मत्ति 3
3
चिभुअ्लि पिका युहन्नाको बानाल
(मरकुस १:१-८; लुका ३:१-१८; युहन्ना १:१९-२८)
1आसा बाअ्सारन्हुअ्सो चिभुअ्लि पिका युहन्ना यहुदिया माउजाको उदादाङका थामेता लोहि रो एसा दोअ्तेङ पारचार पालि तेङहि, 2“पास्ताइसु, हाइदोनु स्वरगको सारभि#३:२स्वरगको सारभि यहुदिगेलाइ परमेस्वरको मिङहेङ पुनित फोमपातेङ वाको मिङ माल्होपिघाखे, इङकोभाअ्सिङ परमेस्वरको सारभिहेङ स्वरगको सारभि दोअ्घाखे। भेरपा लोका हि।”#मत्ति ४:१७; मरकुस १:१५ 3हाइदोनु परमेस्वर पाहासो धुइका यासाइया युहन्नाको बारेता एसा दोअ्का हिघाखे:
“उदादाङका थामेता एअ्मि बारका गालाहोइ र्हिकाइदोङखे,
‘परमप्रभुको दामा त्यार पासु,
वाको दामा सोझापासु।’”#यासाइया ४०:३
4युहन्ना उटको मुइसाको धाबा लागाइघाखे रो केङखेनेता धालेको पेटि तेअ्घाखे। इङकोको चाका आनेमाने जिर्हाम रो झारमह हिघाहि।#२ राजा १:८ 5यरुसलेम पुर, यहुदिया माउजा रो यरदन झोरा कोरबितिङको गोताङ थामेगेलाइसो द्याङगेलाइ वाकोता हानिहि 6रो ताताइको पाप मानितेङ यरदन झोराता युहन्नासो चिभुअ्लि र्हुहि।
7कालाउबुङ फरिसिगेलाइ रो सदुकिगेलाइता हेअ्मि चिभुअ्लि र्हुलि लोका तिङतेङ वा एम्बालाइहेङ दोअ्हि, “ओइ पुह्याँको चानगेलाइ, लोलि तोम्का चेरसो खाअ्लि हासु नेलाइहेङ चेतानि पिहि?#मत्ति १२:३४; २३:३३ 8इदोइभाअ्सिङ पाप पास्ताइका दासि पिलि रेम्का काम पासु। 9आब्राहाम दोङ केलाइको आबा हि दोअ्तेङ ताताइमिता दोअ्तेङ माहिसु। हाइदोनु का नेलाइहेङ दोअ्खा, परमेस्वर इदोइ उन्ठुइसो आब्राहामको भाअ्सिङ खाल उब्जाइलि द्वावा।#युहन्ना ८:३३ 10एलादोङ सिङको गोराता नियाको दुफे धेल्लिङ तोम्होइ। इदोइभाअ्सिङ रेम्का फल मासेपाका गोताङ सिङ पाल्तेङ उन्धिपावा रो मेता थालन्हावा।#मत्ति ७:१९
11“काचाहिँ नेलाइहेङ पास्ताइलिको भाअ्सिङ चिहोइ चिभुअ्लि पिखा, कालाउबुङ कान्हुअ्सो लोका काखान्तेङ सरबङ हिका हि, का वाको जुता चुमलि सोबाइका मान्थुघा। वा नेलाइहेङ पुनित हाङसा रो मेहोइ चिभुअ्लि प्यावा। 12वाको पाचिका राअ् वाकोङ खुरता हि। वा ताइको खाइर्हामहेङ थाइथाइ पावा रो ताइको आनाज भाकारता जोम्पावा। कालाउबुङ पितानाचाहिँ हेअ्लाउ मासिका मेता ओअ्पावा।”
इसुको चिभुअ्का
(मरकुस १:९-११; लुका ३:२१-२२; युहन्ना १:३२-३४)
13कालाउ इसु गालिल माउजासो युहन्नाकोता इङकोसो चिभुअ्लि र्हुलि यरदन झोराता लोहि। 14कालाउबुङ युहन्ना एसा दोअ्तेङ वासेहेङ गोर्हाइलि भोहि, “भुरुङ कासेहेङ नासो चिभुअ्लि र्हुलि गोइका हि, हाइ ना काङकोता लोलिगोइका?” 15कालाउबुङ इसु वासेहेङ दोअ्हि, “एला एसाङ जेङलि पि। हाइदोनु एसादोङ केलाइ गोताङ धरमाति काम पोङघापालिगोयाङ।” कालाउ युहन्ना राजि जेङहि।
16इसु चिभुअ्लि र्हुतेङ ओदोङघरि चिसो ओल्हिहि, कालाउ स्वरग हेन्हाहि रो वा परमेस्वरको हाङसाहेङ कुरजाभाइपा खुअ्तेङ हिका रो ताइमिर्हुता लोतेङहिका तिङहि। 17ओदोङघरि दोङ स्वरगसो इस्का गाला हिङहि, “या काङको मोन्दाताका चान हि, याकोदोफा का हेन्जाङ लेङचाका हिघा।”#सिरजाइ २२:२; ले २:७; यासाइया ४२:१; मत्ति १२:१८; १७:५; मरकुस १:११; लुका ९:३५
Поточний вибір:
मत्ति 3: DHIM
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2025 by Nepal Bible Society and Wycliffe Bible Translators, Inc.
