Lukah 8

Ɗa mawinni ɗama payeamanya hi Yehu

1Manga dana hilu madeimah, hi Yehu halakunanyaka ana nahi bolluha ɗa koata ʄaka ɗa paraingu, ana patomanya na Lii Kalung witina hi Alla ana papareahakak ʄaʄi Raja. Namaraija ɗa ana pahakoala-Na ɗama touma habulu maɗuah. 2Touʄellaɗa namaraija ɗa mawinni ɗapapateggahu-Na waling ta waddi tana ʄaka ta kadauku. Jiahaka: hi Maria namangarang Magdalena (ɗama pituɗa ɗa waddi tana ɗapapalouhungu waling ta ihina); 3ʄaka hi Yohana, na arweina hi Kuha. Hi Kuha kapalaɗanya ɗama tagu kerangu ta umma mapareahana hi raja Herodeh; hi Huhana, ʄaka ɗa ɗanguha ɗa mawinni hawanguk. Waingu riti wikiɗa, aɗa payeamanya hi Yehu ʄaka ɗa ana pahakoala-Na.

Lii-pangearangu natou nama hoꞌarung

(Mat. 13:1-9; Mrk. 4:1-9)

4Ami pangalanya natou ɗangu lahi Yehu nama walingu ta hangi padoungu-hangi padoung. Aɗa pakeha bollunguka ɗa tou ɗangu, hi Yehu loluknanyaka na lii-pangearang: 5“Einya hatou nama halaku hoꞌarung wini. Ta ɗalu hoꞌarunguna, einya nama manaꞌu larangi, naletiya tou ʄaka hawanguk na aanya mawurung. 6Ei ʄellanya na wini nama manaꞌu ta ruggu watu. Ana tubuka, malelinanyak kaɗang na tana ana kadoku. 7Ei ʄellanya na wini nama manaꞌu ta libbu rii. Na libbu rii natubu pamarainya na wini, ʄaka na wini kaɗipitunanyaka libbu rii hina maeti. 8Jiaɗinguka ei ʄellanya na wini nama manaꞌu ta tana makabokahu, manga natubu ʄaka nawua paɗangu napadua-dua ɓaling waling ta hangahu.”

Namengaka palolukuya na lii-pangearang nou, hi Yehu winaka, “Gearaya nama eingu kahiluna, naranguka!”

Ga hi Yehu hina waingu lii-pangearang

(Mat. 13:10-17; Mrk. 4:10-12)

9Ɗa ana pahakoala-Na ɗapatuturung gananya na ihina na lii-pangearang. 10Hi Yehu nagapiya, “Hi Moiri Alla nawehagimija napangaɗangumi nahapeawaiminya nama kaɓuning witina hi Alla ana papareahakak ʄaʄi Raja. Jiaɗinguka ɗa tou hawanguk ɗahapeaka waingu lii-pangearang, kaɗa patetinya na hawiɗang, daɗa peamanya namaʄaʄi; ʄaka ɗamaranguya, daɗa peaʄellamanya.”

Hi Yehu napalaranginya na lii-pangearang nawini napahoꞌarung

(Mat. 13:18-23; Mrk. 4:13-20)

11“Ya ʄiayaka na ihina na lii-pangearang nou: Na wini napahoꞌarung ʄiayaka na wini-Na hi Alla. 12Na wini nama manaꞌu ta larangi mearana natou nama ranguya napatiki nou. Jiaɗinguka aminya hi paɗibang ana parimananya waling ta atiɗa, abi ɗamanninya ʄaka abi ɗamanumara awina. 13Na wini nama manaꞌu ta ruggu watu mearana natou nama ranguya nawini nou, nakaaya waingu egi ati. Jiaɗinguka nawini nou dana palolumangu ta atiɗa, na manninguɗa dana maɗeimang, a amikanyak nama pakaka dana hilu mannimanguha. 14Na wini nama manaꞌu ta paɗua libbu rii mearana natou nama ranguya na wini nou, ʄiaɗinguka ɗadadarunya na morikuɗa, ɗabuhanya namorik tomang ʄaka ɗeɗi ta pinu-tana. Ngaladukaɗa hou nakaɗipituha ʄiayaka hidana matua ɗawuaɗa. 15Na wini nama manaꞌu ta tana makabokahu mearana natou nama ranguya nawini nou, manga naɓijaluya ta atina nama kalungu ʄaka nama luruh. Hiɗa pajukanya na manninguɗa ʄaka ɗawua pangalang.”

Na lii-pangearang larana na api-wei

(Mrk. 4:21-25)

16“Da eimang tou nama kaɗekang api-wei hina toaɗi wainya pajalu, a da, natauya ta kabu padou juɗana. Jiaɗinguka natauya na api-wei ta pinu padouna, a amikanguka tou matama na itaya na wahanguna. 17Da eimang baaru nama kaɓuning dapa ita; ʄaka na papakappa dama tawehar ʄaka dahapeang.

18Nounam pateti pakalunya gikineina kami apaya napatiki-Gu. A gearakayaka natou nama patetekang ana kabu ating papeanya napatiki-Gu, hi Alla enga woa pareihinanya; ʄiaɗinguka natou dama kabu ating papeanya napatiki-Gu, ʄapa langka hakuɗukina nahapeana hilu ɗeki ʄellapananyah.”

Na ina-Na ʄaka ɗa oaliʄaʄi-Na hi Yehu

(Mat. 12:46-50; Mrk. 3:31-35)

19Einya hangi laɗɗu, na inan ʄaka oaliʄaʄin hi Yehu amija, ʄiaɗinguka daɗa piakumang aɗa pareggaɗenganya hi Yehu kaɗang ali ɗanguɗa ɗa tou. 20Einya hatou nama panewi lahi Yehu winanya, ‘‘Na ina-Mu ʄaka ɗa oaliʄaʄi-Mu eija ta habalihiɗi, kamaparegga ɗenganya wiɗa-Gu.ʼʼ

21Jiaɗinguka hi Yehu wina, ‘‘Gearakaya natou nama ranguya ʄaka nama pahalakuya na wini-Na hi Alla, ʄiayaka na ina-Gu ʄaka ɗa oaliʄaʄi-Gu.ʼʼ

Hi Yehu napawaʄaya na ngillu bangat

(Mat. 8:23-27; Mrk. 4:35-41)

22Einya nama hangina na laɗɗu hi Yehu ʄaka ɗa ana pahakoala-Na ɗaɗeahangu teana. Winaja hi Yehu lahi ɗuɗa, “Maiya kahalaku ta habali tamma.” Jiayaka hiɗa halaku. 23Aɗa wudaka learu, juɗananyaka hi Yehu. Dapalliwainya aminya na ngillu bangat ta tamma nou. Na teana tamananyaka wei hiɗa tiki patabillu. 24Ɗa ana pahakoala-Na hi Yehu ɗahalaku lipa ɓangi-Nya. Wiɗanya, ‘‘To Gurru, To Gurru, matidanyaka ya!”

Hi Yehu kiɗinanyak manga hina gagutuya na ngillu ʄaka na ngalung nama ɓakul. Na ngillu ʄaka na ngalungu nawaʄa manga na tamma hina kawannar. 25Hi Yehu wina ta ana pahakoala-Na, ‘‘Ga nyiami hidami manni-Ga Nyouwa?”

Kaɓarra ʄaka mangeꞌatɗanyaka. Hiɗa meara patutur wikiɗ, “Gearaya natou nei, lapakung na pareahaya na ngillu ʄaka na ngalung, hina manudu!”

Hi Yehu napateggahuya natou napatamangu waddi tana

(Mat. 8:28-34; Mrk. 5:1-20)

26Manga hi Yehu ʄaka ɗa ana pahakoala-Na wuda learu pangalangɗanyak ta tana Geraha ta habali tamma Galilea. 27Aɗa tomaka ta Geraha hi Yehu purungnanyak ta tanamara, aminyaka hatouna na moani nama walina ta koata, napatamangu waddi tana. Langa madeika adana pakenang koapi ʄaka adana engang ta umma. Napabuhapana engang ta padou rati mamati. 28Ana itakiyaka hi Yehu, kawulangnanyaka ana karaɗa ta hagana hi Yehu ʄaka hawadingnanyak ana panewi, ‘‘Yehu, Ana Alla Nama Reihi ʄaga! Gahi ami nimiligu? Abi ulaɗiga! Oha amuka abi pamawillaɗiwa!” 29Hiwina noung kaɗang hi Yehu pareahananya na waddi tana louhung waling ta tou nou. Na waddi tana dana pahelamaya ʄiayaka laka piinaja ɗa limmana ʄaka ɗa wihina waingu galiɓihi ʄaka aʄawa dagehirunya, nabotah ʄellapahah na galiɓihi manga hina irihuya waddi tana tama kahika.

30Hi Yehu natuturuya natou nou, “Gearaya na ngaramu?

Nagapiya, “Na ngaragu ʻLegion.ʼ ʼʼ#8.30 Ta hilu Yunani Legionnahawiɗang mearaɗ ɗanguɗ ɗa hordadu Romawi ɗama tou 4000 a da tou 6000. Jiayaka na natou nou legion hiwiɗanya kaɗang langa tamananyak ‘waddi tana’ ɗangu. Hi wina natou nou, kaɗang ɗa ɗangu ɗa waddi tana ɗama tama ta ihin. 31Ɗa waddi tana hou ɗapa ohanya hi Yehu abi nawurutuja ta rowaku maʄalung pingi pahukuɗaja ɗa waddi tana.

32Ta lihi padoungu nou, ɗa ɗangu ɗa wawi ɗama manyerang pa anguɗa ta karaha paledi. Jaka ɗa waddi tana hou ɗapa ohanya hi Yehu kapahellakigama tama houng ta wawi, awiɗ. Hi Yehu na oꞌanya. 33Manga ɗa waddi tana hou ɗalouhung waling ta tou nou, hiɗa tama ta wawi ɗama ɗangu. Ɗa wawi hou ɗapalai ʄaka ɗaleijung waling ta wiwi kealang ta tamma, manga hiɗa maeti mumuh.

34Ɗa maʄawa wawi hou ɗa itaya namaʄaʄi. Palaiɗanyaka hiɗa lolukuya namaʄaʄi ta koata ʄaka ta paraingu ɗama eija ta loada Geraha. 35Manga ɗa tou ɗangu waling ta koata ʄaka ta paraingu hou ɗalouhung aɗa patetinya namaʄaʄi. Amija lahi Yehu, tomaɗanyaka natou napapahella waddi tana, nangoɗu ta lihi wihi-Na hi Yehu. Nama langa wainguna koapi ʄaka napangaɗanguna tiddinanyak. Jiayaka hiɗa mangeꞌat. 36Ɗa tou ɗama ita wainya mata namaʄaʄi nou, lolukɗanyak ta tou maɗangu gikinouna natou nou anateggah. 37Manga ngaladukaɗa ɗa tou ta loada Geraha nou ɗakareiya hi Yehu kana ɗujakunya na padoungu nou awiɗa, kaɗang ɗuɗa ɗamangeꞌat oata. Jiayaka hi Yehu hina ɗeahang teana kaku ɓali awin, 38natou napalanga pahella waddi tana napa ohanya hi Yehu kaku keriya, awin.

Jiaɗinguka hi Yehu napaleawaya halaku, winanya, 39“Ɓaliwu ʄaka patomanya napalanga woluna hi Alla lahi ou.ʼʼ

Manga natou nou halakunanyaka ana peakaya ta tou haguꞌul koata, gananya napalanga woluna hi Yehu ta morikuna.

Hi Yehu napateggahuya na mawinni boangu raa ʄaka napamorik ɓaliya na anan hi Yairuh

(Mat. 9:18-26; Mrk. 5:21-43)

40Ana ɓalika hi Yehu ta habali tamma,#8.40 Na ngara padouna, Kapernaum. ɗa tou ɗangu ɗama naɗi-Nya ɗareggawainya egi ati. 41Manga aminya hatou na kapalang nama ɓeinya na umma pingi pakaɓuangu tou Yahudi,#8.41 Umma pingi pakaɓuangu tou Yahudi ʄiayak na umma nahawaingu abahhaya ʄaka ahalidikuya na Hurat Ɓakul ta Lii Dei, pingi pahabayang, pingi pakaɓua-kawoting ʄaka pingi papanunga-papeakang. nama ngarang Yairuh. Nakaraɗa ta hagana hi Yehu ʄaka nakarei pa ohanya hi Yehu ka aminya ta ummagu, awina, 42kaɗang na ana mangomana nama hatou waikin nama ɓuhi habulu ɗuba douna matuana, nakadauk tik hamaet.

Tangir halakuna hi Yehu ta ummana hi Yairuh, ɗa tou ɗangu ɗapaʄuʄa-ʄuʄang. 43Ta joangaɗa ei ʄellanya na mawinni nama habulu ɗuba dounak madeina ana boangu raa tunanya na rahi mawinnin. Napadukahaka ɗa ritina ana kaheawa waingu doatir, ʄiaɗinguka da eimang mapateggahuya. 44Na mawinni nou aminya ta lihi kaɗeangana hi Yehu, manga hina ɗeɗaya na hupu koapi ɓakulu-Na. Ta rahi nouʄella na bongu raana na mawinni nou ailolu kataɗuknanyaka. 45Hi Yehu napatutur, “Gearaya nama ɗeɗa-Wa?ʼʼ

Ngaladukaɗa ɗa tou da eimangu nama peaka wikin. Manga hi Petruh wina, “Gurru, enga eingu maɗeɗa-Wu kaɗang natou ɗangu ɗawollitu-G ʄaka ɗapaʄuʄa-ʄuʄang!ʼʼ

46Hi Yehu wina ʄellapah, “Daꞌahǃ Einya natou nama ɗeɗa-Wa. Kupeanya nou, kaɗang einya na kuaha nama louhung waling ta ihi-Gu.ʼʼ 47Na mawinni nou napaɗa wikina nahawoluna ana peananya. Kadadaknanyaka na ihina ʄaka aminya ana karaɗa ta hagana hi Yehu. Manga hina lolukuya na hiɗuna ta haga tou ɗangu, ʄaka gikineina ana ɗeɗaya hi Yehu, ta rahi nou ʄella hina ailolu teggahu. 48Hi Yehu winanya, “Ak anaG, na manningumu, napamanumarawuka. Halakuya waing moili ati.ʼʼ

49Tangirun hi Yehu ana panewi ɗenganya, aminyaka hatou nama walina ta ummana hi Yairuh ʄaka wina lahi Yairuh, “Na anam mangoma na maetika. Abi hilu pamawillamaya na Gurrum.ʼʼ

50Narangukik hi Yehu, panewinanyaka lahi Yairuh, “Abi mangeꞌatmang. Mumannikaɗing ʄaka na anam enga teggahuna.ʼʼ

51Ana tomaka ta ummana hi Yairuh, hi Yehu naheiruja natou hawanguk aɗa tama pamarai ɗenga-Nya, ʄiapaha hi Petruh, hi Yohanih, hi Yakobuh ʄaka ɗa inan ɗa aman na lakeaɗa nou. 52Ngaladukaɗa ɗa tou ɗahou ʄaka ɗahaliya na lakeaɗa nou. Jiaɗinguka hi Yehu winaja, “Abi houmang. Na lakeaɗa nei dana maetimang, ʄuɗakaɗinanya!ʼʼ

53Ɗa tou ɗangu malikɗanyaka hi Yehu, kaɗang aɗa peanya na lakeaɗa mawinni nou ana maeti. 54Jiaɗinguka hi Yehu nahamanunanya na limmana na lakeaɗa nou ʄaka hi winanya, “Kiɗiya iana!ʼʼ 55Na hangahun na lakeaɗa nou kolli ɓalinanyak hina ailolu kiɗi. Manga hi Yehu hiwina woanyaya pa angu na lakeaɗa nou. 56Ɗa inan ɗa aman na lakeaɗa nou kaɓarraɗanyak. Jiaɗinguka hi Yehu naheiruja abi ɗapeakaya namaʄaʄi nou lahi gea-geara.

Поточний вибір:

Lukah 8: wnk

Позначайте

Поділитись

Копіювати