मत्ती 17

मोशा और एलियाके सँग येशू

(मर्क. 9:2-13; लूक. 9:28-36)

1जाको छय दिन पिच्छु येशू अपने सँग पत्रुस, याकूब और बिनको भइया यूहन्नाके एक उँचे पहाड उपर अलग लैगओ। 2बिनके अग्गु बाको रुप बदलिगओ। और बाको चहेरा सुर्य हानी चिल्कन लागो, 3और बाको कुर्ता उजियारो हानी सेतो भओ, तओ मोशा और एलिया बाके सँग बात चित करत दिखाने।

4पत्रुस येशूसे कही, “हे प्रभु, हमके हियाँ रहानके अच्छो हए। तुमर इच्छा हुइहए तओ हियाँ तीन परमेश्वरको आराधना करन बारो तम्भु बनामंगो, एक तुमर ताहीं, एक मोशाके ताहीं और एक एलियाके ताहीं।”

5पत्रुस मसकतए मसकत, चमकदार बादर बिनके तोपदइ, और बादरसे एक अबाज आओ, “जा मिर प्रिय लौंणा हए, जासे मए बहुत खुसी हओं, इनकी बात सुनओ।” 6जब चेला जा सुनीं, तओ बे बहुत जोडसे झसक्के घुपटा पणिगए। 7तओ येशू आएके बिनके छुइ और कही, “उठओ, मतडरओ।” 8जब बे उपर देखीं, बे येशू बाहेक और कोइके नाए देखीं।

9जब बा पहाडसे उतरत रहए, तओ येशू बिनके हुकुम दइ, “जब तक मए, आदमीको लौंणा, मरे मैसे जीबनमे नाए उठेतक, जो कुछ तुम देखे हओ कोइके मत् बतैयओ।”

10और चेला बासे अइसे करके पुछीं, “तओ मोशाको नियम कानुन सिखान बारे पहिले एलियाके आन पणैगो कहिके काहे कहात हएं?”

11बा बिनसे कही, “एलिया नेहात्तओ आबैगो, और सब बातके फिर सुधारैगो। 12पर मए तुमसे कहात हओं, एलिया अग्गुसे आइगओ हए, और हमर अगुवा एलियाके सँग बहुत खराब ब्यबहार करीं, और बोके बे मनमानी करीं। उइसीयए मए, आदमीको लौंणा फिर बिनके हातसे बहुत दु:ख भोगंगो।” 13तओ बा बप्तिस्मा देन बारो यूहन्नाके बारेमे कही हए करके चेला बुझीं।

मिर्गी रोगसे अच्छो करी

(मर्क. 9:14-29; लूक. 9:37-43)

14तओ भिडके ठिहामे आएके एक आदमी येशूके अग्गु आदर देनके ताहीं घुपटा पणके कही, 15“प्रभु, मिर लौंणाके उपर दया करओ, काहेकी बोके मिर्गी रोग लागो हए, और बहुत कष्ट भोग रहोहए। बो कभु आगीमे कभु पानीमे गिरपणत हए। 16मए मिर लौंणाके अच्छो करंगे कहिके तुमर चेलनके ठिन लाओ रहओं, पर बे बोके अच्छो नाए करपाइं।” 17तओ येशू कही, “ए अबिश्वासी और हठी आदमी, कहाँ तक मए तुमरसँग रएहओं? कहाँ तक मए तुमके सहामऔं? बोके मेरे ठिन लियाबओ।” 18येशू बोके डाँटी, और भुत बोसे निकरिगओ। बो लौंणा तुरन्त अच्छो हुइगओ।

19तओ चेला येशूके ठिन चुप्पएसे आएके पुछीं, “हम बोके काहेनाए निकारपाए?” 20येशू बिनसे कही, “तुमर अल्पबिश्वासके मारे नाए निकारपाए। नेहात्तओ, मए तुमसे कहात हओं, कि तुमर एक लाहीको दाना बरोबर बिश्वास हए तओ जा डँगा हियाँसे हटीजा कएहओ तओ बो हटीजएहए। और तुमर ताहीं कोइ असम्भब नाए हुइहए। 21(तहुँफिर जा किसिमको भुत प्राथना और उपवास बिना नाए निकरत हए)।”

अपनी मृत्युके बारेमे येशूक दुस्रो भबिष्यबाणी

(मर्क. 9:30-32; लूक. 9:43-45)

22बे गालीलमे इकट्ठा होत येशू बिनसे कही, “मए, आदमीको लौंणा आदमीनके हातमे सौँपो जामंगो। 23तओ बे मोके मारङगे, तओ तीन दिन पिच्छु फिर जिन्दा हुइके उठजएहओं।” और बे बेढाम दु:खित भए।

मन्‍दिरको कर

24जब येशू और बाके चेला कफर्नहुम सहरमे आए, और मन्दिरको कर उठान बारे पत्रुसके ठिन आएके कहीं, “का तुमर गुरु कर नाए तिरत हए?”

25बो कही, “हाँ तिरत हए।” जब पत्रुस घरमे घुसो तओ येशू बिनसे सुरुमे कही, “सिमोन, तुमर बिचार का हए? पृथ्वीके राजा, महसुल और कर कासे उठात हएं? अपन लौंणासे कि औरनसे?”

26पत्रुस जबाफ दइ, “औरनसे।” येशू बिनसे कही, “तओ त लौंणनके कर तिरनके नाए पणैगो। 27पर बे हमसे नाए दिक्कामए करके, समुन्दरमे जाएके बन्सी लगाबओ, और पहिली पणी मछ्री लियाओ। और बोको मुँहुँ खोलैगे तओ तुम एक चाँदीक लोहोटा रुपैया पएहओ। बो लैजाएके तुमर और मिर कर बिनके देओ।”

Поточний вибір:

मत्ती 17: THRNT

Позначайте

Поділитись

Копіювати