Joni 8
8
A yalewa sa dautagane, 3-11. Sa kaya ko Jisu ni sa rarama kei vuravura ko koya; a sa vakadinadinataka na nana vosa, 12-32. Sa veivosaki ko Jisu kei ira na Farisi, 33-59.
1A SA lako ko Jisu ki na ulu-ni-vanua ni veiolive.
2Ia e na mataka caca sa lako tale mai ko koya ki na vale ni soro, a ra sa lako mai vei koya ko ira kecega na tamata; a sa tiko sobu ko koya, ka vakavulici ira.
3Ia ko ira na vu-ni-vola kei ira na Farisi era sa kauta mai vei koya e dua na yalewa sa kunei ni sa dautagane; a ra sa vakatikori koya e na kedra maliwa, 4a ra sa kaya vua, Vakavuvuli, sa kunei na yalewa o qo ni sa dautagane, ni sa ia tiko: 5a sa vosa vei keda ko Mosese e na vunau, me ra viriki e na vatu ko ira sa vakaoqo: ia ka cava ko sa kaya? 6Era sa kaya na ka o qo me dauveretaki koya kina, me ra beitaki koya rawa. A sa cuva sobu ko Jisu, ka vola na soso e na nonai qaqalo. 7Ia ni ra sa tarogi koya tikoga, sa tu cake ko koya, ka kaya vei ira, O koya vei kemudou sa sega ni valavala ca, me viriki koya mada eliu e na vatu. 8Sa qai cuva sobu tale ko koya, ka vola na soso. 9Ia ni ra Sa rogoca, ka sa beitaki ira ko na lomadra, era sa lako yadua ki tuba, sa liu na qase ka muri kecega na tamata: ka tiko duaduaga ko Jisu, a sa tu na yalewa e matana. 10Ia ni sa tu cake ko Jisu, ka sega ni raica e dua, na yalewa duaduaga, sa kaya vua, Yalewa, sa evei ko ira o qori ka beitaki iko? sa sega e dua sa lewai iko mo cudruvi, ne? 11A sa kaya ko koya, Sa sega e dua, Turaga. A sa kaya vua ko Jisu, Au sa sega talega ni lewai iko mo cudruvi: lako, ka kakua ni valavala ca tale.
12Sa qai vosa tale vei ira ko Jisu, ka kaya, Oi au na rarama kei vuravura: o koya sa muri au ena sega ni lako e na butobuto, ena tu ga na rarama ni bula vei koya.
13O ira na Farisi era sa qai kaya vua, O sa tukuni iko; sa sega ni dina na nomui tukutuku.
14Sa vosa ko Jisu, ka kaya vei ira, Kevaka kaʼu sa tukuni au, sa dina na noqui tukutuku: niʼu sa kila na vanua kaʼu sa lako maikina, ka lako yani kina; ia dou sa sega ni kila seʼu lako maivei, seʼu lako kivei. 15Dou sa lewa me vaka na ka sa rairai mai; au sa sega ni lewa e dua na tamata. 16Ia kevaka kaʼu sa lewa, sa dina na noqu lewa, niʼu sa sega ni tiko duaduaga, ia koi au kei Tamaqu, o koya sa talai au mai. 17Sa volai talega e na nomudou vunau, ni sa dina nai tukutuku ni tamata e lewe rua. 18E dua koi au kaʼu sa tukuni au, a sa tukuni au ko Tamaqu, o koya sa talai au mai.
19Era sa qai kaya vua, Evei ko tamamu? Sa kaya ko Jisu, Dou sa sega ni kilai au sei Tamaqu; kevaka dou sa kilai au, dou sa kilai Tamaqu talega.
20Sa cavuta na vosa o qo ko Jisu e na vale ni yau, ni sa vakatavuvuli e na vale ni soro: a sa sega e dua sa tauri koya; ni sa sega ni yaco mai na nona gauna.
21Sa qai kaya tale vei ira ko Jisu, Au sa lako yani, ka dou na vakasaqarai au, ia dou na mate e na nomudoui valavala ca: ia na yasana kaʼu sa lako kina, dou sa sega ni lako rawa kina.
22Era sa qai kaya na kai Jutia, Ena vakamatei koya beka ko koya? ni sa kaya, Na yasana kaʼu sa lako kina, dou sa sega ni lako rawa kina. 23A sa kaya vei ira ko koya, Dou sa lako maira; au sa lako maicake: dou sa vakavuravura; au sa sega ni vakavuravura. 24O koya o qo kaʼu a kaya kina vei kemudou, Dou na mate e na nomudoui valavala ca; kevaka dou sa sega ni vakadinata ni sai au, dou na mate e na nomudoui valavala ca.
25Era sa qai kaya vua, O cei ko iko? A sa kaya vei ira ko Jisu, Sai koya ga kaʼu a tukuna vei kemudou mai nai vakatekivu. 26Sa vuqa na ka meʼu vosataka ka lewai kemudou kina; ia sa dina ko koya sa talai au mai; ia kaʼu sa tukuna vei ira na kai vuravura na veika kaʼu a rogoca maivei koya. 27Era sega ni kila ni sa vosataka na Tamana vei ira ko koya.
28Sa qai kaya vei ira ko Jisu, Ni dou sa laveta cake oti na Luve ni tamata, dou na qai kila ni sai au, niʼu sa sega talega ni kitaka e dua na ka vakai au ga; ia me vaka na ka sa vakatavulici au kina ko Tamaqu, na ka o qori au sa vosataka. 29Ia sa tiko vata kei au ko koya sa talai au mai: sa sega ni biuti au ko Tamaqu meʼu tiko duaduaga: niʼu sa kitaka tikoga na ka sa vinakata ko koya.
30Ni sa cavuta tiko na vosa o qo ko koya, era sa lewe vuqa era sa vakabauti koya. 31Sa qai kaya ko Jisu vei ira na kai Jutia era sa vakabauti koya, Kevaka dou sa muria tikoga na noqu vosa, dou sa qai noqu tisaipeli dina; 32ia dou na kila na ka dina, ia na ka dina ena sereki kemudou.
33Era sa kaya vua, Oi keimami na kawa i Eparaama, ka sega e dua keimami a bobula kina e na dua na gauna; o sa kaya vakacava, Dou na sereki?
34Sa kaya vei ira ko Jisu, E dina, e dina, au sa kaya vei kemudou, O koya yadua sa valavala ca sa bobula ki nai valavala ca. 35A sa sega ni tiko vakadua e vale na bobula; na luvena sa tiko vakadua. 36Ia dou na sere dina kina, kevaka ena sereki kemudou na Luvena. 37Au sa kila ni dou sa kawa i Eparaama; ia dou sa via vakamatei au, e na vuku ni sa sega ni tiko e na lomamudou na noqu vosa. 38Au sa vosataka na ka kaʼu a raica vei Tamaqu: ia dou sa kitaka na ka dou a raica vei koya na tamamudou.
39Era sa vosa, ka kaya vua, A tama i keimami ko Eparaama.
Sa kaya vei ira ko Jisu, Kevaka dou sa luve i Eparaama, dou na kitaka nai valavala i Eparaama. 40Ia dou sa qai via vakamatei au, a tamata sa tukuna vei kemudou na ka dina, a ya kaʼu a rogoca ga mai vua na Kalou; sa sega ni kitaka na ka vakaoqo ko Eparaama. 41Dou sa kitaka na nona cakacaka na tamamudou.
Era sa qai kaya vua, Keimami sa sega ni sucu e na dauyalewa; e dua bau na tama i keimami, a Kalou.
42Sa qai kaya vei ira ko Jisu, Kevaka sa Tamamudou na Kalou, dou na lomani au: niʼu sa tubu mai vua na Kalou, ka lako mai kina; au sa sega ni lako walega mai vakai au, ia sai koya sa talai au mai. 43A cava dou sa sega kina ni kila na noqu vosa? e na vuku ni dou sa sega ni vakabauta rawa na noqu vosa. 44A tamamudou na tevoro, ia dou sa via kitaka na gadreva ni tamamudou. O koya na dauveivakamatei mai nai vakatekivu, a sa sega ni vakabauta na ka dina, e na vuku ni sa sega ni tu na ka dina vei koya. Ni sa vosa lasu ko koya, sa vosataka na ka sa tu vua; ni sa daulasulasu ko koya, ka sa vu ni ka o qo. 45Ia koi au, e na vuku niʼu sa tukuna vei kemudou na ka dina, dou sa sega ni vakadinati au. 46O cei li vei kemudou sa vakadinadinataka niʼu sa valavala ca? Ia kevaka kaʼu sa vosa dina, dou sa sega ni vakadinati au e na vuku ni cava? 47O koya sa nona na Kalou sa rogoca na vosa ni Kalou: o qo dou sa sega kina ni rogoca, e na vuku ni dou sa sega ni nona na Kalou.
48Era sa qai vosa na kai Jutia, ka kaya vua, Sa sega li ni keimami kaya dina, ni ko sa kai Samaria, ka sa curumi iko e dua na tevoro? 49Sa kaya ko Jisu, Sa sega ni curumi au e dua na tevoro, ia kaʼu sa vakarokorokotaka na Tamaqu, ia dou sa vakalialiai au ga: 50ia kaʼu sa sega ni vakasaqara meʼu vakarokorokotaki: sa dua sa vakasaqara ka lewa. 51E dina, e dina, au sa kaya vei kemudou, Kevaka e dua sa vakabauta tikoga na noqu vosa, ena sega sara ni raica na mate.
52Era sa qai kaya na kai Jutia vei koya, Keimami sa qai kila ni sa curumi iko e dua na tevoro. Sa mate ko Eparaama kei ira talega na parofita; ia ko sa kaya, Kevaka e dua sa vakabauta tikoga na noqu vosa, ena sega sara ni tovolea na mate. 53O sa levu cake beka, ka lailai sobu ko Eparaama na tamada, o koya sa mate? a ra sa mate talega ko ira na parofita: o sa qisi iko mei cei?
54Sa kaya ko Jisu, Kevaka kaʼu sa vakarokorokotaki au, na ka wale na noqu veivakarokorokotaki: sai koya na Tamaqu sa vakarokorokotaki au; o koya dou sa vosataka, ni sa nomudou Kalou: 55ia dou sa sega ni kilai koya, ia kaʼu sa kilai koya koi au; ia kevaka kaʼu sa kaya, Au sa sega ni kilai koya, au na lasulasu ga me vakai kemudou: ia kaʼu sa kilai koya ga, ka vakabauta tikoga na nona vosa. 56Sa gadreva vakalevu sara ko Eparaama na tamamudou me raica na noqu gauna: a sa raica, ka reki.
57Era sa qai kaya na kai Jutia vei koya, Sa sega ni limasagavulu na nomu yabaki, ia ko a raici Eparaama, ne?
58Sa kaya vei ira ko Jisu, E dina, e dina, au sa kaya vei kemudou, Ni sa sega ni sucu mai ko Eparaama, au sa bula.
59Era sa qai tomika e so na vatu, me viriki koya: a sa vuni koya ko Jisu, ka sa curu yani mai na vale ni soro, ka lako e na kedra maliwa, ka lako tani yani kina.
Поточний вибір:
Joni 8: FIJ1864
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
First full Bible in the Fijian language © British and Foreign Bible Society, 1864.
