Yohan 18
18
Yesu ta:pmò we
Mat. 26:47-56; Mak. 14:43-52; Luk. 22:47-53
1Kà yadv́ng pv̀n shø̀:nò dá:ngí, Yesu nø Àng coqcv́nrì nv̀ng tiqdø, Kidron Vkung kupa sv̀ng léshìá:mì. Weyv́ng Àng nv̀ng Àng coqcv́nrì nø kùlwàng tiqlòng sv̀ng gòngá:mì. #Mat. 26:36; Mak. 14:32; Luk. 22:39 2Yesu nv̀ng coqcv́nrì nø weyv́ngø àngkvtkvt dvkǿmshì dvr we í rvt, Àng sv̀ng nvmá:mò pè Yudaí gø wezàng sháòe. #Luk. 21:37 3Wekvt Yudaí shvrúngshú vjìrì nv̀ng Parisirìí dvzá:rò we Noqngø̀m Tø̀ngnø vsóngshúrì gø cìlcè tiqmvdò gø shølatnà. Àngmaq nø svmi mvdø̀mrì, svmigwìnrì nv̀ng cìldvmrì lá:ngò nø̀ tø̀m ráì. 4Yesu nø, À:ngí vhǿmlv́m rì shvngbe sháshì rvt, àngmaq yv́ngsv̀ng di nø, “Nàmaqí kagǿ èlánø̀nge?” wa rø:tnòe. #Yoh. 19:28 5Àngmaqí, “Nazaretpè Yesu láìe,” wa vtá:nòe. Yesuí, “Ngà ǿngàe,” a:lòe. Àng sv̀ng nvmá:mò pè Yuda gø werì nv̀ng tiqdø ripme. 6Yesuí, “Ngà ǿngàe,” vl bǿà kvt, àngmaq nø mèpvng lap sv̀ng shøtshì sórí vba tø̀m sv̀ng vngaqá:mì. 7Vrá tiqkvt À:ngí, “Kagǿ èlánø̀nge?” wa rø:tnò kvt, àngmaqí rá, “Nazaretpè Yesu láìe,” wae. 8Yesuí, “‘Ngà ǿngàe,’ lavl bǿshà. Ngà sv̀ng èláshà nìnø, yarì nø shèlonø̀ng,” wa vtá:noe. 9Yalòng nø, “Nàí Ngà sv̀ng vzíshaq rì tiqgǿ gø Ngàí màshvmv́ngò,” wa À:ngí shø̀:nò kà dvhømlv́m dvpvt íe. #Yoh. 17:12 10Wekvt Simon Piter nø, àng taq vbá we shv̀mka rit shà:lò nø̀ shvrúngshú vgopèò vshuq sv̀ng vtuq bǿà kvt, àng vbàngpa vnà tøq vja cv́nga bǿà. Vshuqpè bø̀ng nø Malku íe. 11Yesuí Piter sv̀ng, “Shv̀m nø àng dø̀nggàng taq èzá:ngò. Vpèí Ngà sv̀ng vzíshaq gwìn#18:11 Dvshà mvhøt vhǿm rà lòng sv̀ng wae. nø Ngàí mvaqlv́m í má?” a:lòe.#Mat. 26:39
Annas mv́rdv̀ng Yesu shøl bǿà we
Mat. 26:57-75; Mak. 14:53-72; Luk. 22:54-71
12Wekvt cìldap øpshú dùpè ó àng cìlcè mvdò nv̀ng Noqngø̀m Tø̀ngnø vsóngshú Yuda vsv̀ngrìí Yesu sv̀ng ta:pmò nø̀ dù:ngò dá:ngí, 13Annas yv́ngsv̀ng vzv̀ng shøl bǿà. Annas nø wenǿng taq shvrúngshú vgo wáshìpè Kayapa àngkø̀ íe. 14Kayapa nø, bashàrì tvle vsv̀ng tiqgǿ shì lòng té shvlae, wa nø Yuda vsv̀ng shølshúrì kaq vraa:pmà pè íe. #Yoh. 11:49-50
15Simon Piter ó coqcv́n dvgá tiqpèí Yesu mèpvng cv̀n bǿà. Coqcv́n wepè sv̀ng shvrúngshú vgopèí sháò rvt, àng nø Yesu nv̀ng tiqdø shvrúngshú vgopè chø̀m gùrpuq sv̀ng gòngá:mì. #Yoh. 20:3; 21:20; Dzr. 3:1 16Piter mv̀ng nø bv́ngkà vngámlap yv́ng ripme. Wekvt shvrúngshú vgopèí sháò we coqcv́npè di daqì nø, bv́ngkà vsóngshú chø̀myorémè sv̀ng a:lò nø̀ Piter sv̀ng dvgòng lú:ngà. 17Wekvt bv́ngkà vsù:ngò mèí Piter sv̀ng, “Nà gø wepè coqcv́n tiqpè mèí má?” a:lòe. À:ngí, “Mvǿngà,” a:lòe. 18Weyv́ngø vshuqrì nv̀ng vsóngshúrì nø, zø̀ng rvtnø̀ shø̀l svmi wvrshì nø̀, lǿmshì sórí ripme. Piter gø àngmaq nv̀ng rip nø svmi lǿmshìe.
Shvrúngshú vgopèí Yesu sv̀ng gù:nò we
19Welvng nø shvrúngshú vgopèí Yesu sv̀ng Àng coqcv́nrì dang nv̀ng À:ngí shvngø:tnò mvshǿl dang rø:tnòe. 20Yesuí àng sv̀ng vtá:nò nø̀, “Ngàí nø rvgaq tø̀m sv̀ng dèdè chaqdvp shø̀n bǿngà. Ngàí nø kadvgvp gø Yuda vsv̀ngrì shvngbe dvkǿmshì we júrøt chø̀m nv̀ng Noqngø̀m Tø̀ngnø taq shvngøtshaq íe. Mvyø̀:ní tiqpv̀n gø Ngàí mvshø̀nò. #Yoh. 7:14,26; Mat. 10:27 21Ngà sv̀ng pàwá èrøtnàe? Ngàí kapà shø̀nò we táa:pmà rì sv̀ng èrø:tnò lè. Ngàí shø̀nò rì shvngbe àngmaqí sháòe,” a:lòe. 22À:ngí yakà shø̀n bǿà kvt, shvnvngø rip we vsóngshú tiqpèí Yesu mv́r vpaqò nø̀, “Shvrúngshú vgopè sv̀ng Nà yadø vtv́nshì daq má?” wae. #Yoh. 19:3; Dzr. 23:2 23Yesuí àng sv̀ng, “Ngàí shǿn vléngònø̀ng nø vléngò kà nàchakngà. Dìnglòng shø̀nònø̀ng nø pàwá Ngà sv̀ng nàpakngàe?” a:lòe. 24Wekvt Annasí Yesu sv̀ng wedø vdóngshaq, shvrúngshú vgopè Kayapa yv́ngsv̀ng shøl dvzv́r bǿà.
25Simon Piter nø wedøni rip nø svmi lǿmshì ke, àngmaqí, “Nà gø Àng coqcv́nrì kèní tiqgǿ èí we mø̀í má?” wa rø:tnòe. Àng mashì nø̀, “Mvǿngà,” wae. 26Piterí vnà sv́nga dárà pèò àngrì àngyàng vdu we, shvrúngshú vgopèò vshuq tiqgǿí àng sv̀ng, “Kùlwàng yv́ngø Yesu nv̀ng tiqdø ngàí nà sv̀ng yv̀ng dv́rà we mø̀í má?” a:lòe. 27Vrá tiqkvt Piter mashìe. Wela:ngí dv̀nggú gì daqì.
Pilat mv́rdv̀ngø koò we
28Wekvt Yuda vsv̀ng shølshúrìí Yesu sv̀ng Kayapa yv́ngkèní Roma gàmzø̀pè#18:28 Roma dàni lv̀ngpvng Yerusalem sv̀ng ø:pmò we gàmzø̀pè íe. chø̀mdø̀ng yv́ngsv̀ng shøla:tnà. Welvng nø sháng mvgágá íe. Àngmaq nø Shvlé Bóy v́mpà v́m lúnlv́m dvpvt, noqngø̀m tóng cà:nò nø̀ mvshèr we sv̀ng vyáshìlv́m, gàmzø̀pè chø̀mdø̀ng sv̀ng mvzv́ngshì. #Yoh. 18:28-19:15; Mat. 27:2,11-30; Mak. 15:1-19; Luk. 23:1-25 29Wervt Pilat nø àngmaq yv́ngsv̀ng léshì daqì nø, “Vsv̀ng yapè sv̀ng nàmaqí pà shvràlv́m vle má?” wa rø:tnòe. 30“Vsv̀ng yapèí màshvla we mvwàò nìnø, nøngmaqí nà sv̀ng màtvleì,” wa àngmaqí vtá:nòe. 31Pilatní, “Nàmaqí ni Àng sv̀ng èshølnø̀ng nø nàmaq dvrá vl dø kà èngeshì bǿnø̀ng,” a:lòe. Àngmaqí àng sv̀ng, “Nøngmaqí nø kagǿ sv̀ng gø shvtlv́m vko vkv́ng màvl,” a:lòe. #Yoh. 19:6,7; Dzr. 18:15 32Yalòng nø Yesu Àng kadøwa shìlv́m í we shǿnshìa:pmì tvrà dvhømlv́m dvpvt íe. #Yoh. 19:32,33; Mat. 20:19
33Wekvt Pilat nø vrá tiqkvt Roma gàmzø̀pè chø̀mdø̀ng vdòng sv̀ng gòngá:mì dá:ngí, Yesu sv̀ng go dvzá:rò nø̀, “Nà nø Yuda vsv̀ngrìò Koqkv́m èí má?” wa rø:tnòe. 34Yesuí, “Yakà nø nà nø:tní èshø̀n we í má? Mø̀íni vsà:ngí Ngà dang dètá we í má?” wa vtá:nòe. #Mat. 16:13 35Pilatní, “Ngà nø Yuda vsv̀ng ǿngàe má? Nà dvcìcèrì nv̀ng shvrúngshú vjìrìí ni Nà sv̀ng ngà kaq tèle bǿì. Nàí kapà èwàa:pmà má?” wa rø:tnòe. #Yoh. 1:11; Mat. 21:39 36Yesuí, “Ngà móngdàn nø rvgaq móngdàn mø̀í. Rvgaq móngdàn la í nìnø, Yuda vsv̀ngrì kaq Ngà sv̀ng màtvlelv́m rvt, ngà mèpvng cv̀n rìí cìl wà lú:ngò ni we íe. Íwe Ngà móngdàn nø rvgaq móngdàn mø̀í,” a:lòe. 37Wervtnø̀ Pilatní, “Wedø íni, Nà nø koqkv́m ni èí má?” a:lòe. Yesuí, “Nàí èshø̀:nò døni Ngà nø koqkv́m ǿngàe. Ngà sv̀ng ègv̀l dakngà nø rvgaq tø̀m sv̀ng dø̀ng dakngà we nø dìnglòng dvpvt shvkse wáshìlv́m rvt íe. Dìnglòng lap wáshì rì kagǿ gø Ngà kà tae,” wa vtá:nòe. #Yoh. 8:47; 10:2; 1Tm. 6:13-14 38Pilatní Àng sv̀ng, “Dìnglòng nø pà íe?” wa rø:tnò dá:ngí, vrá Yuda vsv̀ngrì yv́ngsv̀ng léshìá:mì nø, “Yapè taq ngàí pà mvrà gø lá mvlúnò. 39Íwe Shvlé Bóy rvtø̀ taq ngàí nàmaq dvpvt tong rung vsv̀ng tiqgǿ shvlángalv́m vtóng vl dø, Yuda vsv̀ngrì Koqkv́m yapè shvlángaì we sv̀ng èshòngnø̀ng má?” a:lòe. 40Wekvt “Yapè nø mø̀í, Baraba mv̀ng shèlángashà!” wa àngmaq vkiqe. Baraba nø tølv́mshú tiqpè íe.
Поточний вибір:
Yohan 18: GSM
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024, Rvcv́ngcè Kàru Gomidi Kristu Shvngø̀mré. All Rights Reserved.
