मत्ति 8
8
रोग्याल्होका एल्का
(मर्कुस १:४०-४५; लुका ५:१२-१६)
1इसु आरदाङसो खुअ्लाउ द्याङगेलाइको बारा चेअ्सुमेअ्सुका वासेहेङ पिताइहि। 2इङकोङ पहर एमि रोग्याखोअ्का वाकोता लोहि रो वाको आगाता तिर्हो थोतेङ एसा दोअ्हि, “ओइ प्रभु, नाङको लाल्सा हिनु कासेहेङ एल्पालि द्वाना।” 3इसु ताइको खुरहोइ साइतेङ इङकोहेङ दोअ्हि, “का लाल्सा पाखा, ना एल।” उदोङघरि इङकोको रोग्या एल्हि। 4कालाउ इसु इङकोहेङ दोअ्हि, “इदोइ काथा हासुहेङ मादोअ्, कालाउ बुङ हाने रो ताइमि एल्का धामिहेङ तिङपा। कालाउ मोसा आर्हाइका भाइपा नाङको चार्हाइका भेटि दासिको आकारता ज्याको।”#लेबि १४:१-३२
रोमि कप्तानको खान्धुर
(लुका ७:१-१०)
5इसु कफर्नहुम पुरता दुललाउ एमि रोमि काप्तान लोतेङ वाकोदोफा भनसुन पालि तेङहि। 6इङको दोअ्हि, “ओइ प्रभु, काङको कामत्या गाइल्हि खोअ्तेङ हेन्जाङ पिर निङचातेङ साअ्ता तुपाइतेङ हि।” 7इसु वासेहेङ दोअ्हि, “का लोतेङ इङकोहेङ एल्पा प्याङका।” 8कालाउ बुङ काप्तान दोअ्हि, “ओइ प्रभु, नासेहेङ काङको सिता चुमपुलि लायकको का मान्थुघा। ना कथन खिनिङ धुइपि, कालाउ काङको कामत्या एलावा। 9हाइपानु का बुङ हाकिमगेलाइको बसता हिघा, कालाउ काङको बसता बुङ सिपाल्हाइ हि। का एमिहेङ ‘हाने’ दोअ्खा, इङको हानिखे, भेनेङहेङ ‘लोउ’ दोअ्खा, इङको लोखे। काङको कामत्याहेङ ‘एसा पा’ दोअ्खा, वा एन्साङ पाखे।”
10कप्तानको काथा हिङतेङ इसु भारभुसाइहि रो वासेहेङ पिताइतेङ लोकालाइहेङ दोअ्हि, “जातिङको, का नेलाइहेङ दोअ्खा, इस्राएलिगेलाइता बुङ इसिका बारा खान्धुर का निङका मान्थुघा। 11का नेलाइहेङ दोअ्खा, नुहेँ रो दिहेँसो बोजात्यागेलाइ हेन्जाङ ल्वावा कालाउ आब्राहाम, इसहाक रो याकुबदोफा सादेलको सारभिको भात्यारता चालि योमावा।#लुका १३:२९ 12कालाउ बुङ सादेलको सारभिता हिलिगोइका इस्राएलिगेलाइ चाहिँ बाहार कितिकितिकाता थालन्हावा। इन्ता एम्बालाइ खारस्वावा रो तासि रेअ्तावा।”#मत्ति २२:१३; २५:३०; लुका १३:२८
13कालाउ इसु काप्तानहेङ दोअ्हि, “हाने, जिसिका ना खान्धुर पाका हिन्हा, इन्सिकाङ ज्याको।” कालाउ इङको कामत्या इदोङखातिर घरि एल्हि।
रोगाइकालाइ एल्का
(मर्कुस १:२९-३४; लुका ४:३८-४१)
14इसु पत्रुसको साअ्ता लोलाउ वा पत्रुसको जुबेहेङ मेसासो तुपाइतेङ जिमतेङहिका तिङहि। 15इसु इङकोको खुर साइपिहि रो मेसा वासेहेङ लाअ्हि। कालाउ वा ल्होहि रो वाको सेवा टहल पालि तेङहि।
16जेलाउ बेल्हाहि, कालाउ द्याङगेलाइ वाकोता मासान खोअ्का हेन्जाङहेङ चुमाहि। इसु बचनसो दोङ मासानगेलाइहेङ ओल्हेपाहि रो जेथे मासाअ्धेकालाइ हिघाखे, एम्बालाइ झाराङहेङ एल्पाहि। 17एसापा यसैया आगाधुइकाको धुइका बचन पोङघालि इदोइ जेङका हिघाहि:
“वा ताइमिङ केलाइको निमसरिगेलाइ फुहि
रो केलाइको रोगगेलाइ एल्पाहि।”#यसैया ५३:४
इसुहेङ पिताइलाउ भोगेलिगोइका तु:
(लुका ९:५७-६२)
18जेलाउ इसु ताइको कोरबितिङ द्याङगेलाइको चेअ्सुमेअ्सुका तिङहि, कालाउ वा चावान्दिको ओदोइपार हानेलि हुकुम पिहि। 19इङको दोङ पहर एमि धरममास्टर वाकोता लोतेङ दोअ्हि, “मास्टर, ना जेताजेता हानाना, का नासेहेङ पितायाङका।” 20इसु वासेहेङ दोअ्हि, “खाङ, स्याइलेको घारा रो जिह्याँ जुइलेङगेलाइको भासा हिखे, कालाउ बुङ का द्याङको चानको भाअ्सिङ पुरिङ ढाल्का थामे बुङ मान्थु।”
21वाको चात्यागेलाइता भेनेङ एमि दोअ्हि, “प्रभु, लाम्फा हानितेङ कासेहेङ काङको आबाहेङ लिअ्लि हानेलि पि।” 22कालाउ बुङ इसु वासेहेङ दोअ्हि, “कासेहेङ पिताइ, सिका दोङ सिकाहेङ लिअ्ताको।”
इसु दुमभेर्माहेङ गाङपाका
(मर्कुस ४:३५-४१; लुका ८:२२-२५)
23कालाउ इसु नाउता धोल्कान्हुअ्सो वाको चात्यागेलाइ वासेहेङ पिताइहि। 24ओदोङघरि चावान्दिता बारा दुम्भेर्मा लोहि रो लहर लोतेङ नाउहेङ थुम्लि तेङहि। कालाउ बुङ इसु निन्धातेङ हिघाहि। 25चात्यागेलाइ लोतेङ एसा दोअ्तेङ वासेहेङ ल्होपाहि, “सिन्हुपा प्रभु! केलाइ दुबितेङ सिलि तोमन्हाहोइ।” 26इसु एम्बालाइहेङ दोअ्हि, “खोइ कुनु नेलाइको खान्धुर? नेलाइ हाइपालि थिसुखेना?” कालाउ ल्होतेङ वा दुमभेर्माहेङ रो लहरहेङ हाकाराइहि, कालाउ भेर्मा रो लहर ओदोङघरि गाङहि। 27इदोइ तिन्तेङ झाराङ भारभुसाइतेङ दोअ्लि तेङहि, “या ते हिसिका द्याङ वाला, दुमभेर्मा रो लहर बुङ वाको हुकुम साअ्खे।”
मासान खोअ्का न्हेमि द्याङ एल्का
(मर्कुस ५:१-२०; लुका ८:२६-३९)
28जेलाउ इसु चावान्दिको ओदोइपार गदरिनिगेलाइको माउजाता लोहि, कालाउ मासान खोअ्का न्हेमि द्याङगेलाइ तोमहिका थामेसो लोकाताङ पालाउ इसुहेङ दुसुहि। एम्बालाइ हेन्जाङ थिनाङभाइका हिनाङसिङ हासु बुङ इन्तासो पाकपिलि मादोघाखे। 29एम्बालाइ एसा दोअ्तेङ र्हिकाइहि, “ओइ परमेस्वरको चान, नाङको केलाइदोफा हाइ मतलब? नियाको पहर माथुकासिङ केलाइहेङ हाइपालि साजाइ पिलि लोका हिन्हा?”
30एम्बालाइसो आसा दुरे पायाको एलोङ बारा जेर चारेदोङ घाहि। 31मासानगेलाइ इसुहेङ एसा दोअ्तेङ भनसुन पाहि, “ना केलाइहेङ ओल्हेपान्हा पानु, केलाइहेङ पायाको जेरता दिङगिलपि।” 32कालाउ वा एम्बालाइहेङ दोअ्हि, “हानेसु!” कालाउ एम्बालाइ ओल्हेतेङ पायागेलाइ लिअ्ता दुल्हि रो पायाको गोताङ जेर धाअ्तेङ हानेलाउ आर्दाङसो चावान्दिता हुलतेङ चिता दुबितेङ सिहि।
33कालाउ पाया घोकालाइ खाअ्हि रो पुरता हानेतेङ गोताङ बारदात रो मासान खोअ्कालाइ हाइ जेङहि इङको हिम्पापिहि। 34इदोइ काथा हिङकान्हुअ्सो पुरको झाराङ द्याङगेलाइ इसुहेङ दुसुलि लोहि रो वासेहेङ तिङतेङ द्याङगेलाइ एम्बालाइको माउजासो हानेपि दोअ्तेङ भनसुन पाहि।
Поточний вибір:
मत्ति 8: DHIM
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024 (Active), Wycliffe Bible Translators, Inc. All rights reserved.
