मर्कुस 4
4
बिउ छर्नारकर उखान
(मति १३:१-२३; लुका ८:४-१५)
1येसु फेरि गालिल तालकर छेउनाइ सिछ्या देइ लाग्ले। येसुकर वरिपोरि मान्छेल्को बड्खो भिड लाग्ल हुदान येसु एउटो लाउनाइ चडिके बस्ले र आनेलतचाइ डेङ्गानाइ ने बस्ला।#लुक ५:१-३ 2अनि येसुन होल्काइ उखानबान धेरइ कुरो सिकाइल्याक र सिछ्या दितिन इत्तिके बल्-ल्याक, 3“सुनो! एउटो किसान बिउ छरइ निस्किले। 4अनि बिउ छर्तिन खेर केइ बिउ बाटनाइ परल्ते र चरिल्किन आइके खाइहाल्ला। 5केइ बिउ ढड्यान जग्गानाइ परल्ते। उछिका धेरइ माटि बइहक्ल हुदान छिटइ उम्रल्ते। 6र जरा गइरोसम्म जाइ बइपाइल हुदान घाम धेरइ चर्किल पछि ह्व मरिहालल्ते। 7अनि केइ बिउ काँटो घारि हक्नार ठउँनाइ परल्ते। काँटोलत बाढिके बिरुवालाइ छोपल्ते र फल बइफलल्ते। 8तर केइ बिउ मजार माटिनाइ परल्ते, उम्रल्ते र बाढ्तिन जाल्ते। अनि तिस गुना, साठ्ठि गुना र सय गुना फल फलाल्ते।”
9ह्व पछि येसुन बाज्ले,“जुनकर सुन्नार कान आछि, होइनिन सुन्दिक।”
उखानकर उदेस्य
(मति १३:१०-१७; लुका ८:९-१०)
10मान्छेल्को भिड जाइल पछि बारुटाइ चेला र उछि हक्लाइ केइ मान्छेल्किन येसुलाइ उखानकर बारेनाइ सोद्ला। 11येसुन होल्काइ बल्-ल्याक,“तोराल्काइ पो परमेसोरकर राज्यकर रहस्य बुज्नार ग्यान दिलाछ, तर आने मान्छेल्काइ ता सेब्बे कुरो उखानबान बल्छु। 12ताकि,
‘होल्किन हेरइ ता हेर्छत,
तर बइदेखत,
सुनइ ता सुन्छत,
तर बइबुजत,
नत्रता होल्किन आफ्ने पाप छाडिके फर्कि आइनाला,
र होल्को पाप छेमा हक्नाल्ति।’” #
यस ६:९-१०
उखानकर अर्थ बल्दिल
(मति १३:१८-२३; लुका ८:११-१५)
13येसुन होल्काइ बल्-ल्याक,“तोराल्किन ह्य उखानकर अर्थ बइबुज्लो? उन्खा हो भने तोराल्किन आने उखानकर अर्थ किनिखे बुज्छो? 14बिउ छर्नारिन परमेसोरकर बचन छर्छइ। 15कोइ मान्छेलत बाटनाइ पर्ल बिउ जिन्खाए आछत। होल्किन बचन सुन्लेसात तुरुन्तइ सइतान आइके होल्को मनबान बचन लाकाइछइ। 16उन्खाए ढड्याननाइ पर्ल बिउचाइ हेइ हो, जुनिन बचन सुन्छइ र सुन्लेसात खुसि हकिके सुइकार गर्छइ। 17तर होल्को आफ्ने जरा भित्रसम्म बइजाइल हुदान केइ दिनसम्म मात्र बिस्वास गर्छत। बचननाइ बिस्वास गर्ल कारनिन दुख र सतावट आइलेसात होल्किन बिस्वास छाडि हाल्छत। 18र काँटो घारि हक्नार ठउँनाइ पर्ल बिउचाइ हेइ हो, जुनिन बचन सुनइ ता सुन्छइ, 19तर ह्य जिबनकर चिन्ता, धन-सम्पति र आने थोककर लोबिन गर्तिन बचन नाठ्तिन जाइछि र होइनिन फल फलाइ बइसक। 20तर मलिलो जमिननाइ पर्ल बिउचाइ होलत हो, जुनिन बचन सुन्छइ र बिस्वास गर्छइ अनि होइनिन तिस गुना, साठ्ठि गुना र सय गुना फल फलाइछइ।”
बत्तिकर उखान
(लुका ८:१६-१८)
21येसुन होल्काइ बल्-ल्याक,“केति कुन्नुल्किन दियो बालिकइ पाथिन छोपिके अथवा खाट हेठ्ठान धर्छत र? बुरु सेब्बाल्किन देख्दिखन बाजिके ढाङ्गो ठउँनाइ पो धर्छत।#मति ५:१५; लुक ११:३३ 22उन्खाए नुकाइ धर्ल सेब्बे कुरो देख्नार आछ र गोप्पे कुरो सेब्बाल्किन था पाइनारआछत।#मति १०:२६; लुक १२:२ 23जुनकर सुन्नार कान आछि, होइनिन सुन्दिक।”
24येसुन फेरि होल्काइ बल्-ल्याक,“तोराल्किन जे सुन्लाछो, होलाइ ध्यान दिके सुनो। किनारइभने तोराल्किन जुन नापिन दिछो होइ नापनाइ तोराल्किन पाइछो, र तोराल्काइ अजइ बढ्ता दिनारआछ।#मति ७:२; लुक ६:३८ 25किनारइभने जुनसिन आछि, होलाइ अजइ दिनारआछ, र जुनसिन बइने होइसिन हक्ल पुनि खोसिनारआछ।”#मति १३:१२;२५:२९; लुक १९:२६
बिउकर उखान
26येसुन बाज्ले,“परमेसोरकर राज्य इन्खा हो, एउटो मानुसिन आफ्ने बारिनाइ बिउ छर्छइ, 27ह्व सुत्तिन पुनि उठ्तिन पुनि रात-दिन बिउ आफि उम्रिछि र बाढ्तिन जाइछि। तर ह्य किनिखे बाढ्छि होलाइ था बइहकि। 28माटि आफिन उम्राइछि र फल फल्नार बानाइछि। पइला टुसाइछि, बाढ्छि र बाला लाग्छि। 29जब अन्न पाक्छि, तब तुरुन्तइ हाँसुन काटिके अन्न बट्लाइ थाल्छइ, किनारइभने अन्न भित्राइनार बेला आइसक्ल हक्छि।”#यो ३:१३
पासाइकर बिउकर उखान
(मति १३:३१-३२,३४; लुका १३:१८-१९)
30येसुन फेरि बाज्ले,“परमेसोरकर राज्यलाइ केतिसिन दाँजु? अथवा केतिकर उखान बाजिके हेक्र बारेनाइ बुजाउ? 31ह्य ता पासाइकर एक गेडा बिउ जिन्खाए आछि। धर्तिनाइ सेब्बे बिउ भन्दा स्यान्खि हक्तिन ता पुनि माटिनाइ छर्ल पछि, 32ह्य केइ दिननाइ ने बाढिके सेब्बे साग-पात भन्दा बड्खो गाछ हक्छि, र बड्खो-बड्खो हङ्गालत हाल्छि, अनि चरिल्किन आइके होक्र हङ्गानाइ खोँदा बानाइके बस्छत।”
33मान्छेल्किन बचन बुजइ सक्दिखन बाजिके येसुन इन्खाए धेरइ उखानबान होल्काइ सुनाइल्याक। 34मान्छेल्काइ सिकाइतिन येसुन उखानबान मात्र सिकाइल्याक। तर आफ्ने चेलालत मात्र हक्ल बेलानाइ एकान्तनाइ उखानकर अर्थ बल्दितेल्याक।
येसुन हुन्डरिलाइ रोक्ल
(मति ८:२३-२७; लुका ८:२२-२५)
35ह्व दिन साँझ पर्ल पछि येसुन चेलाल्काइ बल्-ल्याक,“आहो, अब हाइ तालकर पारपटि जिउँ।” 36अनि भिडकोसिन बिदा लिलपछि, येसु जुन्टो लाउनाइ बस्ल रइल होइ लाउनाइ चेलाल्किन येसुलाइ आफ्ने साथनाइ लाकाइला। र आने लाउलत पुनि होल्को साथनाइ रल्ति। 37अनि उछिका एक्कासि बड्खो हुन्डरि-बातास चलल्ते, र छाललत लाउनाइ ठोकिके पानिन भरइ आटल्ते। 38तर येसुचाइ लाउकर पछाडिपटि सिरानि लाइके निदाइधर्ल रइल। चेलाल्किन येसुलाइ इत्तिके बाज्तिन उठाइला, “गुरु, हाइ डुबइ लाग्ले, तुइलाइ केइ वास्ता बइन्यास?”
39येसुन उठिके हुन्डरि-बातास र छालकाइ हाकार्तिन बाज्ले,“सान्त हक! रोकिहाल!” उत्तिने खेर हुन्डरि रोकल्ते र एकदमइ सान्त हकल्ते। 40येसुन चेलाल्काइ बल्-ल्याक,“तोरा किनारे इन्खा डाराइछो? तोराल्काइ अजइ बिस्वास बइन्या?”
41अनि चेलालत एकदम डाराइतिन आफि-आफिनाइ बाजइ लाग्ला, “ह्य कुन हो? हुन्डरि-बातास र छालिन पुनि हेक्र आग्या मान्छत।”
Поточний вибір:
मर्कुस 4: MAJH
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024 (Active), Mother Tongue Translators Society and Wycliffe Bible Translators, Inc. All rights reserved.
