Tiona 1
1
Tiona 'e tahi mania Iawe
1Warahana Iawe 'e ramai tarea Tiona mi'i 'e huta ana Amitai: 2<<'Oko ta'era'i ma oko ra tarea hanua paina wau Niniwa ma oko arahu okira tare kira, tonaana ma'asianaha kira 'e rika'a no'o na'ohaku.>>
3Tairihi Tiona 'e ta'era'i ma 'e ni'irae hana eka tahi mania Iawe hi Tasisi. Mane 'ene 'e raa tori hi Tiopa, taina mane 'e tautaria haka nia 'eka rao raa hi Tasisi. Puriana mane 'ene hori tarana, ma mane 'e ta'e raona haka ma kira ka sero no'o hi Tasisi hana 'eka tahi mania Iawe.
4Naina ma Iawe 'eka eroa ta'ehana sisiho painate haho ana asi, ma asi toraa painate 'e to'o ma haka wau karahinia eka napota no'o. 5Rikimana mane ni to'iha raona haka kira ka ma'u rika'a ma kira ka ani no'o tarea hi 'aremaea kira. Ma kira ka u'ira'inia haru 'are raona haka wau no'o hi asi hana haka 'eka e'ehe. Tairihi na'o hana rikimana 'are eka rau Tiona 'e siho hihu'a, ma 'eka ma'ama'asu ke.
6Kaputana ana haka 'eka siho tori tarea Tiona ma 'eka arahu 'uri 'ene tarea Tiona, <<Mou 'oko ma'ama'asu ke? 'Oko ta'era'i ma oka arahu tarea aremaea 'o! Mo'are mane 'eka raro riosi koru, ma 'eka haiponi koru hana korusi ma'asiana.>>
7Naina ma hi mane ni to'iha raona haka kira arahu uri 'ene tare kira, <<Koru ka roko ta'i ma koru ka mato'o ana hau su'ana 'are 'ene hana koru ka tautaria itai nia 'e taua are ma'asiana 'ene 'eka rau 'ene ana koru.>> Kira ka mato'o ana hau ma hauni mato'oha 'e suia Tiona.
8Naina ma kira ka soea mane 'uri'ene, <<'Oko ha'ahoura'a nia tari 'ami mou, itai nia 'e tara'ae ana ma'asianaha 'ene hana koru? Iita to'iha 'o? Ma mania taihai nia 'o ramai mania? Hanua taihai nia 'o ramai mania? 'O ramai mania ta'a taihai?>>
9Mane 'eka orisi kira 'uri 'ene, <<Inau mane ni Hipuru ma inau naka ha'aha'a paina Iawe, Warato'o ana rarara, ma inaia kera'o 'e raupua asi ma mako.>>
10Ma'uha paina 'e hura ana kira ma kira ka soea mane uri'ene, <<Mou 'are uta 'o taua ema rete?>> (Ma kira raea no'o urihana 'e tahi mania Iawe, tona'ana inaia 'e iria tarea kira siko no'o.)
11Ma asi wau 'eka ha'i naho'a ma 'eka naho'a maea no'o. Naina ma kira ka soea mane 'uri'ene, <<'Are 'uta nia 'ami ka taua amu hana asi 'ene 'eka peata hana koru?>>
12Mane ka orisi kira uri'ene, <<'Au ka suru'i nau ma au ka u'ira'i nau raona asi ma 'eka raro peata. Na raea no'o tona'ana inau nia sisiho paina 'ene 'eka to'o 'ene ana 'au.>>
13Tai'rihi, hi mane kira tau rika'a hana kira ka hote ra'ania haka 'ene hi apa. Tai'rihi 'e rika'a no'o hana kira tona'ana asi wau 'e tohoni naho'a ma 'e paina kane taro'riua si. 14Naina ma kira ka aani no'o tarea Iawe, <<Hai Iawe, 'osi tau ma 'ami mae tahuna manona mane 'ene. 'Osi tau ma 'ami huahi'a ana maerana mane nia te 'are ma'asiana 'ema taua, tona'ana i'o, hai Iawe, 'are 'ene 'e rau no'o 'urihana 'o ni'irae.>> 15Naina kira suru'ia Tiona ma kira u'ira'inia mane 'ene hi asi, ma taina asi 'ene ma hi naho 'e pi'i peata. 16Tona'ana 'are 'e rau 'ene hi mane kira to'oana ma'uha paina hana Iawe, ma kira ha'aoho tarea Iawe ma kira rukasia arahuna akau kira ha'ania.
17Tai'rihi Iawe 'e eroa ta'ehana marika paina hana 'eka ra ma 'eka onoma'ania Tiona, ma Tiona 'e oni raona opana marika paina 'ene hana oru hairatoa ma oru hairi'poni.
Поточний вибір:
Tiona 1: ALU
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024, Islands Bible Ministries. All rights reserved.