uru ɓee gə́ raŋg’d si keneŋ kuree əw#Esa 5.1. 10Naḭ ra kandə nduú lé ndá yeḛ ula kura ləa rɔ njéndɔ-nduúje’g gə mba karee taa kandə nduú kea̰ gə́ d’a gə karee lé. Njéndɔ-nduúje lé d’ḭ d’ur dɔ kura’g lé kundá d’aree rəm gə jia kari ba. 11Tɔɓəi yeḛ ula kura ləa gə́ raŋg rɔ dee’g, nɛ deḛ kundá d’ula ne sul dəa’g d’aree rəm jia kari ba ya aw tɔ. 12Tɔɓəi yeḛ ula kura ləa gə́ raŋg rɔ dee’g ɔm gə́ gɔl munda, nɛ deḛ kundá d’aree doo d’unee tubá d’aree aw. 13Mbai gə́ njendɔ-nduú lé pana: See m’a ra banwa. Ŋgon məəm gə́ m’ndigee m’undá dan kəm’g lé ya m’a kulá rɔ dee’g, banelə d’a ɓəl kəmee ya. 14Nɛ loo gə́ njéndɔ-nduúje lé d’aa loo d’oo ŋgon lé ndá d’ula njuma̰ meḛ na̰’d pana: Aa ooje, ŋgon gə́ njekwa-nénduba lé ŋga si aw gə́ nee aw’n. Ar sí n’tɔleeje j’ya̰je loo n’taaje ne nénduba ləa ŋga. 15Yen ŋga d’ubá d’wá ndɔree jol-jol d’uru səa ŋgaŋloo ndɔ-nduú’g tugá keneŋ jag-jag tɔlee.

Ɓasinè lé see mbai gə́ njendɔ-nduú lé see ri ɓa a ra sə dee ɓəi wa. 16Yeḛ a kḭ ree kar njéndəaje lé d’udu guduru ndá a kwa ndɔ-nduú lé gə mba kar njé gə́ raŋg ndɔ keneŋ.

Loo gə́ deḛ d’oo ta neelé mba̰ ndá deḛ pana: Maji kar Ala ar né gə́ togə́bè lé teḛ el nja.

17Nɛ Jeju aa kəm dee njal ɔr ula dee pana: See ta gə́ deḛ ndaŋg mee maktub’g lé see ginee to gə́ ban ɓəi wa.

Pil mbal gə́ njékṵdakəije mbad d’ila kɔrɔ lé

Yee nja tel to mbal kunda dɔ kum kəi gə́ gəd tɔ#Pak 118.22.

18Nana ɓa gə́ a koso dɔ pil mbal’g neelé ndá a təd njigi-njigi, nɛ dəw gə́ rara ɓa gə́ pil mbal neelé oso dəa’g ndá a rədee naŋg mbə̰ji-mbə̰ji ya.

Nékar Ala gə né gə́ kəm kar njéko̰ɓeeje

Mat 22.15-22, Mar 12.13-17

19Mee kàree’g neelé mbai dɔ njékinjanéməsje-je gə njéndaji-maktubje ndiŋga rɔ dee gə mba kwá gə ji dee peb nɛ deḛ ɓəl koso-dəwje. Mbata deḛ gər gao, Jeju pa gosota neelé wɔji ne dɔ dee-deḛ ya.

20Deḛ d’unda kəm dee goo Jeju’g lér-lér, d’ula dəwje rəa’g gə mba kar dee su kəmee asəna gə njémeekarabasurje bèe, ra ne goso ɓó gə koo ne ta gə́ gəd təa’g mba kubá ne kwá kulá ne ji mbai dɔ njégaŋ-rəwtaje’g ləm, gə njeguburuɓee’g ləm tɔ. 21Dəwje neelé d’un ta dəji Jeju pana: Mbai, jeḛ n’gər gao tapai gə ta gə́ i ndoo dee lé to danasur ya, i ɔr kankəmta ya ndoo dee ne rəw lə Ala ɓó ɔr kəm dəw kára el. 22See kar sí j’ugaje lar-gədɓee gə Sesar lé see to né gə́ kəm ra əsé to né gə́ kəm ra el wa.

23Jeju gər goso lə dee gao ndá yeḛ ila dee keneŋ pana: Tɔjimje lar gə́ seḭ ugaje ne lar-gədɓee lé amje m’oo sə sí. 24See dɔ na̰ əsé ri na̰ ɓa d’unda keneŋ nee ɓəi wa.

Deḛ ndigi təa’g pana: To ka̰ Sesar.

25Yen ŋga yeḛ ila dee keneŋ pana: Né gə́ wɔji dɔ Sesar ndá arje Sesar ya, ɓó yee gə́ to ka̰ Ala ndá arje Ala tɔ.

26Deḛ d’oo ta kára kara gə mba kḭ ne səa no̰ koso-dəwje’g neelé el, nɛ ta gə́ yeḛ ila dee keneŋ lé ar kaar dee wa dee paḭ ar dee d’isi ne gə ta dee mundu guu.

Tadəji gə́ wɔji dɔ teḛ loo-yoo lé

Mat 22.23-33, Mar 12.18-27

27Saduseḛje gə́ na̰je gə́ to njémaḭta teḛ loo-yoo’g lə dəwje lé rəm wɔr gə́ rɔ Jeju’g dəjee pana#NNk 23.8: 28Mbai, Moyis ndaŋg ta nee ar sí pana: Ɓó lé ŋgoko̰ dəw wəi ɓa ya̰ dené ləa lal koji ne ŋgon ndá maji kar ŋgoko̰ debee neelé taa dené-nduba ləa oji ne ŋgon tor nojee’g lé mba kunda ne kó ŋgokea̰#TtG 25.5. 29Njé goo na̰je’g deḛ siri d’isi gən. Yeḛ gə́ dɔtar taa dené, nɛ yeḛ wəi galao lal koji ne ŋgon. 30Njekɔm gə́ joo gə njekɔm’g munda kara taa dené lə ŋgoko̰ dee ɓa d’wəi ɓəi tɔ. 31Ar deḛ lai to dəwje siri ra togə́bè lal koji ne ŋgon ya lai. 32Gée gə́ gogo ndá dené lé oso wəi tɔ. 33Togə́bè ŋga see ndɔ gə́ dəwje d’a gə teḛ loo-yoo’g lé ndá see dené neelé a to ka̰ na̰ ŋga ɓa mbuna deḛ gə́ siri’g neelé wa. Mbata deḛ siri lai lé təa gə́ dené lə dee ya.

34Jeju ila dee keneŋ pana: Dəwje gə́ d’isi dɔ naŋg nee ɓasinè lé deḛ taa denéje ləm, deḛ denéje kara taa ŋgaw ləm tɔ, 35nɛ deḛ gə́ d’oo dee gə́ d’askəm kiŋga loo mee ləb gə́ a gə ree gə́ d’a teḛ loo-yoo’g lé ndá d’a taa denéje el ləm, denéje kara d’a taa ŋgaw el ləm tɔ. 36Yoo a ɓar ri dee el ŋga mbata d’a to kasəna gə kuraje gə́ dara ləm, d’a to ŋgan-Alaje mbata to gə́ deḛ to ne ŋgan njéteḛ loo-yoo’gje ləm tɔ. 37Ta gə́ wɔji dɔ kunda gə́ njé gə́ d’wəi d’a kunda loo teḛ loo-yoo’g lé Moyis ɓa gə́ njeriba dəa loo gə́ Ala teḛ ne dəa’g mbɔr ŋgon kag’d lé ndá yeḛ ɓar Mbaidɔmbaije lé Ala lə Abrakam ləm, gə Ala lə Isaak ləma, gə Ala lə Jakob ləm tɔ#Tr 3.6. 38Bèe ndá Ala lé to ka̰ njé gə́ d’aw kəmba ɓó to ka̰ njé gə́ d’wəi ɓa el, mbata yeḛ oo dəwje lai gə́ njé gə́ d’isi kəmba ya.

39Njéndaji-maktubje gə́ na̰je d’un ta d’ulá pana: Mbai, i pata maji boi.

40Ndá dəw kára kara oo loo gə mba kila ɗigi kaaree’g dəjee ne ta gogo el ŋga.

See Kristi to ŋgon Dabid wa

Mat 22.41-46, Mar 12.35-37

41Jeju dəji dee pana: See ban ɓa deḛ pana: Kristi to gə́ ŋgon Dabid wa. 42Dabid nja pata mee maktub Pakɔs’g pana:

Mbaidɔmbaije lé ula Mbai ləm pana:

Si dɔ jikɔlm’g

43Saar mba karm m’ar njéba̰je ləi

Tel to nétura-gɔl-kɔm ləi lé#Pak 110.1.

44Loo gə́ Dabid ɓaree Mbaidɔmbaije ləa ndá ŋga see a to gə́ ŋgonee gə́ ban tɔɓəi wa.

Meḛ sí dɔ rɔ sí’g mbata lə njéndaji-maktubje lé

Mat 23.1-36, Mar 12.38-40

45Loo gə́ koso-dəwje lai d’isi d’oo ta gə́ yeḛ ndoo dee lé ndá yeḛ tel ula njékwakiláje pana: 46Meḛ sí dɔ rɔ sí’g mbata njéndaji-maktubje gə́ ndigi njaa gə kubu gə́ ŋgal yududu rɔ dee’g ləm, gə mba kar dəwje ra dee ne lapia loo-nadaje’g ləm tɔ, deḛ ndigi loo gə́ kédé gə mba si keneŋ mee kəi-kwa-dɔ-na̰’gje ləm, gə loo naḭje’g ləm tɔ, 47deḛ to gə́ njerum né kəi lə njékəisiŋgaje rum-rum ləm, deḛ ra tamaji lé kur dee əw rab ne rɔ dee kəm dəwje’g ləm tɔ. Deḛje neelé ta gə́ d’a kɔr kila dɔ dee’g lé a kur dɔ ka̰ mar deeje’g sula.

Поточний вибір:

Lugu 20: SBA2015

Позначайте

Поділитись

Копіювати