Matiyu 4
4
Abu Shetan è mbwadi Yeso ángá
(Marku 1:12-13; Luka 4:1-13)
1Kǝnggwa Engǝ́ mo Ehwya è du Yeso ken a tswa ehwen evǝa Shetan e mbwà e di ye. 2Ekǝn-etkyen mo nò a zǝkpe gwi ndwe (40) ngge zǝn etsǝ gwi ndwe (40), a Yeso è tse fwa ara vǝ ángá, mbe è fu ye. 3Kǝnggwa Shetan è bwa a zǝn ye nè jan, “Ano o no tén Nwen mo Ehwya, jan be ten e dwana be e nga borodi.”
4Yeso è janfwe ye, “Fwa mo Ehwya jan, ‘Fwa ye a chu borodi tete a nobǝ a no angǝ ángá ra, tea a chu egwa egwa mo fwa e gwa anga a je a kpevǝ mo Ehwya ángá.’ ”
5Kǝnggwa Shetan hon è ti ye shi a tswa eten echanwenwen, Urishelima, nè du ye vǝ́ ywa a chu zǝn e cha ti ara a chu Àtá mo Ehwya ángá. 6Gè jan, “Ano o no tén Nwen mo Ehwya hon, fǝ efǝ ana shi a sen, adia ge no ebam jan,
“ ‘Ehwya a du be maleka
mbwe a bwa a dgon o,
be jwa a cha o
a bu mo be afwa wa
tswa fù mbo a chu ten akan.’ ”
7Yeso è janfwe ye, “Efwe, fwa mo Ehwya jan, ‘We mbwà e di mbo Etsodwe o, Ehwya mbo ra.’ ”
8Efwe Shetan è ti ye tonvǝ́ a chu hwì è cha no àywá, nè tú gu ye binbin mo be zǝnotì a zǝnchaje ngge be mò esese ya e dwa a tswa mo be ángá. 9Gè jan, “Be mò ena binbin, m kpu a no o, ano o nggwa ekpanvǝ a sen, o fen m.”
10Yeso è jan ye, “Nya ana, Shetan, twagwa m! Adia fwa mo Ehwya jan, ‘Wa fen Etsodwe hon, Ehwya mbo. Kpwà a ge tete a wa fen.’ ”
11Kǝnggwa, Shetan hon è nyagwa ye, be maleka è mbwibwa a zǝn, nè bwe ye be mò a gè nda anga.
Yeso è tke mochi mbwe
(Marku 1:14-15; Luka 4:14-15)
12Atan a Yeso è fo jan bè fu Yohana twano a àtá ehwyatu ángá, gè twabǝ ken a Galili. 13A gè gwa ara Nazarati ángá, gè ken no a eten a Kapanahum, a tón edan, a efa mo Zebulu ngge Naftali. 14Mò ena è bwe tén abu Ehwya è jan ara chá kpevǝ mo efojan Eshaya ekpe ekpe jan,
15“A nye be nobǝ a sǝnsen mo
Zebulu ngge Naftali,
ya e dwano a efǝ e shi a tón sǝn,
e no jengǝ̀ mo Kǝn a Joda,
a Galili e no sǝnsen mo be ya e
fwa be ya a Esǝrela ra.
16Be nobǝ hon ya
e no anga a tswafǝ ángá,
di ara enggasansan echa.
Be nobǝ ya e no kpwà anga a
tswa edgyenfǝ mo fǝ ángá,
zǝn ngga ara be a chu.”
17Tke adi ekpengga eni ti ken chafya, Yeso è kwa ara edgon edum jan, “Nye e twa etwa mo be ebgen mo nye adia zǝnotì a kpe hon bwa tén ara.”
Be etsonchi a Yeso è kwafya fǝ́ be dwa ángá
(Marku 1:16-20; Luka 5:1-11)
18Nò kè akan, abu Yeso è no kenkèn anga a tón edan a Galili ángá, gè di be nobǝ fà, Sima, a bè fǝ́ anga Bitru, ngge nwenjin ye Andoro. Bè no nggwa be acha mo be shi anga a tswa edan hon, evǝa be e fu gwejo, adia bè no be ya gwejo efum ángá. 19Gè jan be jan, “Nye ba m, ma tú nye abu nye no a fǝ́ m be nobǝ dwa anga.” 20Kè akan, bè nggwa gwa be acha mo be, nè ba ye.
21Gè ti a zǝn, ken bishi chafya a tón edan hon, nè di be nobǝ fà efki, bè no be nwenjwa so èé be, Yakubo ngge Yohana, bè chuno a tswa ngga ngge ate be Zabadi. Bè no bwese be acha mo be anga a tswa ngga akan. Kǝnggwa, Yeso è fǝ́ be dwa. 22Kè akan bè gwa ngga hon ngge ate be, nè ba ye.
Yeso è matswa be nobǝ embo
(Luka 6:17-19)
23Yeso è tkukwa gu be efa mo Galili nè no tú mò anga a tswa be àtá chuefǝnm mo be, nè no du edgon a chu Fwa Esese mo zǝnotì mo Ehwya anga. Gè no matswa egwa egwa mo ya è no ngge modwa ngge atkigwa a ju be nobǝ anga. 24Enona, etkyen mbwe kpò cha gu sǝnsen mo Siriya. Be nobǝ è kpu be ya modwa efki efki, ya è no ngge ju edwam, engǝ́ esera, be ya modwa-ekpom ngge be ya modwa-edan bwa, gè matswa be. 25Be nobǝ embo è vǝ chá sǝnsen mo Galili, be eten efifi a bè fǝ́ anga Dekapoli (be eten gwi), chá Urishelima, sǝnsen mo Yahudiya ngge chá jengǝ̀ mo Kǝn a Joda, nè bwa ba Yeso.
Поточний вибір:
Matiyu 4: ICH
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024 Luke Initiative for Scripture Translation
