मत्ती 2
2
1ओहाङःसैको येसु बेथ्लेहेम् गाव्हाङः ओत्तोक्हाङः ओउः यहुदीया देस्कोः राजा हेरोद् त तोओ खेःतो। 2ओउः बेलाहाङः आन व्हाय्ओ मान्तालम् दाह्न्याम्सै वाङ्ती यरुसालेम् सहर्ताङ् दाह्आकाय्। दाह्ती वाङ्आक्तीको “लौ ओउः तोहा ओत्ओ यहुदीकोः राजा स्याव्सा चोः द्याह् गाःहाङःलो खेःतो। दाह्न्याम्हाङः ओउः चोः छ्यानःसाकायः मुओ कार्लेः फेल्बाङ्हाङः च्यवःआलाङःसु ओउःत झ्यान्ते ओउःकायः स्यवलाङ् वाङ्आलाङी” त दाय्ह्ती नोःआकाय्। 3ओउःतलेः नोःइतो ओउःमयःकोः नोःराय् सायःती हेरोद् राजामा यरुसालेम्कोः मान्तालम्मा “लौ इ सु राजाकोः चोः खेःचाः” त म्हर्ती ल्हुङ् रुःतो स्याव्नै। 4ओहाङःसै सबै यहुदीलम्कोः ताङ्ह्ओ पुरोहीत्लम्मा आखरः स्यान्ओमयःकायःमा हुम्ताक्ती “लौ ओउः वाङ्सा खेःओ ख्रीस् त तोओ गाःहाङः ओत्सा खेःताङःतो” त दाय्ह्ती हेरोद् राजाइ व्हत्आथास 5“ओउःपाय् यहुदीकोः बेथ्लेहेम् गाव्हाङः” त दाय्ह्ती त्याङ्आकाय्। 6“ ‘लौ यहुदीया देस्कोः बेथ्लेहेम् गाव्कोः मान्तालम्य नीङ्कोः गाव्पाय् लोनेः यहुदीया देस्हाङः ताङ्ह्ओजा खेःलेःनाः। दोह् हायःती दाय्ह्सा नीङ्कःसै यात्चाक् जुगाङ् ताङ्ह्ओ मान्ता वाङ्आनाः। ओउःपाय् ङाकोः इस्राएली त तोओ मान्तालम्कायः स्यालःतीमा ओम्पायःतीमा गम्नाःथास बा’ त दाय्ह्ती परमेस्वर्कोः कुरा आखरःहाङः लेखओ मुनाः” त दाय्ह्ती ओउः हुम्ओलम्इ हेरोद् राजाकायः तोआथै। 7एत तोओ सायःआक्तीको हेरोद् राजाइ ओउः दाह्न्याम्सै वाङ्ओ व्हाय्ओलम्कायः झुङ्आले लयःकःताङ् गोत्आकान्। गोत्आक्तीको “लौ ओउः ख्रीस्कायः छ्यानःओ कार् गलखा थाना” त दाय्ह्ती हेरोद्इ व्हत्आथास। 8ओहाङःसैको व्हत्आक्तीको “लौ बेथ्लेहेम्ताङ् आल्ती ओउः चोःकायः पेतो बोङःनु दा। ओहाङःसै ओउःकायः च्यवःआक्तीको ङाकायः तोती ल्हाक्ती छ्यानःनेःनाङ्स। ओउःकायः ङामा स्यवसा झाक्आनाङः बा” त दाय्ह्ती हेरोद्इ बेथ्लेहेम् गाव्ताङ् ल्होक्आथास। 9एत तोती ल्होक्आक्तीको ओउः व्हाय्ओ मान्तालम् आल्ती आल्तोक्हाङः ओउःमयःइ दाह्न्याम्हाङः च्यवःओ कार्लेः ङ्हासै स्यालःती ओउः चोः मुओ कीम्कोः आसाङ् न्यास्आ। 10ओहाङःसैको ओउः कार् च्यवःआक्तीको ओउः वाह्ओ मान्तालम् आन चोङाय्तोलेः स्याव्ती कीम्हाङः दाह्आकाय्। 11कीम्हाङः दाह्ती पोक्आक्तीको चोःकोः नीस् आमाचाः च्यवःती ओउः चोः येसुकायः बाःती स्यवआकानी। स्यवआक्तीको ओउःमयःइ भारीलम् फास्ती चोःकायः सुन्मा आन पेओ धुप्मा मुर् त तोओ सातीमा बयःआथै। 12बयःआक्तीको पाय्ह्ती आल्खेःतोक्हाङः माङःखाहाङः “लौ हेरोद्कःताङ् द्यान्ह्तेःचनै दा” त दाय्ह्ती परमेस्वर्इ गानाक्ती तोआथास ओउःत खेःओ थे ल्याम् आल्ती लयःकोः देस्ताङ् पाय्ह्आकाय्।
13ओहाङःसैको ओउःमयः आल्आक्तीको यात्चाक् परमेस्वर्कोः लाङ्कासै ल्होक्ओमयः युसेफ्कःताङ् माङःखाहाङः थाती वाङ्ती “लौ चीङ्ती नाङ्कोः नीस् आमाचाः लात्ती मीस्रा देस्ताङ् क्रव्अ दा। ओहाङः दाह्आक्तीको ङाइ तोधाङ्माःच्युक्कायः मुन। नाङ्कोः चोःकायः हेरोद् राजाइ सात्ती वाय्सा बोङःनौ बा” त दाय्ह्ती युसेफ्कायः तोआकान्। 14ओउःत तोआक्तीको युसेफ्इ च्योक्ती नीस् आमाचाः लात्ती न्याम् थोङ्धाङ्माःखाहाङः मीस्रा देस्ताङ् क्रव्आकाय्। 15मीस्रा देस्ताङ् क्रव्ती दाह्ती वाङ्आक्तीको ओहाङः हेरोद् राजाकोः सीधाङ्माःखाच्युक्कायः मुआकाय्। एत हायःती “लौ ङाकोः गोय्चोःचोःकायः मीस्रा देस्सै गोत्आलाङः” त दाय्ह्ती यात्चाक् परमेस्वर्कोः कुरा छ्यानःओ मान्ताइ लेखओ कुरापाय् द्याह् ताप्तो स्याव्आ।
16ओहाङःसैको “ओउः व्हाय्ओ मान्तालम् ङाकःताङ् वाङ्सा ग्यामाःत थे ल्याम् पाय्ह्आकाय्” त हेरोद् राजाइ चीःआकान्। चीःआक्तीको ओउःपाय् आन ल्हुङ् स्योङ्ती ओउः व्हाय्ओ मान्तालम्इ ङ्हा त्याङ्ती तोओ कार्कोः कुरा गीलती “लौ बेथ्लेहेम् गाव्गन सबै नीस् बर्स पुत्धाङ्मालो गोय्चोःलम्कायः सात्पाःथास” त दाय्ह्ती हुकुम् बयःआकान्। 17इत हायःतीलेः ओउः येरीमीया त तोओ परमेस्वर्कोः कुरा छ्यानःओ मान्ताइ लेखओ कुरापाय् ताप्तोलेः स्याव्आ। 18“लौ रामाह् त तोओ देस्हाङः आन क्रेस्ती र्याःआ सायःनानी ओउःपाय् राखेल् त तोओ लयःकोः चोःलम्कायः र्याःबत्नाःथास। ओउःमयः सबै सीती झ्यान्ते ओउःकोः लीह्ओ ल्हुङ् अरुइ स्याक्ताक्सा खाय्नीली” त दाय्ह्ती ङ्हासै चीःती लेखओआः बा।
19ओहाङःसैको लोने हेरोद् राजा सीआक्तीको यात्चाक् परमेस्वर्कोः ल्होक्ओमयः फेरीलेः मीस्रा देस्हाङः मुओ युसेफ्कःताङ् माङःखाहाङः थाती वाङ्ती 20“लौ चीङ्ती नाङ्कोः नीस् आमाचाःकायः लात्ती नाङ्कोः इस्राएल् देस्ताङ् पाय्ह्अ दा। नाङ्कोः चोःकायः सात्सा बोङःओमयः द्याह् सीओआः बा” त दाय्ह्ती युसेफ्कायः तोआकान्। 21एत तोआक्तीका युसेफ् च्योक्ती नीस् आमाचाःकायः लात्ती आलःती इस्राएल् देस्ताङ् पाय्ह्आकाय्। 22इस्राएल् देस्ताङ् पाय्ह्तोक्हाङः “लौ हेरोद् राजाकोः आर्खेलाउस् त तोओ गोय्चोःचोः द्याह् यहुदीयाकोः राजालेः स्याव्ओआः” त दाय्ह्ओ सायःती युसेफ् ओहाङः याक्सा ग्याल। 23ओहाङःसैको ओउःकायः फेरीलेः परमेस्वर्इ माङःखाहाङः गानाक्ती तोती झ्यान्ते युसेफ् गालील देस्ताङ् आल्ती नासरेत् त तोओ गाव्ताङ् याक्आकाय्। ओउःत हायःती येसुकायः “ओउःकायःपाय् ‘नासरेत्कोः’ त तोनानी” त दाय्ह्ती उय्ह्लेकोः परमेस्वर्कोः कुरा छ्यानःओमयःइ लेखओ द्याह् ताप्तोलेः स्याव्आ।
Поточний вибір:
मत्ती 2: CDM93
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 1993 Wycliffe Bible Translators Inc., All Rights Reserved.
