Gḭ-Néje 3
3
Koso lə dəw lé
1Gosɔ lə li lé to yaa̰ ur dɔ ka̰ daje gə́ wala lai gə́ Njesigənea̰ Ala unda dee lé. Yeḛ dəji dené lé pana: See Ala pana: Seḭ a sɔje kandə kagje lai gə́ to mee ndɔ’g lé el, see pa togə́bè tɔgərɔ ya wa#LkJ 12.9, 20.2.
2Dené lé tel ila li’g lé pana: J’askəm sɔ kandə kagje gə́ mee ndɔ’g lé ya. 3Nɛ kag gə́ aar dan ndɔ’g dana bab lé Ala pana: J’a sɔ ka̰dee nda̰ el ləm, j’a kɔrɔ rəa gə ji sí nda̰ el ləm tɔ nà j’a kwəi.
4Yen ŋga li ula dené lé pana: Seḭ a kwəije nda̰ el. 5Nɛ Ala gər gao to gə́, mee ndɔ gə́ seḭ a sɔje ndá kəm sí a kinja ləm, seḭ a toje asəna gə Ala bèe gə mba gər ne né gə́ maji gə né gə́ majel ləm tɔ.
6Dené lé oo to gə́ kag lé to maji kəm sɔ ləm, taa kəmee rəgm ləma, to maji kəm kar dee gosɔkəmkàr ləm tɔ ndá yeḛ ti ka̰dee sɔ. Tɔɓəi yeḛ ya̰ ar ŋgabeeje gə́ aar mbɔree’g ndá yeḛ sɔ səa tɔ. 7Yen ŋga deḛ joo bɔr lé kəm dee inja ar dee d’oo to gə́ kudu dee to dum ndá deḛ d’uru kam kodé ta na̰’d ra gə́ kubu tɔ kudu dee’g.
8Loo gə́ kàr unda jia dɔ kam’g ler ndá, deḛ d’oo ndu Njesigənea̰ Ala gə́ njaa mee ndɔ’g, tɔɓəi diŋgam deḛ gə dené ləa lé d’aḭ d’iya rɔ dee əw kəm Njesigənea̰ Ala’g mbuna kagje’d gə́ mee ndɔ’g lé. 9Nɛ Njesigənea̰ Ala ɓar dəw lé dəjee pana: See i aar ra wa.
10Yeḛ ilá keneŋ pana: Ma m’oo ndui gə́ ɓar mee ndɔ’g ndá ma m’ɓəl yaa̰ mbata m’aar gə kudum dum ba, yee ɓa ma m’iya ne rɔm gə mbəa.
11Njesigənea̰ Ala dəjee pana: See na̰ ɓa ulai to gə́ i aar gə kudi dum wa. See i sɔ kandə kag gə́ ma m’ɔgi dɔ’g mba kari sɔ lé wa.
12Diŋgam lé tel ilá keneŋ pana: Dené gə́ i am mba karee nai səm lé ɓa am kandə kag neelé ndá m’usɔ ya.
13Njesigənea̰ Ala dəji dené lé pana: See ban ɓa i ra togə́bè wa.
Dené lé ilá keneŋ pana: Li ɓa su kəm am m’usɔ ya#2Kɔr 11.3, 1Tim 2.14.
14Njesigənea̰ Ala ula li lé pana:
Rea gə́ i ra togə́bè lé ndá
Ndɔlee a kwa dɔi mbuna da-kulje’g lai ləm,
Gə daje gə́ wala lai ləm tɔ.
I a kag naŋg gə ta məəi ləm,
I a sɔ nduji naŋg gə ndɔi-ndɔi
Loo gə́ i si ne kəmba lé ləm tɔ.
15M’a kar ba̰ to mbuna sí-seḭ gə dené’g ləm,
Gə mbuna ŋgakaije gə ŋgakea-yeḛje’g ləm tɔ.
Yeḛ a rəd dɔi naŋg
Ndá i a to̰ gel gɔlee tɔ#LkJ 12.17.
16Yeḛ ula dené lé pana:
M’a kila meeko̰ dɔ maree’g k’ari loo gə́ i a kaw gə kèm.
M’a kar kèm ulai ndubu unda nje gə́ kédé ləm,
Ndɔ koji ŋgon ləi kara ndóo a tooi yaa̰ ləm tɔ.
Néndiŋga ləi a kḭ rɔ ŋgabije’g
Nɛ yeḛ a to dəw dɔi ya tɔ.
17Yeḛ ula Adam lé pana: Mbii gə́ i uru oo ne ta lə dené ləi ləm, gə sɔ gə́ i sɔ kandə kag gə́ m’un ndum m’ari m’ɔgi ne dɔ’g lé m’pana: I a sɔ nda̰ el ləm tɔ lé
Ndá ndɔl wa dɔ naŋg nee mbata ləi ya.
I a koo ndòo ɓa i a kiŋga ne nésɔi keneŋ
Ndɔje kára-kára lai gə́ i aw ne kəmba lé#Ǝbr 6.8 .
18Naŋg lé a kinja gə kunje gə ŋgarje kari,
Tɔɓəi kam néje gə́ mee ndɔ’g a to gə́ nésɔi tɔ.
19I a kinja təd ŋgo nɔḭ’g bur ɓa
A sɔ né ɓəi
Saar i a kandə ne naŋg gogo
Loo gə́ i ḭ keneŋ lé,
Mbata i to nduji naŋg
Ndá i a tel to nduji naŋg gogo ya tɔ.
20Adam unda ri dené ləa lə Ebe mbata yeḛ to ko̰ dəwje lai gə́ d’isi kəmba lé. 21Njesigənea̰ Ala un ndar da ra gə́ kubu mbata Adam gə dené ləa ndá yeḛ ula rɔ dee’g tɔ. 22Njesigənea̰ Ala pana: Aa ooje, dəw lé tel to tana gə yeḛ gə́ kára mbuna síjeḛ’g bèe mba gər né gə́ maji gə né gə́ majel. Ɓasinè, ar sí j’ɔgeeje loo nà a kula jia mba ti ne kandə kag-kəmə ləm, a sɔ ka̰dee ləma, a kisi ne kəmba gə no̰ ləm tɔ#LkJ 22.14. 23Njesigənea̰ Ala tuba dəw lé mee ndɔ gə́ Edḛ’g, mba karee ndɔ naŋg gə́ deḛ d’ɔree keneŋ lé. 24Togə́bè ɓa yeḛ tuba ne Adam bèe tɔɓəi yeḛ unda Nékundaje gə́ dara par gə́ bər lə loo-ndɔ gə́ Edḛ’g lé. Nékundaje gə́ dara neelé d’wa kiambas gə́ taa pər bilim-bilim ji dee’g ndá, deḛ biri tar widi-widi mba ŋgəm ne rəw gə́ wɔji dɔ kag-kəmə lé.
Поточний вибір:
Gḭ-Néje 3: SBA2015
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Ngambai Bible © Alliance Biblique du Tchad 1989, 2015.