Lukah 7
7
Hi Yehu napateggahuya na atan na kapala ʄawa-bani ta mapareaha Roma
(Mat.8:5-13)
1Namengaka papanewi reihiɗanya ta tou ɗangu, hi Yehu halakunanyaka ta koata Kapernaum. 2Noulau einya na kapala ʄawa-bani#7.1 Kapala ʄawa-banita mapareaha Roma, ʄiayak hatou nama kapalaja ɗama hangahuɗa ɗa ʄawa-bani. ta mapareaha Roma nama eingu atana napanamu oatan, nama kadauku tik hamati. 3Ta rahi nou, na kapala ʄawa-bani naranguya nalarana hi Yehu, ʄiayak hina paleawaha ɗama touma pirrah ɗa kapalang ɓei tou Yahudi, kaɗa halaku lipa kareiya hi Yehu ka aminya kana pateggahuganya na atagu awina. 4Ɗa tomaka lahi Yehu, ɗa tou ɗapa ohaya kana gatanya na kapala ʄawa-bani, awiɗa, “Na kapala ʄawa-bani nou napatuꞌang amugatanya Ama, 5kaɗang ɗunna na namuda iata tou Yahudi, ʄaka langa wolunagamaka umma pingi pakaɓuanguma.”
6Manga hi Yehu halaku marainajaka. Natikki patomak hi Yehu ta umma na kapala ʄawa-bani, napaleawaha ɗa oalin lahi Yehu kaɗa peakanya, awina, “Abi pamawillang wikiɗi-Mu, kaɗang nyouwa daku tutumangu aku kaawu ta ummagu. 7Jaka daku tarabani ʄellamangu pahagaGu, Ama. Muwoakaɗing patiki hakawoɗu, kana teggahu na atagu. 8Touʄellana nyouwa kumokul ta mapareaha barra ɗeaha, ʄaka nama ta wawaguja ɗamokul ʄellanya napareahagu. Ak paleawakayaka hatou na ʄawa-bani, ‘Halaku!’ enga halakun. Jaka awigukak ta tou hawanguk, ‘Mai nim!’ enga aminya. Jaka touʄellana ak paleawakayaka na atag, ‘Muwoluya nei!’ enga wolunanya.”
9Hi Yehu nakaɓarra ɗenganya ana ranguya napatikina na ʄawa-bani nou, nagilak ta tou ɗangu ɗama keri-Ya ʄaka hiwina, “Dapamaɗolu waingumaya natou nei laka da tou Ihraelɗiya. Ta joanga tou Ihrael daɗi kureggahingmah na manninguna nama kullih mearang natou nei!”
10Aɗa ɓalika ɗa tou papaleawana na kapala ʄawa-bani ta ummana, baɗi teggahunaka na atan.
Hi Yehu napamorik ɓaliya na anana na mawinni ɓalu
11Dana hilu madeimaha, hi Yehu halakunanyaka ta koata Nain. Natou ɗangu ʄaka ɗa ana pahakoalan halaku marainajak. 12Natomaka hi Yehu ta lihi ɓinna ɓakul ta koata, eija ɗa tou ɗama lipa tanung mamaet ta haɓali koata. Nama maeti nou, lakeaɗa moani kanihaya anananya hatou na mawinni ɓalu ta koata nou. Na ɗangu natou ɗama marainya na inan. 13Hi Yehu ana itaya na mawinni nou, na milla na atin hi winanya, “Abi muhouɗing, iana!” 14Hi Yehu nalihinya na rakang mamaet ʄaka naɗeɗaya. Manga ɗama ɗeituya ɗadedi. Hi Yehu winanya, “Bua moani, nyouwa kupalewawu mukiɗiyaiǃ” 15Na ɓua moani nama langa matina, kiɗinanyaka ana ngoɗu ʄaka hina panewi. Hi Yehu naharaka ɓalinya ta inan.
16Ngaladukaɗa ɗa tou ɗakaɓarra ʄaka hiɗa wuatu-haliya hi Alla. Ɗuɗa ɗapanewi, “Na nabi ɓakul einyaka ta paɗuada iata! Hi Alla aminyaka ana pamanumaraha ɗa huhu-anan!”
17Nahawoluna hi Yehu ta koata Nain mahoꞌarungnanyak ta haguꞌul loaɗa Yudea ʄaka ta kaligiruna.
Ɗa papaleawa waling lahi Yohanih Pembaptih
(Mat. 11:2-19)
18Ɗa tou ɗama keriya hi Yohanih Pembaptih ɗapeakaya lahi Yohanih ngaladukana namaʄaʄi. Manga hi Yohanih nakamaikaja ɗama tou maɗuaha waling ta tou ɗama keriya, 19hina paleawaha halaku lahi Moiri Yehu kami tuturuya, “Ama ʄiaɗiwuka nama aminya papaturana hi Alla? A da ʄiakawuka manaɗinguha tou hawanguk?”
20Tou maɗuaha ɗama keriya hi Yohanih ɗahalaku lahi Yehu hi wiɗanya, “Hi Yohanih Pembaptih paleawanagama liha tuturuwu Ama, ʄiawuka natou nama aminya napapaturana hi Alla? A da ʄiakawuka manaɗinguha tou hawanguk?”
21Ta rahi nou, hi Yehu napateggahuha ɗa tou ɗangu waling ta kadaukuɗa, hina wurutuja ɗa waddi tana, ʄaka napa ita ɓaliha ɗama kaboala. 22Nagapiya hi Yehu, “Miɓaliyaya lahi Yohanih kaim peakanya gananya naparangumi ʄaka napa itami: natou kaboala na ita, natou kalikku nahalaku, natou katobu napijal, natou kawanga narangu, natou mati namorik ɓali, ʄaka na Lii Kalung#7.22 Lii Kalung ‘Kabar Baik’ waling lahi Alla witina hi Yehu nama pamanumaraya na tourara. waling lahi Alla napatomanya ta tou milla. 23Maringu-malala natou, dama momu anawai-Ga ʄaka anakeri-Wa.”
24Ɗaɓalika ɗapapaleawana hi Yohanih, hi Yehu wali nounaka ana panewi ta tou ɗangu witina hi Yohanih, winaja, “Ami halaku ta maraɗa karah gapa ealumi? Kama liha ealuya natou nama maga kaloa ta pinu letinaya wimi?#7.24 Na lii-pangearang ya ta Hurat Bakul hilu ʄawa wina, buluh yang digoyangkan angin kian kemari.Ta hilu Wanukaka natou nama maga kaloa ta pinu letin mearang natou dama maddung pangaɗanguna. Daꞌahǃ 25Nyiami ami halaku, gananya napapatetim? Natou nama waingu koapi kalung ʄiaya? Daꞌahǃ ɗa tou ɗama pakenang matoungu ʄaka morik nama tomang, engaɗa ta umma raja! 26Manga nyiami himi louhung gananya napapatetim? Kama itaya na nabi dawimiɗing? Mapaɗeninguya, ʄiayaka nama reihi waling ta nabi. 27Kaɗang langa matulingnak ta Hurat Bakul, hi Moiri Alla napanewi ta Raja nama Pamanumara witina hi Yohanis Pembaptih, wina,
‘Hi Yohanih Pembaptih ʄiaɗiyaka napapaleawa-Gu,
Nyouwa nama paleawaya kana moulu waling lahi Ou,
kapiaku wehanagunya na larangi!’ ”
28Jaka hi Yehu wina ʄellapah, “Munamuyaǃ Ta pinu-tana daɗi eimanguha mareihi ɓakul waling lahi Yohanih Pembaptih. Jiaɗinguka ta joanga tou namapawai lahi Alla, laka tou merrahuya ʄiayak nama reihi ɓakul waling lahi Yohanih Pembaptih.”
29Ngaladukaɗa ɗa tou ʄaka ɗama tagu karei hikatiku ɗama ranguya hi Yehu ana panewi tounouna, ɗa oꞌanya hi Alla ana paɗening. Na tadana alanga woa wikiɗa na ihuha hi Yohanih Pembaptih. 30Jiaɗinguka ɗa tou waling ta kaɓuangu Parihi ʄaka ɗa guru agama tou Yahudi dama buhangu pakaaya gananya napawukuna hi Alla tutu-taguɗa. Kaɗang daɗa weakumangu ana ihuha hi Yohanih Pembaptih.
31Manga hi Yehu napanewi ʄella winaja, “Gananya napahameara waiguja ɗa tou ɗama morik ta dalar ya? Gikiheiɗaka ɗuɗa? 32Meara houɗa ɗa lakeaɗa ɗama ngoɗu ta paregang; ɗama kaɓuangu ʄaka ɗakawulangu ta oaliɗa hawanguk,
‘Nyiama mapou talali egi ati tagumi, ʄiaɗinguka nyiami dami neagumangu!
Nyiama maloɗu milla, ʄiaɗinguka nyiami dami houmangu!’
33Hi Yohanih Pembaptih aminya dana amang dana inumangu wei anggur, ʄaka nyiami wiminy, ‘Regga mori tanananya!’ 34Nyouwa Ana Tourara na ami-Ga ku angu ku inung manga wimi ʄella-Ga, ‘Ealuyah natou nei! Naporat, namawuk, oalinaja ɗama tagu karei hikatiku ʄaka ɗa tou jala.’ 35Laka atounouɗin, na manyakatuna hi Alla itananyaka natadana ana paɗening, ta tou nama morik wainya na manyakat.”
Hi Yehu ta ummana hi Himon
36Einya natou waling ta kaɓuangu Parihi, nama ngarang Himon, ʄaka hina waddaya hi Yehu lipa angu. Hi Yehu nahalaku ta ummana hina ngoɗu ana angu. 37Ta koata nou einya na mawinni nama morik ta doku-jala. Ana rangukiyaka hi Yehu a einya ana angu ta ummana natou waling ta kaɓuangu Parihi, aminya ana idiya na minya nama wou momar napatau ta kuba buatu hii. 38Nangoɗu panyuka ta kaɗeangana hi Yehu ta lihi wihi-Na ana hou, hina pabahanaja ɗa wihi-Na hi Yehu waingu wei matana. Manga napoahiha waingu loagina hina ngiɗihunaja ʄaka naɓurinaja minya mawou momar. 39Natou waling ta kaɓuangu Parihi nama waddaya hi Yehu na itaya namaʄaʄi nou, panewinanyaka ta ɗalu atin, “A nabi tekkakayaka napeanya agearaya na mawinni nei nama ʄamiya, atou mamorik ta doku-jalaya!”
40Manga hi Yehu napanewi lahi Himon, “Himon, einya napatiki-Gu lahi ou.”
Nagapiya hi Himon, “Oaꞌ Ama, tikikaɗiganya.”
41Hi Yehu napanewi, “Eija ɗama tou maɗuaha ɗama pa utang ta tou nama mangu ritin nama woa letuja. Nama hatouna napa utang lima ngahu riti kaka, ʄaka nama hatouna limam bulu riti kaka. 42Atou maɗuaha daɗa hilumokamaja pahaɓalija ɗa riti ɗapaɗekiɗa, ʄiayaka ɗa utanguɗa hiɗa mapoɗahung. Manga, gearakaɗiyaka ɗama tou maɗuaha nama reihi panamung ta tou nama woaja riti nou?”
43Nagapiya hi Himon, “Nyouwa wiggu, natou nama reihi ɗangu utanguna!”
Nagapiya hi Yehu, “Nahawimung mapaɗeninguya.” 44Manga hi Yehu nagilakunya na mawinni nou, ʄaka hina panewi ɗenganya hi Himon, “Ou mu itaya na mawinni nei? A ami-Ga ta ummamu da ei mangu wei papayeamamu-Ga kaku ɓaha waija ɗawihi-Gu. Jiaɗinguka na mawinni nei naɓahagaja ɗawihi-Gu waingu wei matana, ʄaka napoahigaja waingu loagin. 45Ou damu kaa waima-Ga ngiɗih, ʄiaɗinguka na mawinni nei dana hangahu mangu ana ngiɗihugaja ɗa wihi-Gu waling a amig. 46Ou damu ɓurimaganya wei minya na katiku-Gu, ʄiaɗinguka na mawinni nei naɓurigaja minya nama wou momar ta wihi-Gu. 47Rangu pakalung: ɗa doku-jalana na mawinni nei ɗama ɗangu, hiɗa mapoahi-poɗahung, kaɗang napanamunguna nama ɓakul napalanga patekana lahi Nyouwa! Natou napapoahi-poɗahu hakuɗuk ɗa doku-jalan, hakuɗuk ʄellana napanamung.”
48Manga hi Yehu winanya na mawinni nou, “Ɗa doku-jalamu Kupoahi-poɗahgujak.”
49Ɗa tou hawanguk ɗama ngoɗu a ɗenganya hi Yehu, ɗapatutur wikiɗa, “Gearaya natou nei lapakung hina piaku ana poahi-poɗahuha ɗa doku-jala?”
50Jiaɗinguka hi Yehu winanya na mawinni nou, “Kaɗang ou amu wai-Ga, ouwu pamanumarawuka. Muhalaku wainguya moili ati!”
Поточний вибір:
Lukah 7: wnk
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024 (Active), Wycliffe Bible Translators, Inc. All rights reserved.
