Genèse 5
5
Ndohi te verzi Adam, Seth, ha nde a sam Noé
1Na haha ndohi te verzi Adam. Aman Bi Zhiklè a ngu Adam, a ngu ara Mèzhèɓ Zhiklè. 2Nguraʼa a ngwoz a nge ta. A pats man a nge ta, a mpshè ta ma, a mbaha ta ndo.
3Aman mvi Adam 130, a myu kra nguraʼa, man a cka nengaʼa, a mbaha na Seth. 4Te deɓ nyi Seth, a nʼnza a nshèffè mvi 800 dai, a myu wudahi a dalahai. 5Gar haha mvi Adam tèlèba, 930. Te deɓaʼa a mʼmets na.
6Aman mvi Seth 105, a myu Enosh. 7Te deɓ nyi Enosh, Seth a nʼnza a nshèf-fè mvi 807 dai, a myu wudahi a dalahai. 8Gar haha mvi Seth tèlèba, 912. Te deɓaʼa a mʼmets na.
9Aman mvi Enosh 90, a myu Kénan. 10Te deɓ nyi Kénan, Enosh a nʼnza a nshèffè mvi 815 dai, a myu wudahi a dalahai. 11Aman mvi Enosh tèlèba, 905. Te deɓaʼa a mʼmets na.
12Aman mvi Kénan 70, a myu Mahalaleel. 13Te deɓ nyi Mahalaleel, Kénan a nʼnza a nshèffè mvi 840 dai, a myu wudahi a dalahai. 14Gar haha mvi Kénan tèlèba, 910. Te deɓaʼa a mʼmets na.
15Aman mvi Mahalaleel 65, a myu Jéred. 16Te deɓ nyi Jéred, Mahalaleel a nʼnza a nshèffè mvi 830 dai, a myu wudahi a dalahai. 17Gar haha mvi Mahalaleel tèlèba, 895. Te deɓaʼa a mʼmets na.
18Aman mvi Jéred 162, a myu Hénoc. 19Te deɓ nyi Hénoc, Jéred a nʼnza a nshèffè mvi 800 dai, a myu wudahi a dalahai. 20Gar haha mvi Jéred tèlèba, 962. Te deɓaʼa a mʼmets na.
21Aman mvi Hénoc 65, a myu Metu-shélah. 22A Hénoc a jèjèr Bi Zhiklè pèc pècèk. Te deɓ nyi Metushélah, Hénoc a nʼnza a nshèffê mvi 300 dai, a myu wudahi a dalahai. 23Gar haha mvi Hénoc tèlèba, 365. 24A Hénoc a jèjèr Bi Zhiklè; aman a pats staɗ, ta rka asaɓai, te man Bi Zhiklè a mco.
25Aman mvi Metushélah 187, a myu Lémec. 26Te deɓ nyi Lémec, Metushélah a nʼnza a nshèffè mvi 782 dai, a myu wudahi a dalahai. 27Gar haha mvi Metushélah tèlèba. 969. Te deɓaʼa a mʼmets na. 28Aman mvi Lémec 182, a myu kra nguraʼa. 29A mbaha na Noé, a ngaɗa: Nengaʼa a da pa nga a pa a ndav, a da bid nga te mizlinè man nga gi a matakwan a géɗ herkeda, man Ndo nzi pèc pècèk a mphomda. 30Te deɓ nyi, Noé Lémec a nʼnza a nshèffè mvi 595 dai, a myu wudahi a dalahai. 31Gar haha, mvi Lémec tèlèba, 777. Te deɓaʼa a mʼmets na. 32Aman mvi Noé 500, a myu Sem, Cham, a Japhet.
Поточний вибір:
Genèse 5: MOF89
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Alliance Biblique du Cameroun 1989